“E Maʻeu le Mamana o le Afioga a le Atua!”

“O LOO ola le afioga a le Atua, o loo matuā galue foʻi.” (Eperu 4:12) Ina ia faamaonia le mamana o le Afioga a le Atua, ua lomia i le 2003 Calendar of Jehovah’s Witnesses ia talaaga e ono o soifuaga o tagata mai isi vaega o le lalolagi. I lalo o le ulutala “Le Olaga Muamua ma Mulimuli Ane Ai,” ua faaalia ai le auala o loo fesoasoani ai le galuega tau aʻoaʻoga a Molimau a Ieova i tagata ina ia suia a latou amio, lafoaʻi olaga matuā leaga, faamalosia o latou olaga faaleaiga ma ati aʻe se faiā ma le Atua.

Sa mauaina ni tusi faafetai e tusa ai ma le kalena o le 2003. O nisi nei o tusi:

“O lenei kalena o se faamaoniga lea i Kerisiano moni o loo iai foʻi isi e pei o i latou, o ē sa faamalolosi ona finau mo le faatuatua. O lea, e mafai ona latou tagatagaʻi i ata o se faamanatuga o suiga na faia e nisi.”—Sitivi, Iunaite Setete.

“Ua ou manaʻo e tusia ni nai upu ina ia outou silafia ai le matuā pāʻia o loʻu loto i le kalena o le 2003. E leai se isi kalena e pei o lenei na matuā aafia ai oʻu faalogona. O le a avea nei talaaga o soifuaga o se vaega o aʻu mea e tauaveina i laʻu ato talaʻi, ina ia faaali i isi ia faaaʻoaʻoga a tagata ma faamaoniga ofoofogia o le aafiaga o le Tusi Paia i olaga o tagata.”—Mareko, Peleseuma.

“Na matuā pāʻia loʻu loto e le Kalena. Sa ootia loʻu loto ina ua ou faitau ma iloa le auala na suia ai e Ieova nei tagata taʻitoʻatasi. O le iʻuga, ua uunaʻia ai aʻu e faaauau pea ona faia suiga i loʻu olaga. O le taimi nei e sili atu na i lo se isi lava taimi, ua ou lagona ai o aʻu o se vaega o le ʻauuso i le lalolagi aoao.”—Maria, Iunaite Setete.

“Na matuā ootia Iesu ona o le tulaga pagatia faaleagaga o le motu o tagata. Faafetai tele lava i lo outou faataʻitaʻi i le faaaʻoaʻoga a Keriso e ala i le lomia o talaaga o soifuaga i la tatou kalena o le 2003. E leʻi faapea muamua lava i loʻu olaga ona iai se kalena na pāʻia ai aʻu ma maligi ai oʻu loimata.”— Cassandra, Iunaite Setete.

“Na amata ona ou ulaula ina ua 11 oʻu tausaga, mulimuli ane sa ou faaaogāina fualaau faasāina. Sa masani ona ou mafaufau i le pule i loʻu ola. Ae ina ua ou iloa Ieova, na fesoasoani lea iā te aʻu e taofia ai na masaniga. E matuā tāua lenei kalena iā te aʻu. O faaaʻoaʻoga a oʻu uso ma tuafafine i le lalolagi aoao ua faamalosia ai aʻu. O lea la, ua ou iloa nei e lē na o aʻu o loo faia lenei taua, ma o le itu e sili ona tāua o le alofa mo Ieova ma auauna iā te ia ma le lotoatoa.”—Makerita, Polani.

“E maʻeu le mamana o le Afioga a le Atua! Sa ou taumafai ina ia aua neʻi oʻu tagi ina ua maua le Kalena o le 2003. O nei talaaga faatasi ai ma ata, e matuā faamalosia ai le faatuatua.”—Taralina, Iunaite Setete.

“E tai tutusa olaga muamua o nisi o nei tagata ma loʻu olaga sa iai muamua foʻi. Ua aumaia e Ieova iā te aʻu le malosi e tuua ai masaniga leaga e foliga mai e lē mafai ona tuua. Faafetai tele lava mo nei talaaga o soifuaga.”—Viliamu, Iunaite Setete.