Ua Matuā Faanatinati Nei Ona Tatou Mataala
Ua Matuā Faanatinati Nei Ona Tatou Mataala
“O lea, ia outou mataala ai; auā tou te lē iloa po o lē fea aso e sau ai lo outou Alii.”—MATAIO 24:42.
1, 2. O le ā ua faaalia ai ua tatou ola i le faaiʻuiʻuga o le faiga o mea?
UA FAAPEA mai se tusitala e suafa iā Bill Emmott: “E sili atu i mea uma lava, ua matuā suia tulaga o mea i le senituri lona 20 ona o faigātaua.” Ua ia faapea mai, i le tala faasolopito o tagata ua maua ai āuga leaga mai taua ma faiga sauā, ae ua ia toe faaopoopo mai e faapea: “E leai se eseesega o le senituri lona 20 ma isi senituri muamua atu e tusa ai ma mea na tutupu i taua ma faiga sauā, ae na pau le eseesega o le telē ma le mataʻutia na oo atu iai faiga taua. O le senituri muamua lava na iai se taua na aofia ai le lalolagi atoa . . . E le gata i lea, ina ia faamamafa le manatu, e lē na o le tasi se taua a le lalolagi ae e lua taua faapena na tauina ai.”
2 Na valoia e Iesu Keriso e faapea, o le a sii le taua “e le tasi nuu i le tasi nuu, ma le tasi malo i le tasi malo.” Peitaʻi, o na mea ua na o se tasi lea o vala o le ‘faailoga o le faatasi mai o Keriso, ma le faaiʻuiʻuga o le faiga o mea.’ (NW) Na taʻua foʻi e Iesu i lenei valoaga le iai o oge, faamaʻi ma mafuiʻe. (Mataio 24:3, 7, 8; Luka 21:6, 7, 10, 11) I le tele o auala, o na tulaga faigatā ua matuā faateteleina ma ua sili ona mataʻutia. Ua faatuputeleina le leaga o tagata, e pei ona vaaia i uiga agaʻi i le Atua ma tagata. Ua paʻū maulalo tulaga tau amio, ma ua faateteleina solitulafono ma faiga sauā. Ua avea tagata ma ē mananaʻo i tupe ae ua leai se manaʻo i le Atua, ma pupū i mea faafiafia. O nei mea uma ua faamaonia ai ua tatou ola i “aso faigatā.” —2 Timoteo 3:1-5.
3. E faapefea ona aafia i tatou i le “faailoga?”
3 O le ā sou manatu e uiga i le faateteleina o le leaga o mataupu fai a tagata? E manatu māmā i ai nisi pe lē faanoanoa i mea mataʻutia o loo tutupu i aso nei. E lē o malamalama tagata taʻutaʻua ma atamamai o le lalolagi i le uiga o le “faailoga”; e lē o mafaia foʻi e taʻitaʻi lotu ona aumaia ni taʻitaʻiga talafeagai e faatatau i lenei mataupu. (Mataio 16:1-3) Peitaʻi na apoapoaʻi Iesu i ona soo e faapea: “O lea, ia outou mataala ai; auā tou te lē iloa po o lē fea aso e sau ai lo outou Alii.” (Mataio 24:42) Na faalaeiau Iesu iā i tatou e lē lava le na ona mataala ae ia “mataala” pea. Ina ia mataala pea, e ao ona tatou mataalia ma nofo sauni. E manaʻomia ai se mea e sili atu i lo le na o le iloaina e faapea, ua tatou ola i aso e gata ai, ma ua faigatā nei aso. E ao ona maumauaʻi lo tatou talitonuga e faapea “ua lata mai le gataaga o mea uma lava.” (1 Peteru 4:7) O le faia faapea, o le a mafai ai ona tatou mataala ma iloa ua faanatinati le taimi. O lea, o le fesili e ao ona tatou manatunatu i ai e faapea: ‘O le ā e fesoasoani iā i tatou e faamalosia ai lo tatou talitonuga e faapea ua latalata mai le iʻuga?’
4, 5. (a) O le ā e faamalosia ai lo tatou talitonuga e faapea, ua latalata le iʻuga o lenei faiga amioleaga o mea, ma aiseā? (e) O le ā se mea e tasi e tutusa ai ona pō o Noa ma le faatasi mai o le Atalii o le tagata?
