Talaaga o le Soifuaga

Aʻoaʻoina e Ieova Mai Lava a o Ou Laʻitiiti

FAAMATALAINA E RICHARD ABRAHAMSON

“Le Atua e, na e aʻoaʻo mai iā te aʻu talu ina ou tama itiiti; ua oo mai foʻi i nei ona pō ua ou faaali atu ou vavega.” Seʻi ou faamatala atu le pogai ua uigā faapitoa ai iā te aʻu na upu i le Salamo 71:17.

I LE 1924, na feiloaʻi ai loʻu tinā o Fannie Abrahamson ma tagata aʻoga o le Tusi Paia ia ua faaigoaina nei o Molimau a Ieova. I le taimi lenā, sa na o le tasi loʻu tausaga. A o aʻoaʻoina e loʻu tinā upu moni o le Tusi Paia, e leʻi pine ae asiasi atu loa i ona tuaoi ma faamatala atu mea na ia aʻoaʻoina, ma sa ia aʻoaʻo foʻi i matou ma loʻu uso ma loʻu tuafafine. Ae oʻu te leʻi iloa faitau, sa ia fesoasoani iā te aʻu ina ia ou taulotoina le tele o mau e uiga i faamanuiaga o le Malo o le Atua.

I tausaga faaiʻuiʻu o le 1920-1929, na faavaeina ai i le nuu lea na ou fanau ma ola aʻe ai o La Grande, i Oregon i Amerika, la matou vaega o Tagata Aʻoga o le Tusi Paia lea na faia aʻe i ni nai fafine ma tamaiti. E ui lava sa mamao lo matou nofoaga, ae sa asiasia i matou e ovasia femalagaaʻi e faatasi pe faalua i le tausaga. Na faia e i latou nei ni lauga faalaeiau, ma matou ō faatasi i le faiva mai lea fale i lea fale, ma sa faaalia foʻi le naunau alofa i tamaiti. Sa faatasi ma i latou o ē pele iā te aʻu ia Shield Toutjian, o Gene Orrell, ma John Booth.

Sa leai se tasi o la matou vaega na mafai ona auai i le tauaofiaga na faia i Columbus, Ohio i le 1931, o i inā na talia ai e tagata Aʻoga o le Tusi Paia le igoa Molimau a Ieova. Ae peitaʻi, o faapotopotoga i na aso, ma vaega mamao sa leai ni o latou sui auai i le tauaofiaga, na faapotopoto i a latou lava vaega i le masina lenā o Aokuso ina  ia ioeina le iʻugāfono e talia ai le igoa Molimau a Ieova. O le mea lenā na faia i si a matou vaega toʻalaitiiti i La Grande. Ona faia ai lea o se tauiviga i le 1933 e tufatufaina atu le tamaʻitusi, The Crisis. Sa ou aʻoina se taulimaga faale-Tusi Paia ma o le uluaʻi taimi lea na ou molimau atu ai na o aʻu mai lea fale i lea fale.

I le faagasologa o tausaga o le 1930, na faateteleina ai le tetee o tagata i la matou galuega. Ina ia faafetaiaʻia lenei mea, na vaevaeina ai faapotopotoga i ni vaega, ia sa faia ni fonotaga laiti, ma sa auai i le galuega talaʻi e faatasi pe faalua i le tausaga. I nei fonotaga, sa faatonuina ai i matou i auala e faia ai le talaʻiga ma feutagaʻi ai ma le faaaloalo ma leoleo o le malo sa faalavelave ane. Talu ai sa masani ona molia ia Molimau i taʻitaʻi leoleo, po o faamasinoga foʻi, e matou te faataʻitaʻia ai ia faaupuga mai se pepa o faatonuga lea e taʻua o le Order of Trial. Sa fesoasoani lenei mea iā i matou e feagai ai ma teteega.

Tuputupu Aʻe i Upu Moni o le Tusi Paia a o Laʻitiiti

Sa faateleina loʻu malamalama ma le talisapaia o upu moni o le Tusi Paia faapea le faamoemoe e faavae i le Tusi Paia, o le ola e faavavau i le lalolagi i le pulega a le Malo faalelagi o le Atua. I lenā taimi, e leʻi faamamafaina le papatisoga mo i latou e lē maua le faamoemoe o le pule faatasi ma Keriso i le lagi. (Faaaliga 5:10; 14:1, 3) Ae peitaʻi, na faailoa mai iā te aʻu e faapea, afai ua maumauaʻi i loʻu loto e faia le finagalo o Ieova, e tatau la ona ou papatiso. Na ou papatiso ai iā Aokuso i le 1933.

