Aʻoaʻoina ni Lesona Mai le Aiga o Iesu

O LE ā ua e silafia e faatatau i le aiga o Iesu, o ē na latou soifua faatasi seʻia oo i lona papatisoga, i tausaga e 30 o lona soifuaga i le lalolagi? O le ā ua taʻu mai e tusi o le Evagelia iā i tatou? O le ā tatou te aʻoaʻoina mai i le iloiloina o lona aiga? E mafai ona e mauaina aogā mai i tali o nei fesili.

Pe sa soifua mai Iesu i se aiga mauʻoa? O lona tamāfai o Iosefa, o ia o se tufuga. Sa masani o ia ma galuega mamafa, e aofia ai le tuuina i lalo o laau e fai ai laupapa. Ina ua mavae le 40 aso talu le fanau mai o Iesu, na ō atu ai ona mātua i Ierusalema, ma ofoina atu se taulaga e tusa ai ma le Tulafono. Pe na la ofoina atu se mamoe poʻa faatasi ma ni ulugā manutagi po o se lupe e pei ona faatonuina e le Tulafono? E leai. E foliga mai sa la lē gafatia na taulaga. Peitaʻi, sa faia e le Tulafono se faatulagaga mo ē matitiva. E tusa ai ma lenā faatulagaga, na ofo atu ai e Iosefa ma Maria “O le ulugā manutagi, po o tamaʻi lupe e lua fua.” O le filifilia o manu taugofie e faaalia ai o i latou o se aiga matitiva.—Luka 2:22-24; Levitiko 12:6, 8.

Ua mafai ona e silafia e faapea o Iesu Keriso, le Pule o le fanau a tagata i le lumanaʻi, sa soifua mai o ia i ni tagata lotomaulalo ma galulue mamafa ina ia maua mea manaʻomia o le  olaga. Na soifua aʻe o ia o se tufuga, e pei o lona tamāfai. (Mataio 13:55; Mareko 6:3) E ui sa “tamaoaiga ia [Iesu]” o se foafoaga agaga e malosi tele i le lagi, ae ua faapea mai le Tusi Paia “ua faamativaina” o ia ona o tatou. Ua ia tuuina o ia i se tulaga maulalo o se tagata ma soifua aʻe i se aiga e pei lava ona masani ai. (2 Korinito 8:9; Filipi 2:5-9; Eperu 2:9) E leʻi soifua aʻe o ia i se aiga mauʻoa, ma atonu sa fesoasoani ai i nisi tagata ina ia fiafia iā te ia. Sa faigofie ona ō atu tagata iā te ia ona e lē o ia o se tagata taualoa. Sa latou talisapaia o ia ma ana aʻoaʻoga, ona uiga lelei ma ana galuega matagofie. (Mataio 7:28, 29; 9:19-33; 11:28, 29) Ua mafai ona tatou iloa le atamai o Ieova le Atua i le auina mai lea o Iesu e fanau i se aiga faatauvaa.

O lea, seʻi o tatou iloiloina le aiga o Iesu ma vaai po o le ā tatou te aʻoaʻoina mai iā i latou.

Iosefa—O se Tamāloa Amiotonu

Ina ua iloa e Iosefa ua maʻitō lē ua ia faamau atu i ai “a o leʻi faatasia i laʻua,” atonu sa matuā popole o ia auā sa faigatā mo ia ona filifili i lona alofa mo Maria ma lona inoino i so o se mea e foliga mai o se amioga lē mamā. E foliga mai o lenei mataupu, ua tulaʻi mai ai se faalētonu i lana aiā tatau i le avea o ia ma tane a Maria i le lumanaʻi. I na aso, o se fafine ua uma ona faamau ma se tamāloa, e manatu i ai e tai pei lava ua faaipoipo. Ina ua mavae manatunatuga loloto, na filifili ai loa Iosefa e faateʻa lemū iā Maria ina ia aua ai neʻi fetogia o ia i maa ona o se mulilua.—Mataio 1:18; Teuteronome 22:23, 24.

Na faaali le agelu iā Iosefa i se miti ma faapea atu: “Aua e te fefe inā au mai iā te oe o Maria lau avā; auā o lana tō mai le Agaga Paia lea. E fanau mai e ia le tama tane, e te faaigoa foʻi iā te ia o Iesu; auā e faaola e ia lona nuu ai a latou agasala.” Ina ua mauaina lenā faatonuga mai le Atua, na gaoioi ai loa Iosefa ma ave Maria i lona aiga.—Mataio 1:20-24.

