Sauāina Ona o le Amiotonu

“Amuia ē sauāina ona o le amiotonu.”—MATAIO 5:10.

1. Aiseā na tulaʻi ai Iesu i luma o Ponotio Pilato, ma o le ā na tulei ai o ia?

“O LE mea lenei na fanau mai ai aʻu, o le mea foʻi lenei na ou sau ai i le lalolagi, ina ia ou molimau i le upu moni.” (Ioane 18:37) O upu na sa tulei ai Iesu a o tulaʻi i luma o le Kovana Roma i Iutaia, o Ponotio Pilato. E lē faapea na iai Iesu i inā ona o sona finagalo po o se valaaulia a Pilato. Na i lo lenā, na iai o ia i inā ona o tuuaʻiga sesē a taʻitaʻi lotu Iutaia e faapea, o ia o se tagata fai mea sesē ua tatau i ai le oti.—Ioane 18:29-31.

2. O le ā na faia e Iesu ma o le ā na iʻu i ai?

² Na silafia lelei e Iesu, na iā Pilato le pule e tatala ai o ia pe fasiotia foʻi o ia. (Ioane 19:10) Ae e leʻi taofia ai o ia mai le fetalai atu ma le loto tele iā Pilato e uiga i le Malo. E ui ina sa lamatia le soifua o Iesu, ae na ia faaaogāina le avanoa e molimau atu ai i le pule aupito i maualuga o le malo i lenā vaipanoa. E ui i lenā molimau, ae na taʻusalaina ma fasiotia Iesu ma maliu tigāina ai o se maturo i luga o le satauro.—Mataio 27:24-26; Mareko 15:15; Luka 23:24, 25; Ioane 19:13-16.

Molimau po o le Maturo?

3. O le ā le uiga o le upu “maturo” i taimi o le Tusi Paia, ae o le ā lona uiga i aso nei?

³ I le tele o isi atunuu i aso nei, o le maturo o se tagata e maelega valea. O tagata e lotomalilie e feoti ona o o latou talitonuga aemaise o talitonuga faalotu, e masani ona masalosalo i ai o ni tagata faatupu faalavelave po o ē e fai ma lamatiaga i tagata. Peitaʻi, o le upu maturo e maua mai i le upu Eleni (marʹtys), lea na faauigaina i taimi o le Tusi Paia o le “molimau,” o se tasi e avatu se molimau pe atonu i se faamasinoga i le mea moni e talitonu i ai. Na faatoʻā suia mulimuli ane le uiga o le upu maturo “i sē na te tuuina atu lona ola i le maliu ona o lana molimau atu,” pe ua avea lona maliu o se mea e molimau atu ai i isi.

4. O le ā le uiga moni na avea ai Iesu ma maturo?

⁴ Na avea Iesu o se maturo ona na naunau e molimau atu e uiga i ona talitonuga. E pei ona ia tulei atu iā Pilato, na sau o ia e “molimau i le upu moni.” E matuā eseese auala na tali atu ai tagata i lana molimau atu. O nisi o tagata lautele na matuā faagaeetia i mea na latou faalogologo ma vāai i ai, ma faapea ona latou faatuatua ai iā Iesu. (Ioane 2:23; 8:30)  Peitaʻi, na matuā lē fiafia le toʻatele o tagata aemaise le ʻautaʻitaʻi lotu. Na fetalai atu Iesu i ona tauaiga lē talitonu: “E lē mafai le lalolagi ona ʻinoʻino iā te outou; a e ʻinoʻino mai iā te aʻu, auā ou te molimau i ai ua leaga ana amio.” (Ioane 7:7) Ona o lona molimau i le upu moni, na lotoa ai taʻitaʻi o le nuu iā Iesu lea na oo ai i lona maliu. O le mea moni, o Iesu o “le molimau (marʹtys) moni ma le faamaoni.”—Faaaliga 3:14.

“E Inosia Foʻi Outou”

5. I le amatamataga o lana faiva, o le ā na fetalai i ai Iesu e uiga i sauāga?

⁵ E lē gata na ogaoga sauāga na oo iā Iesu, ae na ia muaʻi lapataʻia foʻi ona soo e faapea o le tulaga foʻi lenā o le a oo iā i latou. I le amatamataga o lana faiva, na fetalai ai Iesu i ē na faalogologo i lana lauga i le Mauga: “Amuia ē sauāina ona o le amiotonu; auā e o latou le malo o le lagi. Amuia outou pe a latou upu leaga, ma faasauā iā te outou, ma latou tuuaʻiina pepelo outou i mea leaga uma ona o aʻu. Ia outou olioli ma fiafia lava; auā o i le lagi lo outou taui e tele.”—Mataio 5:10-12.