Ina ua 12 oʻu tausaga, sa manatu loʻu faiaʻoga e ese loʻu lelei i mataupu tau i le tautala atu i le lautele, o lea na ia uunaʻi malosi ai loʻu tinā ina ia fuafua se isi toleniga mo aʻu. Sa manatu loʻu tinā atonu o le a fesoasoani lenei mea ina ia faaleleia ai laʻu auaunaga iā Ieova. O lea, na ia galue ai i le tāina o lavalava o le faiaʻoga mo se tausaga e totogi ai laʻu aʻoga. Sa aogā tele le aʻoga i laʻu faiva. Ina ua 14 oʻu tausaga, na taia ai aʻu i le fiva rumatika, ma ou te leʻi toe aʻoga ai mo le sili atu i le tausaga.

I le 1939, na asiasi mai ai i lo matou vaipanoa se faifeʻau faataimi atoa e suafa iā Warren Henschel. * I le tulaga faaleagaga, sa avea o ia o se uso matua iā te aʻu, na ia aveina aʻu i le faiva i le fanua i le aso atoa. Sa vave ona ia fesoasoani iā te aʻu e amata ona auai i le paeonia faatuuaga, o se faiva faataimi atoa e fai faavaitaimi. I lenā taumāfanafana, na avea ai la matou vaega o se faapotopotoga. Sa tofia Warren e avea ma auauna o le faapotopotoga, ae na tofia aʻu e faia le Suʻesuʻega o le Olomatamata. Ina ua alu Warren e auauna i Peteli, le ofisa ulu faavaomalo o Molimau a Ieova i Brooklyn, i Niu Ioka, na avea ai aʻu ma auauna o le faapotopotoga.

Amata i le Faiva Faataimi Atoa

O le faateleina o tiute tauave o auauna o le faapotopotoga, na faamalosia atili ai loʻu naunau e fia ulu atu i le faiva faataimi atoa, lea na ou faia i le 17 o oʻu tausaga ina ua uma le tolu tausaga o laʻu aʻoga maualuga. E eseese o matou talitonuga faalotu ma loʻu tamā, ae sa ia tausia lelei manaʻoga o lo matou aiga ma o se tagata foʻi e maualuluga ana faatulagaga. Sa manaʻo o  ia ou te alu i le kolisi. O lea, na ia faapea mai, e fai lava le mea e te manaʻo i ai ae aua neʻi e faalagolago mai iā te aʻu mo se fale ma mea e tausi ai oe. O lea, na amata ai ona ou paeonia iā Setema 1, 1940.

Ina o le a ou tuua le aiga, na fai mai ai loʻu tinā ou te faitauina le Faataoto 3:5, 6: “Ia e faatuatua iā Ieova ma lou loto atoa; a e aua le faalagolago i lou lava atamai. Ia e manatua o ia i ou ala uma, ona faatonuina ai lea e ia lava ou ala.” O le tuu atu pea o loʻu ola i aao o Ieova, o le mea moni, sa fesoasoani tele lea iā te aʻu.

E leʻi pine lava, ae matou faatasi loa ma Joe ma Margaret Hart i le faiva i le ogatotonu i mātū o le Setete o Washington. Sa eseese lava mea na iai i le oganuu, o lafu povi, o lafu mamoe, ma mea sa faasaoina e tagata Initia Amerika faapea le tele o aai ma nuu laiti. I le tau e totogo ai laau i le 1941, na tofia ai aʻu e avea ma auauna o le faapotopotoga i Wenatchee, i Washington.

I se tasi o a matou fonotaga i Walla Walla, Washington, na ou auauna ai o se tautua e faafeiloaʻia i latou na ulufale mai i le maota. Na ou mātauina ai se uso talavou o taumafai e faaola le masini faaleotele leo ae sa lē mafai. O lea na ou fai atu i ai, e sau e tū i loʻu tofiga ae ou alu atu e tū i lona tofiga. Ina ua foʻi mai le ovasia matagaluega o Albert Hoffman, ma iloa ai ua ou tuua loʻu tofiga, na ia ʻataʻata fiafia ma faamatala mai iā te aʻu le tāua o le tausisia e le tagata o lona tofiga seʻiloga ua avatu se faatonuga e faia ai faapea. Talu mai lenā taimi, o loo ou manatua pea lana fautuaga.

