‘Ia Outou Faafetai’
‘Ia Outou Faafetai’
“Ia pule foʻi le filemu mai iā Keriso i o outou loto . . . ma ia outou saga faafetai.”—KOLOSE 3:15.
1. O le ā le eseesega ua tatou mātauina i le va o le faapotopotoga Kerisiano ma le lalolagi o loo nofo toʻilalo iā Satani?
O LOO iai le agaga faafetai i faapotopotoga e 94,600 a Molimau a Ieova i le lalolagi aoao. E amata ma faaiʻuina sauniga taʻitasi i se tatalo, lea e aofia ai faaupuga o le faafetai iā Ieova. E masani ona tatou faalogo o tautatala ē iti ma ē matutua, atoa ma ē fou ma ē ua loa ona avea ma Molimau, i faaupuga e pei o le “faafetai” ma le “mālō” po o isi faaupuga faapena, a o latou tapuaʻi ma faifaimea fiafia faatasi. (Salamo 133:1) Maʻeu se eseesega mai uiga faamaualuga o loo taatele i le toʻatele o ē ‘lē iloa le Atua ma lē anaana i le tala lelei’! (2 Tesalonia 1:8) O loo tatou ola i se lalolagi e aunoa ma se agaga faafetai. E lē o se mea e faateʻia ai, auā foʻi a tatou manatu i le atua o lenei lalolagi—o Satani le Tiapolo o lē e silisili lona manatu faapito, ma ua matuā salalau atu i tagata lona faamaualuga ma lona agaga fouvale!—Ioane 8:44; 2 Korinito 4:4; 1 Ioane 5:19.
2. O le ā le lapataʻiga e manaʻomia ona tatou utagiaina, ma o ā fesili o le a tatou talanoaina?
2 Talu ai o loo siʻomia i tatou e le lalolagi a Satani, e tatau la ona tatou faaeteete ina neʻi pisia i tatou i uiga o le lalolagi. Na faamanatu atu e le aposetolo o Paulo i Kerisiano i Efeso, i le uluaʻi senituri e faapea: “Na outou savavali ai anamua, e tusa ma le tū a lenei lalolagi, e tusa ma le taʻitaʻi o le ʻau faipule i le va nimonimo, o le agaga lea o loo matuā galue nei i ē ua faalogogatā; o i tatou foʻi, na amio faatasi i tatou uma lava ma i latou anamua, ina ua tatou nonofo i tuʻinanau o o tatou tino, na faia foʻi e i tatou o mea na loto i ai le tino atoa ma le mafaufau, na fanau mai foʻi i tatou o le fanauga a le toʻasa, faapei o isi atoa foʻi.” (Efeso 2:2, 3) O le mea foʻi lenā o loo tupu i le toʻatele o tagata i aso nei. O lea la, e faapefea ona tatou tausia pea le agaga faafetai? O le ā le fesoasoani ua saunia e Ieova? O ā auala aogā e mafai ai ona faaalia lo tatou faafetai?
Māfuaaga e Ala ai Ona Faafetai
3. O ā mea tatou te faafetai ai iā Ieova?
3 E tatau ona tatou faafetaia Ieova le Atua, o Lē na Faia i tatou ma o Lē na Foaʻi Maia le Ola, aemaise pe a tatou tōmanatu i le anoanoaʻi o meaalofa ua ia aao i ai mo i tatou. (Iakopo 1:17) I aso faisoo, tatou te faafetaia ai Ieova mo le ola. (Salamo 36:9) I lo tatou siʻomaga, ua tatou mātauina ai le tele o mea ua faia e Ieova e pei o le lā, masina ma fetu. O loo iai i lo tatou paneta le anoanoaʻi o minerale e tāua mo le ola, atoa foʻi ma kasa tāua ua fefiloi i se auala paleni i le ʻea, ma faataamilosaga lavelave i le natura o mea, ia ua faamaonia ai lo tatou matuā ola faalagolago i lo tatou Tamā alofa i le lagi. Na pese le tupu o Tavita: “Ieova e, loʻu Atua, e tele lava mea ua e faia, o ou vavega ma ou manatu iā te i matou, e lē mafai ona laulauina atu ai iā te oe; ou te fia faailoa ma tautala i ai, a e lē mafaitaulia lava.”—Salamo 40:5.
