Ia Ati Aʻe se Agaga Limafoaʻi

E LEAI se tasi na fanau mai ma se agaga limafoaʻi. O le faanaunauga masani lava o se pepe, o le faamalie lea o ona lava manaʻoga, e aunoa ma le popole i manaʻoga o isi, e oo lava i lē o loo tausia o ia. Ae o le a iloa mulimuli ane e le tamaitiiti, e lē na o ia e iai manaʻoga. E tatau ona manatunatu i isi ma e tatau ona ia aʻoaʻoina e lē na o le manaʻo e aumai, ae ia iloa foʻi ona foaʻi ma tufa atu. E tatau ona ati aʻe le agaga o le limafoaʻi.

E lē o tagata uma e faia foaʻi, e iai le agaga limafoaʻi, e tusa lava pe masani ona latou foaʻi atu. E foaʻi atu nisi i se faalapotopotoga, atonu ina ia faataunuu ai mea o latou naunau e fai. A o isi, e foaʻi ona o le mananaʻo ina ia viia i latou e tagata. Ae peitaʻi, e ese le auala e foaʻi ai Kerisiano moni. O ā la vala o le foaʻi lea o loo faalaeiauina mai i le Afioga a le Atua? O le iloiloina puupuu o foaʻi ia na faia e Kerisiano o le uluaʻi senituri, o le a taliina ai lenei fesili.

Faaaʻoaʻoga o Foaʻi Faa-Kerisiano

O le foaʻi faa-Kerisiano e pei ona faamatalaina i le Tusi Paia, sa masani ona “agalelei  ma alolofa atu” ma fetufaaʻi mea ma isi o ē sa manaʻomia moni ni mea. (Eperu 13:16; Roma 15:26) E leʻi faia ona o le faatauanauina. Na tusi le aposetolo o Paulo: “Ia taʻitoʻatasi ma foaʻi e pei ona filifili i lona loto; aua ma le tigā, aua foʻi ma le faatauanauina; auā e alofa le Atua i lē ua foaʻi ma le loto malie.” (2 Korinito 9:7) E lē tatau foʻi ona faia le foaʻi ona o le faalialiavale. O le auala lenā na faia ai le foaʻi a Anania ma Safaira ma na oo ai i se iʻuga mataʻutia.—Galuega 5:1-10.

Na iai le manaʻoga mo ni foaʻi ina ua faapotopoto i Ierusalema le toʻatele o tagata Iutaia, ma tagata liulotu mai nofoaga maotua mo le faamanatuina o le tausamiga o le Penetekoso i le 33 T.A. I inā, na ‘faatutumuina foʻi i le Agaga Paia’ soo o Iesu, “ua afua ai ona tautala i gagana eseese.” Sa faapotopoto mai se motu o tagata e toʻatele iā i latou ma faalogo ai i le lauga faagaee loto a Peteru e uiga iā Iesu Keriso. Mulimuli ane, na vaaia ai e tagata le faamālōlōina e Peteru ma Ioane o le tagata pipili sa i le faitotoʻa o le malumalu, ma na latou toe faalogo ai i le lauga a Peteru e uiga iā Iesu ma e manaʻomia ona latou salamō. E toʻatele na salamō ma papatisoina e avea ma soo o Keriso.—Galuega, mataupu e 2 ma le 3.

Sa mananaʻo tagata fou faatoʻā liulotu ina ia nonofo ai pea i Ierusalema ma maua atili ai nisi faatonuga mai aposetolo o Iesu. Ae o le a faapefea ona tausia e le ʻauaposetolo manaʻoga o nei tagata uma? Ua taʻu mai e le Tusi Paia iā i tatou e faapea: “O i latou ua i ai fanua po o fale, ua latou faatauina, ua au mai foʻi le tau o mea na faatauina, ma tuu mai i le ʻau aposetolo e pule; ua tufatufa iā te i latou taʻitoʻatasi e faatatau i le mativa o le tagata.” (Galuega 4:33-35) O le mea moni, sa iai le agaga o le limafoaʻi i le faapotopotoga fou lea faatoʻā faavae i Ierusalema!