4 Seʻi manatu i le tulaga na iai mea a o lumanaʻi se taimi iloga i le tala faasolopito o tagata—o le Lolo tele i aso o Noa. Na matuā amioleaga lava tagata o lea na ‘tigā ai le finagalo’ o Ieova. Na ia faailoa mai e faapea: “Ou te soloieseina i le fogāeleele tagata na ou faia.” (Kenese 6:6, 7) Sa ia faia faapea. I le faatusatusa atu o ona pō o Noa ma o tatou aso, na fetalai ai Iesu e faapea: “E pei o ona pō o Noa, e faapea foʻi pe a sau le Atalii o le tagata.”—Mataio 24:37.
5 E ao ona tatou iloa e faapea, e tutusa le finagalo o Ieova e faatatau i lenei lalolagi, ma le lalolagi a o lumanaʻi le Lolo. E pei lava ona ia aumaia le iʻuga i le lalolagi lē amioatua i aso o Noa, e mautinoa e faapena foʻi ona ia aumaia le faaumatiaga i le lalolagi amioleaga i aso nei. O le mauaina o se malamalamaaga manino e uiga i mea e tutusa ai na taimi ma o tatou aso, e ao ona faamalosia ai lo tatou talitonuga e faapea, ua latalata mai le iʻuga o lenei lalolagi. O lea, o ā mea e tutusa ai? E lē itiiti ifo i le lima mea e tutusa ai. O le manatu muamua, e manino le lapataʻiga ua tuuina atu e faatatau i le faaumatiaga o loo faaloloʻi mai.
Lapataʻia i “Mea e Leʻi Vaaia”
6. O le ā na fingalo i ai Ieova e fai i aso o Noa?
6 Na faalauiloa atu e Ieova i ona pō o Noa e faapea: “E lē faavavau ona finau o loʻu Agaga ma tagata, auā ua na o tagata i latou; a o latou aso e selau ma le luafulu o tausaga ia.” (Kenese 6:3) O le tuuina atu o lenei folafolaga mai le Atua i le 2490 T.L.M. na faailogaina ai le amataga o le taimi o le iʻuga mo lenā lalolagi faalēmataʻu. Seʻi manatu i le uiga o lenā fuafuaga mo i latou na soifua ai i inā! Ua na o le 120 tausaga o loo totoe ona faaooina atu lea e Ieova o “le lolo i luga o le laueleele, e faaumatia ai mea ola uma ua i ai le mānava o le ola o i lalo o le lagi.”—Kenese 6:17.
7. (a) Na faapefea ona tali atu Noa i le lapataʻiga e faatatau i le lolo? (e) E faapefea ona tatou tali atu i lapataʻiga e faatatau i le iʻuga o lenei faiga o mea?
7 Na maua e Noa le lapataʻiga o lea mala mataʻutia e tusa ma le faitau sefulu o tausaga a o lumanaʻi le oo mai, ma na ia faaaogā ma le atamai le taimi e sauniuni ai. Ua faapea mai Paulo: “O le faatuatua na fausia ai e Noa le vaa ina ua mataʻu, e ola ai lona aiga, ina ua aʻoaʻoina e le Atua i mea e leʻi vaaia i ia ona pō.” (Eperu 11:7) Ae faapefea i tatou? E tusa ua 90 tausaga talu ona amata aso e gata ai o lenei faiga o mea i le 1914. E mautinoa ua tatou iai i “ona pō o le iʻuga.” (Tanielu 12:4) E faapefea ona tatou tali atu i lapataʻiga ua aumaia iā i tatou? Ua faapea mai le Tusi Paia: “O lē fai le finagalo o le Atua, e tumau lea e faavavau.” (1 Ioane 2:17) O lea la, o le taimi lenei e faia ai le finagalo o Ieova ma le faanatinati.
8, 9. O ā lapataʻiga ua aumaia i aso nei, ma ua faapefea ona faalauiloaina atu?