6. O le ā le lapataʻiga a Iesu ina ua aauina atu ona aposetolo e toʻa 12?

⁶ Mulimuli ane ina ua aauina atu aposetolo e toʻa 12, na faapea atu Iesu iā i latou: “Ia outou ma tagata; auā latou te tuuina atu outou i fono, ma latou sasa iā te outou i o latou sunako. E taʻitaʻiina atu foʻi outou i luma o alii ma tupu ona o aʻu, e fai ma molimau iā te i latou atoa ma nuu ese.” Ae e lē na o taʻitaʻi lotu o le a sauāina le ʻausoo. Na fetalai atu foʻi Iesu: “E tuuina atu le uso e le uso ia oti, e tuuina atu foʻi le fanau e le tamā; e tutū atu foʻi le fanau i o latou mātua ina ia fasiotia i latou. E inosia foʻi outou e tagata uma ona o loʻu igoa; a o lē tumau seʻia oo atu i le gataaga, e faaolaina o ia.” (Mataio 10:17, 18, 21, 22) O le talaaga e uiga i le sauāina o Kerisiano o le uluaʻi senituri o se faamaoniga lenā o le moni o upu na.

 O se Talaaga o le Tumau Faamaoni

7. O le ā na tupu lea na māfua ai ona avea Setefano ma maturo?

⁷ Ina ua faatoʻā mavae le maliu o Iesu, o Setefano le Kerisiano muamua lava na maliu ona o le molimau atu i le upu moni. “Ua tumu o ia i le alofa tunoa ma le mana, [ma] na faia vavega ma faailoga tetele i luma o le nuu.” “Ua lē mafaia foʻi” e taʻitaʻi lotu ia na avea ma fili o Setefano, “ona tetee atu i le poto ma le Agaga ua na tautala ai.” (Galuega 6:8, 10) Ona o le matuā lotoa tele, na latou puʻeina ai Setefano ma taʻitaʻia i luma o le faamasinoga maualuga i Iutaia o le ʻau Saniterini, lea na fesagaʻi ai Setefano ma ē na tuuaʻia sesē o ia ma faapea ona ia avatuina ai se molimau mataʻina. Peitaʻi, na fasiotia Setefano le molimau faamaoni, e ona fili.—Galuega 7:59, 60.

8. O ā mea na faia e soo i Ierusalema ina ua sauāina i latou ina ua māeʻa le maliu o Setefano?

⁸ Ina ua māeʻa le fasiotiga o Setefano, na “tupu ai le sauā tele i le ekalesia i Ierusalema; na faasalalauina foʻi i latou uma i nuu o Iutaia ma Samaria, ua toe na o le ʻau aposetolo.” (Galuega 8:1) Pe na muta ai le molimau atu o le ʻau Kerisiano ona o sauāga? E leai, auā o loo faamatalaina e le tala e faapea “ua ō solo foʻi ē na faasalalauina, ma latou folafola atu le tala lelei o le upu.” (Galuega 8:4) E lē taumatea na pei o latou faalogona o le aposetolo o Peteru, o lē na faapea atu i se taimi muamua: “E tusa ona sili o lo matou anaana i le Atua i lo matou anaana i tagata.” (Galuega 5:29) E ui ina sauāina na soo faamaoni ma le loto tetele, ae na tumau pea ona latou molimau atu i le upu moni, e ui na latou iloa o le a atili ai ona sauāina i latou.—Galuega 11:19-21.

9. O ā sauāga na faaauau pea ona oo i soo o Iesu?

⁹ O le mea moni, na atili ai ona faigatā le tulaga o mea. Muamua, tatou te aʻoaʻoina e faapea o Saulo—o le tagata lea na loto atu foʻi i le tauʻaiga o Setefano—“ua mapugatamai pea . . . i le faamataʻu ma le fasioti i le ʻau soo o le Alii, ua alu atu ia i le ositaulaga sili, ua faatoga atu iā te ia i tusi e ave i sunako i Tamaseko, pe afai na te maua ai nisi o le Ala, o tane atoa ma fafine, ia fusifusi ma taʻitaʻi mai i latou e ia i Ierusalema.” (Galuega 9:1, 2) E lē gata i lea, e pe tusa ma le 44 T.A., “na pupuʻe ai e le tupu o Herota nisi o le ekalesia ina ia faasauā i ai. Ua na fasioti foʻi ia Iakopo le uso o Ioane i le pelu.”—Galuega 12:1, 2.