Mulimuli ane, na faaalia foʻi e isi faapotopotoga lea lava agaga limafoaʻi. O se faaaʻoaʻoga, e ui lava sa matuā matitiva ia Kerisiano i Maketonia, ae na latou faia mea uma e gata ai lo latou mafai e foaʻi atu ai ni meaalofa i o latou uso matitiva i Iutaia. (Roma 15:26; 2 Korinito 8:1-7) Sa matuā iloga le lagolagosua a le faapotopotoga i Filipi i le faiva a Paulo. (Filipi 4:15, 16) Sa tufatufa atu e le faapotopotoga i Ierusalema i aso faisoo meaʻai i fafine matitiva ua oti a latou tane, ma na tofia e le ʻauaposetolo ni tagata agavaa se toʻafitu e vaai ia aua neʻi galo fafine ua oti a latou tane i le tufatufaga.—Galuega 6:1-6.

Sa vave lava ona tali atu le uluaʻi faapotopotoga Kerisiano e ui lava i le oo ane o taimi faigatā. O se faaaʻoaʻoga, ina ua valoia e le perofeta o Akapo le oo mai o se oge tele, o le ʻausoo sa i le faapotopotoga i Anetioka i Suria na ‘filifili lea, e taʻitoʻatasi, ia faatatau i mea ua manuia ai, e avatu ai se alofa i le ʻau uso o nonofo i Iutaia.’ (Galuega 11:28, 29) Maʻeu se agaga lelei na latou faaalia ina ia fesoasoani ai i manaʻoga o isi!

O le ā na uunaʻia ai ia uluaʻi Kerisiano e limafoaʻi ma agalelei? Ioe, e faapefea ona maua e se tasi le agaga o le limafoaʻi? E tele mea e mafai ona tatou aʻoaʻoina pe a iloiloina le faaaʻoaʻoga a le tupu o Tavita.

Le Lagolagosua Limafoaʻi a Tavita i le Tapuaʻiga Moni

E toetoe lava 500 tausaga o leai se nofoaga tumau o le atolaau o le feagaiga, lea sa faailoa ai le afio ai o Ieova. Sa tuu i se faleʻie, po o le fale fetafaʻi lea sa feaveaʻi mai lea nofoaga i lea nofoaga a o feoaʻi le nuu o Isaraelu i le vao, ma ō atu ai i le Nuu o le Folafolaga. Sa matuā naunau le tupu o Tavita e ave le atolaau mai le faleʻie lea na tuu ai ma fausia se fale talafeagai mo Ieova ma tuu ai le atolaau paia. Ina o talanoa atu i le perofeta o Natano, na faapea atu Tavita: “Faauta, ua ou nofo i le fale arasi, a o le atolaau o le feagaiga a Ieova, ua i lalo o ie puipui.”—1 Nofoaiga a Tupu 17:1.

Ae talu ai sa avea Tavita o se tagata o taua. O lea na poloaʻi ai Ieova, o le a fausia e lona atalii o Solomona le malumalu e tuu ai le  atolaau o le feagaiga i le taimi o lana pulega filemu. (1 Nofoaiga a Tupu 22:7-10) Ae peitaʻi, e leʻi taofia ai i lenei mea le agaga limafoaʻi o Tavita. Sa ia faamaopoopoina ni tagata malolosi ma aauina atu e aumai mea e fausia ai le malumalu. Na ia taʻu atu mulimuli ane iā Solomona e faapea: “Faauta foʻi, ua saunia e aʻu ma loʻu tigā, mo le fale o Ieova o taleni o auro e selau o afe, ma taleni o ario e afe o afe, ma ʻapa memea ma uʻamea e lē fuatia ina ua tele lava; ua ou saunia foʻi laau ma maa.” (1 Nofoaiga a Tupu 22:14) E leʻi faamalieina ai Tavita i na mea, ae na ia avatu mai i ana lava oloa ia auro ma ario e tusa lona tau i aso nei ma le US$1,200,000,000. E lē gata i lea, sa faia foʻi e alii sili ni foaʻi. (1 Nofoaiga a Tupu 29:3-9) O le mea moni, na faaalia e Tavita le agaga limafoaʻi!

O le ā na uunaʻia ai Tavita e foaʻi atu ma le matuā limafoaʻi? Sa ia iloa o mea uma na ia maua ma faataunuuina, o faamanuiaga mai iā Ieova. Sa ia faailoa mai i le tatalo lenā mea e faapea: “Ieova e, lo matou Atua, o le oloa uma nei ua saunia e i matou e fai aʻi se fale mo oe, mo lou suafa paia, e mai iā te oe ia,  o au mea uma foʻi ia. Loʻu Atua e, ua ou iloa o oe e te suʻesuʻe i le loto, ma ua e fiafia i le amiotonu. O aʻu nei, o le faamaoni o loʻu loto ua ou foaʻiina atu ai ma le fiafia o nei mea uma lava; o lenei, ua ou vaai atu ma le fiafia i loʻu nuu, o nonofo mai i inei e fai taulaga iā te oe ma le loto.” (1 Nofoaiga a Tupu 29:16, 17) Sa matuā tāua iā Tavita lana faiā ma Ieova. Sa ia iloa e manaʻomia ona auauna i le Atua “ma le loto atoa ma le loto fiafia,” ma sa fiafia o ia e faia faapea. (1 Nofoaiga a Tupu 28:9) O vala lava foʻi nei na māfua ai ona faaalia e uluaʻi Kerisiano le agaga limafoaʻi.