Iā Aokuso 1941, na fuafuaina ai e Molimau a Ieova se tauaofiaga tele lava i St. Louis, Missouri. Na fausia e Joe ma Margret Hart se fale tapoleni i tua o la laʻua pikiapu ma faatutū ai ni nofoa uumi. O le toʻa iva o i matou paeonia na faimalaga atu mo le 1,500 maila (2,400 kilomita) i St. Louis i lenā pikiapu. O lenā malaga, e tusa ma le vaiaso na ō ai, ma le vaiaso na toe foʻi mai ai. I le tauaofiaga, na fuafuaina e leoleo e faapea, o le tumutumuga o ē na auai e 115,000. E ui lava o le aofia na auai, atonu sa itiiti ifo i lenā fuainumera, e mautinoa sa sili atu lava pe ā ma se 65,000 Molimau i le Iunaite Setete i lenā taimi. O le mea moni, sa avea le tauaofiaga o se faagaeega faaleagaga.

Auaunaga i Peteli i Brooklyn

Ina ua ou toe foʻi atu i Wenatchee, na ou maua ai se tusi e valaaulia ai aʻu ou te lipoti atu i Peteli i Brooklyn. Ina ua ou taunuu atu iā Oketopa 27, 1941, na ave ai aʻu i le ofisa o Nathan H. Knorr, le ovasia o le falegaosi mea. Sa ia faamatala mai ma le agalelei iā te aʻu le olaga i Peteli ma faamamafa mai e faapea, e tatau ona pipii vavalalata atu iā Ieova ina ia taulau manuia ai i le olaga i inā. Ona ave lea o aʻu i le Matagaluega o Felaʻuaʻiga ma faafaigaluega ai i le noanoaina o pusa mo le aauina atu i fafo.

Iā Ianuari 8, 1942, na maliu ai ia Joseph Rutherford, o lē sa taʻimua i Molimau a Ieova i le lalolagi atoa. I le lima aso mulimuli ane, na tofia ai e faatonu o le Sosaiete le Uso o Knorr e suitulaga iā Rutherford. Ina ua faasilasila mai e W. E. Van Amburgh, le failautusi ma le teutupe a  le Sosaiete mo se taimi umi lenei mea i le aiga Peteli, na ia faapea mai: “Ou te manatua, ina ua maliu ia C. T. Russell [i le 1916] na suitulaga ai ia J. F. Rutherford. Sa faaauau pea ona taʻitaʻia e le Alii ma faaolaola Lana galuega. I le taimi nei, ou te faamoemoe atoatoa o le a agaʻigaʻi i luma le galuega i le vaavaaiga a le peresitene o Nathan H. Knorr, auā o le galuega lenei a le Alii ae lē o se galuega a se tagata.”

Iā Fepuari 1942, na faasilasila mai ai o le a amataina se “Aʻoga Faapitoa o le Faiva Faatiokarate.” Sa fuafuaina e toleni ai i latou i Peteli ina ia faaleleia o latou tomai e faia ai saʻiliʻiliga i mataupu faale-Tusi Paia, ia faamaopoopoina lelei a latou mataupu, ma taulimaina ma le uigā. Ona o le fesoasoani na maua i le muaʻi aʻoaʻoina o aʻu i le tomai e tautala atu ai i le lautele, na mafai ai ona ou agaʻigaʻi vave i luma i le polokalame.

