“Ia E Fiafia Lava Oe Iā Ieova”
“Ia E Fiafia Lava Oe Iā Ieova”
“Ia e fiafia lava oe iā Ieova, ona foaʻiina lea e ia iā te oe o mea e manaʻo i ai lou loto.”—SALAMO 37:4.
1, 2. O ai le Puna o le fiafiaga moni, ma na faapefea ona faamatilatila e le tupu o Tavita lenei mea moni?
“AMUIA ē matitiva i le agaga; . . . amuia ē alolofa atu; . . . amuia ē faatupuina le filemu.” E ono isi faaupuga faatasi ma faaamuia nei o loo faamatalaina ai ē o loo fiafia pe e faaamuia iai, ma ua avea na faaupuga ma faatomuaga mataʻina o le lauga taʻutaʻua a Iesu i le Mauga, e pei ona faamauina e le tusitala Faievagelia, o Mataio. (Mataio 5:3-11) Ua faamautinoa mai e fetalaiga a Iesu, e mafai ona tatou mauaina le manuia po o le fiafia.
2 Na faamatilatila e se salamo na fatuina e le tupu o Tavita i ona pō o Isaraelu, le Puna o le fiafiaga moni, o Ieova. Na faapea mai Tavita: “Ia e fiafia lava oe iā Ieova, ona foaʻiina lea e ia iā te oe o mea e manaʻo i ai lou loto.” (Salamo 37:4) Ae aiseā e “fiafia” ai pe a tatou iloaina Ieova ma le tele o ona uiga eseese? Aiseā e mafai ai ona e faamoemoe e maua mea “e manaʻo i ai lou loto,” pe a e iloiloina mea na faia e Ieova i le taimi ua teʻa, ma mea o le a ia faia i le lumanaʻi i le faataunuuina o lana fuafuaga? E maua tali i fesili na, pe a iloiloina totoʻa le Salamo 37, fuaiupu 1 e oo i le 11.
“Aua Foʻi E te Losilosi”
3, 4. O le ā le fautuaga na aumaia e Tavita e pei ona faamauina i le Salamo 37:1, ma aiseā e talafeagai ai ona mulimuli i ai i aso nei?
3 O loo tatou ola i “aso faigatā” ma ua taatele le amio leaga. Ua tatou vaaia le faataunuuga o upu a le aposetolo o Paulo: “O tagata amio leaga ma ē taupelopelo, e alualu pea lava lo latou leaga, o loo faasesē atu, ua faasesēina foʻi i latou.” (2 Timoteo 3:1, 13) E faigofie lava ona manaʻo i ai le loto ona o loo foliga mai e manuia tagata amio leaga! E mafai e mea na, ona faalavelavea ai i tatou, ma faalētonu ai lo tatou olaga faaleagaga. Mātau le lapataʻiga mo i tatou o loo i upu amata o le Salamo 37, e faatatau i lenei lamatiaga: “Aua e te faameo ona o ē amio leaga; aua foʻi e te losilosi ona o ē fai mea leaga.”
4 E tele ina tatou faalogo ma vāai i le TV, leitiō ma nusipepa a le lalolagi i le anoanoaʻi o faiga lē tonu. E lē o faasalaina le ʻaufaipisinisi lē faamaoni o ē fai faiga faagaoi. Ua faaaogā e tagata amio leaga ē o vaivai. E lē o maua ē fasioti tagata pe e lē o faasalaina foʻi i latou. O faaaʻoaʻoga uma na o faiga lē tonu, e mafai ona faapogaia ai le ita ma lē toʻafilemu ai o tatou mafaufau. Ona o le foliga manuia mai o tagata amio leaga, e ono faaosofia ai lagona losilosi iā i tatou. Pe o le a faaleleia ai ea le tulaga o mea pe afai e atugalu o tatou mafaufau? Po o le a suia ai ea le iʻuga o le a oo i tagata amio leaga i le losilosi i lo latou foliga manuia mai? E mautinoa lava e leai! E lē tatau foʻi ona tatou “faameo.” Aiseā?
