Fesili Mai le ʻAufaitau

E faapefea ona manatu Kerisiano i le faaaogāina o maatāua e fesootaʻi atu ma masina na fananau ai?

I nisi aganuu, e latou te faafesootaʻi atu ia maatāua o aso fanau i le masina na fanau ai se tasi. E filifili lava la le Kerisiano ia pe tuu i lona lima se mama o loo iai sea ituaiga o maatāua pe leai. (Kalatia 6:5) I le faia o lenā filifiliga, e iai vala tāua e ao ona manatunatu i ai.

Ua taʻua i le Encyclopaedia Britannica e faapea, “o le tuuina i le lima o se tasi o se maatāua e fesootaʻi atu ma le masina na fanau ai, e masani ona manatu i ai e maua ai se laki po o le soifua mālōlōina.” Ua faapea atili mai lenei tusi: “Ua loa ona faafesootaʻi e tagata saʻiliʻili i fetu le malosi uigaese i nisi o nei maatāua.”

Aemaise lava i aso anamua, sa talitonu le toʻatele e faapea, o sea maatāua, e laki ai lē o loo iai le mama i lona lima. Pe e talitonu i ai se Kerisiano moni i lenei mea? E leai, auā ua ia iloa e faasalaina e Ieova i latou e tuua o ia ma i latou sa faatuatua iā “Kato” o le atua o le Laki.—Isaia 65:11.

I le faagasologa o le 500 T.A. e oo i le 1500 T.A., na filifilia ai e tagata fai valovaloga ni maatāua mo masina taʻitasi o le tausaga. Sa latou faalaeiauina tagata ina ia tuu i o latou lima le maatāua e fesootaʻi ma le masina na latou fananau ai, ma le manatu e puipuia ai lē o loo tauaveina le mama mai mea leaga. Ae e tusa ai ma le manatu o le Tusi Paia, e matuā sesē lava mo se Kerisiano ona mulimuli i taʻitaʻiga a ē o loo valoiaina mea tutupu talu ai e taʻusalaina e le Tusi Paia mea faapena.—Teuteronome 18:9-12.

E lē talafeagai foʻi mo Kerisiano ona faatāuaina faapitoa se mama ona e faapea, o loo iai se maatāua o le aso na fanau ai. E lē faamanatuina e Molimau a Ieova ia aso fanau. Talu ai, o na aso faamanatu e tele lava ina faatāuaina ai le tagata, ma e na o le pau lava aso fanau o loo faamauina i le Tusi Paia, o aso na fananau ai ni taʻitaʻi e lē auauna i le Atua.—Kenese 40:20; Mataio 14:6-10.

Ua manatu nisi tagata e faapea, o le tauaveina o se mama e iai se maatāua o le aso fanau, o le a faaleleia ai uiga o lē o loo tauaveina lea mama. Ae peitaʻi, e lē talitonu i ai Kerisiano moni i lenei mea, auā ua latou iloa, ua mafai ona ofuina “le tagata fou” ona o le taaʻiga a le agaga paia o le Atua ma le faatatauina o mataupu silisili o le Tusi Paia.—Efeso 4:22-24.

O le vala e sili ona tāua, o uunaʻiga. O le filifiliga e tuu i lou lima se mama e iai se maatāua, e tatau i se Kerisiano ona fesili ifo iā te ia lava: ‘Pe ou te manaʻo e fai le mama lea ona ou te fiafia i le maatāua, e ui lava e fesootaʻi le maatāua ma le masina o loʻu aso fanau? Po o le mea ua taaʻina aʻu i manatu faanuupō ia ua faafesootaʻi atu e nisi tagata i na maatāua?’

E tatau i se Kerisiano ona suʻesuʻe ifo i lona loto ina ia iloa ai ana gaoioiga. Ua faapea mai le Tusi Paia: “Ia sili ona leoleoina o lou loto i le leoleoina o mea uma; auā e tupu mai ai le amio.” (Faataoto 4:23) I le faia o lana filifiliga e faatatau i maatāua o aso fanau, e lelei i Kerisiano ona manatunatu i uunaʻiga o lona loto ma āuga e ono oo i isi faapea ia lava ona o ana gaoioiga. —Roma 14:13.