‘E Lē Afio le Atua i Malumalu e Faia e Lima’
‘E Lē Afio le Atua i Malumalu e Faia e Lima’
E LĒ mafesiligia sa masani Paulo i malumalu a Athena, auā na iai na malumalu i aai sa ia asiasi atu i ai i ana malaga faamisionare. E tusa ai ma le Encyclopædia Britannica, sa lauiloa Athena e lē gata o se atua fafine o taua ma le atamai ae o “meataulima ma gaoioiga poto na faia e tagata a o leʻi iai ni taua.”
O le malumalu sili ona lauiloa a Athena e taʻua o le Parthenon, lea sa fausia i Atenai, le aai o loo faaigoa i lenei atua fafine. E manatu i ai o lenā malumalu o se malumalu e sili atu i lo isi malumalu i aso anamua, ma sa iai i totonu se faatusa o Athena na faia i le auro ma nifo elefane e tusa ma le 40 futu [12 mita] lona maualuga. Ina ua asiasi Paulo i Atenai, ua leva ona matilatila lenei malumalu e faia i maa papaʻe i le aai pe tusa ma le 500 tausaga.
Ona o le latalata o lenei malumalu, na talaʻi ai Paulo i se vaega o tagata Atenai e uiga i le ‘Atua e lē afio i malumalu e faia i lima.’ (Galuega 17:23, 24) Ona o le matagofie o malumalu a Athena po o ona o le ofoofogia o ana faatusa, na foliga mai ai ua sili atu le mataʻina o ia e tagata na talaʻi atu i ai Paulo na i lo le Atua e lē vaaia latou te lē o iloa. Peitaʻi, e pei ona faasino atu e Paulo, e lē tatau ona manatu o Lē na Foafoaina tagata ua pei o “se auro, po o se ario, po o se maa, ua talaiia . . . a le tagata.”—Galuega 17:29.
O Atua ma atua fafine e pei o Athena o ē na faalagolago lo latou mamalu i malumalu ma faatusa, e na ona iloa mai ma toe mou atu. Na mou atu le faatusa o Athena mai le Parthenon i le senituri lona lima T.A., ma e na o ni toēga o ona malumalu o loo iai nei. O ai i aso nei o loo vaai atu iā Athena mo le atamai ma le taʻitaʻiga?
Maʻeu le eseese ma Ieova “le Atua e faavavau,” o lē e leʻi vaaia e se tagata. (Roma 16:26; 1 Ioane 4:12) Na tusi atalii o Koru e faapea: “O lenei Atua, o lo tatou Atua lava ia e faavavau faavavau lava; o ia lava na te taʻitaʻiina i tatou.” (Salamo 48:14) O se tasi o auala tatou te olioli ai i le taʻitaʻiga a Ieova le Atua e ala i le suʻesuʻeina o lana Afioga, le Tusi Paia, ma faatatauina ana fautuaga i o tatou olaga.