5. Aiseā ua faatusaina ai tagata amio leaga i le vao muʻa?
5 Na tali le faisalamo e faapea: “Auā e lē pine ona seleeseina i latou e pei o le mutia; e mamae i latou e pei o le vao muʻa lauolaola.” (Salamo 37:2) E matagofie le vao muʻa lauolaola, ae e vave mamago ma pepēgofie ona lau. E faapena foʻi le tulaga o ē amio leaga. E lē tumau lo latou foliga manuia mai. A feoti i latou, o le a lē toe aogā iā i latou lo latou tamaoaiga lea na maua i ni auala faapiʻopiʻo. O le mea moni, e oo uma lava tagata i le oti. Na tusi Paulo: “O le oti, o le totogi lea o le agasala.” (Roma 6:23) E iai lava le taimi o le a maua ai e tagata amio leaga ma ē amiolētonu, lo latou “totogi” ma e pau ai lava i inā. Pagā se olaga iʻuvale!—Salamo 37:35, 36; 49:16, 17.
6. O le ā le lesona e mafai ona tatou aʻoaʻoina mai le Salamo 37:1, 2?
6 Pe e tatau ea ona tatou atuatuvale i le manuia vave mavae o ē amio leaga lea na maua i ni auala faapiʻopiʻo? O le lesona lenei tatou te aʻoaʻo mai i uluaʻi fuaiupu e lua o le Salamo e 37: Aua lava neʻi e liliu ese mai lau filifiliga e auauna iā Ieova ona o le tulaga manuia o tagata na. Na i lo lea, ia taulaʻi atu i faamanuiaga ma sini faaleagaga.—Faataoto 23:17.
‘Ia E Faatuatua iā Ieova ma Fai le Amio Lelei’
7. Aiseā e tatau ai ona tatou faatuatua iā Ieova?
7 Na pulunaunau mai le faisalamo e faapea: ‘Ia e faatuatua iā Ieova ma fai le amio lelei.’ (Salamo 37:3a) Afai ua lofitūina i tatou i popolega po o masalosaloga, e tatau ona tuu atoatoa lo tatou faatuatuaga iā Ieova. Ua Ia ofoina mai le puipuiga atoatoa faaleagaga. Na tusi Mose e faapea: “O lē nofo i le mea lilo o i ai le Silisili ese, e mau o ia i le paolo o Lē e ona le malosi uma lava.” (Salamo 91:1) Afai e atuatuvale i le faatupulaʻia o soligatulafono i lenei faiga o mea, e tatau ona atili ai ona tatou faalagolago iā Ieova. A mapeva o tatou vae, tatou te talisapaia pe a mafai ona tatou faalagolago i sa tatou uō. E faapena foʻi pe a tatou tausinio e savavali ma le faamaoni, e manaʻomia ona tatou faalagolago iā Ieova.—Isaia 50:10.
8. E faapefea i le auai i le faiva faa-Kerisiano ona fesoasoani iā i tatou e ʻalofia ai le soona atuatuvale i le manuia o tagata amio leaga?
8 O se tasi o vaifofō mo le atuatuvale ona o le manuia o tagata amio leaga, o le pisi lea i le saʻilia ma le fesoasoani atu i ē pei o ni mamoe, ina ia latou malamalama lelei i fuafuaga a Ieova. E tatau ona tatou matuā pisi i le fesoasoani atu i isi, a o faatupulaʻia le amio leaga. Na fai mai le aposetolo o Paulo: “Aua le galo iā te outou ona agalelei ma alolofa atu; auā o taulaga faapena e fiafia ai le Atua.” O le auala sili e mafai ona tatou faaalia ai le “agalelei,” o le taʻutaʻu atu lea i isi o le tala lelei matagofie o le Malo o le Atua. Ua avea moni la tatou talaʻiga i le lautele ma “taulaga o le viiga.”—Eperu 13:15, 16; Kalatia 6:10.
