E Mafai Faapefea Ona E Faia ni Filifiliga Atamai?

NA FAAPEA mai Solomona, le tupu o Isaraelu anamua: “E faalogo mai le tagata poto, e tupu ai pea lona poto.” O le toʻatele lava o i tatou e faia ni filifiliga sesē i nisi taimi, talu ai lo tatou lē fia faalogo i fautuaga a isi.—Faataoto 1:5.

O na upu a Solomona, na tusia mulimuli ane i le Tusi Paia, faatasi ma isi o ana “faataoto e tolu afe” na ia fatuina. (1 Tupu 4:32) Pe e mafai ona tatou maua ni aogā mai le iloa ma utagia ana upu atamai? Ioe. Ua fesoasoani na upu iā i tatou “ina ia iloa ai le poto ma ia aʻoaʻoina; ia lagona ai upu e atamai ai; ia maua ai le aʻoaʻoina i le poto, ma le amiotonu, ma le faamasinoga, ma le amio saʻo.” (Faataoto 1:2, 3) Seʻi o tatou iloiloina ni taʻiala autū se lima mai le Tusi Paia e mafai ona fesoasoani iā i tatou i le faia o ni filifiliga atamai.

Manatunatu i Iʻuga Tumau

O nisi filifiliga o le a iai ni iʻuga mataʻina i le olaga. O le mea lea, ia taumafai e muaʻi iloa po o ā na filifiliga. Aua neʻi faatauasoina oe i le matagofie o mea e vave mavae, ma maileia ai i iʻuga lē lelei i lou olaga atoa. Ua lapataʻi mai le Faataoto 22:3: “O lē ua faautauta, na te iloa atu le leaga, ma lafi ai; a o ē ua faigofie, e ō atu pea i latou, ona faasalaina ai lea.”

Atonu e aogā pe a faia se lisi po o ā iʻuga o le a vave mavae ma iʻuga e tumau. O le filifilia o se galuega e lelei le totogi ma fiafia ai, e ono puupuu se taimi e aogā ai. Ae po le a aofia ai i iʻuga mo se taimi umi le mauaina o se galuega e aunoa ma se lumanaʻi? Po o le a manaʻomia ai ona e siitia atu i se isi nofoaga mai au uō ma aiga? Pe faamata e te oo ai i se tulaga leaga pe atonu foʻi e te lē fiafia ai ma e lagona ai le matuā fiu ma le lotovaivai? Ia fuafua lelei po o ā aogā ma mea e lē aogā ma filifili ai po o ā mea e sili ona tāua.

Ia Faagesegese i le Faia o se Filifiliga

O filifiliga e faataalise ona fai, e mafai ona iʻu i ni tulaga lē lelei. Ua lapataʻi mai le Faataoto 21:5 e faapea: “O mafaufauga o ē filigā i galuega, na o le mau mea e iʻu i ai; a o mafaufauga o ē faataalise uma lava, e iʻu ai na o le mativa.” O se faataʻitaʻiga, e tatau i talavou alofa faavalea ona faagesegese ona faia ni filifiliga e ulu atu i se faiā tumau faalefaaipoipoga. Auā a lē faia faapea, atonu o le a latou tofo i le moni o le mea na taʻua e le tusitala Egelani i le amataga o lona 18 o senituri, o William Congreve e faapea: “O le faataalise ona faaipoipo, e tatou te toe salamō ai i se taimi mulimuli ane ona o a tatou gaoioiga.”

Ae peitaʻi, o le faagesegese i le faia o se filifiliga, e ese mai le tolopōina o se filifiliga. O nisi filifiliga e sili atu ona tāua, o lea e manaʻomia ai ona faia i se vave e mafai ai. O le tolopō e aunoa  ma se māfuaaga, e ono faigatā mo i tatou po o isi foʻi. O le tolopōina o se filifiliga e aunoa ma se māfuaaga, o le mea moni, o se isi foʻi lea filifiliga e ao ona faia, ma atonu o se filifiliga valea.

