Talavou e, Ia Savavali e Tusa ma Ieova

UA NONOFO ese nisi talavou Kerisiano mai i o latou aiga ma a latou faapotopotoga mo sina taimi. Ua faia faapea e nisi ina ia faalautele ai la latou faiva. O nisi ua tuua o latou aiga ona o lo latou tulaga solitū i mataupu fai a lenei lalolagi. (Isaia 2:4; Ioane 17:16) I nisi atunuu, ua faasalaina ai e “Kaisara” po o le malo i le falepuipui ia talavou faamaoni po o le faia foʻi o galuega i le lautele. *—Mareko 12:17; Tito 3:1, 2.

A o faasalaina i le falepuipui ona o lo latou solitū, e masani ona lokaina faatasi ai nei talavou ma tagata solitulafono mo se taimi umi. O le nofo ese mai i le aiga mo nisi māfuaaga e faamalosia ai se talavou ina ia galue i se siʻomaga lē lelei tau amio. E mafai faapefea e nei talavou Kerisiano po o isi ua faamalosia ona galulue i na tulaga, ona taulau i le fesagaʻia o omiga ma faigatā a o latou tauivi e ‘savavali ia tatau ma le Atua?’ (1 Tesalonia 2:12) E mafai faapefea e o latou mātua ona fesoasoani iā i latou i le feagai ai ma so o se tulaga lē lelei?—Faataoto 22:3.

Luʻi Patino

Ua faapea mai Tákis e 21 tausaga, o lē na nofo ese mai i lona aiga mo le 37 masina: “Sa faigatā iā te aʻu ma na ou fefe ina ua ou nofo ese mai i le puipuiga a oʻu mātua aemaise le vaaiga a toeaina alolofa o ē na silafia lelei aʻu.” * Ua ia faaopoopo mai e faapea: “I nisi taimi, sa ou lē iloa le mea o le a ou fai.” Sa tatau foʻi ona nofo ese Pétros e 20 tausaga mai lona aiga mo le sili atu i le lua tausaga. Ua ia faamatala mai e faapea: “O le taimi muamua lenei o loʻu olaga na ou faia ai laʻu lava filifiliga e aunoa ma le fesoasoani mai o isi e faatatau i faafiafiaga ma aumea, ma sa masani ona lē atamai na filifiliga.” Ua ia toe faapea mai: “I nisi taimi e fai ai sina ou popole ona o le tele o le saʻolotoga ua ou maua peitaʻi ua tele ai foʻi ma oʻu tiute tauave.” Ua mātauina e Tássos o se toeaina Kerisiano e masani ona fesootaʻi ma talavou Kerisiano o loo iai i na tulaga e faapea: “Atonu ua aafia talavou ua lē lava le poto masani i talanoaga leaga, uiga fouvale ma amioga sauā a a latou tupulaga lē talitonu.”

A o ola ma galulue faatasi ma tagata o ē e itiiti se faaaloalo i mataupu silisili a le Tusi Paia, e manaʻomia ai e na talavou Kerisiano ona leoleo faasaga i le fia faaaʻoaʻo i amioga leaga a a latou tupulaga ma ala e lē tusa ma le Tusi Paia. (Salamo 1:1; 26:4; 119:9) Atonu ua foliga mai ua faigatā ona tausia se faasologa lelei o suʻesuʻega totino, auai i le sauniga ma le auaunaga i le fanua. (Filipi 3:16) O le a ono lē faigofie foʻi le faataatiaina ma le galue agaʻi i sini faaleagaga.

E mautinoa e mananaʻo talavou Kerisiano ina ia faafiafia Ieova e ala i a latou amio ma talanoaga. Ua latou taumafai ma le faamaoni ina ia utagia le valaaulia a lo latou Tamā faalelagi e faapea: “Loʻu atalii e, ia poto oe, ma e faafiafia loʻu loto; ona ou mau tali ai lea i lē fāifai mai.” (Faataoto 27:11) Ua latou iloa o a latou amio ma uiga faaalia e iai se aafiaga i le auala e vaai ai isi iā Ieova ma ona tagata.—1 Peteru 2:12.

Ua tatau ai le faamalō i na talavou o loo latou  faia le mea sili latou te mafai ina ia pei ai o o latou uso i le uluaʻi senituri o ē na tatalo ai Paulo e faapea: “Ia outou savavali e tusa ma le Alii, ina ia fiafia mai o ia iā te outou i mea uma, ma ia outou fua mai galuega lelei uma lava . . . e iʻu i le onosai uma lava ma le faatoʻatoʻa, atoa ma le fiafia.” (Kolose 1:9-11) Ua saunia e le Tusi Paia ni faaaʻoaʻoga o talavou matataʻu i le Atua o ē na taulau ona savavali e tusa ma le Atua i nofoaga ese, e leaga ma tapuaʻi i tupua.—Filipi 2:15.

