O Loo Ola le Afioga a Ieova

Manatu Tāua Mai le Tusi o Kenese—I

O LE uiga o le upu Kenese o le “amataga” po o le “fanau,” e maua mai i le upu faa-Peretania o Genesis. E talafeagai lea upu auā o loo faamatalaina i le tusi o Kenese, le auala na maua ai le vateatea ma le auala na saunia ai le lalolagi ina ia nonofo ai tagata, atoa foʻi ma le auala na nofoia ai e tagata. Na tusia e Mose lenei tusi i le vao i Sinai, atonu na māeʻa i le 1513 T.L.M.

O loo taʻua i le tusi o Kenese le lalolagi a o lumanaʻi le Lolo, o le mea na tupu ina ua māeʻa le Lolo, ma feutagaʻiga a Ieova le Atua ma Aperaamo, Isaako, Iakopo ma Iosefa. O le a iloiloina e lenei mataupu manatu tāua mai le Kenese 1:1–11:9, o lona uiga e gata mai i le taimi na amata ai ona feutagaʻi Ieova ma le augātamā o Aperaamo.

LE LALOLAGI A O LUMANAʻI LE LOLO

(Kenese 1:1–7:24)

O le faaupuga “i le amataga,” lea o loo i le uluaʻi fuaiupu o le Kenese, o loo faasino atu i le faitau piliona o tausaga ua teʻa. O mea na tutupu i “aso” e ono ia na foafoaina ai mea, po o taimi faapitoa na faia ai ia galuega, o loo faamatalaina i le auala e malamalama ai se tagata o loo maimoa ane pe anafai na iai i le lalolagi i lenā taimi. Na faia e le Atua le tagata i le faaiʻuga o le aso lona ono. E ui e leʻi leva ae mou ese atu loa le Parataiso ona o le lē usiusitai o le tagata, ae na aumaia e Ieova le faamoemoe. O loo taʻua i le uluaʻi valoaga o le Tusi Paia, se “fanau” o lē o le a aveesea āuga o le agasala ma tuʻimomomoina le ulu o Satani.

I senituri e 16 mulimuli ane ai, na taulau ai taumafaiga a Satani e faaliliueseina tagata uma mai le Atua, seʻi vaganā ai tagata faamaoni toʻaitiiti e pei o Apelu, Enoka ma Noa. O se faaaʻoaʻoga, na fasiotia e Kaino lona uso amiotonu o Apelu. “O ona pō ia na amata ai ona valaau tagata i le suafa o Ieova,” e foliga mai na matagā le auala na latou faia ai faapea. Na fatuina e Lameko se solo lea e faaatagia ai uiga sauā o tagata i na aso, e faatatau i le auala na ia fasiotia ai se alii talavou ma na faapea mai Lameko na ia faia lenā gaoioiga e puipuia ai lona ola. Na faasolo ina leaga le tulaga o mea ina ua faiavā atalii agelu lē usiusitai o le Atua, i fafine o le lalolagi, ma maua ai a latou fanau tinoeese o ē faasauā. E ui i lea, na fausiaina le vaa e Noa o lē e amiotonu, ma na lototele e lapataʻia isi e uiga i le Lolo o faaloloʻi ane, ma na faasaoina ai o ia ma lona aiga mai lea mala mataʻutia.

Taliina Fesili Faale-Tusi Paia:

1:16—Na faapefea ona faia e le Atua le malamalama i le uluaʻi aso, pe afai o le aso lona fā na faatoʻā fai ai le lā, masina ma fetu? O le upu Eperu e “faia” i le fuaiupu e 16, e lē tutusa ma le upu “faia” i le Kenese mataupu 1 fuaiupu 1, 21, ma le 27. Ua leva ona faia “le lagi” lea e aofia ai le lā, masina ma fetu a o leʻi taitai amata le “uluaʻi aso.” A o le taimi lenā e leʻi au mai ai le malamalama o le lā ma le masina i le lalolagi. “Ona malamalama ai lea” o lona uiga, i le uluaʻi aso o le foafoaga na mafai ai ona ati le malamalama i ao ma oo atu ai i le lalolagi. O lea la, na maua le ao ma le pō a o taamilomilo le lalolagi. (Kenese 1:1-3, 5) Ae e leʻi mafai ona iloa atu puna o lenā malamalama mai le lalolagi. Peitaʻi, a o faagasolo le aso lona fā o le foafoaina o mea, na iai se suiga mataʻina na tulaʻi  mai. Ua faia le lā, le masina ma fetu ina ia “faamalamalama aʻi le lalolagi.” (Kenese 1:17) “Ona faia lea e le Atua” o lona uiga na mafai ona vaaia le lā, le masina ma fetu i le lalolagi.

