“Aua Tou te Amo Faalēgatasi”

E PEI ona e tagaʻi i le ata, e matuā lē tutusa lava le kamela ma le povi poʻa lea e tosoina le suōtosina. O le amo lea e soofaatasi ai nei manu, sa fuafua mo ni manu se lua e tutusa le lapopoʻa ma le malolosi, ae ua matuā mafatia lava nei manu uma. Ona o le manatu mamafa mo le lelei o nei manu e lē tutusa ae ua faafaigaluega faatasi, na taʻu atu ai e le Atua i le fanauga a Isaraelu e faapea: “Aua e te suatia le fanua i se povi ma se asini e faatasi.” (Teuteronome 22:10) E faatatau foʻi le mataupu silisili lava lea i se povi poʻa ma se kamela.

E lē masani ona tuuina atu e se fai faatoʻaga sea tulaga faigatā i ana manu. Ae afai e leai ni ana povi poʻa se lua, e mafai ona ia tuu faatasi ni manu se lua o iā te ia. I le ata, e foliga mai, o le mea lenā na faia e se fai faatoʻaga o lona 19 o senituri. Ona o le lē tutusa o le lapopoʻa ma le malolosi (mamafa), o le a tauivi ai lava le manu vaivai ina ia ō faatasi ma le manu malosi, ma o le a sili atu foʻi ona mafatia le manu malosi.

Ua faaaogā e le aposetolo o Paulo se faataʻitaʻiga o le amo faalēgatasi e aʻoaʻo mai ai iā i tatou se lesona tāua. “Aua tou te amo faalēgatasi ma e lē talitonu; auā pe faapefea ona faatasi o le amiotonu ma le amio leaga? Pe faapefea foʻi ona mafuta o le malamalama ma le pouliuli?” (2 Korinito 6:14, LT) E mafai faapefea ona amo faalēgatasi se Kerisiano?

O le tasi o auala, pe afai e filifilia e se Kerisiano se paaga faaipoipo e lē tutusa o la talitonuga. E faamaonia le matuā faigatā o sea aufaatasiga mo i laʻua e toʻalua, auā e lē ioe uma i laʻua i mataupu tāua.

Ina ua faavaeina e Ieova le faaipoipoga, na ia tuuina atu i le avā se matafaioi e avea o se “fesoasoani.” (Kenese 2:18) E ala i le perofeta o Malaki, ua faapena foʻi ona taʻua e le Atua le avā e faapea “o ia sa lua mafuta,” po o lau “paaga.” (Malaki 2:14) E finagalo Lē na Faia i tatou ina ia galulue faatasi ulugalii faaipoipo i le taʻitaʻiga faaleagaga e tasi, ia amo faatasi a la avega ma selesele faatasi mai ai aogā.

O le faaipoipo “tau lava i lē ua i le Alii,” ua faaalia ai e se Kerisiano lona faaaloalo i faatonuga a le Atua. (1 Korinito 7:39) O lenei faiga ua faataatia ai se faavae mo se faaipoipoga autasi, lea e viia ma faamamaluina ai le Atua a o auauna faatasi atu paaga uma iā te ia o ni “fesoasoani faamaoni” i se uiga faapitoa.—Filipi 4:3.

[Faamatalaga i Ata i le itulau 32]

Kamela ma le povi poʻa: Mai le tusi La Tierra Santa, Tusi 1, 1830