Fesili Mai le ʻAufaitau

I le ā le uiga e faapea, na “faalologo,” pe na gūgū Esekielu i le taimi na vagaia ma faaumatia ai Ierusalema?

O lona uiga moni, e lē tatau ona ia faaopoopo se isi upu i le feʻau faavaloaga a Ieova lea ua uma ona ia molioo atu.

Na amata ona auauna le perofeta o Esekielu o se tagata vaai faamaoni mo tagata Isaraelu ia na faatafea i Papelonia i “lona lima o tausaga lea o le tafeaga a le tupu o Ioakina,” i le 613 T.L.M. (Esekielu 1:2, 3) O le aso sefulu, o le masina e sefulu i le 609 T.L.M., na faailoa ane ai i se afioga mai le Atua iā Esekielu le amataga o le vagaia o Ierusalema e Papelonia. (Esekielu 24:1, 2) O le ā na iʻu i ai lea vagaia? Po o le a mafai ona sao mai ai Ierusalema ma ona tagatānuu lē faamaoni o iai? Ina ua uma ona faailoa atu e le tagata vāai o Esekielu le feʻau manino o le malaia mai iā Ieova, sa lē manaʻomia ona ia toe faaopoopo i ai se mea e peiseaī e faamautinoa atili atu ai lenā feʻau. E leʻi toe gagana atu Esekielu e faatatau i nisi mea e uiga i le vagaia o Ierusalema.—Esekielu 24:25-27.

Ina ua mavae le ono masina talu ona faaumatia Ierusalema i le 607 T.L.M, na sau ai iā Esekielu i Papelonia se tagata na sao mai ma se tala e uiga i le faatafunaina o le aai paia. I le afiafi a o leʻi taunuu ane le tagata na sao mai, na ‘faagaganaina ai e Ieova ia Esekielu ma lē toe faalologo’ ai o ia. (Esekielu 33:22) O lea, na lē toe gūgū ai o ia.

Pe sa gūgū moni lava Esekielu i lenā taimi? E mautinoa lava e leai, talu ai ina ua uma le taimi na “faalologo” ai o ia, sa ia toe vavalo tuusaʻo atu foʻi aemaise lava i nuu na siʻomia ai, o ē na olioli i le paʻū o Ierusalema. (Esekielu, mataupu 25-32) I le amataga lava o le galuega a Esekielu o se perofeta ma o se tagata vāai, na taʻu atu ai e Ieova iā te ia e faapea: “Ou te faapipii aʻe foʻi lou laulaufaiva i lou gutu, ina ia gūgū ai oe, e lē faia foʻi oe ma tagata aʻoaʻi iā te i latou; auā o le aiga fouvale i latou. A ou fai atu iā te oe, ona ou faagaganaina lea o oe.” (Esekielu 3:26, 27) Ina ua leai se feʻau a Ieova mo Isaraelu, sa tatau ona lē toe gagana Esekielu e faatatau i lenā nuu. Sa na o mea lava na faatagaina e Ieova Esekielu e tautala ai, sa ia tautala atu ai. O le gūgū o Esekielu, na faaalia ai sa lē gagana o ia e oo lava i ni upu faavaloaga e faatatau iā Isaraelu.

Ua leva ona lapataʻi atu le vasega o le tagata vāai i aso nei, o Kerisiano faauuina, e uiga i le malaia o lotu ua faapea mai o Kerisiano, lea ua faaatagia e Ierusalema. Pe a oo mai le “puapuaga tele” ma faaumatia ai “Papelonia le Aai Tele,” le emepaea o lotu sesē, e lē manaʻomia ona toe gagana atu le vasega faauuina ua faaataina e Esekielu i se upu e faatatau i lotu Kerisiano pepelo ia e faia aʻe ai le vaega tele o lenā emepaea.—Mataio 24:21; Faaaliga 17:1, 2, 5.

Ioe, e iai le aso o le a lē toe gagana atu ai le vaega totoe faauuina ma a latou aumea, e lē toe iai lava se upu e fai atu i lotu ua faapea mai o Kerisiano. O le a tupu lenā mea pe a faaumatia e ‘nifo e sefulu’ ma “le manu feʻai” ia Papelonia le Aai Tele ma toese ona ofu. (Faaaliga 17:16) O le mea moni, e lē faapea ai o le a gūgū moni ia Kerisiano. O le a latou vivii atu iā Ieova ma taʻutaʻu atu o ia i aso uma lava, faapea foʻi “i augātupulaga uma lava,” e pei ona latou faia i le taimi nei.—Salamo 45:17; 145:2.