3:8—Pe na fetalai tuusaʻo Ieova iā Atamu? O loo faailoa mai e le Tusi Paia e faapea, na masani lava ona fetalai le Atua i tagata, e ala mai i agelu. (Kenese 16:7-11; 18:1-3, 22-26; 19:1; Faamasino 2:1-4; 6:11-16, 22; 13:15-22) O le fofoga fetalai a le Atua, o lona alo pele e toʻatasi lea ua taʻua o “le Upu.” (Ioane 1:1) E lē taumatea, na fetalai le Atua iā Atamu ma Eva e ala i “le Upu.”—Kenese 1:26-28; 2:16; 3:8-13.

3:17—O le ā le auala na malaia ai le laueleele, ma o le ā le umi? O le faamalaiaina o le laueleele, o lona uiga o le a faigatā tele ona atiaʻe le laueleele. Na matuā tofo ē na tupuga mai iā Atamu, i āuga o le faamalaiaina o le laueleele ma ona laau tuitui ma laau talatala. O lea la, na taʻua ai e Lameko le tamā o Noa, “le tigā o tatou lima, ona o le laueleele ua malaia iā Ieova.” (Kenese 5:29) Ina ua māeʻa le Lolo, na faamanuia Ieova iā Noa ma ona atalii, ma faailoa i ai Lana fuafuaga ina ia tumu le lalolagi. (Kenese 9:1) E foliga mai na aveeseina ai le faamalaiaina e le Atua o le laueleele.— Kenese 13:10.

4:15—Na faapefea ona ‘tuuina e Ieova le faailoga iā Kaino’? E lē o fai mai le Tusi Paia e faapea na faapipii e le Atua se faailoga i le tino o Kaino. O le faailoga e lē taumatea na aofia ai se faatonuga aloaʻia na lausilafia ma mulimuli i ai tagata, ma na fuafuaina ina ia ʻalofia ai le fasiotia o Kaino ona o le tauimasui.

4:17—O fea na maua ai le avā a Kaino? Na ‘fanaua e Atamu atalii ma afafine.’ (Kenese 5:4) O lea la, na toe nonofo lava Kaino ma se tasi o ona tuafāfine, pe atonu na nonofo ma se afafine a sona uso po o se tama teine a sona tuafafine. Mulimuli ane, e leʻi toe faataga e le Tulafono a le Atua i tagata Isaraelu, le fefaaipoipoaʻi o tuagane ma tuafāfine.—Levitiko 18:9.

5:24—O le ā le auala na ‘avea ai Enoka’ e le Atua? E foliga mai na matuā lamatia le soifua o Enoka ae e leʻi faataga e le Atua Enoka ina ia faapuapuagatia e ona fili. Na tusi le aposetolo o Paulo e faapea: “Na aveeseina ai Enoka ina ia lē oo iā te ia le oti.” (Eperu 11:5) E lē uiga lenei mea e faapea na aveeseina e le Atua Enoka i le lagi ina ia ola ai pea. O le uluaʻi tagata na afio i le lagi, o Iesu. (Ioane 3:13; Eperu 6:19, 20) O le uiga o le “aveeseina ai Enoka ina ia lē oo iā te ia le oti,” atonu sa tuuina o ia e le Atua i se tulaga o loo ia vaaia ai se vaaiga i lana galuega faaperofeta, ona faamuta ai lea o lona soifua a o iai i lenā tulaga. Ona o lenā tulaga, e leʻi faapuapuagatiaina Enoka pe “oo iā te ia le oti” ona o ona fili.

6:6—O le ā le uiga “ua salamō” Ieova i lona faia o tagata? O le upu Eperu o loo faaliliuina “ua salamō” e fesootaʻi atu i le suia o se taofi po o se fuafuaga. Talu ai e lelei atoatoa Ieova, na te leʻi faia se mea sesē ina ua ia faia le tagata. Ae na suia lona finagalo e faatatau i le tupulaga amioleaga a o lumanaʻi le Lolo. Na suia le finagalo o Ieova mai Lē na Faia tagata i lē e faaumatiaina i latou, ona o lona lē fiafia i a latou amioga leaga. O lona faasaoina o nisi tagata, e faaalia ai na o tagata amioleaga na salamō ai le Atua.—2 Peteru 2:5, 9.