10. O ā faamaumauga e uiga i sauāga tatou te mauaina i le tusi o Galuega ma le Faaaliga?

¹⁰ O loo iai i isi mataupu o le tusi o Galuega se faamaumauga tumau e uiga i faamasinoga, le faafalepuipuiina ma sauāga na onosaia e Kerisiano faamaoni e pei o Paulo, lea na sauāina muamua Kerisiano peitaʻi na avea mulimuli ane ma se aposetolo, ma atonu na maliu o se maturo ona o le faatonuga a Nero le emeperoa o Roma pe tusa ma le 65 T.A. (2 Korinito 11:23-27; 2 Timoteo 4:6-8) O le manatu faaiʻu, i le tusi o Faaaliga lea na tusiaina i le taufaasiʻusiʻuga o le uluaʻi senituri, tatou te maua ai le tala e uiga i le aposetolo o Ioane lea ua loa lona soifua, o loo faafalepuipuiina i le motu o faasalaga i Patamo “ona o le afioga a le Atua ma le [molimau] iā Iesu.” O loo taʻua foʻi e le tusi o Faaaliga ia “Anetipa o laʻu molimau o lē na faamaoni, sa fasiotia o ia” i Perekamo.—Faaaliga 1:9; 2:13.

11. E faapefea i olaga o uluaʻi Kerisiano ona faamaonia ai le moni o fetalaiga a Iesu e uiga i sauāga?

¹¹ O mea uma nei ua faamaonia ai le moni o fetalaiga a Iesu i ona soo: “Afai ua latou faasauā mai iā te aʻu, e faasauā foʻi iā te outou.” (Ioane 15:20) Na lotomalilie uluaʻi Kerisiano faamaoni e fesagaʻia le tofotofoga silisili, o le oti—e ala i le faataugāina pe lafo i manu feʻai  po o se isi foʻi auala—ina ia faatinoina ai le tofiga mai le Alii o Iesu Keriso: “E fai foʻi outou ma molimau iā te aʻu i Ierusalema, ma Iutaia uma lava, ma Samaria, e oo lava i le tuluʻiga o le lalolagi.”—Galuega 1:8.

12. Aiseā ua lē na o Kerisiano ai i aso ua mavae e oo i ai sauāga?

¹² E matuā faasesēina se tagata pe afai e manatu e faapea na gata i aso ua mavae le matuā sauāina o soo o Iesu. O Paulo, o lē na tatou faitau i ai e faapea na onosaia le anoanoaʻi o tulaga faigatā, na tusi mai o ia: “O i latou uma foʻi o ē loto ina nonofo ma le amio Atua iā Keriso Iesu, e sauāina i latou.” (2 Timoteo 3:12) Na faapea mai Peteru e tusa ai ma sauāga: “Auā na valaauina outou ona o lea lava mea; auā na tigāina Keriso lava mo outou, ua tuuina mai ai e ia le faaaʻoaʻo mo outou, ina ia outou mulimuli atu i ona tulagāaao.” (1 Peteru 2:21) O loo faaauau pea i nei “aso e gata ai” o lenei faiga o mea, ona inosia tagata o Ieova. (2 Timoteo 3:1) I tuluʻiga uma o le lalolagi i lalo o pulega tautalatasi ma i atunuu faatemokalasi, mai lea taimi i lea taimi ua mafatia ai Molimau a Ieova ona o sauāga, e lē gata o Molimau a Ieova taʻitoʻatasi ae o i latou uma foʻi o nonofo i se atunuu.

Aiseā e Inosia ma Sauāina Ai?