O lenei filifiliga, na aofia ai lenei tane amiotonu ma faamaoni i le faataunuuga o le mea na fetalai ai Ieova e ala i le perofeta o Isaia: “Faauta, e tō le taupou, ma fanau mai se tama tane; na te faaigoa foʻi iā te ia o Emanuelu.” (Isaia 7:14) E mautinoa na talisapaia e Iosefa le faaeaga e avea ai ma tamāfai o le Mesia, ona o ia o se tane faaleagaga e ui lava o le tama muamua a Maria e lē o sona atalii.

E leʻi faia lava e Iosefa feusuaʻiga ma Maria seʻia fanau mai lana tama. (Mataio 1:25) O le taimi lenā ua faaipoipo le ulugalii, o le lē faia o feusuaʻiga atonu sa faigatā, peitaʻi la te leʻi mananaʻo e iai se lē femalamalamaaʻi po o ai le tamā o le pepe. Maʻeu se faaaʻoaʻoga lelei o le pulea o le tagata lava ia! Na faatāua e Iosefa mea faaleagaga na i lo ona lava faanaunauga.

E faafā ona maua e Iosefa taʻitaʻiga faaagelu e uiga i le tausiaina aʻe o lona atalii fai. O le tolu o na faatonuga na avatu, sa faatatau atu i le nuu e ao ona tausia aʻe ai le tama. Sa tāua tele le usiusitai i lenā taimi mo le faasaoina o le ola o le tamaitiiti. I mea uma lava, na vave ona gaoioi Iosefa, i le aveina o le tamaitiiti muamua lava i Aikupito ma toe aumaia mulimuli ane ai i Isaraelu. O lenei mea na puipuia ai Iesu mai le fasiotia e Herota o pepe tama uma. E lē gata i lea, o le usiusitai o Iosefa na iʻu i le faataunuuina o valoaga e faatatau i le Mesia.—Mataio 2:13-23.

Na aʻoaʻoina e Iosefa ia Iesu i se galuega ina ia mafai ai ona ia tausia o ia lava. O lea la, sa lauiloa ai Iesu e lē gata o le ‘atalii o le tufuga’ ae sa iloa foʻi o “le tufuga.” (Mataio 13:55; Mareko 6:3) Na tusi mai Paulo e faapea, o Iesu sa “faaosoosoina o ia i mea uma pei o i tatou.” E mautinoa e aofia ai le galue mamafa  ina ia lagolagoina lona aiga.—Eperu 4:15.

Ua tatou iloa faamaoniga o le tuutoina o Iosefa i le tapuaiga moni e ala i faamatalaga mulimuli lea na taʻua ai o ia i Tusitusiga Kerisiano Eleni. Sa ave e Iosefa lona aiga i Ierusalema mo le Paseka. E na o tane sa manaʻomia ona ō, peitaʻi sa fai ma masani a Iosefa le ave o lona aiga i Ierusalema “i lea tausaga ma lea tausaga.” Sa tele ni faataulaga na ia faia, auā e tatau ona latou savavali pe tusa ma le 65 maila [100 kilomita] mai Nasareta agaʻi i Ierusalema. E pei ona faamatalaina e le Tusi Paia le mea na tupu, na lē faatasi Iesu mai i latou. Na maua atu o ia i le malumalu, o loo faalogologo ma tuufesili i aʻoaʻo o le Tulafono. E ui lava sa na o le 12 tausaga o Ièsu, ae sa sili lona atamai ma lona iloa o le Afioga a le Atua. O lenei mea na tupu, tatou te iloa ai sa lelei le aʻoaʻoina o Iesu e ona mātua, ma tausia aʻe o ia o se tama e naunau i mea faaleagaga. (Luka 2:41-50) E foliga mai na maliu Iosefa i se taimi ina ua mavae lenei mea, talu ai e leʻi toe taʻua lava o ia i tala o le Tusi Paia mulimuli ane ai.

Ioe, o Iosefa o se tamāloa amiotonu sa ia tausia lelei lona aiga, i le itu faaleagaga ma le faaletino. Pe e pei oe o Iosefa, e faamuamua mea faaleagaga i lou olaga pe afai e te silafia le finagalo o le Atua mo i tatou i aso nei? (1 Timoteo 2:4, 5) Pe e te naunau e usitai i mea o fetalai mai ai le Atua e ala i lana Afioga, ma gauaʻi e pei o Iosefa? Po o e aʻoaʻo lau fanau ia latou faia ni talanoaga i mea faaleagaga ma isi?