7:2—O le ā le faavae na faaaogā e faaesea ai manu mamā ma manu lē mamā? O le faavae e iloa ai le eseesega e foliga mai na faasino atu i taulaga a manu na faia i le tapuaʻiga, ae e lē faasino i manu e mafai pe e lē mafai foʻi ona taumafaina. E leʻi taumafaina e tagata aano o manu a o lumanaʻi le Lolo. O upu “mamā” ma le “lē mamā” ia e faasino atu i meaʻai, na faatoʻā aliaʻe ina ua iai le Tulafono na tuu atu iā Mose, ma e leʻi toe iai ni eseesega na, ina ua muta le Tulafono. (Galuega 10:9-16; Efeso 2:15) E foliga mai na silafia e Noa po o ā manu e talafeagai mo taulaga i le tapuaʻiga iā Ieova. Ina ua faatoʻā ulufafo nai le vaa, “ona faia lea e Noa o le fata faitaulaga iā Ieova; ua avea foʻi e ia nisi manu i manu vaefā uma e mamā, ma manu felelei uma e mamā, ua ia fai aʻi taulaga mū i le fata.”—Kenese 8:20.

 7:11—O fea na maua mai ai le vai lea na māfua ai le Lolo tele? A o faagasolo le “aso” lona lua o le foafoaina o mea, lea na faia ai le “va nimonimo” o le lalolagi, na iai vai i “lalo o le va nimonimo” ma vai i “luga o le va nimonimo.” (Kenese 1:6, 7) O vai i “lalo” na faasino atu i vai na iai i le lalolagi. O vai i “luga” na faasino atu i le tele o vai na i luga aʻe o le lalolagi, lea na avea ma “moana sausau.” O na vai, na paʻūʻū ifo i lalo o le lalolagi i ona pō o Noa.

Lesona mo i Tatou:

1:26. Talu ai na faia i latou i le faatusa o le Atua, e mafai e tagata ona faaalia uiga e pei o uiga o le Atua. E ao lava ona tatou taumafai e faaalia uiga e pei o le alofa, alofa mutimutivale, agalelei, amio lelei ma le onosai, ma faaatagia ai Lē na faia i tatou.

2:22-24. O le faaipoipoga o le faatulagaga lenā a le Atua. E tumau ma e paia le faaipoipoga, ma o le tane o le ulu lea o le aiga.

3:1-5, 16-23. E faalagolago lo tatou fiafia i lo tatou amanaʻiaina o le pule silisili ese a Ieova i o tatou olaga i aso faisoo.

3:18, 19; 5:5; 6:7; 7:23. E taunuu mea uma lava e tulei ai Ieova.

4:3-7. Na fiafia Ieova i le taulaga a Apelu ona o ia o se tagata amiotonu ma faatuatua. (Eperu 11:4) I se tulaga tuufaafeagai, e leʻi faatuatua Kaino e pei ona faaalia e ana gaoioiga. Na leaga lana amio lea na mātaulia i le fuā, ita ma le fasioti tagata. (1 Ioane 3:12) E lē gata i lea, atonu na manatu mamā o ia i lana taulaga ma o se mea na tau lava ina fai. E ao ona tuu atoatoa o tatou loto i a tatou taulaga o viiga iā Ieova, ma ia faia i se uiga saʻo ma ia lelei la tatou amio!

6:22. E ui na tele tausaga na fau ai le vaa, ae na faia e Noa e pei ona poloaʻi ai le Atua. O lea la, na faasaoina Noa ma lona aiga i le Lolo. O loo fetalai mai Ieova iā i tatou e ala i lana Afioga ma ua ia aumaia taʻiala e ala i lana faalapotopotoga. Tatou te maua aogā pe a tatou faalogo ma usiusitai i ai.

7:21-24. E lē faaumatia e Ieova ē amiotonu faatasi ma ē amioleaga.

UA ULU ATU TAGATA I SE VAITAIMI FOU

(Kenese 8:1–11:9)

Ua ulu atu tagata i se vaitaimi fou ina ua soloiesea le faiga o mea na iai a o lumanaʻi le Lolo. Ua faataga tagata e taumafaina aano o manu ae na iai le tulafono ina ia taumamao mai le toto. Na faataga e Ieova le faasalaga oti i sē e fasioti tagata ma faamautū ai le feagaiga i le nuanua, ma folafola atu e lē toe oo mai se Lolo. Na avea atalii e toʻatolu o Noa ma tupuaga o tagata uma i le lalolagi, ae o le atalii o le atalii o le atalii o Noa e igoa iā Nimarota o “lē malosi i tuli manu,” na tetee iā “Ieova.” Na i lo le taapeape ina ia faatumu le lalolagi, na filifili ai tagata e fauina se aai na taʻua o Papelu ma se ʻolo ina ia taʻutaʻua ai i latou. Na faamuta e Ieova a latou fuafuaga ina ua ia faafenumiaʻia a latou gagana ma faataapeapeina i latou i le lalolagi aoao.