9. Ia faamatala mai le timaʻiga a Tavita “ia e nofo i le nuu.”
9 Na faapea mai Tavita: “Ia e nofo i le nuu, ma tausisi i le faamaoni.” (Salamo 37:3e) I ona pō o Tavita, o “le nuu” na faasino atu i le Nuu Folafolaina po o le laueleele lea na tuuina atu e Ieova iā Isaraelu. O tuaoi o lenā nuu i le nofoaiga a Solomona, na amata mai i Tanu i le itu i mātū e oo atu i Peresepa i le itu i saute. O inā na nonofo ai tagata Isaraelu. (1 Tupu 4:25) I aso nei, po o fea lava tatou te nonofo ai i le lalolagi, ae o loo tatou aloalo atu i le taimi o le a avea ai le lalolagi aoao ma parataiso i le lalolagi fou amiotonu. Ae i le taimi nei, o loo tatou nonofo saogalemu i se tulaga faaleagaga.—Isaia 65:13, 14.
10. O le ā le iʻuga pe a tatou “tausisi i le faamaoni”?
10 O ā iʻuga e oo i ai pe a tatou “tausisi i le faamaoni”? Ua faamanatu mai e le faataoto a le Tusi Paia e faapea: “O le tagata faamaoni, e tele mea e manuia ai o ia.” (Faataoto 28:20) O lo tatou faamaoni i le talaʻia o le tala lelei i se auala filigā, po o fea lava tatou te nonofo ai ma i so o se tagata foʻi, e mautinoa lava e faamanuiaina e Ieova. O se faaaʻoaʻoga, i tausaga e 40 ua teʻa, na ō atu ai Falani ma lana avā o Rosa e auauna o ni paeonia i se taulaga i le itu i mātū o Sikotilani. E oo atu i le taimi lenā, ua ō ese mai le upu moni ē na faaalia muamua le fiafia. Ae e leʻi faavaivai ai lenei ulugalii paeonia, na i lo lea, na amata loa la laʻua galuega talaʻi ma le faia o soo. I le taimi nei, o loo iai se faapotopotoga olaola i lenā taulaga. Na matuā faamanuiaina e Ieova le auaunaga faamaoni a lenei ulugalii. Na faapea mai ma le lotomaulalo Falani: “O le faamanuiaga sili lava, o lo ma tumau pea i le upu moni ma avea ma ē e aogā iā Ieova.” Ioe, a tatou “tausisi i le faamaoni,” tatou te maua ma talisapaia le tele o faamanuiaga.
“Ia E Fiafia Lava Oe iā Ieova”
11, 12. (a) E mafai faapefea ona tatou ‘fiafia iā Ieova’? (e) O le ā le sini e mafai ona e faatūina a o faia au lava suʻesuʻega, ma o ā iʻuga e lē taumatea e oo i ai?
11 Ina ia faamalosia la tatou faiā ma Ieova ma faaauau pea ona tatou faatuatuaina o ia, e tatau ona tatou ‘fiafia iā Ieova.’ (Salamo 37:4a) E faapefea ona tatou faia lenā mea? E ui e lē o se mea faigofie, ae e lē tatau ona tatou popole naʻuā i o tatou lava tulaga, peitaʻi, e ao ona tatou taulaʻi atu iā Ieova. O se tasi o auala e faatino ai lenei mea, o le tōʻaga e faitau lana Afioga. (Salamo 1:1, 2) Po o e fiafia ea i lau faitauga Tusi Paia? O le a faafiafiaina oe pe afai e faatū sou sini ina ia e aʻoaʻoina atili nisi mea e uiga iā Ieova. Pe a uma ona faitau se vaega o le Tusi Paia, e lelei pe a e taofi ma fesili ane iā te oe lava, ‘O le ā ua ou aʻoaʻoina e uiga iā Ieova mai lenei vaega?’ E ono aogā iā te oe le iai o se api po o se pepa a o e faitauina le Tusi Paia. O so o se taimi e taofi ai e mafaufau i le uiga o mau na e faitauina, ia tusi i lalo se faaupuga e faamanatu atu ai iā te oe se tasi o uiga matagofie o le Atua. Na pese Tavita i se tasi o salamo: “Ia mālie foʻi iā te oe upu a loʻu gutu, ma mafaufauga o loʻu loto, Ieova e, loʻu papa ma lē na te togiolaina aʻu.” (Salamo 19:14) O lo tatou uaʻi totoʻa faapenei i le Afioga a le Atua, o se mea e “mālie” iā Ieova—ma o se fiafiaga foʻi iā i tatou.