‘Sa iā Iosefa Ieova’

A o talavou Iosefa le alo faapelepele o Iakopo ma Rasela, sa nofo mamao ese ai o ia mai le fale o lona tamā e mataʻu i le Atua. Na faatauina atu o ia e fai ma pologa i Aikupito. Sa faataatia e Iosefa se faaaʻoaʻoga sili ona lelei o sē e faigaluega malosi, maufaatuatuaina ma o se talavou amiolelei. E ui ina sa pologa iā Potifara—o se tasi e lē tapuaʻi iā Ieova—ae o ia o sē e faigaluega lelei ma toʻaga, o lea na tofia ai loa o ia e lona matai e pule i lona aiga ma mea uma sa iā te ia. (Kenese 39:2-6) Sa tausia pea e Iosefa lona faamaoni iā Ieova, ma na iʻu i le tuuina ai o ia i le falepuipui, ae e leʻi faapea mai lava o ia: “Se ā le aogā o loʻu faamaoni i le Atua?” E oo lava a o iai o ia i le falepuipui sa faaalia pea uiga lelei, ma e leʻi umi ae tuuina atu iā te ia le vaaiga o le tele o mea i le falepuipui. (Kenese 39:17-22) Na faamanuia le Atua iā te ia e pei ona faamauina i le Kenese 39:23 e faapea, “Sa iā te ia [Iosefa] Ieova.”

E matuā faigofie iā Iosefa, o lē sa nofo ese mai i lona aiga mataʻu i le Atua, ona amio faatasi ma tagata faapaupau o ē na ola faatasi ma ia ma faataʻitaʻi i le olaga lē mamā o tagata Aikupito! Na i lo lenā, sa ia tausisi pea i mataupu silisili a le Atua ma tausia lona tulaga mamā e ui i le faaosoosoga sili ona faigatā. Ina ua tauanau pea o ia e le avā a Potifara e la te momoe, na ia tali atu ma le maumauaʻi e faapea: “Pe faapefea ona ou faia lenei mea leaga tele ma ou agasala ai i le Atua?”—Kenese 39:7-9.

I aso nei, e manaʻomia e talavou Molimau ona utagia le lapataʻiga a le Tusi Paia e faasaga i aumea leaga, faafiafiaga lē mamā, ata matagā ma musika e faaleaga ai mea lelei. Ua latou iloa, “O loo i mea uma lava fofoga o Ieova; o loo matuā silasila i ē amio leaga ma ē amio lelei.”—Faataoto 15:3.

Sa Teena e Mose le “Fiafia i le Agasala”

Na soifua aʻe Mose i se siʻomaga ifo i tupua ma le faamalieina o tuʻinanauga faaletino i le maota o Farao. Ua faapea mai le Tusi Paia e faatatau iā te ia: “O le faatuatua na lē mafai ai Mose, . . . ona ia taʻua o ia o le tama a le afafine o Farao, ua filifili e ia ia agaleagaina o ia faatasi ma tagata o le Atua e lelei ai, a e aua le iā te ia le  fiafia i le agasala e vave mavae.”—Eperu 11:24, 25.

E mafai ona maua ni aogā i le faauō ma le lalolagi, peitaʻi e lē tumau. O na aogā, e na o le taimi lava o loo totoe o lenei lalolagi e mafai ona maua ai. (1 Ioane 2:15-17) Pe e lē lelei ea ona mulimuli i le faaaʻoaʻoga a Mose? Ua faapea mai le Tusi Paia na “faamalosi o ia pei o sē iloa atu i lē lē o vaaia.” (Eperu 11:27) Sa taulaʻi atu lona mafaufau i le tulaga faaleagaga a ona augātamā matataʻu i le Atua. Na ia avea fuafuaga a Ieova ma ana fuafuaga i lona olaga, lea sa avea ai ma ona sini le faia o le finagalo o le Atua.—Esoto 2:11; Galuega 7:23, 25.