Taliina Fesili Faale-Tusi Paia:

8:11—Afai na faatamaʻia e le Lolo ia laau, o fea na maua ai e le  lupe le lau olive? E lua tulaga na ono iai. Talu ai o le olive o se laau malosi, atonu na ola pea a o iai i lalo o le vai mo ni nai masina a o faagasolo le Lolo. A o faasolo ina maui atu le vai o le lolo, o se laau olive na i lalo o le vai o le a mafai ona fua mai pe a mātūtū le eleele. O le lau olive lea na tuu atu e le lupe iā Noa, atonu o se lau mai se laau faatoʻā ola, lea na tupu ina ua mātūtū vai o le lolo.

9:20-25—Aiseā na faamalaia ai e Noa ia Kanana? E foliga mai na nofosala Kanana ona o lona faileagaina o le tamā o lona tamā o Noa. E ui lava na vaai lona tamā o Hamo i lenei mea, ae na te leʻi taofia ma e foliga mai na ia faasalalauina atu i isi le mea na tupu. Peitaʻi, na ufiufi e isi atalii e toʻalua o Noa, o Semu ma Iafeta lo la tamā. Na faamanuiaina i laʻua ona o le mea na la faia, ae na faamalaiaina Kanana, ma na mafatia Hamo ona o le māsiasi na oo i lana fanau.

10:25—Na faapefea ona “vaevaeina” le lalolagi i aso o Peleko? Na soifua Peleko i le 2269 e oo i le 2030 T.L.M. I “aso” o Peleko na vaevaeina ai e Ieova le lalolagi e ala i le faafenumiaʻia o gagana o tagata fau ʻolo i Papelu, ma faataapeapeina i latou i tuluʻiga o le lalolagi. (Kenese 11:9) O lea la, “ua vaevaeina ai le lalolagi [po o tagata o le lalolagi]” i aso o Peleko.

Lesona mo i Tatou:

9:1; 11:9. Po o ā lava mea e fafau e tagata, ae e lē taofia ai le fuafuaga a Ieova.

10:1-32. O faamaumauga faale-Tusi Paia e lua e uiga i gafa a o lumanaʻi le Lolo ma ina ua māeʻa foʻi—o mataupu e 5 ma le 10—o loo taʻua ai e faapea e iai le sootaga o tagata uma lava i le uluaʻi tagata o Atamu, e ala i atalii e toʻatolu o Noa. Na tupuga mai iā Semu tagata Asuria, Kaletaia, Eperu, Suria ma nisi o ituaiga o Arapi. Na tupuga mai iā Hamo tagata Aitiope, Aikupito, Kanana ma nisi o ituaiga o Aferika ma Arapi. O tagata Initia ma tagata Europa, na tupuga mai iā Iafeta. E aiga tagata uma ma e tutusa uma i le silafaga a le Atua. (Galuega 17:26) O lenei mea moni, e tatau ona aafia ai la tatou vaaiga i isi ma le auala tatou te feutagaʻi ai ma i latou.

O Loo Matuā Galue le Afioga a le Atua

E pau le faamaumauga saʻo e uiga i le amataga o le talafaasolopito o tagata, o loo maua i le uluaʻi vaega o le tusi o Kenese. Ona o le tusi o Kenese ua tatou malamalama ai i le fuafuaga a le Atua na ala ai ona faia tagata e soifua i le lalolagi. Maʻeu le faagaeeloto i le iloa e faapea e lē mafai e taumafaiga a tagata, e pei o taumafaiga a Nimarota, ona taofia ai le faataunuuga o le fuafuaga a le Atua!

A o faia lau faitauga Tusi Paia i vaiaso taʻitasi e sauniuni ai mo le Aʻoga o le Faiva Faatiokarate, o lou tōmanatu i faamatalaga o loo mulimuli mai i le tamaʻi ulutala “Taliina Fesili Faale-Tusi Paia,” o le a fesoasoani iā te oe e malamalama ai i nisi o mau faigatā i le Tusi Paia. Ua faaalia i faamatalaga o loo mulimuli mai i le tamaʻi ulutala “Lesona mo i Tatou,” aogā e mafai ona e maua mai le faitauga Tusi Paia faalevaiaso. Pe a talafeagai, e mafai ona faaaogā i se manaʻoga o le faapotopotoga i le Sauniga o le Auaunaga. O le mea moni, o loo ola le Afioga a Ieova ma o loo matuā galue foʻi i o tatou olaga.—Eperu 4:12.