E Tāua le Faatuatuaina o Isi Ina ia Fiafia Ai

O LE onā i meaʻai e matuā maʻi ai lava. O se tagata e fai ma onā i meaʻai, e moomia ona faaeteete i mea e taumafa ai. Peitaʻi, e lē o se filifiliga atamai le lē toe taumafaina o meaʻai ina ia ʻalofia ai le lamatiaga o le onā i meaʻai. O le faia faapea, e atili ai ona lē lelei le soifua mālōlōina o se tagata. E lē mafai ona soifua umi se tagata e aunoa ma meataumafa.

I se tulaga talitutusa, e tigā foʻi o tatou faalogona pe a ʻolegiaina i tatou e se tasi tatou te faatuatuaina. E tatou te faaeteete i ē tatou te aumea i ai, pe afai ua ʻolegiaina soo i tatou e se tasi tatou te faatuatuaina. Peitaʻi e lē o se vaifofō le vavae ese atoatoa mai tagata ina ia ʻalofia ai le lē fiafia ona o le lē faamaoni mai o isi. Aiseā? Auā foʻi o le lē faatuatuaina o isi e aveesea ai lo tatou fiafia. Ina ia ola i ni olaga faamalieloto, e tatou te moomia ni faiā fefaatuatuaaʻi ma isi.

Na faapea mai le tusi Jugend 2002: “O le faatuatuaina o isi, o se faavae lelei lenā mo a tatou feutagaʻiga ma tagata i aso faisoo.” Na lipotia mai e le nusipepa Neue Zürcher Zeitung e faapea: “E faanaunau tagata uma i ni faiā maufaatuatuaina. . . . E faaleleia le olaga pe a faatuatuaina isi” ma “e tāua tele ona soifua ai.” O le mea moni, na toe fai mai le nusipepa, a aunoa ma le faatuatuaina o isi, “e lē mafai ona soifua ma le manuia se tagata.”

Talu ai o loo iā i tatou le faanaunauga masani e faatuatuaina isi, o ai la e mafai ona tatou faatuatuaina e aunoa ma le popole, ina neʻi lē faamaoni i ana folafolaga?

Ia E Faatuatua iā Ieova ma Lou Loto Atoa

Ua taʻu mai e le Tusi Paia iā i tatou: “Ia e faatuatua iā Ieova ma lou loto atoa.” (Faataoto 3:5) O le mea moni, ua faalaeiauina pea i tatou e le Afioga a le Atua ina ia tatou faatuatua i Lē na Foafoaina i tatou, o Ieova le Atua.

Aiseā e mafai ai ona tatou faatuatuaina le Atua? Muamua, auā o Ieova o le Atua paia. Na tusi le perofeta o Isaia: “E paia, e paia, e paia Ieova.” (Isaia 6:3) Pe e te lē naunau ea i mea paia? O le mea moni, e tatau ona e naunau i ai auā o le tulaga paia o Ieova o lona uiga e mamā o ia, e lē amio leaga ma e matuā maufaatuatuaina. E lē mafai ona faapiʻopiʻo ana feutagaʻiga pe soona faia foʻi isi, ma e lē mafai ona ia faia se mea e faaleagaina ai lo tatou faatuatuaina o ia.

E lē gata i lea, e mafai ona tatou faatuatuaina  le Atua ona o lona malosi, ma lona naunautaʻiga e lagolagoina ana auauna. O se faaaʻoaʻoga, o le tele o lona mana ua mafai ai ona gaoioi o ia. O lana faamasinotonu ma lona atamai lelei atoatoa ua taʻitaʻia ai ana gaoioiga. E lē gata i lea, o lona alofa lē mafaatusalia e māfua ai ona gaoioi o ia. Na tusi le aposetolo o Ioane “o le Atua, o le alofa lava ia.” (1 Ioane 4:8) O le alofa o le Atua e faaaafia ai mea uma lava na te faia. Ua avea Ieova ma Tamā lelei atoatoa ona o lona paia ma isi ona uiga matagofie, ma o sē e mafai ona tatou faatuatuaina atoatoa. E leai se mea po o se tasi e sili atu lona maufaatuatuaina na i lo Ieova.