E leʻi umi se taimi, ae tofia aʻu i le Matagaluega o le Auaunaga, lea e vaavaaia le faiva a Molimau a Ieova i le Iunaite Setete. Mulimuli ane, i lenā lava tausaga, na filifili ai e toe faagaoioia se polokalame mo faifeʻau e asiasia faapotopotoga a Molimau o Ieova. I na taimi, na taʻua ai na faifeʻau femalagaaʻi o auauna i le ʻauuso, ia ua taʻua o ovasia matagaluega. I le taimi o le taumāfanafana i le 1942, na fuafuaina ai se aʻoga i Peteli e toleni ai uso mo lenei ituaiga o faiva, ma na ou maua ai se faaeaga matou te aʻooga faatasi ai ma isi. Ou te manatua lava le manatu lenei na faamamafa mai iā i matou e le Uso o Knorr, o se tasi o faiaʻoga e faapea: “Aua tou te taumafai e faafiafia tagata. E lē o tagata e tou te faafiafiaina. Ia faafiafia Ieova, ma o le a e faafiafia foʻi i latou uma o ē alolofa iā Ieova.”

Na amataina le galuega femalagaaʻi iā Oketopa 1942. Na faia ai se sao o i matou mai i Peteli, i faaiʻuga o nisi vaiaso i le asiasia o faapotopotoga e tusa ma le 250 maila (400 kilomita) mai le aai o Niu Ioka. Sa matou autaluina ia lipoti o le galuega talaʻi a faapotopotoga ma le aofaʻiga o ē auai i sauniga, sa faia foʻi se feiloaʻiga ma i latou sa iai tiute tauave i le faapotopotoga, faia se lauga se tasi po o se lua, ma galulue faatasi i le faiva ma Molimau i le faapotopotoga.

I le 1944, na aauina atu ai i matou ma nisi mai le Matagaluega o le Auaunaga i le galuega femalagaaʻi mo le ono masina, e auauna i Delaware, Maryland, Pennsylvania, ma Virginia. Mulimuli ane, sa ou asiasi atu ai i faapotopotoga i Connecticut, Massachusetts, ma Rhode Island mo ni nai masina. Ina ua ou toe foʻi atu i Peteli, sa ou galue faavaitaimi ai i le ofisa ma le Uso o Knorr ma lana failautusi o Milton Henschel, o i inā na ou masani ai ma la tatou galuega i le lalolagi aoao. Sa ou galue foʻi faavaitaimi i le Ofisa o Tupe i le vaavaaiga a W. E. Van Amburgh ma lona fesoasoani o Grant Suiter. I le 1946, na avea ai aʻu ma ovasia o nisi o ofisa i Peteli.

Suiga Tetele i Loʻu Olaga

I le 1945, a o ou asia faapotopotoga, na ma masani ai ma Julia (Julie) Charnauskas i Providence, i Rhode Island. I le ogatotonu o le 1947, na ma mafaufau ai e faaipoipo. Sa ou fiafia tele i le auaunaga i Peteli, ae i lenā taimi, e leʻi iai se fuafuaga e aumai se paaga faaipoipo e auauna i inā. O lea, na ou tuua ai Peteli iā Ianuari 1948, ma na ma faaipoipo ai ma Julia. Sa maua laʻu galuega faavaitaimi i se supa maketi i Providence, ma amata ai loa ona ma paeonia faatasi.

Iā Setema 1949, na valaaulia ai mo le galuega matagaluega i le itu i mātū i sisifo o Wisconsin. Sa avea o se suiga tele mo i maʻua ma Julie le talaʻi e tele lava i aai laiti ma nofoaga taulalata ane e tausia ai lafu povi. Sa uumi ma mālūlū le tau malūlū, o le tele lava o vaiaso, e matuā mālūlū lava ma e toʻa ai le kiona. E leʻi iai sa ma taavale. Ae peitaʻi, sa masani ona ave i maʻua e se tasi i lana taavale i le isi faapotopotoga.

E leʻi umi talu ona ou amata i le galuega matagaluega, ae faia loa sa matou fonotaga matagaluega. Ou te manatua, sa ou matuā siakiina mea uma ina ia faamautinoa ua lelei, lea sa faapopoleina ai nisi. O lea, na faamatala mai ai ma le agalelei e le ovasia itumalo o Nicholas Kovalak e faapea, e masani lava ona faia e uso mea i a latou lava auala ma e lē manaʻomia ona ou popole fua e faia mea i se auala patino. Talu mai lenā taimi, sa aogā lenā fautuaga iā te aʻu i le feagai ai ma le tele o tofiga.

