Fesili Mai le ʻAufaitau

I lana tatalo faaaʻoaʻo, po o le uiga ea o le fetalaiga a Iesu, ua uma ona faia le finagalo o le Atua i le lagi, e ui lava e leʻi tuliesea agelu leaga?

Na tulei Iesu e pei ona faamauina i le Mataio 6:10: “Ia faia lou finagalo i le lalolagi, e pei ona faia i le lagi.” E lua ni auala e ono mafai ona malamalama ai i lenei talosaga. Muamua, o se faatoga ina ia faia le finagalo o le Atua i le lalolagi e pei ona faia i le lagi. Lona Lua, o se talosaga ina ia faia atoatoa i le lagi ma le lalolagi. O le fetalaiga na faia muamua atu e Iesu e faapea “ia oo mai lou malo,” e faailoa mai ai o le manatu lona lua, e sili atu ona ōgatusa ma le Tusi Paia. Na faaatagia ai foʻi le tulaga o le lalolagi a o soifua Iesu ma faaauau mai ai pea. E faapefea?

Na faasino atu le tusi o Faaaliga i ni mea se lua na tutupu ina ua faavaeina le Malo o le Atua i le lagi. O le mea muamua e aafia ai le lagi, a o le mea lona lua, e aafia ai le lalolagi. Ua faapea mai le Faaaliga 12:7-9, 12: “Ua tau foʻi le taua i le lagi; o Mikaele ma ana agelu ua latou tau ma le tarako, ua ʻau foʻi le tarako ma ana agelu e tau ai le taua, a ua latou lē manumalo, e lē toe maua foʻi i le lagi se mea latou te nonofo ai. Ua lafo foʻi le tarako tele, o le gata tuai lea, ua igoa i le tiapolo, i le ma Satani, o lē faasesē i le lalolagi uma; ua lafo ifo i le lalolagi, ua lafo foʻi ana agelu faatasi ma ia. O le mea lea ia outou olioli ai, le lagi e atoa ma ē ua nonofo ai! Oi talofa iā te oulua le fanua ma le sami, auā ua alu ifo iā te oulua le tiapolo ua lotoa tele, auā ua na iloa ua saasaa ona pō.”

O le tuliesea o Satani ma ana temoni mai le lagi ina ua mavae le 1914, na faamamāina ai le lagi mai agaga uma e fouvale, ma matuā faafiafiaina ai atalii agaga faamaoni o le Atua ia na sili atu lo latou toʻatele na i lo agelu fouvale. (Iopu 1:6-12; 2:1-7; Faaaliga 12:10) O lea la, na faataunuuina i le lagi le talosaga i le tatalo faaaʻoaʻo a Iesu. O i latou uma na totoe i le lagi, na faamaoni iā Ieova ma gauaʻi atoatoa i lana pule silisili ese.

O le manatu e tatau ona faamatilatila, e oo lava i le taimi e leʻi tupu ai lenā tulaga ma o loo mafai pea ona ō atu agelu leaga i le lagi, ae o le taimi lenā ua lē toe avea ai i latou ma vaega o le aiga o le Atua, ma na iai ni faasāsāaga patino na tuu atu iā i latou. O se faaaʻoaʻoga, o loo faailoa mai e le Iuta 6 e faapea, e oo atu i le uluaʻi senituri, ua uma ona “taofia [i latou] i noanoataga faavavau i lalo o le pogisa [faaleagaga], seʻia oo i le faamasinoga o le Aso tele.” Na faapea mai foʻi le 2 Peteru 2:4: “Na lē faasaoina e le Atua le ʻau agelu o ē na agasala, a ua na tuuina atu i latou i lua o le pogisa [faaleagaga] i seoli [o se tulaga e matuā maulalo lava], ina ia taofia i latou e oo i le faamasinoga.” *

I se matuā eseesega mai lo latou tulaga faaesea a o iai i le lagi, e tele le pule a agelu leaga  i luga o le lalolagi. O le mea moni, o loo taʻua i le Afioga a le Atua e faapea, o Satani o “le alii o lenei lalolagi,” a o temoni “o alii o le pōuliuli o lenei lalolagi.” (Ioane 12:31; Efeso 6:11, 12; 1 Ioane 5:19) Ona o lana pule, na mafai ai e le Tiapolo ona ofoina atu iā Iesu, “malo uma o le lalolagi ma o latou matagofie” ina ia ifo atu Iesu iā te ia. (Mataio 4:8, 9) E manino mai la, e mataʻina suiga o le a faia i le lalolagi pe a “oo” mai le Malo o le Atua.

Pe a “oo” mai le Malo o le Atua, o le a iai se faiga fou atoatoa i lenei lalolagi. O le a nutimomoia e le Malo ia malo uma faaletagata, ma pule ai na o ia i le lalolagi. I le taimi e tasi, o le a avea ona tagatānuu o ē matataʻu i le Atua, ma “lalolagi fou.” (2 Peteru 3:13; Tanielu 2:44) O le a aveesea foʻi e le Malo, le agasala a tagata usiusitai ma faasolosolo ina avea le lalolagi atoa ma parataiso, ma faapea ai ona tafiesea aafiaga uma o pulega a Satani.—Roma 8:20, 21; Faaaliga 19:17-21.

I le faaiʻuga o le afe tausaga ina ua faataunuu atoatoa e le Malo faa-Mesia le finagalo o le Atua, “ona tuuina i lalo foʻi lea o le Alo lava i lē na tuuina i lalo iā te ia o mea uma, ina ia pule aoao le Atua i le aoao o mea.” (1 Korinito 15:28) Ona faia lea o le tofotofoga mulimuli, lea o le a tafiesea ai e faavavau Satani, o ana temoni ma so o se tagata fouvale i “le oti faalua.” (Faaaliga 20:7-15) Mulimuli ane, ona gauaʻi lea ma le fiafia e faavavau ia foafoaga faamaoni uma i le lagi ma le lalolagi, i le pule silisili ese alofa a Ieova. I vala uma lava, o le faataunuuga lenā o upu a le tatalo faaaʻoaʻo a Iesu.—1 Ioane 4:8.

[Faamatalaga pito i lalo]