Se Lalolagi e Aunoa ma ni Solitulafono i le Lumanaʻi

SEʻI mafaufau i le faaupuga, se lalolagi e aunoa ma ni tagata solitulafono! O le a lē toe manaʻomia ai ni leoleo, ni falepuipui, po ni faamasinoga taugatā ma le lavelave o tagata solitulafono. O le a avea o se lalolagi e faaaloalogia e tagata uma le soifua ma mea totino a isi. Pe e foliga mai e faigatā ona faataunuuina o lenā mea? Atonu o lou manatu lenā, ae o lenei suiga ofoofogia mo le lelei, o le mea tonu lava lenā o loo folafola mai e le Tusi Paia. Aiseā e lē iloilo ai po o ā mea o loo valoia mai e le Tusi Paia e faatatau i solitulafono ma isi amioga leaga i lenei lalolagi?

Ua tatou faitau ai i le tusi o Salamo e faapea: “Aua e te faameo ona o ē amio leaga; aua foʻi e te losilosi ona o ē fai mea leaga. Auā e lē pine ona seleeseina i latou e pei o le mutia; e mamae i latou e pei o le vao muʻa lauolaola. A o ē agamalu, e fai mo latou le nuu; e faafiafia foʻi i latou iā te i latou ona o le manuia e tele.” (Salamo 37:1, 2, 11) O le mea moni, e leai se tasi e mafai ona taofia le Atua mai le faataunuuina o lenei folafolaga ma isi ana folafolaga faalaeiau uma.

O le a aumaia e le Atua nei faamanuiaga e ala i lona Malo. I le Tatalo a le Alii, na aʻoaʻo ai e Iesu Keriso ona soo e tatalo ina ia oo mai lenei Malo ma ia faia ai le finagalo o le Atua “i le lalolagi e pei ona faia i le lagi.” (Mataio 6:9, 10) I le pulega a lenā Malo, e lē toe uunaʻia ai se tasi i le lalolagi e faia solitulafono ona o le mativa, pulega sauā, po o le manatu faapito. O lea, ua faapea mai le Afioga a le Atua: “E taumafa o saito i le nuu i tumutumu lava o mauga.” (Salamo 72:16) O le mea moni, o le a lē muta ona saunia e Ieova le Atua mo tagata uma i le lalolagi le anoanoaʻi o mea lelei. Ae o le mea e sili ona tāua, o le a mauaa i loto o tagata le alofa i le Atua ma tuaoi, ona lē toe faalavelaveina lea o le lalolagi i solitulafono.