Pe Iai ea se Tasi e Maufaatuatuaina?

INA ua muta le pulega faa-Komunisi ma ua māeʻa le solo ifo i lalo o le pa i Perelini i le 1989, na faatoʻā malamalama ai tagata i nisi o mea na natia. O se faaaʻoaʻoga, na iloa mulimuli ane e Litia * faapea a o faia pulega faa-Komunisi i Siamani i Sasaʻe, na tuufaatasia ai e le Stasi po o le Auaunaga mo le Saogalemu a le Setete, ni faamatalaga i ana gaoioiga i aso faisoo. Na ofo Litia ina ua ia iloa e uiga i na faamatalaga, ae na matuā faateʻia o ia ina ua ia iloaina, o lana tane na tuuina atu faamatalaga i le Stasi. Na faalataina o ia e le tagata na tatau ona ia faatuatuaina atoatoa.

O Ropati o se tamā ua loa le soifua o lē na vaai i lana fomaʻi o se tagata e “sili ona faaaloalogia, e manatu maualuga i ai ma maufaatuatuaina,” o se lipoti lenā a le mekasini The Times i Lonetona. Sa manatu i le fomaʻi o “se tagata e agalelei ma tigāalofa.” Mulimuli ane, na maliu faafuaseʻi Ropati. Pe na maua o ia i le maʻi fatu pe na pē se itu o lona tino? E leai. Na fai mai leoleo e faapea, na asiasi atu le fomaʻi i le fale o Ropati ma tui o ia i se tui oti e aunoa ma le iloa e Ropati ma lona aiga. E foliga mai na fasiotia Ropati e se tagata na ia faatuatuaina atoatoa.

Na matuā ʻolegia Litia ma Ropati e tagata na la maufaatuatuaina ma e mataʻutia āuga na oo i ai. E lē matuiā faapena āuga o isi mea na tutupu. E ui i lea, e masani ona tatou lē fiafia ona o le lē faamaoni mai o se tagata na tatou faatuatuaina. I se lipoti na lomiaina e se faalapotopotoga e faia suʻesuʻega i Siamani o le Allensbacher Jahrbuch der Demoskopie 1998-2002, na faailoa mai e se suʻesuʻega na faia e faapea, na lē fiafia le 86 pasene o ē na fesili atu i ai, ona o le lē faamaoni o se tasi na latou faatuatuaina. Atonu na e oo foʻi i se tulaga faapena. E lē tatau la ona faateʻia i tatou i le lipoti a se nusipepa i Suisilani Neue Zürcher Zeitung i le 2002 e faapea “i atunuu tau ati aʻe i Sisifo, ua autausagā ona mou atu faiā fefaatuatuaaʻi i le vafealoaʻi o tagata.”

Faifai Mālie Ona Atiina Aʻe, Vave Ona Faaleagaina

O le ā le uiga o le maufaatuatuaina o isi? E tusa ai ma se lomifefiloi, o le maufaatuatuaina o isi o lona uiga e te talitonu o i latou o ni tagata faamaoni, ma e lē faagutugutulua ma e latou te lē faia ma le iloa se mea e tigā ai lou loto. E faifai mālie ona atiina aʻe le faatuatuaina o isi ae e mafai foʻi ona vave faaleagaina. Ona e toʻatele ē ua lagona e faapea ua tuu sesē lo latou faatuatua i isi, pe o se mea la e ofo ai le faatalatū o tagata mai le faatuatuaina o isi? E tusa ai ma se suʻesuʻega na lomiaina i Siamani i le 2002, “e itiiti ifo i le 1 i le 3 talavou e faatuatuaina isi tagata.”

Atonu tatou te fesili ifo iā i tatou lava: ‘Pe e mafai moni lava ona tatou faatuatuaina se tasi? Pe e tatau ea ona tatou faatuatuaina se isi e ui tatou te lē o iloa pe e faamaoni mai pea o ia pe leai?’

[Faamatalaga pito i lalo]

[Faamatalaga faaopoopo i le itulau 3]

Na faailoa mai e se suʻesuʻega na faia e faapea, na lē fiafia le 86 pasene o ē na fesili atu i ai, ona o le lē faamaoni o se tasi na latou faatuatuaina