I le 1950, na ou maua ai se tofiga mo se vaitaimi, o le vaaia lea ma le saunia o āpi mo sui  usufono mo le uluaʻi tauaofiaga o a tatou tauaofiaga tetele i le Yankee Stadium i le aai o Niu Ioka. Sa matuā faafiafiaina tagata uma i lenei tauaofiaga mai lava i le amataga seʻi oo i le faaiʻuga, e 67 atunuu na ō mai ai sui usufono, ma o se tumutumuga e 123,707 na auai! Ina ua uma le tauaofiaga, na toe faaauau ai ona ma galulue ma Julie i le faiva femalagaaʻi. Sa matuā faafiafiaina i maʻua i le galuega matagaluega. Ae peitaʻi, sa iai lo ma lagona, ua tatau ona faaavanoa atu i maʻua mo se isi vala o le faiva faataimi atoa. O lea, sa ma faatutumuina ai ia pepa talosaga i tausaga taʻitasi mo le auaunaga i Peteli faapea foʻi le auaunaga faamisionare. I le 1952, na matuā faafiafiaina i maʻua ina ua maua lo ma valaaulia e auai i le vasega lona 20 o le Aʻoga Faale-Tusi Paia a le Olomatamata o Kiliata, lea na toleni ai i maʻua i le galuega faamisionare.

Auaunaga i Isi Atunuu

I lo ma faauuga i le 1953, na tofia ai i maʻua i Peretania, o i inā na ou auauna ai o se ovasia itumalo i le itu i saute o Egelani. Ae e leʻi atoa so ma tausaga i lenei galuega, lea sa ma fiafia tele i ai ma Julie. Ae na faateʻia i maʻua ina ua maua lo ma tofiga e ma te ō i Tenemaka. Sa manaʻomia tele ai se ovasia fou e vaaia le ofisa o le lālā. Talu ai sa ou latalata atu i ai, ma sa toleniina foʻi aʻu i galuega faapena i Brooklyn, na auina atu ai aʻu ou te fesoasoani i inā. Na ma ō atu i se vaa i Netherlands, ma puʻe ai se nofoaafi ma te ō atu ai i Copenhagen, i Tenemaka. Na ma taunuu i inā iā Aokuso 9, 1954.

O se tasi o faafitauli na feagai ai i inā, ua lē fia talia e nisi sa i tulaga maualuluga faatonuga mai le ofisa ulu i Brooklyn. E lē gata i lea, o le toʻatolu mai le toʻafā o ē na faaliliuina a matou lomiga i le gagana Tenemaka, ua ō ese mai Peteli, ma ua lē toe auaufaatasi ma Molimau a Ieova. Ae na tali mai Ieova i a matou tatalo. O paeonia e toʻalua o  Jørgen ma Anna Larsen, sa galulue faavaitaimi i le faia o faaliliuga, na faaavanoa i laʻua mo le auaunaga faataimi atoa. O lea na toe faaauau ai le faaliliuina o a matou mekasini i le gagana Tenemaka e aunoa ma le misia o se lomiga. O loo galulue ai pea ia le uso ma le tuafafine Larsen i Peteli i Tenemaka, ma ua avea Jørgen ma sooupu o le Komiti o le Lālā.

O asiasiga e lē aunoa a le uso o Knorr, sa avea ma faalaeiauga iā i matou i na tausaga. E talatalanoa o ia ma tagata taʻitoʻatasi, faamatala ia tala i mea tutupu ua malamalama ai i auala e feagai ai ma faafitauli. I sana asiasiga i le 1955, na filifili ai o le a fausia se lālā fou ma ni fale lomitusi ina ia saunia ai mekasini mo tagata Tenemaka. Na maua se fanua i le itu i mātū o le aai o Copenhagen, ma i le taumāfanafana o le 1957, na matou see atu ai i le fale fou faatoʻā uma ona fausia. O Harry Johnson, ma lana avā o Karin ia faatoʻā taunuu atu i Tenemaka ina ua uma ona faauu mai le vasega lona 26 o Kiliata, na fesoasoani i le faagaoioia o masini lomitusi.

Sa faaleleia la matou faalapotopotoga ina ia mafai ona faia ai ni tauaofiaga tetele i Tenemaka, ma sa aogā le poto masani lea na ou maua a o ou galue i le faamaopoopoina o tauaofiaga i le Iunaite Setete. I le 1961, na talimālō ai la matou tauaofiaga tele faavaomalo lea na faia i Copenhagen i sui usufono mai atunuu e sili atu ma le 30. O le tumutumuga o i latou na auai e 33,513. I le 1969, na matou talimālō ai i se tauaofiaga aupito sili ona telē lea na faia i atunuu o Europa, o le tumutumuga o ē na auai, e 42,073!