Ia Tali Atu i Fautuaga

Talu ai e lē tutusa uma ni tulaga, atonu e lē mafai foʻi e ni tagata se toʻalua ona faia ni filifiliga tutusa pe a fesagaʻi ma ni faafitauli faapena. Ae, e tāua tele le faalogologo atu i le auala na faia ai e isi tagata ia filifiliga i faafitauli e tai pei foʻi o i tatou. Ia fesili atu iā i latou po ua faapefea ona latou fuafuaina i le taimi nei a latou filifiliga. O se faaaʻoaʻoga, i le filifilia o se galuega, ia fesili atu i ē na faia lea galuega e faamatala atu iā te oe ia itu lelei ma itu lē lelei. O ā ni aogā na latou maua mai lo latou filifilia o lea galuega, ma o ā ni faalētonu po o ni lamatiaga?

Ua lapataʻia i tatou e faapea: “E faalēaogāina mafaufauga pe a leai se filifiliga; a e faatumauina i le toʻatele o faipule.” (Faataoto 15:22) O le mea moni, pe a saʻilia se fautuaga ma aʻoaʻoina mai mea na oo i isi, e tatau ona tatou faia faapea ma le iloa lelei, o i tatou lava e tatau ona faia le faaiʻuga mulimuli ma o i tatou foʻi e paʻū i ai lenā avega.—Kalatia 6:4, 5.

Utagia se Lotofuatiaifo ua Aʻoaʻoina Lelei

E mafai ona fesoasoani le lotofuatiaifo iā i tatou i le faia o filifiliga e ōgatusa ma mataupu silisili faavae ua tatou filifilia e ola ai. O le uiga o lenei mea mo Kerisiano, o le aʻoaʻoina lea o le lotofuatiaifo ina ia atagia atu ai le finagalo o le Atua. (Roma 2:14, 15) Ua taʻu mai e le Afioga a le Atua iā i tatou e faapea: “Ia e manatua o ia i ou ala uma, ona faatonuina ai lea e ia lava ou ala.” (Faataoto 3:6) O le mea moni, i nisi o vala, ua faia ai e ni tagata se toʻalua ua aʻoaʻoina lelei o la lotofuatiaifo ni faaiʻuga eseese, ona e eseese a la filifiliga.

Ae peitaʻi, o se loto fuatiaifo ua aʻoaʻoina lelei, o le a lē faaaofia ai ia gaoioiga e taʻusalaina e le Afioga a le Atua. O se faaaʻoaʻoga, o se lotofuatiaifo e leʻi aʻoaʻoina i mataupu silisili o le Tusi Paia, e ono faatagaina ai se tamāloa ma se fafine e faataʻitaʻi ona nonofo faatasi a o leʻi faaipoipo. Atonu ua manatu i laʻua ua la faia se filifiliga saʻo, ma le manatu o le a taofia ai i laʻua mai le faia vave o se faaipoipoga e leʻi nofo sauni i ai. Atonu e lē o faatigā o la loto fuatiaifo iā i laʻua. Ae peitaʻi, so o se tasi lava e tutusa lana vaai ma le silafaga a le Atua e faatatau i feusuaʻiga ma faaipoipoga, o le a na lē faia se fuafuaga lē tumau ma lē mamā faapena.—1 Korinito 6:18; 7:1, 2; Eperu 13:4.

Le Auala o le a Aafia ai Isi i Lau Filifiliga

E masani lava ona aafia ai isi i au filifiliga. O lea, aua lava neʻi e faia ma le loto i ai se filifiliga lē atamai, pe e valea e ono faaleagaina ai ia faiā tāua ma uō, ma aiga, aemaise lava le faiā ma le Atua. Ua taʻua e le Faataoto 10:1 e faapea: “O le atalii poto na te faafiafia lona tamā; a o le tama valea e faanoanoa ai lona tinā.”

O le isi itu ia iloa, e tatau foʻi ona faia ni filifiliga e lē fiafia ai au uō i nisi taimi. O se faataʻitaʻiga, atonu e te filifili e teena ni manatu faalelotu sa e talitonu muamua i ai ia ua e iloaina nei e feteenaʻi ma le Tusi Paia. Po ua e filifili foʻi e faia ni suiga tetele i ou uiga ona o lou naunau ia ōgatusa lou olaga ma taʻiala a le Atua ia ua e talia nei. Atonu o le a lē fiafia nisi o au uō po o aiga i lau filifiliga, ae o se filifiliga e faafiafiaina ai le Atua, o se filifiliga atamai lenā.