12 E mafai faapefea ona tatou fiafia i a tatou suʻesuʻega ma manatunatuga loloto? E mafai ona tatou tausinio e aʻoaʻoina le tele o mea e uiga iā Ieova ma ona ala. O lomiga e pei o Le Tagata Silisili o Ē Uma na Soifua Mai ma le Faalatalata Atu iā Ieova * e tatou te maua ai le anoanoaʻi o faamatalaga e mafai ona tatou manatunatu loloto i ai ma le talisapaia. E tusa ma lenei tulaga, ua faamautinoa mai e Tavita i lē amiotonu e faapea, o le a ‘foaʻi mai e Ieova mea e manaʻo i ai lou loto.’ (Salamo 37:4e) O faalogona mautinoa ma le loto tele faapenei e lē taumatea na faapogaia ai le aposetolo o Ioane e tusi e faapea: “O lenei foʻi le loto tele ua tatou maua i ona luma, pe afai tatou te ōle atu ai se mea e tusa ma lona finagalo, e faafofoga mai o ia iā te i tatou. Afai foʻi ua tatou iloa, e faafofoga mai o ia iā te i tatou i se mea tatou te faatoga atu ai, ua tatou iloa e maua e i tatou mea tatou te faatoga atu ai iā te ia.”—1 Ioane 5:14, 15.
13. O le ā le faatelega o le galuega talaʻi o le Malo ua vaaia i le tele o atunuu i tausaga talu ai nei?
13 Talu ai e tatou te tausiaina le faamaoni, o lo tatou fiafiaga sili la o le vaaia lea ua faamaonia le tonu o le pule silisili ese a Ieova. (Faataoto 27:11) Ua faatumulia o tatou loto i le olioli ina ua tatou iloa, ua matuā salalau atu le galuega talaʻi o loo faatinoina e o tatou uso, i atunuu na i lalo muamua o pulega tautalatasi! O loo tatou naunau e vaai po o ā nisi saʻolotoga tau le talaʻiga e ono maua a o leʻi uma lenei faiga o mea. O le toʻatele o auauna a Ieova o ē e nonofo i atunuu e saʻoloto ai tapuaʻiga, latou te talaʻi ma le filigā i tagata aʻoʻoga, o ē sulufaʻi ma isi o loo nonofo i inā mo sina taimi, ma olioli ai i le saʻolotoga e tapuaʻi ai. Tatou te matuā talotalo o le a faaauau pea e tagata nei ona faasusuluina atu lo latou malamalama, pe a toe foʻi i o latou atunuu ia e faasā ai le galuega talaʻi.—Mataio 5:14-16.
“Ia E Tuuina Atu Lou Ala iā Ieova”
14. O le ā le faamaoniga e iloa ai e mafai ona tatou faalagolago iā Ieova?
14 Maʻeu se mapusaga i le iloa faapea e mafai ona aveesea o tatou popolega ma mea e foliga mai o ni avega mamafa! E faapefea? Na faapea mai Tavita: “Ia e tuuina atu lou ala iā Ieova ma faatuatua iā te ia.” Ona ia faaopoopo mai lea: “Ona faia lava lea e ia.” (Salamo 37:5) E anoanoaʻi faamaoniga i a tatou faapotopotoga e iloa ai, e mafai ona tatou faalagolago moni lava iā Ieova. (Salamo 55:22) O loo molimau ē o i le faiva faataimi atoa e pei o paeonia, o ovasia femalagaaʻi, o misionare po o ē o auauna tauofo i le Peteli, i le maufaatuatuaina o le tausiga a Ieova. Ia susū atu e talatalanoa iā i latou e te silafia, ma fesili i ai pe na faapefea ona fesoasoani Ieova iā i latou! E lē taumatea o le a e faafofoga i le tele o mea na tutupu e faaalia ai le tausiga lē mavae a Ieova, e oo lava i taimi faigatā. Ua ia saunia pea mea e manaʻomia e ola ai.—Salamo 37:25; Mataio 6:25-34.