13. O le ā e ao ona manatuaina pea e auauna a Ieova i aso nei e tusa ai ma sauāga?

¹³ E ui lava e tele ina mauaina e le toʻatele o i tatou le saʻolotoga e talaʻi ma auaufaatasi ai ma le saogalemu i sauniga, ae e ao ona tatou utagiaina le apoapoaʻiga a le Tusi Paia e faapea “o le a [suia] le tū o le lalolagi nei.” (1 Korinito 7:31) Talu ai e mafai ona suia faafuaseʻi le tulaga o mea, e faigofie la ona tatou paʻūʻū atu seʻi vaganā ai ua saunia o tatou mafaufau, faalogona ma lo tatou itu faaleagaga. O le ā se mea e mafai ona tatou faia ina ia puipuia ai i tatou? O se auala lelei tele e puipuia ai i tatou o le manatuaina pea o le māfuaaga ua inosia ma sauāina ai Kerisiano, o ē e fiafia e tausia le filemu ma usitaia tulafono.

14. O le ā le māfuaaga na taʻua e Peteru na ala ai ona sauāina Kerisiano?

¹⁴ Na taʻua e Peteru se manatu e uiga i lenā mataupu i lana uluaʻi tusi lea na tusia pe tusa ma le 62-64 T.A., a o tofotofoina ma sauāina Kerisiano na soifua i lalo o le emepaea a Roma. Na faapea mai o ia: “Le au pele e, aua tou te ofo i le tofotofoga pei o le afi, ua oo iā te outou e fai ma tofotofoga iā te outou, peiseaʻī o se mea fou ua oo iā te outou.” Ina ia faamalamalamaina le uiga o lana tala, na toe faapea mai Peteru: “Aua foʻi neʻi ala ona faatigāina so outou ina ua fasioti tagata, pe gaoi, pe amio leaga, po ina ua asiasi fua i mea a isi tagata; a e afai e faatigāina se tasi auā o ia o le Kerisiano, aua le māsiasi ai o ia, a ia vivii atu i le Atua ona o lea lava mea.” Na taʻua e Peteru e faapea na ala ona latou mafatia ona o i latou o Kerisiano ae e lē faapea o ni mea sesē na latou faia. Anafai na latou faia “lea lava ulavale silisili” e pei ona sa faia e tagata na latou soifua faatasi, semanū o le a fiafia ma taliaina i latou e tagata na. Ae o le mea moni, na mafatia i latou ona o le filigā e faataunuu lo latou tofiga o ē e mulimuli iā Keriso. O le tulaga foʻi lenā o Kerisiano moni i aso nei.—1 Peteru 4:4, 12, 15, 16.

15. Pe faapefea ona feteenaʻi le auala o loo feagai ai tagata ma Molimau a Ieova i aso nei?

¹⁵ I le tele o atunuu o le lalolagi, ua viiviia ai Molimau a Ieova ona o lo latou autasi ma le galulue soosootauʻau a o faia a latou tauaofiaga ma faugāfale. E lē gata i lea, ua viiviia i latou ona o lo latou faamaoni ma le filigā, ma le lelei o a latou amio ma olaga faaleaiga, atoa ma le lelei o o latou foliga vaaia ma uiga faaalia. * I le isi itu, o loo faasāina pe taofiofia la latou galuega i le sili atu ma le 28 atunuu i le taimi na tusiaina ai lenei mataupu, ma o le toʻatele o Molimau a Ieova e oo i ai sauāga faaletino ma faatamaʻia a latou meatotino ona o lo latou faatuatua. Aiseā ua faasāsā  ma sauāina ai Molimau a Ieova a o i latou o ni tagata amio lelei? Aiseā ua faatagaina ai e le Atua lenā tulaga?

16. O le ā le māfuaaga autū ua faataga ai e le Atua ona tagata ina ia mafatia i sauāga?

¹⁶ O le māfuaaga autū, e ao ona tatou manatuaina upu o loo i le Faataoto 27:11: “Loʻu atalii e, ia poto oe, ma e faafiafia loʻu loto; ona ou mau tali ai lea i lē faifai mai.” Ioe, ona o loo aofia ai le finauga na lāgā i aso anamua e faatatau i le pule silisili ese i le aoao o mea. E ui lava i le fau ma soloi o faamaoniga ua faia e i latou ua faamaonia lo latou faamaoni iā Ieova i le talafaasolopito o tagata, ae e lē taofia ai Satani mai le fāifāi atu iā Ieova e pei ona sa ia faia foʻi i ona pō o le tagata faamaoni o Iopu. (Iopu 1:9-11; 2:4, 5) E mautinoa lava ua atili ai ona fitivale Satani i ana taumafaiga faaiʻu ina ia faamaonia lana finauga, aemaise ua uma ona faavaeina le Malo o le Atua, ma o loo iai ona tagatānuu ma ona sui i le lalolagi aoao. Faamata o le a tumau ma le faamaoni i latou na i le Atua po o ā lava toʻatugā ma faigatā latou te fesagaʻia? E tatau ona tali lava e auauna taʻitoʻatasi a Ieova lenā fesili.—Faaaliga 12:12, 17.