4. Aiseā e ao ai ona tatou faafetai iā Ieova mo le aufaatasiga fiafia o loo tatou olioli ai i a tatou faapotopotoga?
4 E ui lava e lē o nonofo i se lalolagi parataiso, ae o loo olioli tagata o Ieova ona o loo nonofo i se parataiso faaleagaga. I o tatou Maota o le Malo ma i tauaofiaga ma fonotaga, tatou te tofo ai i āuga o le galue o le agaga o le Atua i uso talitonu. O le mea moni, a o talaʻi atu i tagata e lē naunau i lotu pe lē ō foʻi i lotu, o nisi Molimau e latou te faasino atu i le mea na faamatalaina e Paulo, i lana tusi i Kerisiano i Kalatia. Muamua lava, latou te faauaʻi manatu i “galuega a le tino,” ma fesili atu i ē o loo latou talaʻi i ai, po ua latou mātauina nei uiga i tagata i aso nei. (Kalatia 5:19-23) E matuā ioe le toʻatele o tagata e faapea, o uiga na o loo faaalia e tagata i aso nei. Pe a faaali atu i ai faamatalaga e uiga i fua o le agaga o le Atua ma pe a valaaulia foʻi i le Maota o le Malo i le vaipanoa o loo iai, ina ia mafai ona latou vāaitino i faamaoniga o lenei mea, o le toʻatele o tagata e latou te faapea mai: “E moni, o iā te outou le Atua.” (1 Korinito 14:25) E lē na o le Maota o le Malo o loo tupu ai lenei mea. Po o fea lava e te malaga i ai, ae afai e te feiloaʻi i se tasi o Molimau a Ieova lea ua silia i le ono miliona lo latou faitau aofaʻi, o le a e vaaia ai foʻi lenā lava agaga olioli ma le fiafia. O le mea moni, o lenei aufaatasiga matagofie o se māfuaaga lenā e avatu ai le faafetai iā Ieova, o lē ua aumaia lona agaga ina ia mafai ona iai lenei tulaga.—Sefanaia 3:9; Efeso 3:20, 21.
5, 6. E mafai faapefea ona faaalia lo tatou faafetai mo le meaalofa silisili a le Atua, o le togiola?
5 O le meaalofa silisili na foaʻi mai e Ieova lea e atoatoa lona lelei, o lona Alo o Iesu o lē na ala mai ai le taulaga togiola. Na tusi le aposetolo o Ioane: “Afai ua faapea ona alofa mai o le Atua iā te i tatou, e tatau ai ona tatou fealofani.” (1 Ioane 4:11) Ioe, tatou te faaalia lo tatou faafetai mo le togiola e lē gata i le alofa iā Ieova ma faafetaia o ia, ae e ala foʻi i le ola i se olaga ua faaalia ai le alofa mo isi.—Mataio 22:37-39.
6 E mafai ona tatou aʻoaʻoina le auala e faafetai ai, e ala i le iloiloina o feutagaʻiga a Ieova ma le nuu o Isaraelu i aso anamua. E ala i le Tulafono lea na ia tuuina atu i tagata e ala iā Mose, na aʻoaʻo atu ai e Ieova le tele o lesona i tagata. E ala i le “tino o le poto ma le upu moni i le tulafono,” tatou te aʻoaʻoina ai le tele o mea lea o le a fesoasoani iā i tatou e mulimuli ai i le fautuaga a Paulo: ‘Ia outou faafetai.’ —Roma 2:20; Kolose 3:15.
Lesona se Tolu Mai le Tulafono na Tuu Atu iā Mose
7. Na faapefea i le faatulagaga o le sefuluaʻi ona maua ai e tagata Isaraelu le avanoa e faaalia ai lo latou faafetai iā Ieova?
