Pe E te Manatua?

Pe na e talisapaia le faitauina o lomiga talu ai nei o Le Olomatamata? Ia seʻi vaai la pe mafai ona e taliina fesili o loo mulimuli mai:

• E fia mataupu o le tusi o Mika, o anafea na tusia ai, ma o le ā le tulaga na iai i le taimi lenā?

E fitu mataupu o le tusi o Mika. Na tusia e le perofeta o Mika i le senituri lona 8 T.L.M., ma o le taimi lea o vaeluaina tagata o le Atua o ē na latou osi feagaiga, i ni nuu se lua—o Isaraelu ma Iuta.—8/15, itulau 9.

• E tusa ai ma le Mika 6:8, o le ā ua faafinagaloina e le Atua mai iā i tatou?

E ao ona tatou “fai le amiotonu.” O le auala o loo tauaaoina ai mea e le Atua, o le faatulagaga lenā mo le faia o le mea tonu, e tatau la ona tatou tauivi e lagolagoina ana mataupu silisili o le fai mea tonu ma le faamaoni. Ua faapea mai o ia e tatou te “naunau i le alofa [“agalelei,” NW].” Ua faaalia e Kerisiano le alofa agalelei i le tali atu lea i manaʻoga o isi, o se faaaʻoaʻoga, pe a māeʻa ni mala. Ina ia tatou ‘feooaʻi ma le loto faamaulalo’ ma Ieova, o lona uiga o le iloa lea o le mea e gata ai lo tatou malosi ma ia faalagolago iā te ia.—8/15, itulau 20-22.

• Pe a vāea mai le galuega, o le ā atonu e manaʻo se Kerisiano e fai?

O se gaoioiga atamai le toe iloiloina o o tatou olaga. Atonu e mafai ona faafaigofie o tatou olaga e ala i le siitia atu i se fale e laʻitiiti atu po o le aveesea foʻi o meafaitino e lē o manaʻomia moni. E mautinoa lava, e tāua ona aua le soona popole naʻuā i mea e manaʻomia i aso taʻitasi, ae ia faatuatua o le a fesoasoani mai le Atua ina ia maua mea e manaʻomia e ola ai. (Mataio 6:33, 34)—9/1, itulau 14-15.

• O le ā e ao ona tatou manatua pe a avatu pe maua foʻi ni meaalofa i faaipoipoga?

E lē manaʻomia ni meaalofa taugatā, ma e lē tatau foʻi ona faatalitalia ni meaalofa faapena. O le mea e sili ona tāua, o le agaga lea e faia ai e le tagata lana foaʻi. (Luka 21:1-4) E lē o se faiga alofa le faailoa atu o le suafa o lē na foaʻi atu le meaalofa. O le faia faapea, e ono māsiasi ai o ia. (Mataio 6:3)—9/1, itulau 29.

• Aiseā e ao ai ona tatou tatalo e lē aunoa?

O le tatalo e lē aunoa, e fesoasoani lea e faamausalī ai la tatou faiā ma le Atua ma e fesoasoani foʻi iā i tatou e fesagaʻi ma tulaga faigatā. E mafai ona pupuu pe uumi a tatou tatalo e faalagolago i le manaʻoga ma le tulaga o iai. O le tatalo e atiina aʻe ai le faatuatua ma fesoasoani iā i tatou e taulimaina faafitauli.—9/15, itulau 15-18.

• O le ā la tatou malamalamaga e ao ona iai i le 1 Korinito 15:29, lea o loo taʻua ai le ‘papatisoga mo ē ua oti’?

O le uiga o le faamatalaga a Paulo, e papatisoina pe faatofuina Kerisiano faauuina i se olaga e oo ina maliliu ai ma le faamaoni, e pei o Keriso. Mulimuli ane, ona faatutūina aʻe lea o i latou i se soifuaga agaga, e pei o Keriso.—10/1, itulau 29.

• E faapefea ona tatou iloa, e sili atu mea e aofia ai pe a avea se tasi ma se Kerisiano, na i lo le ʻalofia o mea sesē o loo taʻua i le 1 Korinito 6:9-11?

E leʻi faapea mai le aposetolo o Paulo e ao i se Kerisiano ona ʻalofia na o mea sesē e pei o le faitaaga, ifo i tupua ma le onā. Na ia faaalia e faapea, e iai nisi suiga e manaʻomia ona faia, e ala i lona faaauau mai i le fuaiupu e sosoo ai: “Ua tataga mea uma iā te aʻu, a ua lē aogā mea uma.”—10/15, itulau 18-19.

• O ai nisi o fafine i aso anamua na faafiafiaina le finagalo o le Atua?

E aofia ai fafine faatosaga o Sepela ma Puʻa, o ē e leʻi usiusitai iā Farao ma leʻi fasiotia ai tamameamea Isaraelu faatoʻā fananau mai. (Esoto 1:15-20) Na puipuia e Raava le fafine talitane Kanana, ni tagata asiasi se toʻalua mai Isaraelu. (Iosua 2:1-13; 6:22, 23) Ona o lona mafaufau lelei, na faasaoina ai e Apikaila ola o tagata ma puipuia ai Tavita mai le nofosala i le sasaaina o le toto. (1 Samuelu 25:2-35) Ua fai i latou ma faaaʻoaʻoga mo fafine i aso nei.—11/1, itulau 8-11.

• Na faapefea ona ‘tau mai le lagi fetu’ e faasaga iā Sesera, e pei ona taʻua i le Faamasino e 5:20?

Ua manatu nisi, o lenei faaupuga e faasino atu i le fesoasoani mai le Atua. Ua faapea mai isi faamatalaga, na fesoasoani agelu e faatotō ifo le uatoʻa, pe ona o le faalagolago o Sesera i valovaloga sesē a tagata saʻiliʻili i fetu. Talu ai e lē o faamatalaina mai i le Tusi Paia le auala tonu na tau ai fetu i lenei taua, e foliga mai ua lava a lo tatou malamalama i le faaupuga, e faaalia ai sa iai se fesoasoani mai le Atua i ʻautau a Isaraelu.—11/15, itulau 30.

• Aiseā ua talitonu ai pea tagata i le Atua, ae ua matuā taatele le lē ano ma le lē manatu mamafa i tapuaʻiga?

O nisi e ō i lotu ina ia saʻili se toʻafilemu o le mafaufau. O nisi e faamoemoe mo le ola pe a mavae le oti, o le soifua mālōlōina lelei, o ʻoa po o le taulau manuia. I nisi o vaipanoa, ua ō tagata i lotu ma le faanaunauga ina ia faamalieina o latou manaʻoga faaleagaga, ona ua sili atu le saʻolotoga ua latou mauaina na i lo le taimi na ola ai i lalo o pulega faa-Komunisi. O le iloaina o nei māfuaaga, e mafai ona fesoasoani i Kerisiano ina ia amata ai ni talanoaga uigā.—12/1, itulau 3.