8 I aso nei, ua aʻoaʻoina e tagata aʻoga faamaoni o le Tusi Paia mai le Tusi Paia e faapea, o le a faaumatia lenei faiga o mea. Pe tatou te talitonu moni ea i lenei mea? Ia mātau le mea na taʻua manino e Iesu Keriso e faapea: “O ia ona pō e oo ai le puapuaga tele, e leai sona tusa talu le amataga o le lalolagi, ua oo lava i ona pō nei; e lē toe faapea foʻi amuli.” (Mataio 24:21) Na faapea mai foʻi Iesu o le a ia afio mai o se Faamasino tofia a le Atua ma o le a ia tuueseeseina tagata e pei ona tuueseesea e se leoleo mamoe ia mamoe mai oti. O i latou o ē maua ua amiolētonu o le a ‘ō atu i latou na i le sala faavavau; a o ē amiotonu e ō atu i le ola faavavau.’—Mataio 25:31-33, 46.
9 O loo faauaʻi atu e Ieova ona tagata i nei Mataio 24:45-47) E lē gata i lea, ua poloaʻia atunuu uma, ma ituaiga, gagana eseese ma nuu ina ia “matataʻu i le Atua, ma avatu iā te ia le viiga, auā ua oo mai le itu aso o lana faamasinoga.” (Faaaliga 14:6, 7) O se vaega autū o le feʻau o le Malo o loo talaʻia e Molimau a Ieova i le lalolagi aoao, o le lapataʻiga e faapea, ua toe nei o se aga ona aveesea lea e le Malo o le Atua ia pulega a tagata. (Tanielu 2:44) E lē tatau ona manatu māmā i lenei lapataʻiga. E tausisi pea le Atua e Ona le Malosi Uma Lava i ana folafolaga. (Isaia 55:10, 11) Na ia tausisi i ana folafolaga i aso o Noa, ma o le a ia faia foʻi faapea i o tatou aso.—2 Peteru 3:3-7.
lapataʻiga i le toe faamanatu mai e ala i le saunia o meaʻai faaleagaga e “le auauna faamaoni ma le mafaufau.” (Ua Taatele Faiga Matagā Tau Feusuaʻiga
10. O le ā le tele na oo i ai ia faiga matagā tau feusuaʻiga i aso o Noa?
10 E tutusa o tatou taimi ma aso o Noa i le vala lona lua. Na faatonuina e Ieova le uluaʻi tamāloa ma le fafine ia ‘tumu le lalolagi’ i tagata, e ala i le faaaogāina o le malosi faafanau tama na avatu i ai e le Atua i se auala mamalu i le liʻo faalefaaipoipoga. (Kenese 1:28) I aso o Noa, na faaleagaina le fanau a tagata e agelu lē usiusitai e ala i le faia o feusuaʻiga lē tatau. Na latou ō mai i le lalolagi, liutino tagata, ma fai aiga ma fafine lalelei ma maua ai ni fanau e itu lua—o tagata malolosi. (Kenese 6:2, 4) Ua faatusaina agasala a nei agelu e malolosi tele o latou tuʻinanauga, i faiga matagā a tagata Sotoma ma Komoro. (Iuta 6, 7) O lea la, na taatele ai faiga matagā tau feusuaʻiga i na ona pō.
11. O ā tulaga tau amio ua tutusa ai o tatou taimi ma aso o Noa?
11 E faapefea tulaga tau amio i aso nei? I nei aso e gata ai, ua faaautū atu olaga o le toʻatele i mataupu tau feusuaʻiga. Na faamatala manino mai e Paulo e faapea, “ua latou lē lagona se mea”; o le toʻatele ua tuuina atu i latou e i latou i “le matāitu, e fai mea leaga uma lava ma le tuʻinanau i ai.” (Efeso 4:19) Ua taatele ata matagā, feusuaʻiga a o leʻi faaipoipo, faaleagaina faaleituaiga o tamaiti ma le tauatane. O nisi ua “tauia foʻi i latou i o latou lava tino” e ala i le maua i faamaʻi e māfua mai i feusuaʻiga, aiga malepelepe ma isi mau faafitauli.—Roma 1:26, 27.