7 I le Tulafono na tuu atu iā Mose, na faailoa mai ai e Ieova ni auala se tolu e mafai ona faaalia ai e tagata Isaraelu lo latou matuā talisapaiaina o lona agalelei. Muamua, o le sefuluaʻi. O le sefuluaʻi o fua o faatoʻaga ma “le sefulu o manu uma, o povi, atoa ma mamoe,” sa tatau ona avea ma mea “e paia lava iā Ieova.” (Levitiko 27:30-32) Ina ua usiusitai le nuu o Isaraelu, na matuā faamanuiaina i latou e Ieova. “Inā aumaia mea e sefulu aʻi a outou mea uma lava i le fale e tuu ai mea; ina ia i ai mea e ʻai i loʻu fale; ma ia outou tofotofo mai ai iā te aʻu i lenei mea, ua fetalai mai ai Ieova o ʻau; pe ou te lē toina pupuni o le lagi mo outou, ma sasaa atu le manuia mo outou, ina seʻia silisili ona tele.”—Malaki 3:10.
8. O le ā le eseesega o taulaga tauofo ma le sefuluaʻi?
8 Lona lua, e faaopoopo atu i le sefuluaʻi, na faatonuina foʻi e Ieova tagata Isaraelu ina ia fai ni a latou taulaga tauofo. Na ia faatonuina Mose e fai i tagata Isaraelu: “Pe a outou oo i le nuu ou te faaoo i ai outou, pe a outou aai i mea e ʻai o i le nuu, ona outou au mai ai lea o le taulaga sii iā Ieova.” O nisi o a latou uluaʻi “palugāfalaoa” na tatau ona avea ma “taulaga sii iā Ieova” i o latou augātupulaga. Ia mātau mai, e lē o manaʻomia se aofaʻiga patino i nei uluaʻi palugāfalaoa. (Numera 15:18-21) Ae ina ua ofoina atu e tagata Isaraelu se taulaga ma le lotofaafetai, na mautinoa lo latou mauaina o se faamanuiaga mai iā Ieova. E iai se faatulagaga faapena e fesootaʻi atu i le malumalu i le vaaiga a Esekielu. Tatou te faitau e faapea: “O le faapolopolo o le uluaʻi fua uma i mea uma, ma taulaga uma i mea uma i a outou taulaga uma, e fai ia mā ositaulaga; tou te avatu foʻi a outou uluaʻi palugāfalaoa i le ositaulaga, ina ia faatumauina e ia le manuia i lou aiga.”—Esekielu 44:30.
9. O le ā na aʻoaʻoina atu e Ieova e ala i le faatulagaga mo le aoina mai o mea e totoe o le seleselega?
9 Lona tolu, na fuafuaina e Ieova le faatulagaga mo le aoina mai o mea e totoe o le seleselega. Na faatonuina e le Atua e faapea: “A outou selesele foʻi i le seleselegasaito i o outou fanua, aua e te selesele uma ou pito fanua, aua foʻi e te ao ni saito ua paʻūʻū i lau seleselega. Aua e te foʻi faalua e tau vine o i lou tovine, aua foʻi e te faaputu le fua ua totoe i lou tovine; a ia tuu ai mo ē matitiva ma tagata ese; o aʻu o Ieova lo outou Atua.” (Levitiko 19:9, 10) E lē o manaʻomia foʻi se aofaʻiga patino. Na tuu lava i le faitalia a le tagata Isaraelu e filifili po o le ā le tele o mea e tuu mo ē matitiva. Na faamatalaina ma le tonu e le tupu poto o Solomona e faapea: “O lē ua alofa i le tagata mativa, na te avatua ana mea iā Ieova; e tauia mai foʻi e ia ana mea na avatu iā te ia.” (Faataoto 19:17) O lea la, na aʻoaʻoina atu e Ieova le faaalia o le alofa mutimutivale ma le manatu mamafa i ē lē tagolima.
10. O ā āuga na oo i tagata Isaraelu ina ua latou lē faaalia le faafetai?
10 Na faamanuiaina e Ieova tagata Isaraelu ina ua latou usiusitai e faatino le sefuluaʻi ma taulaga tauofo, atoa foʻi ma le avatuina o mea mo tagata matitiva. Peitaʻi ina ua lē faaalia e tagata Isaraelu le faafetai, latou te leʻi mauaina le finagalo malie o Ieova. Na mataʻutia iʻuga na oo i ai ma na faaaunuua mulimuli ane ai. (2 Nofoaiga a Tupu 36:17-21) O ā ni lesona e mafai ona tatou aʻoaʻoina mai ai?