Maria—O se Auauna Lē Manatu Faapito a le Atua

O Maria le tinā o Iesu, o se auauna sili ona lelei a le Atua. Ina ua taʻu atu e le agelu o Kaperielu iā Maria o le a fanau o ia, sa faateʻia o ia. Ona o ia o se taupou sa ia leʻi ‘iloa la se tane.’ I le iloaina o lana tō e mai le agaga paia, sa ia taliaina ma le loto maulalo le feʻau, ma faapea mai: “Faauta, o aʻu nei o le auauna a le Alii; ia faia iā te aʻu e tusa ma lau fetalaiga.” (Luka 1:30-38) Sa ia matuā faatāuaina le faaeaga faaleagaga sa tuuina atu iā te ia, lea sa ia lotomalie ai e onosaia so o se faigatā e oo mai ona o lana filifiliga.

O le mea moni, o le taliaina o le tofiga sa matuā suia atoa ai lona soifuaga o se fafine. Ina ua alu o ia i Ierusalema mo lona faamamāina, na taʻu atu e se tamā matua amioatua e  suafa iā Simeona e faapea: “E tūʻia foʻi lou lava loto ia ati i le pelu.” (Luka 2:25-35) E foliga mai, na ia faasino atu i lagona o le a iai iā Maria i le vaai atu ua teena Iesu e le toʻatele ma mulimuli ane tutuʻiina i fao i le satauro.

A o soifua aʻe Iesu, sa manatua pea e Maria mea na tutupu i le olaga o Iesu, “ua mafaufau ai i lona loto.” (Luka 2:19, 51) I le pei o Iosefa, o Maria foʻi o se tagata faaleagaga ma sa ia faatāuaina mea tutupu ma faamatalaga e faataunuuina ai valoaga. O le mea na fetalai atu ai le agelu iā te ia sa manatua pea i lona mafaufau: “E sili o ia, e taʻua foʻi o le Alo o le Silisili ese; e foaʻi atu e le Alii le Atua iā te ia le nofoaiga a Tavita lona tamā, e fai o ia ma tupu i le aiga o Iakopo e faavavau; o lona malo foʻi e leai sona gataaga.” (Luka 1:32, 33) Ioe, sa i manatu o se faaeaga tāua le avea ma tinā faaletagata o le Mesia.

Na mātauina foʻi le tulaga faaleagaga o Maria ina ua feiloaʻi ma Elisapeta, o lona tauaiga o lē o loo maʻitō foʻi faavavega. I le vaai atu iā te ia, na vivii ai Maria iā Ieova ma faaalia lona naunau mo le Afioga a le Atua. Na ia taʻua ni manatu mai le tatalo a Hana o loo faamauina i le 1 Samuelu mataupu e 2 ma faaaofia ai isi manatu mai isi tusi o Tusitusiga Eperu. Ua faaalia i lenā iloa o le Tusi Paia e faapea, ua talafeagai ona avea o ia o se tinā alofa ma mataʻu i le Atua. Sa lagolagosua Maria iā Iosefa i le tausia aʻe faaleagaga o Iesu.—Kenese 30:13; 1 Samuelu 2:1-10; Malaki 3:12; Luka 1:46-55.

Sa matuā malosi le faatuatua o Maria i le avea o lana tama ma Mesia, ma e leʻi faaitiitia ai ina ua mavae le maliu o Iesu. E leʻi umi ona mavae lona toetū mai, sa iai o ia faatasi ma isi soo faamaoni o ē na faatasitasi e tatalo faatasi ma aposetolo. (Galuega 1:13, 14) Sa ia tausisia pea lona faamaoni, e ui lava e tatau ona ia tigā i le vaai atu i lana tama faapelepele o maliu i le satauro.

E faapefea ona e maua aogā mai le aʻoaʻoina e faatatau i le soifuaga o Maria? Pe e te taliaina le faaeaga o le auauna i le Atua e aofia ai le faia o ni faataulaga? Po o e manatu mamafa i le tāua o lenei faaeaga i aso nei? Po o e manatua le mea na valoia e Iesu ma faatusatusa i mea o loo tutupu i aso nei, ma e ‘mafaufau ai i lou loto’? (Mataio, mataupu 24 ma le 25; Mareko mataupu e 13; Luka mataupu e 21) Po o e faaaʻoaʻo iā Maria i le iloa lelei o le Afioga a le Atua ma faaaogā i au talanoaga? Pe o le a e tausisia pea lou faatuatua iā Iesu, e tusa lava po o ā ni mafatiaga o le mafaufau e oo iā te oe ona o le avea ma ona soo?