12. Aiseā e ao ai ona tatou inoino i le mea leaga?
12 I ona pō o Noa, na aumaia ai e Ieova le Lolo tele ma ia faaumatia lenā lalolagi sa mananaʻo tele i feusuaʻiga faaleituaiga. E lē tatau ona tatou faagaloina le mea moni e faapea, o nei aso ua tatou ola ai e pei lava o aso o Noa. O le “puapuaga tele” o loo faaloloʻi mai o le a aveesea mai le lalolagi o ‘ē faitaaga, ma ē mulilulua, ma ē tauātane, ma ē faasotoma.” (Mataio 24:21; 1 Korinito 6:9, 10; Faaaliga 21:8) E manaʻomia ona inoino i le mea leaga ma ia ʻalofia tulaga e ono oo atu ai i amioga lē mamā!—Salamo 97:10; 1 Korinito 6:18.
Ua “Tumu le Lalolagi i le Sauā”
13. I aso o Noa, aiseā na ‘tumu ai le lalolagi i le sauā’?
13 Ua faapea mai le Tusi Paia e faatatau i le vala lona tolu i aso o Noa: “Ua leaga lava le lalolagi i luma o le Atua, ma ua tumu le lalolagi i le sauā.” (Kenese 6:11) E lē fou faiga sauā. Na fasiotia e le atalii o Atamu o Kaino lona uso amiotonu. (Kenese 4:8) Na fatu e Lameko se solo e viiviia ai le auala na ia fasiotia ai se tauleʻaleʻa, lea e faapea na fasia o ia, ma o se faamaoniga lenā o le agaga sauā sa iai i ona aso. (Kenese 4:23, 24) Ae o le eseesega i aso o Noa, o le mataʻutia lea na oo i ai faiga sauā. Ina ua faaipoipo atalii agelu lē usiusitai o le Atua i fafine o le lalolagi ma maua ni fanau, o tagata malolosi ma maualuluga, na matuā faateleina faiga sauā i se tulaga e leʻi iai muamua. Ua faaalia i le New World Translation e faapea, o le uluaʻi upu i le gagana Eperu e faasino atu i nei tagata tinoeese o lona uiga o tagata fasitagata o ē māfua ai ona “paʻūʻū isi i lalo.” O le iʻuga, na “tumu le lalolagi i le sauā.” (Kenese 6:13) Seʻi manatunatu i faafitauli sa fesagaʻia e Noa a o tausia aʻe lona aiga i se siʻomaga faapena! Peitaʻi, sa faamaonia Noa o ‘lē amiotonu i luma o Ieova i lenā tupulaga.’—Kenese 7:1.
14. O le ā le tele ua ‘tumu ai le lalolagi i le sauā’ i aso nei?
14 Na iai faiga sauā a o faagasolo le tala faasolopito o tagata. Peitaʻi, e pei ona moni i aso o Noa, ua faapena foʻi ona mātauina i o tatou taimi ia faiga sauā o se tulaga e leʻi faapea ona iai muamua. Ua tatou faalogo soo e uiga i sauāga i aiga, faiga faaterorisi, fasiotiga tagata matagā, ma le tafanaina e isi tagata o le toʻatele o tagata e aunoa ma se māfuaaga. E faaopoopo atu i lenā, o le faamasaa toto e māfua mai i faiga taua. Ua toe tumu le lalolagi i faiga sauā. Aiseā? O le ā ua māfua ai lenei faatelega? Ua faaalia i le tali se isi foʻi mea ua tutusa ai ma aso o Noa.
15. (a) O le ā le māfuaaga o le faateleina o faiga sauā i aso e gata ai? (e) O le ā le iʻuga e mafai ona tatou mautinoa?