O Ieova o le Foaʻi Silisili

O Ieova o le faaaʻoaʻo aupito sili o le agaga limafoaʻi. E alofa ma manatu mai o ia, “na te faaoso i lona la i ē ua amio leaga atoa ma ē ua amio lelei; ua ia faatotō ifo foʻi le ua i ē ua amiotonu, atoa ma ē ua amiolētonu.” (Mataio 5:45) “O loo foaʻi mai e ia le ola, ma le mānava, ma mea uma lava” i tagata uma. (Galuega 17:25) E pei lava ona fai mai ai le soo o Iakopo, “o mea lelei uma e foaʻifuaina mai, atoa ma mea alofa uma e atoatoa ona lelei, mai lugā lava ia, e alu ifo mai le Tamā o malamalama.”—Iakopo 1:17.

 O le meaalofa aupito sili a Ieova mo i tatou, o le auina mai lea o lona “Atalii e toʻatasi, ina ia lē fano se tasi e faatuatua iā te ia, a ia maua e ia le ola e faavavau.” (Ioane 3:16) E leai se tasi e mafai ona faapea mai e tatau ona ia mauaina lenā meaalofa, “auā ua agasala tagata uma lava, ma ua lē oo i le mamalu o le Atua.” (Roma 3:23, 24; 1 Ioane 4:9, 10) O le togiola a Keriso o le faavae lea ma le auala ua maua ai e i tatou le “mea foaʻi fua e lē mafaamatalaina” a le Atua, o “le alofa tunoa o le Atua ua matuā tele.” (2 Korinito 9:14, 15) Ona o le loto faafetai o Paulo mo le meaalofa a le Atua, na avea ai ma ana galuega i lona olaga atoa le “molitino atu o le tala lelei o le alofa tunoa o le Atua.” (Galuega 20:24) Sa ia iloa, o le finagalo o le Atua “ia faaolaina o tagata uma lava, ma ia oo ina iloa lelei le upu moni.”—1 Timoteo 2:4.

Ua faataunuuina lenei mea i aso nei, e ala i le galuega talaʻi ma aʻoaʻo atu lea ua faateleina atu nei i atunuu e 234 i le lalolagi aoao. Na valoia e Iesu lenei faatelega i lona faapea mai: “E talaʻiina atu foʻi lenei tala lelei o le malo i le atu laulau uma, e fai ma molimau i nuu uma; ona oo mai ai lea o le gataaga.” (Mataio 24:14) Ioe, “ia muaʻi talaʻiina foʻi le tala lelei i nuu uma lava.” (Mareko 13:10) I le tausaga ua mavae, e sili atu i le ono miliona ē folafola le tala lelei na tuutoina atu le 1,202,381,302 itula i lenei galuega, ma faia le sili atu i le 5,300,000 suʻesuʻega faale-Tusi Paia. Ona ua lamatia ola, ua matuā tāua tele ai lenei faatonuga.—Roma 10:13-15; 1 Korinito 1:21.

E faitau miliona lomiga, e aofia ai Tusi Paia, tusi, ma polosiua ua lomia i tausaga taʻitasi ina ia fesoasoani iā i latou o matelāina mo upu moni o le Tusi Paia. E lē gata i lea, ua saunia foʻi le sili atu i le piliona kopi o mekasini o le Olomatamata ma le Ala Mai! A o talisapaia e tagata le tala lelei, ua fausia ai le anoanoaʻi o Maota o le Malo ma Maota Fono o Molimau a Ieova, ua avea ma nofoaga autū o aʻoaʻoga faale-Tusi Paia. Ua fuafuaina foʻi i tausaga taʻitasi ia fonotaga matagaluega ma aso faapitoa o fonotaga, faapea tauaofiaga itumalo. Ua avea foʻi ma polokalame faifai pea le toleniga o misionare ma ovasia femalagaaʻi, o toeaina, ma auauna o le faiva. E tatou te faafetai iā Ieova mo le faia o nei sauniuniga uma e ala mai i “le auauna faamaoni ma le mafaufau.” (Mataio 24:45-47) Maʻeu lo tatou fiafia e faailoa atu iā te Ia lo tatou loto faafetai!