 Ia Faia ma le Atamai le Filifiliga Aupito Sili

E lē o iloa e tagata lautele, o loo fesagaʻi tagata uma i aso nei ma le filifiliga tāua o le ola po o le oti. Sa fesagaʻi le nuu o Isaraelu anamua ia sa tolauapi i tuaoi o le Nuu Folafolaina i le 1473 T.L.M, ma se filifiliga faapena. I le avea ma fofoga fetalai a le Atua, na taʻu atu ai e Mose iā i latou: “Ua ou tuuina atu i ou luma o le ola ma le oti, o le manuia ma le malaia; o lenei, ia e filifili i le ola, ina ia ola ai oe atoa ma lau fanau; ina ia e alofa atu iā Ieova lou Atua, ma e faalogo i lona siʻufofoga, ma ia e pipii atu iā te ia; auā o lou ola ia, ma lē na te faafualoaina ou aso; ina ia e mau i le laueleele sa tautō ai Ieova i ou tamā, o Aperaamo, ma Isaako, ma Iakopo, e foaʻiina atu iā te i latou.”—Teuteronome 30:19, 20.

Ua faaalia i valoaga ma talafaasolopito o le Tusi Paia e faapea, ua tatou ola i “aso faigatā” ma “o le a mavae atu le tū o le lalolagi nei.” (2 Timoteo 3:1; 1 Korinito 7:31) O le a taualuga suiga ia na valoia i le faaumatiaina o le faiga o mea faaletagata ua matuā faaleagaina, lea o le a suia i le lalolagi fou amiotonu a le Atua.

Ua tatou iai nei i faitotoʻa o lenā lalolagi fou. Po o le a e ulu atu e olioli i le ola e faavavau i le lalolagi i le pulega a le Malo o le Atua? Po o le a aveesea oe mai le lalolagi pe a soloiesea le faiga o mea a Satani? (Salamo 37:9-11; Faataoto 2:21, 22) O le taimi lenei e faia ai lau filifiliga po o lē fea auala e ao ona e mulimuli ai, o le mea moni, o se filifiliga e aafia ai le ola ma le oti. Pe e te talisapaia se fesoasoani ina ia e faia ai se filifiliga saʻo ma atamai?

O le filifilia o le ola, e aofia ai le aʻoaʻoina muamua po o ā mea e manaʻomia e le Atua. I le tele o mea, ua lē faailoaina mai e lotu le mea saʻo e manaʻomia ona fai. Ua masani ona faasesē e taʻitaʻi lotu ia tagata ina ia talitonu i mea pepelo ma faia mea e lē fiafia i ai le Atua. Ua latou lē faamatalaina atu le mea e manaʻomia ona faia e le tagata lava ia o se filifiliga ina ia tapuaʻi i le Atua “i le agaga ma le faamaoni.” (Ioane 4:24) O lea, ua lē mafai ai foʻi e le toʻatele o tagata ona tapuaʻi i le Atua i le auala lenā. Ae ia mātau le fetalaiga a Iesu e faapea: “O sē lē ʻau iā te aʻu, e ʻau ese lea iā te aʻu; o sē lē faaputu faatasi ma aʻu, e faataapeape lea.”—Mataio 12:30.

E fiafia Molimau a Ieova e fesoasoani atu i tagata ina ia latou malamalama lelei i le Afioga a le Atua. E latou te faia e lē aunoa talanoaga faale-Tusi Paia ma tagata taʻitoʻatasi, po o ni vaega foʻi i se taimi ma se nofoaga e talafeagai ma tulaga o tagata. O i latou e mananaʻo e maua lenei sauniuniga aogā, e tatau ona faafesootaʻi atu ni Molimau a Ieova o i lou nuu pe e tusi atu foʻi iā i latou o lomiaina Le Olomatamata.

E moni, atonu ua maua e nisi tagata le poto faavae i mea e manaʻomia e le Atua. Ua latou talitonu foʻi i le moni ma le maufaatuatuaina o le Tusi Paia. Ae, e iai lava nisi o loo tolopōina pea le faia o se filifiliga e tuuina atu o latou ola i le Atua. Aiseā? Atonu e iai ni mafuaaga.