E mafai ona faamalosia e talavou matataʻu i le Atua a latou faiā ma Ieova e ala i suʻesuʻega totino ina ia iloa lelei ai “lē lē o vaaia” pe afai ua latou iai i se siʻomaga e lē faale-Atua ma e lē lelei. O le a fesoasoani i nei talavou se polokalame o gaoioiga faa-Kerisiano ia e aofia ai le auai e lē aunoa i sauniga ma le auaunaga i le faiva, e taulaʻi atu ai o latou mafaufau i mea faaleagaga. (Salamo 63:6; 77:12) E tatau ona latou tauivi e ati aʻe le faatuatua ma le faamoemoe malosi e pei o Mose. E tatau foʻi ona latou tauivi e taulaʻi o latou mafaufauga ma gaoioiga iā Ieova, ma olioli ai i le avea ma ana uō.

Sa Viia Ieova i le Tautala a se Teineitiiti

O se isi talavou na faamaonia le avea ma faaaʻoaʻoga lelei a o nofo ese o ia mai i lona aiga, o le teineitiiti Isaraelu lea na ave faatagataotaua e ʻautau a Suria i aso o le perofeta a le Atua o Elisaia. Sa avea o ia ma auauna teine a le avā a le taʻitaʻiʻau o Suria e lepela, e suafa iā Naamanu. Na taʻu atu e lenei teine i lona matai tamaʻitaʻi e faapea: “Se anoa! ana i ai loʻu alii i le perofeta o i Samaria, po ua faateʻaina e ia lona lepela.” Na alu atu Naamanu iā Elisaia i Isaraelu ma faamamāina ai lona lepela ona o le molimau a le teineitiiti. Ae sili atu i lenā, na avea Naamanu ma se tasi e tapuaʻi iā Ieova.—2 Tupu 5:1-3, 13-19.

Ua faamamafa mai e le faaaʻoaʻoga a lenei teineitiiti le manaʻoga mo talavou ina ia tautatala i mea e faamamaluina ai le Atua, e tusa lava pe ua latou ō ese mai i o latou mātua. Ana fai o le masani a lenā teineitiiti le tautala i “upu faatauvaa” po o “le faaulaula,” pe e mafai ona ia tautala atu i upu uigā e pei ona sa ia faia ina ua  tulaʻi mai le avanoa e faia ai faapena? (Efeso 5:4; Faataoto 15:2) Ua manatua e Níkos o se tama talavou e leʻi atoa lona 25 tausaga na falepuipui ona o lona tulaga solitū e faapea: “A o matou iai faatasi ma nisi o uso talavou i se falepuipui e faigaluega ai pagota i faatoʻaga, ma sa lē toe iai le taʻitaʻiga a mātua ma le faapotopotoga, na ou mātauina ai le faalēlelei o a matou talanoaga. E mautinoa na lē aumaia ai le viiga iā Ieova.” Ae o se mea e fiafia ai, ona o le fesoasoani a nisi sa mafai ai ona utagia e Níkos ma isi uso le fautuaga a Paulo e faatatau i lenei mataupu e faapea: “A o le faitaaga, ma amio leaga uma, po o le manumanu foʻi, aua neʻi taʻua lava iā te outou, e pei ona tatau i ē ua paia.”—Efeso 5:3.

Sa Moni Ieova iā i Latou

O le mea na tupu i aumea Eperu e toʻatolu a Tanielu i Papelonia anamua, ua faamaonia ai le moni o le mataupu silisili na taʻua e Iesu e faapea o le faamaoni i mea iti e faamaoni foʻi i mea e tele. (Luka 16:10) Ina ua fesagaʻi i latou ma le faafitauli o le ʻaina o meaʻai e faasāina e le Tulafono a Mose, sa ono manatu i latou e faapea, talu ai o i latou o ni tagata na ave faamalosia i nuu ese e leai la sa latou filifiliga e tusa ai ma lea tulaga. Peitaʻi maʻeu se faamanuiaga sa latou maua ona o le manatu mamafa i lenei mataupu e ui lava e foliga mai e itiiti sona tāua! Sa faamaonia le sili atu ona lelei lo latou soifua mālōlōina ma le atamamai na i lo isi na avea faapagota o ē na faaauau ona aai i taumafataga manogi a le tupu. E mautinoa na faamalosia i latou ona o le faamaoni i nei mea iti, o lea ina ua latou fesagaʻi ma le tofotofoga sili atu ona telē o le ifo i se tupua tele, e leʻi lolo atu i latou.—Tanielu 1:3-21; 3:1-30.

Sa moni Ieova i nei tama talavou e toʻatolu. Sa latou maumauaʻi e tausia lo latou lē pisia mai le lalolagi, e ui ina mamao tele i latou mai i o latou aiga ma le nofoaga o tapuaʻiga i le Atua. (2 Peteru 3:14) Na latou faatāuaina la latou faiā ma Ieova o lea na latou loto malilie ai e faataulaga o latou ola mo lenei mea.