15 Ina ua faavaeina le Malo Faa-Mesia o le Atua i le lagi i le 1914, sa faia ai e le Tupu, o Iesu Keriso ni gaoioiga matuā mataʻina. Na tuliesea Satani le Tiapolo ma ana temoni mai le lagi i le lalolagi. (Faaaliga 12:9-12) A o leʻi oo i le Lolo, na tuua ai e agelu lē usiusitai lo latou nofoaga i le lagi i lo latou lava faitalia; ae i le taimi o le iʻuga, na tulia faamalosi ai i latou mai le lagi. E lē gata i lea, ua lē mafai ona latou toe liutino tagata i le lalolagi ma faamalieina o latou tuʻinanauga leaga faaletino. O lea la, ona ua latou lē fiafia, feita ma fefefe foʻi i le faamasinoga o loo sau, ua latou taaʻina ai tagata ma faalapotopotoga ina ia faia gaoioiga e mataʻutia le leaga, e sili atu ona telē na i lo mea na faia i ona pō o Noa. Na faaumatia e Ieova le lalolagi o tagata e ala i le Lolo ina ua faatumuina le lalolagi i le leaga e agelu lē usiusitai ma a latou fanau. E mafai ona e mautinoa o le a ia faaumatia foʻi lenei lalolagi o tagata amioleaga! (Salamo ) Peitaʻi, o i latou o loo mataala pea i aso nei, ua latou iloa ua latalata ona faaolaina i latou. 37:10
O Loo Talaʻia le Feʻau
16, 17. O le ā le vala lona fā e tutusa ai ona pō o Noa ma o tatou aso?
16 O le vala lona fā e tutusa ai aso nei ma ona pō a o leʻi oo i le Lolo, o le galuega lea sa faatonuina ai Noa e fai. Na fausia e Noa se vaa telē lava. O ia foʻi o sē na “talaʻi.” (2 Peteru 2:5) O le ā le feʻau na ia talaʻia? O le talaʻiga a Noa e aofia ai le manaʻomia ona salamō, atoa ai ma le lapataʻiga e faatatau i le faaumatiaga o le a sau. Na fetalai Iesu e faapea, o tagata i ona pō o Noa, “na lē iloa foʻi e i latou ina seʻia oo le lolo, ma aveesea i latou uma.”—Mataio 24:38, 39.
17 E faapena foʻi, a o faataunuuina ma le filigā e Molimau a Ieova lo latou tofiga o le talaʻiga, ua faalauiloa atu ai le feʻau o le Malo o le Atua i le lalolagi atoa. I le toetoe lava o vaega uma o le lalolagi, ua mafai ai e tagata ona faalogo ma faitau i le feʻau o le Malo i la latou lava gagana. O le mekasini o le Olomatamata, o loo faasilasilaina ai le Malo o Ieova, ua faasalalauina i le sili atu i le 25,000,000 kopi ma e sili atu i le 140 gagana ua lomia ai. O le mea moni, ua talaʻia le tala lelei o le Malo o le Atua i le “atu laulau uma, e fai ma molimau i nuu uma.” Pe a māeʻa lenā galuega e tusa ai ma le finagalo o le Atua, ona oo mai lea o le iʻuga.—Mataio 24:14.
18. E faapefea i le tali mai a le toʻatele i la tatou galuega talaʻi ona faatusatusa atu i tagata i ona pō o Noa?
18 Ona o le leai o se naunau i mea faaleagaga ma amioga tatau a o leʻi oo le Lolo, e faigofie la ona tatou malamalama i le māfuaaga na avea ai le aiga o Noa ma taulaiga o tauemuga a tuaoi lē talitonu ma fai i ai upu faifai. Ae na oo moni mai lava le iʻuga. I se tulaga tutusa, o le a toʻatele ē “tauemu” i aso e gata ai. Ae peitaʻi ua faapea mai le Tusi Paia: “E sau le aso o le Alii pei o se gaoi.” (2 Peteru 3:3, 4, 10) E mautinoa o le a oo mai i le taimi atofaina. O le a lē tuai mai lava. (Sapakuka 2:3) Maeu le atamai o le mataala pea!
E Toʻaitiiti e Faasaoina
19, 20. O le ā se mea e tutusa ai le Lolo ma le faaumatiaga o lenei faiga o mea?