15. E faapefea ona pupula le amiotonu o tagata o le Atua?
15 Afai tatou te faatuatua atoatoa iā Ieova, e mafai ona tatou tofo i le mea na taʻua e le faisalamo: “E faaalia e ia lau amiotonu e pei o le malamalama, ma lou faamasinoga e pei o le aoauli.” (Salamo 37:6) Ona o i tatou o Molimau a Ieova, e masani lava ona faauiga sesē i tatou e tagata. Peitaʻi e faapupulaina e Ieova mata o ē lotofaamaoni, ma fesoasoani iā i latou ina ia iloa faapea, o la tatou faiva i le lautele o loo uunaʻia i le alofa mo Ieova atoa foʻi ma tuaoi. I le taimi e tasi, e lē mafai ona natia a tatou amioga lelei e ui lava e faauiga sesē e le toʻatele o tagata. Ua faamalosiau Ieova iā i tatou i so o se ituaiga teteega ma sauāga. O le iʻuga, ua pupula matilatila le tulaga amiotonu o tagata o le Atua, e pei o le susulu o le lā i le aoauli.—1 Peteru 2:12.
“Ia E Faalologo . . . ma Faamoemoe”
16, 17. E tusa ai ma le Salamo 37:7, o le ā e ao ona tatou faia i le taimi nei, ma aiseā?
16 O faaupuga e sosoo ai a le faisalamo e faapea: “Ia e faalologo i luma o Ieova, ma faamoemoe iā te ia; aua e te faameo ona o lē ua manuia lona ala, o le tagata ua faia togafiti leaga.” (Salamo 37:7) O loo faamamafa i inei e Tavita le manaʻoga ina ia tatou faamoemoe ma le onosai mo le taimi e gaoioi ai Ieova. E ui lava e leʻi oo mai le iʻuga o lenei faiga o mea, ae e lē o se māfuaaga lenā e faitio ai. Ua tatou vaaia le tele o le alofa mutimutivale ma le onosai o Ieova, na i lo le mea na tatou manatu muamua i ai! Pe e mafai ea ona tatou faaalia foʻi i le taimi lenei, o loo tatou faamoemoe ma le onosai a o tatou pisi pea i le talaʻia o le tala lelei, a o leʻi oo mai le iʻuga? (Mareko 13:10) Ioe, o le taimi lenei e ʻalofia ai gaoioiga valea ia e mafai ona aveesea ai lo tatou olioli ma lo tatou saogalemu faaleagaga. O le taimi foʻi lenei e matuā tetee malosi ai i aafiaga leaga a le lalolagi a Satani. O le taimi foʻi lenei e tutumau ai i amioga mamā, ma ʻalofia le faaleagaina o lo tatou tulaga amiotonu i luma o Ieova. Ia faaauau pea ona tatou teena mafaufauga palapalā ma ʻalofia gaoioiga lē mamā agaʻi i le isi itu pa, po o lau lava itu pa.—Kolose 3:5.
17 Na fautua mai Tavita e faapea: “Inā soia e te ita, ma ia tuu lou tigā; aua e te faameo, neʻi e faia se mea leaga. Auā e faaumatia o ē fai amio leaga; a o ē faatalitali iā Ieova, o i latou lava ia e fai mo latou le nuu.” (Salamo 37:8, 9) Ioe, ua mafai nei ona tatou aloalo atu ma le mautinoa i le taimi ua lata mai tele, lea o le a tafiesea ai e Ieova amioga leaga uma mai le lalolagi ma ē uma e faia amioga faapena.
“E Toe Itiiti”
18, 19. O le ā le faalaeiauga e te maua mai le Salamo 37:10?
18 “E toe itiiti, ona leai lea o le tagata amio leaga; e te mafaufau foʻi i le mea sa i ai o ia, a e leai lava.” (Salamo 37:10) Maʻeu ni upu faalaeiau mo i tatou a o tatou tulata atu i le iʻuga o lenei faiga o mea, ma le ooooga mataʻutia o le ola tutoʻatasi mai iā Ieova! Ua matuā lē taulau pulega po o malo uma na faatūina e tagata. I le taimi nei, ua toe o se aga ona tatou toe foʻi atu lea i le pulega a le Atua po le faatiokarate moni, o le Malo o Ieova i aao o Iesu Keriso. O le a pule atoatoa lenā Malo i meafai a le lalolagi ma aveeseina i latou uma e tetee i le Malo o le Atua.—Tanielu 2:44.