Faaalia o lo Tatou Lotofaafetai
11. O le ā le auala autū e mafai ona faaalia ai lo tatou lotofaafetai iā Ieova?
11 O le auala autū e mafai ona tatou avatu ai le viiga iā Ieova ma faaalia ai lo tatou lotofaafetai, e aofia ai foʻi se “taulaga.” E moni ona o i tatou o Kerisiano, ua tatou lē o toe ola i lalo o le Tulafono na tuu atu iā Mose, ma e lē manaʻomia ona ofoina ni taulaga i manu po o fua o faatoʻaga. (Kolose 2:14) E ui i lea, na apoapoaʻi atu le aposetolo o Paulo i Kerisiano Eperu: “Tatou te avatu soo ai le taulaga o le viiga i le Atua, o le fua lea o tatou laugutu, o loo faafetai atu i lona suafa.” (Eperu 13:15) E ala i le faaaogāina o o tatou tomai ma alāmanuia i le ofoina atu o se taulaga o viiga iā Ieova, pe tatou te auai i le faiva i le lautele po o totonu foʻi o le “faapotopotoga” o uso Kerisiano, e mafai ona tatou matuā lotofaafetai i lo tatou Tamā, o Ieova le Atua. (Salamo 26:12) I le faia faapea, o ā ni mea e mafai ona tatou aʻoaʻoina mai le auala na tatau ona faaalia ai e tagata Isaraelu le faafetai iā Ieova?
12. O le ā tatou te aʻoaʻoina mai le faatulagaga o le sefuluaʻi e tusa ai ma la tatou tiute tauave faa-Kerisiano?
12 Muamua lava, o le faatulagaga o le sefuluaʻi e pei ona sa tatou talanoaina, e leʻi tuu i le faitalia a le tagata lava ia; peitaʻi o se mea na tatau ona faatino e tagata Isaraelu taʻitoʻatasi. Ona o i tatou o Kerisiano, ua iā i tatou le tiute tauave e auai i le faiva ma sauniga faa-Kerisiano. O nei gaoioiga e lē tuu i le faitalia a le tagata lava ia. I lana valoaga mataʻina e uiga i le taimi o le gataaga, na fetalai manino Iesu e faapea: “E talaʻiina atu foʻi lenei tala lelei o le malo i le atu laulau uma, e fai ma molimau i nuu uma; ona oo mai ai lea o le gataaga.” (Mataio 24:14; 28:19, 20) Na faagaeeina le aposetolo o Paulo e tusi e faatatau i sauniga faa-Kerisiano e faapea: “Ia tatou manatunatu foʻi le tasi i le tasi, ina ia taufaatupu ai le alofa ma galuega lelei; aua le lafoaʻiina le faapotopotoina o i tatou, pei o le masani o isi, a ia fefaamāfanafanaʻi; ia atili ai foʻi ona faapea ina ua outou iloa o le Aso o loo taulata mai.” (Eperu 10:24, 25) E faaalia lo tatou lotofaafetai iā Ieova pe afai tatou te taliaina fiafia la tatou tiute tauave o le talaʻi ma le aʻoaʻo atu, atoa foʻi ma le auaufaatasi e lē aunoa ma o tatou uso i sauniga faa-Kerisiano, ma tatou te manatu i ai o se faaeaga mamalu.