O le a Lē Tuulafoaʻia Outou e Ieova

Pe afai e ō ese mai talavou i ē pele iā i latou ma faatuatuaina, e mautinoa latou te ono lagona le lē malupuipuia, le lē mautinoa ma le fefe. Ae peitaʻi, e mafai ona latou fesagaʻi ma o latou tofotofoga ma faigatā i le atoatoa o lo  latou mautinoa e faapea o le a “lē tuuna e Ieova” i latou. (Salamo 94:14) Afai o na talavou o le a “tigāina . . . ona o le amiotonu,” o le a fesoasoani Ieova iā i latou ia faaauau ona savavali i “ala o le amiotonu.”—1 Peteru 3:14; Faataoto 8:20.

Na faaauau ona faamalosia ma faamanuiaina e Ieova ia Iosefa, Mose, le teineitiiti pologa Isaraelu ma talavou Eperu faamaoni e toʻatolu. I aso nei, ua ia faaaogāina lona agaga paia, lana Afioga ma lana faalapotopotoga ina ia faatumauina ai i latou o loo “tau le taua lelei,” ma tuu i o latou luma le taui o le “ola faavavau.” (1 Timoteo 6:11, 12) O le mea moni, o le savavali e tusa ma Ieova o se mea e mafai ona faia ma o le auala atamai lenā.—Faataoto 23:15, 19.

[Faamatalaga pito i lalo]

[Pusa i le itulau 25]

MĀTUA—IA SAUNIA O OUTOU ALO!

“E pei o ū fanafana i le lima o le toa, e faapea lava atalii o tauleleʻa.” (Salamo 127:4) E lē faafuaseʻi ona oo le ū i lona sini. E ao ona taʻi lelei. O se tulaga tutusa foʻi faapena, a aunoa ma le taʻitaʻiga tatau faamātua o le a lē mafai ona fesagaʻi fanau ma mea e tutupu i aso faisoo, pe a latou nonofo ese mai i o latou aiga.—Faataoto 22:6.

E vave ona oso faanaunauga o talavou pe lolo atu foʻi i “tuʻinanau o tauleleʻa.” (2 Timoteo 2:22) Ua lapataʻi mai le Tusi Paia e faapea: “O le sasa ma le aʻoaʻiga e tupu ai le poto; a o le tama ua tuulafoaʻiina, e tupu ai le mā o lona tinā.” (Faataoto 29:15) O le lē taulau ona faataatia o ni tapulaa i amioga a fanau, e tuua ai se talavou i se tulaga e lē saunia mo faigatā ma omiga o le nofo ese mai i le aiga.

I se auala manino ma talafeagai, e ao ai i mātua Kerisiano ona otooto i a latou fanau ia faigatā, omiga ma mea e tutupu i le olaga i lenei faiga o mea. E aunoa ma le faalotovaivai, e mafai ona la faamatala atu tulaga lē lelei e ono fesagaʻi ma se talavou pe afai e nofo ese mai i le aiga. O lenei toleniga, e vaavaalua ma le atamai mai le Atua, o le a “avatu ai le faautauta i ē faigofie; o le poto ma le mafaufau i le tauleʻaleʻa.”—Faataoto 1:4.

O mātua o ē totō tapulaa a le Atua ma mataupu silisili tau amio i loto o a latou fanau, o le a mafai ai e fanau ona manumalo mai luʻi o le olaga. E mafai ona iloa le eseesega o le taulau manuia ma le lē taulau e ala i suʻesuʻega faaleaiga e lē aunoa, le fetalanoaaʻi pea ma le fanau ma le faaalia o le naunau mo le lelei o le fanau. E ao i mātua ona saunia toleniga faale-Atua i se auala paleni lelei ma talafeagai, o le faia faapea, o le a mafai ai e o latou alo ona ola ese mai i o latou mātua i le lumanaʻi. E ala iā oulua faaaʻoaʻoga, ia aʻoaʻoina la oulua fanau e faapea e talafeagai le ola i le lalolagi peitaʻi, e lē tatau ona faia ai se vaega.—Ioane 17:15, 16.

[Ata i le itulau 23]

O nisi talavou Kerisiano sa tatau ona tuua o latou aiga

[Ata i le itulau 24]

E mafai e talavou ona faaaʻoaʻo iā Iosefa ma tausia le mamā tau amio e ala i le teena o faaosoosoga

[Ata i le itulau 26]

Ia faaaʻoaʻo i le teineitiiti Isaraelu, o lē na talanoa i mea e viia ai Ieova