Ia Faatuatuaina Ieova ma Fiafia Ai

O se isi māfuaaga lelei e faatuatuaina ai Ieova, auā foʻi e sili atu lona silafia o i tatou na i lo se isi. E na te silafia o loo iai se faanaunauga masani i tagata taʻitoʻatasi, ina ia iai pea i se faiā mausalī ma maufaatuatuaina ma Lē na Foafoaina Mea. O i latou e iai i se faiā faapena e latou te lagonaina le malu puipuia. Na faapea mai le tupu o Tavita: “Amuia le tagata o lē faatuatua iā Ieova.” (Salamo 40:4) E faitau miliona tagata i aso nei ua ioe i le manatu o Tavita.

Seʻi tōmanatu foʻi i ni faaaʻoaʻoga. Na soifua Torise i le Dominican Republic, Siamani, Eleni ma le Iunaite Setete. Na fai mai o ia: “O se fiafiaga iā te aʻu loʻu faatuatuaina o Ieova. E na te silafia le auala e tausi ai aʻu i le itu faaletino, faaleagaga atoa foʻi ma oʻu faalogona. O Ia o le uō e sili ona lelei.” Na faapea mai se loia e suafa iā Wolfgang: “O se tulaga matagofie le mafai ona e faalagolago i se tasi o loo naunau i mea e te lelei ai, ma o se tasi e mafai—ma o le a ia faia moni lava—le mea e sili ona lelei mo oe!” Na fai mai Hamo o lē na fanau i Asia ae o loo aumau i Europa: “Ou te mautinoa o loo i aao o Ieova mea uma lava, ma e lē sesē se mea na te faia, o lea la, o se fiafiaga iā te aʻu le faalagolago iā te ia.”

O le mea moni, e moomia e i tatou taʻitoʻatasi ona faatuatuaina Lē na Foafoaina i tatou ma faatuatuaina foʻi tagata. O lea la, ua aumaia e la tatou uō atamai o Ieova, ni fautuaga i ituaiga o tagata e ao ona tatou faatuatuaina. E ala i le faitauina lelei o le Tusi Paia, ua mafai ai ona tatou mātauina ana fautuaga e tusa ai ma lenei mataupu.

O Tagata e Mafai Ona Tatou Faatuatuaina

Na tusi le faisalamo e faapea: “Aua tou te faatuatua i alii, po o le fanau a tagata, e lē o i ai se olataga.” (Salamo 146:3) Ua fesoasoani lenei faamatalaga mai le Atua ina ia tatou iloa ai, e lē tatau ona tatou tuu lo tatou faatuatuaga i le toʻatele o tagata. E oo lava iā i latou e vaai maualuga i ai le lalolagi o “alii” o lenei lalolagi, e pei o ē ua loa lo latou silafia i ni matātā faapitoa, e lē faapea e tatau ona tatou faatuatuaina i latou. O o latou manatu e masani ona taʻitaʻisesēina ai, ma o le faatuatuaina o na “alii” e mafai ona avea ma tulaga tatou te faanoanoa ai.

E moni e lē faapea ai o le a tatou lē faatuatuaina tagata uma. Peitaʻi, e moomia ona tatou filifili lelei ē tatou te faatuatuaina. O ā ni taʻiala e mafai ona tatou mulimuli i ai? E ono fesoasoani iā i tatou le faaaʻoaʻoga mai anamuā i le nuu o Isaraelu. Ina ua moomia ona tofiaina ni tagata e  tauaveina ni tiute tauave mamafa i Isaraelu, na fautuaina Mose ina ia “filifili foʻi ai le nuu atoa ni tagata o loto tetele, o ē matataʻu i le Atua, o tagata faamaoni [“maufaatuatuaina,” NW], ma e ʻinoʻino i le manumanu.” (Esoto 18:21) O le ā e mafai ona tatou aʻoaʻoina mai lenei mea?