13. O ā ni lesona tatou te aʻoaʻoina mai le faatulagaga o taulaga tauofo ma le aoina mai o mea e totoe o le seleselega?
13 E faaopoopo atu i ai, e mafai ona aogā iā i tatou le iloiloina o isi faatulagaga e lua—o taulaga tauofo ma le aoina mai o mea e totoe o le seleselega—lea na mafai ona faaalia ai e tagata Isaraelu lo latou talisapaia. O le faatulagaga o le sefuluaʻi na matuā maʻoti mea na manaʻomia ona faatinoina. E eseese la ma taulaga tauofo ma le faatulagaga o le aoina mai o mea e totoe o le seleselega, lea e leʻi maʻoti se aofaʻiga na manaʻomia mai ai. Peitaʻi, na tuu atu lava i le loloto o le talisapaia e le auauna a Ieova e uunaʻia ai o ia e gaoioi. I se auala talitutusa, e ui lava tatou te iloaina o le auai i le faiva ma sauniga faa-Kerisiano o se tiute tauave autū mo so o se auauna a Ieova, ae po o tatou lotomalilie ea e faatinoina ma o tatou lotoatoa? Pe tatou te vaai i ai o se avanoa e faaalia ai lo tatou lotofaafetai mo mea uma ua faia e Ieova mo i tatou? Pe o tatou filigā ea e faatino nei gaoioiga i le mea sili e tusa ai ma lo tatou tulaga? Po o le mea ea, tatou te manatu i ai ua na o se tiutefai e tau lava ina faatino? Ioe, o fesili nei e tatau ona tali e le tagata lava ia. Na faamatalaina e le aposetolo o Paulo le tulaga lenei e faapea: “A ia taʻitoʻatasi ma faamasino i lana lava galuega, ona iā te ia lea o se mea e mitamita ai iā te ia lava, a e lē o se tasi.”—Kalatia 6:4.
14. O le ā o faatalitalia e Ieova mai iā i tatou i la tatou auaunaga iā te ia?
14 Ua silafia lelei e Ieova le Atua o tatou tulaga. Ua ia silafia foʻi mea e gata mai ai lo tatou malosi. E tāua iā te ia mea ua faataulagaina ma le lotomalie e ana auauna, pe itiiti pe tele. E lē o faatalitalia mai e ia e tutusa le tele o mea tatou te avatuina, ma e lē mafai foʻi ona tutusa ni mea tatou te avatuina. Ina ua talanoaina le foaʻi atu o meafaitino, na fai atu le aposetolo o Paulo i Kerisiano i Korinito: “Afai ua i ai le loto fiafia, e talileleia lea, e tusa ma mea ua iā te ia, a e lē tusa ma mea e lē o iā te ia.” (2 Korinito 8:12) E faatatauina foʻi lenei mataupu silisili i la tatou auaunaga i le Atua. O le taliaina e Ieova o la tatou auaunaga, e lē faalagolago i le tele o mea tatou te faia, ae o le auala tatou te faia ai—i se auala fiafia ma le lotoatoa.—Salamo 100:1-5; Kolose 3:23.
Atiina Aʻe ma Tausia Pea se Agaga Faapaeonia
15, 16. (a) O le ā le fesootaʻiga o le faiva faapaeonia ma le lotofaafetai? (e) E mafai faapefea e i latou e lē mafai ona paeonia ona faaalia le agaga faapaeonia?
15 O se auala lelei e faaalia ai lo tatou faafetai iā Ieova, o le ulu atu lea i le auaunaga faataimi atoa. Talu ai ua uunaʻia i latou i le alofa mo Ieova ma le talisapaia o lona agalelei faifua, e toʻatele auauna tuuina atu a Ieova ua faia ni suiga tetele i o latou olaga, ina ia tele se taimi latou te auauna ai iā Ieova. Ua mafai ona auauna nisi o ni paeonia sauatoa ma faaaluina le 70 itula i masina taʻitasi, i le talaʻia o le tala lelei ma aʻoaʻoina tagata i le upu moni. Mai lea taimi i lea taimi, ua mafai ai e nisi o ē e faatapulaa o latou tulaga, ona fuafua e faaalu le 50 itula i se masina e talaʻi ai o ni paeonia lagolago.
16 Ae faapefea la le toʻatele o auauna a Ieova, o ē e lē mafai ona auauna o ni paeonia sauatoa po o ni paeonia lagolago? E mafai ona latou faaalia le lotofaafetai e ala i le atiina aʻe ma le tausia pea o se agaga faapaeonia. E faapefea? E ala i le faalaeiauina o ē e mafai ona paeonia, ma ia tāmau i a latou fanau se faanaunauga e tuliloaina se vala o le auaunaga faataimi atoa, ma e ala foʻi i le auai ma le filigā i le galuega talaʻi e tusa ai ma o latou tulaga. O mea tatou te faatinoina i le faiva, e faalagolago tele i le loloto o lo tatou talisapaiaina o mea na faia e Ieova i aso ua teʻa, atoa ma mea o loo ia faia i le taimi nei, ma mea o le a ia faia i le lumanaʻi mo i tatou.
