Po o Silasila Alofa Mai le Atua iā i Tatou?

PO O e mafatia ea ona o faafitauli i lou aiga, o lou soifua mālōlōina, o lau galuega po o isi tiute tauave mamafa? O faalogona lenā o le toʻatele o tagata. Pe lē o aafia ea tagata uma i aso nei, i faiga lē tonu, solitulafono ma faiga sauā? O le mea moni, o le tulaga tonu lenā o loo iai e pei ona taʻua i le Tusi Paia: “Ua oi faatasi, ma oono faatasi mea uma lava na faia, ua oo mai lava i ona pō nei.” (Roma 8:22) E lētioa lava a tuufesili le toʻatele o tagata e faapea: ‘Po o silasila alofa mai ea le Atua? Faamata o le a ia fesoasoani mai iā i tatou?’

Na taʻua e le tupu poto o Solomona i lana tatalo i le Atua: “Na o oe lava e silafia loto o tagata.” Na mautinoa Solomona e faapea, e lē gata e silafia e le Atua i tatou, ae o loo silasila alofa mai foʻi o ia iā i tatou taʻitoʻatasi. Na mafai ona ia ʻaiʻoi atu i le Atua “e faafofoga mai mai le lagi” ma ia taliina tatalo a ana auauna taʻitoʻatasi o ē matataʻu iā te ia, ma faailoa atu i le Atua “lona maʻi, ma lona tigā.”—2 Nofoaiga a Tupu 6:29, 30.

O loo silasila alofa mai foʻi le Atua iā i tatou i aso nei, ma ua ia valaaulia i tatou e valaau atu iā te ia i le tatalo. (Salamo 50:15) Ua ia folafola mai o le a ia taliina tatalo faatauanau ia e ōgatusa ma lona finagalo. (Salamo 55:16, 22; Luka 11:5-13; 2 Korinito 4:7) Ioe, e faafofoga Ieova i “talosaga uma ma ʻaiʻoi uma e fai e se tasi tagata, po o [lona] nuu . . . uma.” O lea la, pe a tuu lo tatou faatuatuaga i le Atua, talosaga mo lana fesoasoani ma mafuta vavalalata iā te ia, o le a tatou tofo i lana tausiga alofa ma lana taʻitaʻiga. (Faataoto 3:5, 6) Ua faamautinoa mai e le tusitala o le Tusi Paia o Iakopo e faapea: “Ia outou faalatalata atu i le Atua, ona faalatalata mai lea o ia iā te outou.”—Iakopo 4:8.