19 O le mea e tutusa ai aso o Noa ma o tatou aso e lē na o le leaga o tagata ma lo latou faaumatiaga. E pei ona sa iai ē na faasaoina mai le Lolo, e faapena foʻi ona iai i latou o le a faasaoina mai i le iʻuga o lenei faiga o mea. O tagata na faasaoina mai le Lolo o ni ē lotomaulalo ma e lē soifua e pei o le toʻatele o isi tagata. Sa latou utagia le lapataʻiga a le Atua ma tausia le vavae ese mai le lalolagi amioleaga i lenā taimi. Ua faapea mai le Tusi Paia: “O Noa, ua alofagia o ia e Ieova.” Sa ‘sao Noa i ē tupulaga ma ia.’ (Kenese 6:8, 9) E mai i tagata uma lava, e na o le tasi le aiga “na faasaoina ai tagata e toʻaitiiti, e toʻavalu, . . . i le vai.” (1 Peteru 3:20) Na tuuina atu e Ieova le Atua iā i latou se poloaʻiga e faapea: “Ia outou fanafanau, ma ia uluola, ma ia tumu le lalolagi iā te outou.”—Kenese 9:1.
20 Ua faamautinoa mai e le Afioga a le Atua iā i tatou e faapea, “o le motu o tagata e toʻatele” o le a “ō mai nai le puapuaga tele.” (Faaaliga 7:9, 14) E toʻafia i latou o le a iai i le motu o tagata e toʻatele? Na fetalai Iesu lava ia e faapea: “Auā e va apiapi le faitotoʻa, e lauitiiti foʻi le ala e tau atu i le ola, e toʻaitiiti foʻi i latou o ē maua.” (Mataio 7:13, 14) Pe a faatusatusa atu i le faitau piliona o loo soifua i le lalolagi i aso nei, o le a toʻaitiiti i latou e faasaoina mai le puapuaga tele o loo sau. Peitaʻi, e ono tutusa lo latou faaeaga ma lea na avatu iā i latou o ē na faasaoina mai le Lolo. Atonu o le a mafai e ē o le a faasaoina ona faia ni fanau e avea o se vaega o le sosaiete fou faalelalolagi.—Isaia 65:23.
“Ia Mataala” Pea
21, 22. (a) E faapefea i le iloiloina o le tala i le Lolo ona aogā iā te oe? (e) O le ā le mau mo le tausaga e 2004, ma aiseā e ao ai ona tatou utagia le fautuaga ua aumaia?
21 E ui lava o le Lolo o se mea ua loa ona tupu, ae ua saunia manino mai se lapataʻiga e ao ona tatou amanaʻia. (Roma 15:4) O mea e tutusa ai aso o Noa ma o tatou aso, e ao ona uunaʻia ai i tatou ia mataala e uiga i mea o loo tutupu, ma ia mataalia i le afio mai o Iesu e pei o se gaoi e faaoo mai le sala faafaamasinoga.
22 I aso nei, o loo faatonutonuina e Iesu Keriso se galuega tele faaleagaga. Ina ia saogalemu ma faasaoina ai tagata tapuaʻi moni, ua iai se parataiso faaleagaga e pei o le vaa i aso o Noa. (2 Korinito 12:3, 4) Ina ia faasaoina mai le puapuaga tele, e ao ona tatou tumau ai i lenā parataiso. O loo siʻomia lenei parataiso faaleagaga e lenei lalolagi a Satani, ua nofo sauni e puʻe so o se tasi ua tautulemoe faaleagaga. E tāua tele ona tatou “mataala” pea ma ia nofo sauni mo le aso o Ieova.—Mataio 24:42, 44.
Pe E te Manatua?
• O le ā le lapataʻiga na aumaia e Iesu e tusa ai ma lona afio mai?
• O le ā na faatusa i ai e Iesu le taimi o lona faatasi mai?
• O ā auala ua tutusa ai o tatou taimi ma aso o Noa?
• E faapefea i le manatunatu i mea e tutusa ai aso o Noa ma o tatou aso ona fesoasoani iā i tatou e iloa ua faanatinati le taimi?
[Fesili mo le Suʻesuʻega]
[Faamatalaga faaopoopo i le itulau 18]
O le mau mo le tausaga e 2004 e faapea: “Ia outou mataala ai; . . . O le mea lea ia outou nofo sauni ai.”—Mataio 24:42, 44.
[Ata i le itulau 15]
Na utagia e Noa le lapataʻiga mai le Atua. Pe e faapena foʻi ona tatou tali atu i ai?
[Ata i le itulau 16]
“E pei o ona pō o Noa, e faapea foʻi pe a sau le Atalii o le tagata”