‘Na Ou Maua ni Uō e Alolofa ma Manatu Mamafa Mai’

O LE mea lea e iloa ai e tagata uma lava o oʻu soo outou, pe afai ua outou fealofani.” (Ioane 13:35) E pei ona fetalai Iesu, o le alofa o le faailoga lea na iloa ai le ʻauuso Kerisiano i le uluaʻi senituri. Ina ua mavae le sili atu i le selau tausaga talu ona maliu Keriso, na sii mai ai i tusitusiga a Tetuliano ni faamatalaga a ni tagata molimau e faapea: ‘Seʻi tagaʻi i le auala e faaalia ai le alofa o le tasi i le isi, ma le auala e latou te nofo sauni ai e oti ina ia puipuia ai isi.’

Po o mafai ona maua pea i le lalolagi lenā ituaiga o alofa? Ioe. O se faaaʻoaʻoga, seʻi manatu i se tusi na maua e le ofisa o le lālā o Molimau a Ieova i Pasili. Na tusi mai se fafine e igoa iā Marília, e faapea:

“A o ou nofo i le nuu o Villa Mercedes i Anitenitina, na aafia ai loʻu tinā o ia o se tasi o Molimau a Ieova i se ituaiga o maʻi gugu, na pē ai lona sulugātiti e oo i ona vae. Mo le valu masina muamua o lona maʻi, na tausia ai ma le agaalofa ma le magafagafa o ia e Molimau a Ieova i Villa Mercedes. Sa latou vaaia mea uma mo ia, faamamā le fale ma saunia ana meataumafa. E oo lava i le taimi na iai o ia i le falemaʻi, sa iai pea lava se tasi na vaaia loʻu tinā i le ao ma le pō.

“Na ma toe foʻi atu ma loʻu tinā i Pasili talu mai lenā taimi, ma o loo faasolosolo lava ina manuia lona maʻi. O loo faia pea e Molimau i le nuu lea e ma te nonofo ai nei mea uma latou te mafaia e fesoasoani ai i loʻu tinā ina ia toe malosi.”

Ua faaiʻu mai le tusi a Marília e faapea: “Ou te taʻu atu,o aʻu e lē o se Molimau a Ieova, ae ua ou maua ni uō Molimau e alolofa ma manatu mamafa mai.”

O le mea moni, o loo iai pea tagata o loo gaoioi ma le alofa faa-Kerisiano moni. I le faia faapea, ua latou faatinoina ai le malosi o aʻoaʻoga a Iesu ia ua mafai ona taaʻina ai o tatou olaga.