Po o E “Aa i Tui”?

I VAITAIMI o le Tusi Paia na faaaogā ai se tui—o se laau umī lea e masani ona faia aʻe lona tumutumu i se uʻamea maai—e faatonutonu ai le mea e ō ai manu o loo tosoina ni uta mamafa. O le ā e oo i ai pe afai e fiu lava e tui le manu ae e lē o agaʻi atu i le mea e tatau ona alu i ai? E tigā lona tino na i lo le mapu ai.

Na fetalai Iesu Keriso i tui ina ua toe faatūina o ia, i le taimi na faailoa atu ai o ia iā Saulo lea o loo alu atu e faafalepuipuiina nisi o soo o Iesu. Na faalogo atu Saulo o fetalai mai Iesu iā te ia i se malamalama pupula: “Saulo, Saulo e, se ā le mea ua e sauā mai ai iā te aʻu? O le mea faigatā iā te oe ona e aa i tui.” Ona o lona faasauāina o Kerisiano, na faasagatau ai Saulo i le Atua ma faaauau ona ia faia le mea e afāina ai o ia.—Galuega 26:14.

Po o tatou “aa i tui” ma lo tatou lē iloa? Ua faatusaina e le Tusi Paia “upu a ē popoto” i tui ia e uunaʻia i tatou e agaʻi ai i le ala saʻo. (Failauga 12:11) O fautuaga mai le Atua lea o i lana Afioga, e mafai ona faagaeetia ma taʻitaʻia saʻo ai i tatou—pe a tatou loto i ai. (2 Timoteo 3:16) O le teena o fautuaga o i le Tusi Paia, e tatou te afāina ai.

Na utagiaina e Saulo fetalaiga a Iesu ma suia ona ala, ma mulimuli ane avea o ia ma aposetolo peleina o Paulo. O lo tatou utagiaina o fautuaga a le Atua, o le a faapena ai foʻi ona tatou manuia ai e oo i le faavauvau.—Faataoto 3:1-6.

[Faamatalaga i Ata i le itulau 32]

L. Chapons/Illustrirte Familien-Bibel nach der deutschen Uebersetzung Dr. Martin Luthers