Faaalia o le Faafetai i a Tatou “ʻOa”
17, 18. (a) E mafai faapefea ona tatou faaalia le agaga faafetai i a tatou “ʻoa”? (e) O le ā na mātauina e Iesu i le foaʻi a le fafine ua oti lana tane, ma aiseā?
17 O loo taʻua i le Faataoto 3:9: “Ia e āva iā Ieova i lou ʻoa, ma le faapolopolo o au mea uma e tutupu.” E lē o toe manaʻomia ona faatino e auauna a Ieova le sefuluaʻi. Na i lo lea, na tusi atu Paulo i le faapotopotoga i Korinito: “Ia taʻitoʻatasi ma foaʻi e pei ona filifili i lona loto; aua ma le tigā, aua foʻi ma le faatauanauina; auā e alofa le Atua i lē ua foaʻi ma le loto malie.” (2 Korinito 9:7) O le faia o foaʻi tauofo e lagolago ai le galuega talaʻi o le Malo i le lalolagi aoao, e faaalia ai foʻi lo tatou lotofaafetai. O le lototalisapaia o le a uunaʻia ai i tatou e foaʻi atu e lē aunoa, ma ia tuu ese se tupe i vaiaso taʻitasi pe a talafeagai, e pei ona sa faia e uluaʻi Kerisiano.—1 Korinito 16:1, 2.
18 E lē o le aofaʻiga tatou te foaʻiina atu, e faaatagia ai lo tatou lotofaafetai mo Ieova. Na i lo lea, e faalagolago i le agaga o loo faia ai la tatou foaʻi. O le mea lenei na mātauina e Iesu a o ia silasila ane o lafo e tagata a latou meaalofa i pusa tupe i le malumalu. Ina ua silasila ane Iesu o lafoina e se tinā mativa ni “tupe iti e lua,” na fetalai atu o ia: “E moni, ou te fai atu iā te outou, o mea a lenei fafine mativa ua oti lana tane ua lafo i ai, ua sili lea i a latou uma. Auā o i latou uma, ua latou lafo atu i taulaga nisi mea mai a latou mea ua tele; a o ia ua mativa, ua lafo e ia ana mea uma e ola ai sa iā te ia.”—Luka 21:1-4.
19. Aiseā e lelei ai ona toe iloilo auala o loo tatou faaalia ai le faafetai?
19 Tau ina ia uunaʻia i tatou ina ia toe iloilo le auala o loo tatou faaalia ai le faafetai, ona o le autaluina o auala e mafai ai ona tatou lotofaafetai. Pe e mafai ea ona faateleina a tatou taulaga o viiga iā Ieova, atoa foʻi ma lo tatou lagolagoina o le galuega i le lalolagi aoao, i se auala faaletino? E mafai ona tatou mautinoa e faafiafiaina le finagalo o lo tatou Tamā agaalofa o Ieova, ona o lo tatou faaalia o le faafetai i le tele tatou te mafaia ai.
Pe E te Manatua?
• O ā māfuaaga e ao ai ona tatou faafetai iā Ieova?
• O ā lesona tatou te aʻoaʻoina mai le sefuluaʻi, o taulaga tauofo ma le aoina mai o mea e totoe o le seleselega?
• E faapefea ona tatou atiina aʻe le agaga faapaeonia?
• E mafai faapefea ona tatou faaaogāina a tatou “ʻoa” e faafetai ai iā Ieova?
[Fesili mo le Suʻesuʻega]
[Ata i le itulau 15]
“O mea lelei uma e foaʻifuaina mai, atoa ma mea alofa uma e atoatoa ona lelei, [e] mai lugā lava ia”
[Ata i le itulau 16]
O ā lesona e tolu mai le Tulafono o loo faaalia i inei?
[Ata i le itulau 18]
O ā ni taulaga e mafai ona tatou faia?