Faaalia le Agaga Faafetai iā Ieova

E tusa ai ma le fausiaina o le malumalu ma le faafetaiaʻia o manaʻoga o uluaʻi faapotopotoga Kerisiano, o le faatupeina o nei mea, e auala uma mai lava i foaʻi tauofo. Ae peitaʻi, e tatau ona manatua, e leai se tasi e mafai ona ia faatamaoaigaina Ieova, o Lē e ana mea uma. (1 Nofoaiga a Tupu 29:14; Hakai 2:8) O foaʻi tauofo la, o faailoga na o lo tatou naunau e faaauiluma le tapuaʻiga moni. Ua faapea mai Paulo, o nei gaoioiga o le matamau, e faailoa ai “le faafetai i le Atua.” (2 Korinito 9:8-13) Ua faalaeiauina e Ieova nei foaʻi auā e faaalia ai o loo iā i tatou le agaga saʻo ma se loto alofa iā te ia. O le a faamanuia e Ieova ma olaola faaleagaga i latou o ē matamau ma faalagolago iā te ia. (Teuteronome 11:13-15; Faataoto 3:9, 10; 11:25) Ua faamautinoaina i tatou e Iesu i se iʻuga fiafia e faapea: “E sili le manuia o lē na te foaʻi atu, i lo lē na te talia mai.”—Galuega 20:35.

O Kerisiano e iai le agaga o le limafoaʻi, e lē faatalitali seʻiloga ua iai se manaʻoga. Ae latou te vaavaai mo ni avanoa e ‘agalelei ai i tagata uma lava, aemaise le aiga o le faatuatua.’ (Kalatia 6:10) I le faalaeiauina o le limafoaʻi faale-Atua, na tusi ai Paulo: “Aua le galo iā te outou ona agalelei ma alolofa atu; auā o taulaga faapena e fiafia ai le Atua.” (Eperu 13:16) E matuā fiafia lava Ieova le Atua pe a faaaogā a tatou alāmanuia, taimi, malosi, ma tupe e fesoasoani ai i isi ma faaauiluma ai le tapuaʻiga mamā. E moni lava, e fiafia o ia i le agaga limafoaʻi.

[Pusa/Ata i le itulau 28, 29]

Auala ua Filifilia e Nisi e Faia ai Foaʻi

MEAALOFA MO LE GALUEGA I LE LALOLAGI AOAO

E toʻatele tagata ua tuuesea se vaega tupe, po o se vaega faaagaga, e lafo i pusa o loo faailogaina o “Meaalofa mo le Galuega i le Lalolagi Aoao.—Mataio 24:14.”

I masina taʻitasi, e avatu ai e faapotopotoga nei tupe i le ofisa o le lālā o Molimau a Ieova o loo vaavaaia o latou atunuu. E mafai foʻi ona auina saʻo atu ia foaʻi tauofo o tupe i le Watch Tower Bible and Tract Society of Pennsylvania, c/o Office of the Secretary and Treasurer 25 Columbia Heights, Brooklyn, New York 11201- 2483, po o le ofisa o le lālā o loo vaavaaia lou atunuu. E ao foʻi ona auina atu ia siaki tupe i le “Watch Tower.” E mafai foʻi ona foaʻi faameaalofa atu maatāua po o isi mea tāua. O na foaʻi e tatau ona auina atu faatasi ma se tusi puupuu e faamanino atu ai o lenā foaʻi e leai ni tuutuuga.

FUAFUAGA O FOAʻI E IAI TUUTUUGA

E mafai ona foaʻi faameaalofa atu se tupe e teuina i lalo o se aiaiga faapitoa, lea e mafai ona toe faafoʻi atu lenā foaʻi i lē e ana le tupe pe a ia manaʻomia. Mo nisi faamatalaga, faamolemole faafesootaʻi le Office of the Secretary and Treasurer i le tuatusi o loo taʻua i luga.

FUAFUAGA O FOAʻI FAAMEAALOFA

E lē gata i foaʻi tuusaʻo tautupe ma foaʻi e faia i lalo o ni tuutuuga, ae e iai isi auala e faia ai foaʻi ina ia fesoasoani mo le auaunaga o le Malo i le lalolagi aoao. E aofia ai mea nei:

Inisiua: E mafai ona avea le Watch Tower Society ma faalapotopotoga e totogi atu i ai le taui po o le polisia o le inisiua o le ola o se tagata, po o taui e maua pe a litaea pe maua foʻi le penisione.