Na muaʻi faaalia e tane nei, uiga patino e pei o uiga o le Atua, a o leʻi filifilia i tofiga maufaatuatuaina. Ua uma ona latou faamaonia lo latou matataʻu i le Atua; na latou faaalia le migao i Lē na Foafoaina Mea ma e matataʻu ina neʻi faatigā iā te ia. Na manino i tagata uma e faapea na faia e tane nei le mea silisili na latou mafaia, e sapasapaia ai tapulaa a le Atua. Na inoino i latou i le manumanu po o le matapeʻapeʻa, e faailoa ai le lelei o a latou amio lea o le a taofia ai i latou mai le faia o mea faapiʻopiʻo ona o le iai o le pule. Latou te lē soonafai le faatuatuaga na tuu atu iā i latou ina ia faataunuu ai mea na latou mananaʻo ai, po o mea na mananaʻo ai foʻi o latou aiga ma uō.

Pe lē o se gaoioiga atamai ea lo tatou faaaogāina o taʻiala faapena i aso nei, i le filifilia o i latou e tatou te faatuatuaina? Pe tatou te iloaina ni tagata e faaalia le mataʻu i le Atua i a latou amio? Po o latou maumauaʻi ea e tausisi i tapulaa tau amio a le Atua? Pe latou te faamaoni e sōsō mamao ese mai le faia o mea sesē? Pe latou te faia le mea saʻo e ala i le lē suia faatogafitia o se mea mo lo latou lelei, pe ina ia fai ai le mea o loo loto i ai? E mautinoa, o tane ma fafine e faaalia uiga faapena, ua tatau i ai lo tatou faatuatuaga.

Aua le Lotovaivai Ona o Mea Sesē i Nisi o Taimi

E tatau ona tatou onosai pe a filifilia ē e mafai ona tatou faatuatuaina, auā foʻi e umi se taimi ona faatoʻā maua lea o ni faiā maufaatuatuaina. O le gaoioiga atamai, o le faifai mālie lea ona tuu atu lo tatou faatuatuaga i se isi. E faapefea? E tatou te ono mātauina le amio a se tagata a o faagasolo le taimi, ia mātau le auala e gaoioi ai i tulaga eseese. Pe e faamaoni o ia i mea iti? O se faaaʻoaʻoga, pe na te tausi i lana upu e toe faafoʻi ni mea na ia faanoi i ai, ma pe e tausi taimi? Afai o lea, tatou te ono lagona e mafai ona tatou faatuatuaina o ia i nisi o mataupu e sili atu lo latou tāua. E ōgatusa lenei manatu ma le mataupu silisili: “O lē faamaoni i le mea itiiti, e faamaoni foʻi o ia i mea e tele.” (Luka 16:10) O le filifili lelei ma le onosai, e ono fesoasoani iā i tatou e ʻalofia ai le tigā o o tatou loto.

Ae ā pe a tuulafoaʻia i tatou e se tasi tatou te faatuatuaina? O loo manatua e tagata aʻoga o le Tusi Paia le pō na puʻe faapagota ai Iesu Keriso, lea na tuulafoaʻia ai o ia e ona aposetolo. Na faalataina o ia e Iuta le Sekara ma na sosola ese isi o ona aposetolo ona o le fefefe. Na faatolu foʻi ona faafitia e Peteru Iesu. Ae na silafia e Iesu, e na o Iuta lava na gaoioi ma le loto i ai. O le tuulafoaʻia o ia i lenā taimi iloga, e leʻi taofia ai Iesu mai le toe faamautinoa atu o lona faatuatuaina o aposetolo e toʻa 11 o loo totoe, i ni nai vaiaso mulimuli ane ai. (Mataio 26:45-47, 56, 69-75; 28:16-20) O i tatou foʻi, afai ua foliga mai ua ʻolegia pe faalataina i tatou e isi, e tatau la ona tatou mafaufau po o se faamaoniga lenā o se tagata e lē maufaatuatuaina, pe o se mea na tupu faafuaseʻi ona o se vaivaiga o lea tagata.

