Fesili Mai le ʻAufaitau

Aiseā na talosaga atu ai Elisaia iā Elia e faapea, “ia faalua mai lou agaga iā te aʻu”?

A o toetoe lava faamāeʻa e Elia lona tofiga o se perofeta iā Isaraelu, na talosaga atu le perofeta laʻitiiti o Elisaia iā te ia e faapea: “Ia faalua mai lou agaga iā te aʻu.” (2 Tupu 2:9) I le tulaga faaleagaga, e foliga mai na talosagaina e Elisaia ia vaega e lua e pei ona tuuina atu i se atalii ulumatua. (Teuteronome 21:17) O le iloiloina puupuu o lenei faamatalaga, o le a faamanino ai lenei mea ma fesoasoani iā i tatou e aʻoaʻo ai ni lesona mai mea na tutupu.

I le ōgatusa ma le faasinoga a Ieova, na faauuina ai e le perofeta o Elia ia Elisaia e sosoo ma ia. (1 Tupu 19:19-21) Pe tusa ma le ono ni tausaga na auauna ai Elisaia o se tautua faamaoni iā Elia, ma maumauaʻi o ia e faia lenei galuega seʻia oo i le iʻuga. E oo lava i le toe aso o Elia o se perofeta iā Isaraelu, sa mulimuli pea Elisaia i lona faiaʻoga ma lona faufautua. E ui lava sa uunaʻi malosi e Elia ia Elisaia ina ia aua neʻi toe mulimuli atu iā te ia, ae na faatolu ona fai atu le perofeta: “Ou te lē tuua lava oe.” (2 Tupu 2:2, 4, 6; 3:11) O le mea moni, sa vaai Elisaia i le perofeta matua o sona tamā faaleagaga.—2 Tupu 2:12.

Ae peitaʻi, e lē na o Elisaia se soo faaleagaga o Elia. Sa auaufaatasi Elia ma Elisaia ma se vaega o tane na taʻua “o soo o le ʻau perofeta.” (2 Tupu 2:3) Ua faaalia i le faamatalaga i le Lua Tupu e faapea, sa māfana foʻi le faiā a nei “soo” po o atalii ma lo latou tamā faaleagaga, o Elia. (2 Tupu 2:3, 5, 7, 15-17) Ae peitaʻi, ona o Elisaia o le sui na faauuina e sosoo ma Elia, ua sili ai Elisaia i atalii faaleagaga o Elia, sa pei o ia o se atalii ulumatua. I Isaraelu anamua, na maua e se ulumatua faaletino ia vaega e lua o mea uma a lona tamā, ae na o le tasi le vaega na maua e isi atalii. I lea, na talosagaina ai e Elisaia ni vaega se lua o tofi faaleagaga o Elia.

Aiseā na faia ai e Elisaia lea talosaga i lenā lava taimi? Auā o lea o le a ia tauaveina se galuega mamafa, o le avea ma perofeta i Isaraelu e sui iā Elia. Ina ia faataunuuina tiute tauave e fesootaʻi atu ma lenei tofiga matuā telē, sa iloa e Elisaia e na te manaʻomia se malosi faaleagaga e sili atu na i lo o lona lava malosi, lea e na o Ieova e mafai ona foaʻiina mai. Sa manaʻomia ona lē mataʻu o ia e pei ona sa faia e Elia. (2 Tupu 1:3, 4, 15, 16) O lea, na ia talosaga atu ai ina ia faaluaina mai iā te ia le agaga o Elia, le agaga o le lototele ma le “matuā maelega . . . ona o Ieova,” o uiga manaʻomia e atiina aʻe e le agaga o le Atua. (1 Tupu 19:10, 14) Na faapefea ona tali atu Elia?

Sa iloa e Elia na talosaga atu Elisaia i se mea e lē o sana mea ae e na o le Atua e iai le pule e tuuina mai ai. O lea na tali saʻo atu ai Elia: “O le mea faigatā ua e fai mai ai; afai e te iloa mai aʻu pe a aveeseina aʻu iā te oe, ona faapea lea iā te oe.” (2 Tupu 2:10) O le mea moni, na faataga e Ieova ia Elisaia e vaai i le alu aʻe o Elia i se asiosio. (2 Tupu 2:11, 12) Na talia le talosaga a Elisaia. Na tuuina atu e Ieova iā te ia le agaga na ia manaʻomia e tauaveina ai lana galuega fou ma ia faafesagaʻia ai tofotofoga i le lumanaʻi.

I aso nei, ua mafai e Kerisiano faauuina (ua taʻua i nisi taimi o le vasega ua faaata mai e Elia) ma auauna a le Atua ona maua le tele o faalaeiauga mai lenei tala faale-Tusi Paia. I nisi taimi, atonu e lofitūina i tatou ma lagona le lē agavaa pe a feagai ma se tofiga fou, po ua lagona foʻi le faavaivai e faaauau pea i la tatou galuega talaʻi o le Malo, a o fesagaʻi ma le faateleina o le lē ano mai o tagata po o teteega i la tatou oganuu. Ae peitaʻi, afai e tatou te talosaga atu mo le lagolagosua a Ieova, o le a ia foaʻiina mai le agaga paia iā i tatou e pei ona tatou manaʻomia ina ia mafai ai ona fesagaʻia ia luʻi, ma tulaga fesuisuiaʻi. (Luka 11:13; 2 Korinito 4:7; Filipi 4:13) Ioe, e pei lava ona faamalosia e Ieova ia Elisaia mo le tauaveina o ona tiute tauave mamafa, o le a ia fesoasoani foʻi iā i tatou uma lava, talavou ma ē matutua ina ia faaiʻuina la tatou faiva.—2 Timoteo 4:5.