Teugātupe i le Faletupe: O teugātupe i le faletupe, tusi o teugātupe, po o vaega tupe e maua e le tagata pe a faamālōlō litaea, e mafai ona tuu faamavaega mo le Watch Tower Society, pe totogi atu i ai pe a maliu le tagata e ana ia mea, e tusa ai ma faatulagaga manaʻomia a le faletupe o le atunuu.

Tupe Faafaigaluega (Stock) ma Pepa Faamaonia mo Tupe (Bond): O tupe faafaigaluega ma pepa faamaonia mo tupe, e mafai ona foaʻi faameaalofa atu i le Watch Tower Society e aunoa ma ni tuutuuga.

Fanua ma Fale: E mafai foʻi ona foaʻi atu ia fanua ma fale e mafai ona faatau atu, e ala i le foaʻi saʻo atu, po o le tuu foʻi o le fale po o le fanua e nofo ai pea lē e ana, seʻia oo ina maliu. Ia faafesootaʻi le ofisa o le lālā i lou atunuu a o leʻi faapepaina faaletulafono so o se fanua totino o le a foaʻi atu.

Tupe Faameaalofa e Iai Tuutuuga Faaletausaga (Gift Annuity): O tupe faameaalofa e iai tuutuuga faaletausaga, ua fuafuaina e avatu e se tasi i le Watch Tower Society ni tupe po o tupe faafaigaluega ma pepa faamaonia. Ae i le faia o se faafesuiaʻiga, e maua ai e lē e ana le foaʻi faameaalofa, po o se tasi ua ia tofia, se aofaʻiga patino o se tupe e avatu i ai i tausaga taʻitasi a o soifua pea o ia. O le a faaitiitia le lafoga e totogi e le tagata na faia le foaʻi, i le tausaga tonu na faamautū ai le foaʻiina atu o lana meaalofa.

Uili ma Mavaega: E mafai ona faaui atu meatotino po o se vaega tupe i le Watch Tower Society e ala i se uili ua faia e tusa ai ma le tulafono, pe avea foʻi le Watch Tower Society ma lē e mauaina le taui o se feagaiga o se teugātupe ua tuu faamavaega. O se teugātupe ua tuu faamavaega e faia mo le manuia o se faalapotopotoga faalelotu, e ono maua mai ai nisi fesoasoani tau lafoga.

E pei ona faailoa mai i le faaupuga “fuafuaga o foaʻi faameaalofa,” o nei ituaiga o foaʻi e manaʻomia ai lava ona fuafua lelei e lē e ana le foaʻi. Ina ia fesoasoani i tagata o loo mananaʻo e mauaina e le galuega a Molimau a Ieova i le lalolagi aoao aogā e ala i nisi o foaʻi faameaalofa ua fuafuaina lelei, ua saunia ai nei se polosiua i le faa-Peretania ma le faa-Sepania ua faaulutalaina Charitable Planning to Benefit Kingdom Service Worldwide. Na tusia le polosiua e tali atu ai i le tele o fesili ua oo mai e tusa ai ma meaalofa, uili, ma mavaega. O loo iai foʻi faamatalaga faaopoopo aogā e faatatau i esetete, tupe, ma le fuafuaina o lafoga. Ua faailoa atu ai i tagata ia auala eseese e faia ai meaalofa a lē i le taimi nei, o le faia o se foaʻi i le taimi e maliu ai. Ina ua uma ona faitauina ma talanoaina le polosiua faatasi ma a latou lava loia po o tagata faufautua tau i lafoga ma i latou o loo galulue i le Charitable Planning Office, ua mafai ai e le toʻatele ona fesoasoani i Molimau a Ieova i le lalolagi aoao, ma i le taimi e tasi, ua faateleina ai faamanuiaga tau lafoga ona o le faia faapea. E mafai ona maua lenei polosiua mai le Charitable Planning Office pe a talosaga mo se kopi.

Mo nisi faamatalaga atili, e mafai ona e faafesootaʻi atu le Charitable Planning Office, e ala i lou tusi atu pe telefoni atu foʻi i le tuatusi o loo taʻua i lalo, po o le ofisa o Molimau a Ieova i lou atunuu.

Charitable Planning Office

Watch Tower Bible and Tract Society of Pennsylvania

100 Watchtower Drive, Patterson, New York 12563-9204

Telefoni: (845) 306-0707

[Ata i le itulau 26]

O le ā na uunaʻia uluaʻi Kerisiano ina ia limafoaʻi?