Fesili Mai le ʻAufaitau

O ai na fetalai atu i ai Ieova e pei ona tusia i le Kenese 3:22?

Ua faapea mai le Tusi Paia Samoa: “Ua avea le tagata e pei o so tatou (o lona uiga e toʻatolu pe sili atu foʻi), ua iloa ai le lelei ma le leaga.” (Kenese 3:22) I Tusi Paia faa-Peretania e mafai ona faauiga atu le upu “us” i le toʻalua (taʻua) po o le toʻatolu pe e sili atu foʻi (tatou). O lea la e mafai ona faitauina le fuaiupu e faapea “e pei o so taʻua” po o le “e pei o so tatou.” E foliga mai na fetalai Ieova e faatatau iā te ia ma lona Alo e toʻatasi ina ua ia fetalaia mai upu e pei ona taʻua i luga. Seʻi o tatou iloiloina le māfuaaga mo lenei faaiʻuga.

O upu nei na fetalai atu ai Ieova ina ua uma ona faailoa atu le faasalaga o le uluaʻi ulugalii. E tusa ai ma le Kenese 1:26 ma le 3:22, ua faapea mai le tagata aʻoga o le Tusi Paia o Donald E. Gowan: “E leai se faamaoniga i le Feagaiga Tuai mo le tele o faamatalaga ua tuuina mai e pei: o le upu ‘tatou (we)’ lea e faasino i le tulaga mamalu o se tasi, ma le upu ‘tatou (we),’ lea e faasino i le numera tele o se mea, pe e faailoa ai ni tagata e sili atu i le toʻatasi ua iai i le Tolutasi. . . . E matuā lē fetaui se isi o nei faamatalaga i le faatatau atu i le Kenese 3:22, lea e faapea mai, ‘o so tatou (us).’”

Pe faamata sa fetalai atu Ieova iā Satani le Tiapolo, o lē na filifili e ia lava le “lelei ma le leaga” ma taaʻina ai uluaʻi tagata e faia le mea lava lea? E lē talafeagai lenā mea. O loo faaaogāina e Ieova i inei le faaupuga “so taʻua,” (NW). O le taimi lea e lē o toe iai Satani i le ʻauagelu faamaoni a Ieova, o lea la, e lē tatau ona aofia ai o ia iā i latou sa iai i le itu a Ieova.

Pe sa fetalai atu Ieova i agelu faamaoni? E tatou te lē o matuā mautinoa. Ae peitaʻi, o le tutusa o faaupuga i le Kenese 1:26 ma le 3:22, ua aumaia ai iā i tatou se tali. I le Kenese 1:26, NW, ua tatou faitau ai e faapea, na fetalai atu Ieova: “Ina ta faia ia o le tagata i lo ta faatusa ia foliga iā i taʻua.” O ai na ia fetalai atu i ai nei upu? Na faapea mai le aposetolo o Paulo e faatatau i le foafoaga agaga o lē na avea ma tagata lelei atoatoa o Iesu: “O ia o le faatusa o le Atua e lē vaaia, o le ulumatua o mea uma lava ua faia; auā na faia e ia o mea uma lava, o mea i le lagi ma mea i le lalolagi.” (Kolose 1:15, 16) Ioe, e foliga mai e saʻo le Kenese 1:26, sa fetalai atu Ieova i lona Alo pele e toʻatasi, le “tufuga,” o lē sa iai faatasi ma ia a o foafoaina le lagi ma le lalolagi. (Faataoto 8:22-31) O le tutusa o upu i le Kenese 3:22, ua faailoa mai ai, sa toe fetalai foʻi i inei Ieova i lē sa sili ona vavalalata ane iā te ia, o lona Alo pele e toʻatasi.

E foliga mai sa silafia e le Alo pele e toʻatasi o le Atua le “lelei ma le leaga.” A o mafuta vavalalata ma Ieova mo se taimi umi, e mautinoa sa ia silafia lelei ai le finagalo o lona Tamā, ana mataupu silisili ma tapulaa. I le mautinoa ua masani lelei lona Alo ma nei tapulaa ma faamaoni i ai, atonu na tuuina atu ai e Ieova iā te ia le pule e tauaaoina ai mataupu e aunoa ma le tau faafesootaʻi tuusaʻo atu o Ia. O le tulaga lea ua mafai ai ona tuuina atu i le Alo le pule e filifili ai le mea e lelei ma le mea e leaga. Ae peitaʻi, i le lē pei o Satani, Atamu ma Eva, e leʻi faataatiaina e Iesu ni tapulaa o le lelei ma le leaga e feteenaʻi ma le finagalo o Ieova.