‘Ia Nofo Sauniuni mo Galuega Lelei Uma Lava’

“IA E faamanatu atu iā i latou ia latou usiusitai i alii sili ma faipule, ia gauaʻi, ia nofo sauniuni foʻi i latou i galuega lelei uma lava.” (Tito 3:1) O ā galuega lelei na mafaufau i ai le aposetolo o Paulo ina o ia tusi atu na upu i ona uso talitonu? Na faasino atu e le tagata aʻoga o le Tusi Paia o E. F. Scott i se tasi o galuega lelei i le faapea mai: “E lē gata ia usiusitai Kerisiano i faipule silisili, ae e tatau ona nofo sauniuni mo galuega lelei. . . . Pe a talafeagai, e tatau i Kerisiano ona taulamua i le faaalia o le manatu mamafa i tagata. E iai pea ia mū, o faamaʻi ma mala eseese ma e naunau ai tagatānuu lelei uma e fesoasoani atu i o latou tuaoi.”

E faia se sao o Kerisiano i nisi o galuega o loo manatu mamafa i ai tagata lautele pe afai e lē feteenaʻi na galuega ma tulafono a le Atua. (Galuega 5:29) O se faataʻitaʻiga, i le mulimuli i taʻiala a le matagaluega fui mū i Iapani, e faia ai e le ofisa o le lālā o Molimau a Ieova i le aai o Ebina i tausaga taʻitasi ni faataʻitaʻiga i le auala e fui ai mū, ma sosola ese ai mai mū. I na taimi, e ō ane uma lava tagata o le aiga Peteli e faalogologo i faatonuga e fofogaina mai e se sui o le matagaluega o fui mū.

E lē gata i lea, ua sili atu i le sefulu tausaga o felagolagomaʻi pea le ofisa o le lālā ma pule faalemalo i se faaaliga na faia ina ia faailoa atu ai le auala e puipuia ai mai mū. I le faaaliga, e faataʻitaʻi mai ai e kamupanī ma fale faigaluega i le aai a latou auala faaagaga e tapē ai mū ma taofia ai afi. E masani lava ona faamālō atu i le lālā ona o le tomai ma le felagolagomaʻi o la latou ʻaufaigaluega. I le 2001, na tuuina atu ai iā i latou le faailoga o le tulaga muamua i le faaaliga. Ua nofo sauniuni i latou e faia galuega lelei e mafai ona faasaoina ai ola i le taimi o se mū.

O se Auaunaga Tāua

Ae peitaʻi, e fiafia Molimau a Ieova i se isi galuega lelei e sili atu ona tāua, lea foʻi e faasaoina ai ola. E latou te asiasi atu e lē aunoa i o latou tuaoi e tufa atu le tala lelei o le Malo o le Atua. (Mataio 24:14) E faalaeiau e Molimau ia tagata ina ia aʻoaʻo ma faatatauina mataupu silisili o le Tusi Paia i o latou olaga ina ia mafai ona faaleleia ai i le taimi nei ma maua ai le faamoemoe o le ola e faavavau i se lalolagi o le a olaola ai le filemu ma le saogalemu moni.

Atonu e lē o iloa e nisi le tāua o le auaunaga lea e faia e Molimau a Ieova, ma manatu ai iā i latou e faapea o ni ē faasoesa. Ae peitaʻi, e ese le manatu o le Faamasino o Jean Crepeau o le Faamasinoga Sili i Quebec, i Kanata. Na luʻia ai e Molimau a Ieova i inā se tulafono a le aai o Blainville, i Quebec lea sa manaʻomia ai se pemita e faataga ai la latou galuega o le asiasi atu i lea fale ma lea fale. I le faaiʻuga a le faamasinoga, na taʻua ai e le Faamasino o Crepeau e faapea: “O asiasiga a Molimau a Ieova, o se auaunaga faa-Kerisiano i le nuu ma . . . o lomiga ua ofoina atu e Molimau i tagatānuu fiafia, o ni lomiga matuā tāua lava, e fetaui lelei ma mataupu e pei  o tapuaʻiga, le Tusi Paia, o fualaau faasāina, le ʻava malosi, aʻoaʻoina o talavou, faafitauli tau le faaipoipoga ma talaga faaipoipoga.” Na faaauau mai le faamasinoga: “E na o le pau lava le faaiʻuga a le faamasinoga e faapea, o le faatusatusa o Molimau a Ieova i tagata faatauʻoa, o se upu leaga, lē faaaloalo, faatigā, ma le taufaaleaga.”

E saosaolaumea Molimau a Ieova mo le lelei o le nuu o loo latou soifua ai i le fesoasoani atu lea i tagata ina ia foʻia faafitauli o loo fesagaʻi ma i latou i aso faisoo, ma faailoa atu iā i latou le faamoemoe mo le lumanaʻi. Ua fesoasoani le Tusi Paia iā i latou i le faataunuuina o lenā galuega. “O tusi paia uma lava e mai le Agaga o le Atua ia, e aogā foʻi ia e aʻoaʻo ai, e aʻoaʻi ai, e faatonu ai, e faapoto ai foʻi i le amiotonu, ina ia atoatoa ona lelei ai o le tagata o le Atua, ia saunia lava ia i galuega lelei uma lava.”—2 Timoteo 3:16, 17.

Pe e te fia iloa le auala e ‘nofo sauniuni ai mo galuega lelei uma lava’ ia Molimau a Ieova? E matou te valaaulia oe ina ia taliaina la latou fesoasoani ma aʻoaʻo atili le Tusi Paia, o lea, ua mafai ai ona faaavanoa atu oe mo lenei auaunaga faalenuu e sili ona tāua lea o loo latou faia i lou vaipanoa faapea le lalolagi atoa.

[Ata i le itulau 30]

E felagolagomaʻi Molimau a Ieova ma faipule silisili faalemalo

[Ata i le itulau 31]

Ua lauiloa Molimau a Ieova ona o le fesoasoani atu i o latou tuaoi