17. O le ā le uiga o le fetalaiga a Iesu “o aso ia e avea ai outou ma molimau”?

¹⁷ A o fetalai atu Iesu i ona soo e uiga i mea o le a tutupu i “le gataaga o le lalolagi,” na faailoa atu foʻi e Iesu se isi māfuaaga ua faataga ai e Ieova le sauāina o ana auauna. Na faapea atu o ia: “Latou te taʻitaʻiina atu outou i tupu ma kovana ona o loʻu igoa. O aso ia e avea ai outou ma molimau.” (Mataio 24:3, 9; Luka 21:12, 13) Na molimau atu Iesu i luma o Herota ma Ponotio Pilato. E oo foʻi i le aposetolo o Paulo na “taʻitaʻiina atu [o ia] i tupu ma kovana.” E ala i le taʻitaʻiga a le Alii o Iesu Keriso, na saʻili ai Paulo e tuuina atu se molimau i le pule aupito i malosi i ona aso a o ia taʻutino atu e faapea: “Ou te valaau iā Kaisara.” (Galuega 23:11; 25:8-12) E faapena foʻi i aso nei, e masani ona avea tulaga faigatā ma avanoa ua tuuina atu ai se molimau lelei i tagata maualuluga o le malo ma tagata lautele. *

18, 19. (a) O ā aogā tatou te mauaina pe a onosaia tofotofoga? (e) O ā fesili o le a talanoaina i le mataupu o loo sosoo mai.

¹⁸ O le manatu faaiʻu, e tatou te mauaina aogā pe a tatou onosaia tofotofoga ma puapuaga. O ā aogā? Na toe faamanatu atu e le soo o Iakopo i ona uso a Kerisiano: “Oʻu uso e, ia outou manatu, o le mea e fiafia tele ai pe a maua outou i tofotofoga eseese; ina ua outou iloa o le tofotofoina o lo outou faatuatua e tupu ai le onosai.” Ioe, e mafai ona faaleleia lo tatou faatuatua ma faatupuina le onosai pe a sauāina i tatou. O lea la, e tatou te lē soona fāʻatu pe tatou te saʻilia foʻi ni auala lē faale-Tusi Paia e ʻalo ese ai pe faamutaina ai foʻi sauāga. Na i lo lea, tatou te utagiaina le apoapoaʻiga a Iakopo: “Ia atoatoa foʻi le galuega a le onosai, ina ia atoatoa ai ma ia sao ona lelei ai outou, ia leai se mea e tasi e mativa ai.”—Iakopo 1:2-4.

¹⁹ E ui lava o loo fesoasoani le Tusi Paia iā i tatou ina ia malamalama i le māfuaaga ua sauāina ai auauna faamaoni a le Atua, ma le māfuaaga foʻi ua faataga ai e Ieova, ae e lē faapea ai la e faigofie ona lavātia sauāga. O le ā e mafai ona faamalosia ai i tatou e tutumau pea i lalo o sauāga? O le ā e mafai ona tatou faia pe a tatou fesagaʻi ma sauāga? O le a tatou talanoaina manatu tāua nei i le mataupu o loo sosoo mai.

[Faamatalaga pito i lalo]

Pe Mafai Ona E Faamatalaina?

• O le ā le uiga moni na avea ai Iesu ma maturo?

• O ā mea na faia e Kerisiano o le uluaʻi senituri ina ua sauāina?

• E pei ona faamatalaina e Peteru, aiseā na sauāina ai uluaʻi Kerisiano?

• O ā māfuaaga ua faataga ai e Ieova le sauāina o ana auauna?

[Fesili mo le Suʻesuʻega]

[Ata i le itulau 10, 11]

Na ala ona mafatia Kerisiano o le uluaʻi senituri ona o i latou o Kerisiano ae e lē faapea o ni mea sesē na latou faia

PAULO

IAKOPO

IOANE

ANETIPA

SETEFANO