Po o Aʻu o se Tagata Maufaatuatuaina?

O se tasi e taumafai e filifili lelei i ē e tuu atu i ai lona faatuatuaga, e tatau ona faamaoni o ia ma fesili ifo iā te ia lava: ‘Po o aʻu ea o se tagata maufaatuatuaina? O ā ni tapulaa talafeagai o le faatuatuaina o isi e tatau ona ou ausia ma e tatau foʻi ona ausia e isi?’

E mautinoa o se tagata maufaatuatuaina e masani ona tautala faamaoni. (Efeso 4:25) E lē fetuutuunaʻi ana faamatalaga ina ia talafeagai ma ē o loo latou talatalanoa ina ia maua ai sana mea aogā. A faapea e ioe i se mea, o le tagata maufaatuatuaina la e na te faia mea uma lava ina ia tausi ai i ana upu. (Mataio 5:37) A faapea e faailoa atu e se tagata iā te ia se faafitauli, o le tagata maufaatuatuaina e na te lē toe faamatalaina atu lenā faafitauli i se isi ma e lē faitatala foʻi. O le tagata maufaatuatuaina e faamaoni i lana paaga faaipoipo. E lē matamata o ia i ata lē mamā, e lē mafaufau pea i le faamalieina o ona tuʻinanauga taufeusuaʻiga, ma e lē faatafai solo i le isi itu pa. (Mataio 5:27, 28) O le tagata ua tatau i ai lo tatou faatuatuaga, e filigā o ia e galue auā le tausia o ia ma lona aiga ma e na te lē saʻilia ni  auala faigofie e maua ai tupe, e ala i le faaaogāina o isi tagata. (1 Timoteo 5:8) O le manatuaina o na tapulaa talafeagai o le Tusi Paia, o le a fesoasoani iā i tatou ina ia iloa ai ituaiga o tagata e mafai ona tatou faatuatuaina. E lē gata i lea, o le tutusa o tapulaa tau amio tatou te mulimuli i ai, o le a fesoasoani iā i tatou taʻitoʻatasi ina ia faatuatuaina ai i tatou e isi.

O se fiafiaga le soifua i se lalolagi e maufaatuatuaina tagata uma, ma aveesea ai le lē fiafia ona o le ʻolegiaina e se tagata na tuu i ai le faatuatuaga! Pe na o se miti ea lenā tulaga? E leai, aemaise lava mo tagata o loo faatāuaina folafolaga a le Tusi Paia, auā o loo valoia mai e le Afioga a le Atua le oo mai o se “lalolagi fou” matagofie e aunoa ma se taufaasesē, pepelo, le faaaogāina o isi, le faanoanoa, maʻi ma le oti! (2 Peteru 3:13; Salamo 37:11, 29; Faaaliga 21:3-5) Pe e lē sili atu ea ona aogā le saʻiliʻili atu mo ni faamatalaga atili e uiga i lenā faamoemoe? E fiafia Molimau a Ieova e faailoa atu nisi o faamatalaga e uiga i lenei mataupu, atoa foʻi ma isi mataupu tāua.

[Ata i le itulau 4]

O le lē faatuatuaina o isi e aveesea ai lo tatou fiafia

[Ata i le itulau 5]

E matuā talafeagai ona tuu atu lo tatou faatuatuaga iā Ieova

[Ata i le itulau 7]

E moomia uma lava e i tatou ni faiā fefaatuatuaaʻi ma isi