O Ai le Aiga o Iesu?

I LE tele o atunuu o le lalolagi, iā Tesema e masani ai ona tagaʻi tagata i ni vaaiga o loo faaali mai ai Iesu o loo i aao alofa o lona tinā o Maria, ma lona tamāfai o Iosefa. O na vaaiga faaleaiga e ono tosina mai ai tagata e oo lava iā i latou e lē o ni Kerisiano. Talu ai o Iesu o le tagata autū i nei vaaiga, o le ā ua taʻu mai e le Tusi Paia iā i tatou e uiga i le aiga faaletagata o Iesu?

E iai le talaaga lelei tele o le aiga o Iesu. Na fanau mai o ia i le taupou o Maria, ma avea ai o ia o se tagata i le lalolagi. E tusa ai ma le Tusi Paia, na suia lona soifua mai le lagi e ala i le agaga paia ma tuu i le manava o Maria. (Luka 1:30-35) A o leʻi faailoa mai le afuafuaina faavavega o Iesu, na faamau Maria i se tamāloa e suafa iā Iosefa, o lē na avea mulimuli ane ma tamāfai o Iesu.

Ina ua mavae le fanau mai o Iesu, na maua ai isi fanau a Iosefa ma Maria, o ʻafa uso ma ʻafa tuafāfine o Iesu. Ua faamaonia lenā tulaga i fesili a tagata Nasareta o ē na mulimuli ane tuufesili e uiga iā Iesu: “E lē o le atalii ea lenei o le tufuga? E lē o Maria ea le igoa o lona tinā, o ona uso foʻi o Iakopo, ma Iosefa, ma Simona, ma Iuta? E lē o iā te i tatou ea ona tuafāfine uma?” (Mataio 1:25; 13:55, 56; Mareko 6:3) E mafai ona tatou iloa mai i inei, o le aiga o Iesu e aofia ai ona mātua, ona uso e toʻafā ma a itiiti mai e toʻalua ona tuafāfine.

Ae peitaʻi, i aso nei e lē talitonu nisi o uso ma tuafāfine o Iesu o fanau na a Iosefa ma Maria. Aiseā? Ua faapea mai se tusi: “Na aʻoaʻo e le lotu mai lava i le taimi muamua e faapea, sa taupou pea lava Maria. E tusa ai la ma lenā tulaga, sa leai lava la nisi fanau a Maria.” (New Catholic Encyclopedia) Na faapea mai foʻi le tusi lava lenā, o upu “tuagane” ma le “tuafafine” e mafai ona faasino atu i se “tasi po o nisi o tagata latou te lolotu faatasi po o se isi faatasiga” po o ni tauaiga atonu o ni tauusoga.

Po o le mea moni lenā? E oo lava i nisi o taʻitaʻi lotu Katoliko, ua lē ioe i lenā aʻoaʻoga faavae a le lotu, ua latou lagolagoina le manatu e faapea, sa iai uso ma tuafāfine o Iesu. Na tusi mai se peresitene na iai muamua o le Faalapotopotoga Katoliko o le Tusi Paia i Amerika e suafa iā John P. Meier e faapea: “I le Feagaiga Fou, o le upu Eleni mo le [uso] pe a lē faaaogāina i se auala faafaatusa, ua faasino atu i se faiā faaletino po o se faiā faaletulafono, o lona uiga o se uso moni po o se ʻafa uso ma e leai se isi uiga o faasino atu iai.” * Ioe, ua faaalia mai e le Tusi Paia e faapea na iai uso ma tuafāfine o Iesu, o ē na fananau mai iā Iosefa ma Maria.

Ua faaalia e tusi o le Evagelia isi tauaiga o Iesu, ae peitaʻi seʻi o tatou taulaʻi atu i le aiga o Iesu ma iloa ai po o le ā e mafai ona tatou aʻoaʻoina mai iā i latou.

[Faamatalaga pito i lalo]