19 I le lalolagi fou i le pulega a le Malo o le Atua, e lē toe iai lava se “tagata amio leaga” e tusa pe e te saʻili iā te ia. O le mea moni, o le a aveesea vave so o se tasi e tetee iā Ieova i lenā taimi. E lē iai i inā so o se tasi e luʻia lana pule silisili ese, po o so o se tasi foʻi e lē manaʻo e gauaʻi i le pulega a le Atua. O le a tutusa uma faanaunauga o ou tuaoi ina ia faafiafia le finagalo o Ieova. Maʻeu le saogalemu o le a iai—e leai ni loka ma ni pa puipui, po o so o se mea lava e afāina ai lo tatou faatuatuaina o isi ma lo tatou fiafia!—Isaia 65:20; Mika 4:4; 2 Peteru 3:13.
20, 21. (a) O ai “ē agamalu” i le Salamo 37:11, ma o fea e maua ai lo latou “manuia e tele”? (e) O ā faamanuiaga tatou te maua pe afai tatou te faaaʻoaʻo i le Tavita Sili?
20 “O ē agamalu, e fai mo latou le nuu.” (Salamo 37:11a) Ae o ai “ē agamalu”? O le upu “agamalu” e sau mai le upu e uiga e faapea, ia “faapuapuagatiaina, faamāsiasi, faamaulaloina.” Ioe, “o ē agamalu” o i latou na o loo faatalitali ma le lotomaulalo iā Ieova e aveesea faiga lē tonu uma ia o loo latou puapuagatia ai. ‘E fiafia i latou ona o le manuia e tele.’ (Salamo 37:11e) E oo lava i le taimi nei, tatou te maua foʻi le manuia e tele i le parataiso faaleagaga lea o loo sootaga atu i le faapotopotoga moni faa-Kerisiano.
21 E ui lava e leʻi oo i le taimi tatou te mapu ai mai puapuaga, ae tatou te felagolagomaʻi ma faamāfanafana atu i ē lotomafatia. O le iʻuga, ua maua ai e tagata o Ieova le lotomalie moni. O uso ua tofiaina e avea ma leoleo mamoe, ua latou tausia ma le alofa o tatou manaʻoga faaleagaga—ma manaʻoga faaletino foʻi i nisi o taimi—lea e mafai ona tatou onosaia ai puapuaga ona o le faia o le amiotonu. (1 Tesalonia 2:7, 11; 1 Peteru 5:2, 3) Ioe, e tāua tele lo tatou tulaga manuia! O loo iā i tatou foʻi le faamoemoe o le ola e faavavau i le Parataiso filemu ua lata tele mai. Tau ina ia o tatou faaaʻoaʻo i le Tavita Sili o Iesu Keriso, o lē na auauna ma le faamaoni e oo i le iʻuga ona o lona maelega mo Ieova. (1 Peteru 2:21) O le faia faapea, o le a faaauau ai ona tatou fiafia ma avatu foʻi le viiga iā Ieova lo tatou Atua, o lē o loo tatou fiafia i ai.
[Faamatalaga pito i lalo]
^ pala. 12 Lomia e Molimau a Ieova.
Pe Mafai Ona E Tali?
• O ā lesona na e aʻoaʻoina mai le Salamo 37:1, 2?
• E mafai faapefea ona e ‘fiafia iā Ieova’?
• O ā faamaoniga e iloa ai e mafai ona tatou faalagolago iā Ieova?
[Fesili mo le Suʻesuʻega]
[Ata i le itulau 9]
E lē “losilosi” Kerisiano “ona o ē fai mea leaga”
[Ata i le itulau 10]
‘Ia e faatuatua iā Ieova ma fai le amio lelei’
[Ata i le itulau 11]
Ia fiafia iā Ieova e ala i le aʻoaʻoina o le tele o mea e uiga iā te ia
[Ata i le itulau 12]
“O ē agamalu, e fai mo latou le nuu”