I le 1963, na valaaulia ai aʻu ou te auai i le vasega lona 38 o Kiliata. O se fesuiaʻiga lenei o le aʻoga na faia mo le sefulu masina sa fuafuaina faapitoa mo le toleniina o tagata e faigaluega i lālā. O se fiafiaga le toe faatasi atu i le aiga Peteli i Brooklyn, ma maua ai foʻi aogā mai le poto masani o i latou ua loa tausaga o galulue i le tausia ma le vaavaaia o le faagaoioia o le ofisa ulu.

Ina ua uma lenei aʻoga na toleni ai aʻu, na ou toe foʻi atu i Tenemaka e faaauau ona faia tiute tauave i inā. E lē gata i lea, sa ou maua se faaeaga e avea ma ovasia o le sone, e asiasia ia lālā i le itu i sisifo ma mātū o Europa. Sa avatu ai faalaeiauga i tagata ma fesoasoani iā i latou ina ia faataunuuina o latou tiute tauave. Sa ou faia foʻi talu ai nei lenei galuega i Aferika i Sisifo ma le Karipiane.

I le faaiʻuga o tausaga o le 1970-1979, na amata ai ona saʻili e uso i Tenemaka se fanua ina ia mafai ona fausia ai se fale e faatelē atu i ai le ofisa faaliliu ma le galuega o le lolomiina o tusi. Na maua se fanua lelei e tusa ma le 40 maila (60 kilomita) i le itu i sisifo o Copenhagen. Sa matou galulue faatasi ma isi i le fuafuaina ma le tusiaina o le ata o lenei fale fou, ma sa ma faamoemoe ma Julie e matou te nonofo faatasi ma le aiga Peteli i lenei fale fou manaia. Ae peitaʻi, e lē o le mea lenā na iai.

Toe Foʻi i Brooklyn

Iā Novema 1980, na valaaulia ai i maʻua ma Julie e ma te auauna i Peteli i Brooklyn, ma na ma taunuu i inā i le amataga o Ianuari 1981. O le taimi lenā, ua toeitiiti lava atoa lo ma taʻi 60. Ae talu ai, na toetoe lava o le ʻafa o o ma olaga na matou auauna faatasi ai ma o ma uso ma tuafāfine pele i Tenemaka, sa faigatā iā i maʻua ona toe foʻi atu i le Iunaite Setete. Peitaʻi, ma te leʻi nofonofo ai i le mea na ma filifilia ae sa taumafai e tepa taulaʻi atu i lo ma tofiga ua iai ma ni luʻi e ono tulaʻi mai ai.

Na ma taunuu i Brooklyn ma nonofo ai. Na tofia Julie e galue i le ofisa o tupe, e faia galuega e tutusa ma galuega sa ia galue ai i Tenemaka. Na tofia aʻu i le Matagaluega e Tusiaina mataupu, ou te fesoasoani i le faia o le faasologa o a tatou lomiga. I le amataga o tausaga o le 1980-1989, na suia ai le faagaoioia o mea i Brooklyn, na suia ai  mai le faaaogāina o laau lomitusi i le faaaogāina o komepiuta ma masini lomitusi. Ou te leʻi iloa lava se mea e uiga i komepiuta, ae na maua si oʻu malamalama ona o taualumaga a le faalapotopotoga ma le galulue faatasi ma tagata.

E leʻi pine lava mulimuli ane, ae tulaʻi mai foʻi se manaʻoga ina ia faamalosia le faamaopoopoina o le Matagaluega Tusiata a o agaʻi atu i le faaaogāina o masini faapitoa e tusia ai ata felanulanuaʻi. E ui e leai soʻu tomai e pei o se tagata tusiata, ae sa mafai ona ou fesoasoani i le faamaopoopoina o le matagaluega. O lea sa ou maua ai le faaeaga e vaavaaia lenā matagaluega mo le iva tausaga.