Pe e latou te lē o iloaina moni le tāua o le faia o se tuuina atu i le Atua? Na fetalai manino lava Iesu e faapea: “E lē sao atu i le malo o le lagi i latou uma o ē fai mai iā te aʻu, Le Alii e, le Alii e; na o lē na te faia le finagalo o loʻu Tamā o i le lagi.” (Mataio 7:21) E lē lava le tau ina poto i le Tusi Paia; e manaʻomia galuega. Sa faataatia e le uluaʻi faapotopotoga Kerisiano le faaaʻoaʻoga. Ua tatou faitau ai i faaaʻoaʻoga a nisi i le uluaʻi senituri: “Ua talitonu i latou iā Filipo o folafola le tala lelei i mea a le malo o le Atua, ma le suafa o Iesu Keriso, ona papatisoina lea o i latou, o tane atoa ma fafine.” (Galuega 2:41; 8:12) I lea, pe afai ua talia ma le fiafia e se tasi le Afioga a le Atua, ma talitonu i ai, ma ola e ōgatusa ma tapulaa a le Atua, o le ā o taofia ai o ia mai le papatisoina e faailogaina ai lona tuuina atu? (Galuega 8:34-38) O le mea moni, ina ia fiafia mai i ai le Atua, e tatau ona ia faia ma le loto malie ma le lotofiafia lenei laasaga.—2 Korinito 9:7.

Atonu e lagona e nisi e faapea, e leʻi lava lo latou poto e tuuina atu ai o latou ola i le Atua. Ae o i latou uma lava e amata i se olaga fou, e  itiiti lava so latou poto. O le ā se poto na ia maua ina ua faatoʻā amata ona ia galue i le galuega lea ua poto ai nei? O le filifiliga ina ia auauna i le Atua, e na o le pau lava le mea e manaʻomia, o le maua lea o le poto i aʻoaʻoga ma mataupu silisili faavae o le Tusi Paia, faatasi ma se faanaunauga moni ina ia ola e ōgatusa ma ia mea.

Pe e tolopō e nisi le faia o a latou filifiliga ona o le fefefe ina neʻi lē taulau ona latou ola e ōgatusa ma lea tulaga? O le tele o tautōga e faia e tagata, o loo i ai le popole ina neʻi lē taulau. O se tamāloa na filifili e faaipoipo ma tausia se aiga, atonu na ia lagona e leʻi agavaa, ae o le faia o se tautōga na uunaʻia ai o ia e faia le mea aupito sili ona lelei na te mafaia. E faapena foʻi ona fefe se avetaavale talavou faatoʻā maua se laisene neʻi tupu se faalavelave faafuaseʻi tau taavale, aemaise lava pe afai o loo ia iloa mai fuainumera faamaumauina le toʻatele o avetaavale talavou e sili atu ona aafia i faalavelave tau taavale na i lo o tagata matutua. Ae peitaʻi, e aogā le iloa o lenei mea, e uunaʻia ai o ia ina ia ave ma le matuā faaeteete le taavale. O le lē faia o se laisene, e lē o le vaifofō lenā!

Ia Filifili i le Ola!

Ua faaalia i le Tusi Paia e faapea, ua toe o se aga, ona mavae ese atu lea mai le lalolagi o malo faapolotiki o iai nei, le tamaoaiga, ma i latou o loo lagolagoina faiga faalotu i le lalolagi aoao. Ae peitaʻi, o i latou ua filifilia ma le atamai le ola, ma gaoioi e tusa ai ma na filifiliga, o le a tumau. O i latou o le a soifua i le lalolagi fou, o le a faia so latou sao i le faaparataisoina o le lalolagi e pei ona fuafuaina ai e le Atua. Po o le a e olioli e auai i lenei galuega fiafia i lalo o le taʻitaʻiga a le Atua?

Afai o lea, ia filifili e suʻesuʻe le Afioga a le Atua. Ia filifili e aʻoaʻoina mea e manaʻomia e le Atua ina ia faafiafia ai o Ia. Ia filifili ina ia ausia na mea. Ae o le sili o na mea uma, ia filifili ina ia faataunuuina atoatoa lau filifiliga. I se isi faaupuga, ia filifili i le ola!

[Ata i le itulau 4]

Ia lava se taimi e mafaufau ai i le faia o filifiliga e sili ona tāua

[Ata i le itulau 5]

Ia talia fautuaga e uiga i le filifilia o se galuega

[Ata i le itulau 7]

O i latou e filifili e auauna i le Atua i le taimi nei, o le a faia se sao i le faaparataisoina o le lalolagi