 Na Mafai Ona Suia Uso o Iesu

E foliga mai e leʻi faatuatua uso o Iesu iā te ia seʻia oo ina mavae lona maliu. E foliga mai foʻi o le māfuaaga lenā e leʻi iai i latou i le taimi na maliu ai o ia i le satauro, o lea na tuuina atu ai e Iesu le tausiga o lona tinā i le aposetolo o Ioane. E leʻi talisapaia Iesu e ona tauaiga, ma na oo lava ina latou faapea atu i se tasi aso o Iesu “ua valea o ia.” (Mareko 3:21) Talu ai sa iai tauaiga o Iesu e leʻi talitonu, o i latou foʻi la i aso nei o loo iai tauaiga lē talitonu, e mafai ona mautinoa o loo malamalama Iesu i o latou faalogona pe a amusia i latou e o latou tauaiga ona o lo latou faatuatua.

Peitaʻi, ina ua mavae le toetū o Iesu, e foliga mai na amata ona faatuatua ona uso iā te ia. Sa iai i latou i le vaega i Ierusalema a o lumanaʻi le Penetekoso i le 33 T.A. ma tatalo ma le faatauanau ma le ʻau aposetolo. (Galuega 1:14) E manino mai, o le toe faatūina o lo latou ʻafa uso o Iesu na uunaʻia ai i latou e suia o latou loto, ina ia avea ai i latou ma ona soo. E lē tatau la ona tatou faavaivai i o tatou tauaiga o ē tatou te lē tapuaʻi faatasi.

E tusa ai ma le Tusi Paia, o Iakopo, le ʻafa uso o Iesu o lē na Ia faaali totino atu i ai, na iai sona tofiga mataʻina i le faapotopotoga Kerisiano. Na ia tusia se tusi na faagaeeina e le Atua i ona uso Kerisiano, ma lapataʻia i latou ia tumau pea i le faatuatua. (Galuega 15:6-29; 1 Korinito 15:7; Kalatia 1:18, 19; 2:9; Iakopo 1:1) O le isi ʻafa uso o Iesu o Iuta, na ia tusia le tusi o Iuta e faalaeiau ai le ʻauuso talitonu ina ia faaauau pea ona tau le taua o le faatuatua. (Iuta 1) O se mea e mataʻina ai ona e lē o taʻua i le tusi a Iakopo po o Iuta, sa latou sootaga faaletino ma Iesu ina ia faaofo ai uso Kerisiano. Maʻeu se lesona lelei o le loto maulalo ua tatou aʻoaʻoina mai iā i laʻua!

O lea, o ā nisi o mea ua tatou aʻoaʻoina mai le aiga o Iesu? E mautinoa, ua tatou aʻoaʻoina mai ni lesona o le tuutoina atu, lea e mafai ona faaalia i auala nei: (1) Ia usiusitai ma le faamaoni i le finagalo o le Atua ma le feagai ai ma tofotofoga ona o le faia faapea. (2) Ia faamuamua mea faaleagaga, e tusa lava pe faia ai ni faataulaga. (3) Ia aʻoaʻo lau fanau e tusa ai ma le Tusi Paia. (4) Aua le faavaivai i o tatou tauaiga tatou te lē o tapuaʻi faatasi. (5) Aua le faamaualuga e uiga i ni faiā ma ē o taʻimua i le faapotopotoga Kerisiano. Ioe, o le aʻoaʻoina e uiga i le aiga faaletagata o Iesu ua tatou māfana atu ai iā te ia ma faaleleia atili ai lo tatou talisapaia, ona o le filifilia e Ieova o se aiga faatauvaa e tausia Iesu a o laʻitiiti.

[Ata i le itulau 4]

Sa ave e Iosefa ia Maria e fai ma ana avā ma aofia ai i le faataunuuga o valoaga o le Mesia

[Ata i le itulau 6]

Na aʻoaʻoina e Iosefa ma Maria la laʻua fanau i mataupu faaleagaga ma le faia o galuega

[Ata i le itulau 7]

E ui lava ina sa tausia aʻe i se aiga faaleagaga, ae e leʻi faatuatua uso o Iesu iā te ia seʻia mavae lona maliu

[Ata i le itulau 8]

Sa faalaeiau e ʻafa uso o Iesu o Iakopo ma Iuta ia uso Kerisiano