I le 1992, na tofia ai aʻu ou te fesoasoani i le Komiti e Lomiaina tusi a le Vaega Pule, ma na siitia atu ai i le Ofisa o Tupe. I inā sa faaauau ai ona ou auauna e fesootaʻi atu ma gaoioiga e faaaogā ai tupe a Molimau a Ieova.

Auaunaga Mai Lava a o Ou Talavou

Mai lava a o ou talavou ma i le faagasologa o le 70 tausaga o laʻu auaunaga tuutoina, na aʻoaʻoina ai ma le onosai aʻu e Ieova e ala i lana Afioga, le Tusi Paia, faapea uso loto fesoasoani i lana faalapotopotoga ofoofogia. Sa ou olioli i le sili atu i le 63 tausaga i le faiva faataimi atoa, ma le sili atu i le 55 o na tausaga sa ma auauna faatasi ai ma si aʻu avā pele, o Julie. O le mea moni, ua ou lagona ua matuā faamanuiaina aʻu e Ieova.

I tuā i le 1940 ina ua ou tuua loʻu aiga ma ulu atu i le auaunaga faapaeonia, sa ula mai loʻu tamā i laʻu filifiliga lea na fai ma faapea mai: “Atalii, afai e te tuua le aiga ae fai le mea lenā, aua neʻi e manatu e te sulu mai iā te aʻu mo se fesoasoani.” I le faagasologa o tausaga, ou te leʻi faia lava lenā mea. Sa saunia ma le aao mafola e Ieova mea uma na ou manaʻomia, e masani lava ona ala mai i uso Kerisiano loto fesoasoani. Mulimuli ane, na oo ina faaaloalogia e loʻu tamā la tatou galuega, ma sa oo foʻi ina faia ni laasaga agaʻigaʻi i luma e aʻoaʻoina upu moni o le Tusi Paia a o leʻi maliu o ia i le 1972. A o loʻu tinā o lē na maua le faamoemoe o le ola faalelagi, sa faaauau pea ona auauna faamaoni iā Ieova seʻia oo i lona maliu i le 1985, ina ua 102 ona tausaga.

E ui lava e mapuna aʻe faafitauli i le auaunaga faataimi atoa, ae ma te leʻi manatu lava ma Julie e tuua lo ma tofiga. Sa tausia pea i maʻua e Ieova e tusa ai ma lenei faaiʻuga. E ui lava ua matutua oʻu mātua ma manaʻomia se fesoasoani, ae na mafai e loʻu tuafafine o Victoria Marlin, ona tausia ma le agalelei i laʻua. E ma te loto faafetai tele i lana fesoasoani alofa lea na mafai ai ona ma faaauau i le faiva faataimi atoa.

Sa lagolagosua faamaoni Julie iā te aʻu i o ma tofiga uma lava, ona o le manatu e faapea, o se vaega lenei o le tuuina atu o ia lava iā Ieova. E ui lava o lea ua 80 oʻu tausaga ma ua oo foʻi i faafitauli o le soifua mālōlōina, ae ou te lagona, ua matuā faatamaoaigaina i maʻua e Ieova. Ua matuā faalaeiauina lava aʻu i upu a le faisalamo o lē na faapea mai ina ua uma ona aʻoaʻoina o ia e le Atua mai lava a o talavou, na ia ole atu, ‘Le Atua e, aua e te tuulafoaʻi mai iā te aʻu e oo ina toeaina; seʻia ou faaali atu lou malosi i ē amuli uma lava.’—Salamo 71:17, 18.

[Faamatalaga pito i lalo]

[Ata i le itulau 20]

I maʻua ma loʻu tinā i le 1940, ina ua amata ona ou paeonia

[Ata i le itulau 21]

I matou ma aumea paeonia o Joe ma Margaret Hart

[Ata i le itulau 23]

Le aso o la ma faaipoipoga iā Ianuari 1948

[Ata i le itulau 23]

I matou ma uso na matou vasega faatasi i Kiliata i le 1953. Mai le taumatau i le agavale: O Don ma Virginia Ward, Geertruida Stegenga, ma i maʻua ma Julie

[Ata i le itulau 23]

I matou ma Frederick W. Franz ma Nathan H. Knorr i Copenhagen, i Tenemaka, 1961

[Ata i le itulau 25]

I maʻua ma Julie i aso nei