E Lē Masu‘esu‘eina le Silisili Ese o Ieova
E Lē Masuʻesuʻeina le Silisili Ese o Ieova
“E silisili lava Ieova, e tusa ona matuā viia o ia; e lē mafai ona suʻesuʻeina lona silisili ese.”—SALAMO 145:3.
1, 2. O le ā le ituaiga tagata sa iai Tavita, ma o le ā lona manatu sa iai e faatatau iā te ia ma le Atua?
O LĒ na fatuina le Salamo 145 o se tasi ua lauiloa i le talafaasolopito. A o tamaitiiti o ia, na la fesagaʻi ai ma se tagata tinoese ma na ia fasiotia lenā tagata. I le avea o se tupu ma se toa, na ia manumalo ai i le tele o fili. O lona suafa o Tavita, ma o ia o le tupu lona lua o Isaraelu anamua. Ua maliu Tavita ae o loo iai pea lona talaaga, e oo foʻi lava i aso nei e toʻatele tagata ua latou iloaina se mea e faatatau iā te ia.
2 E ui lava sa tele mea na faia e Tavita, ae sa lotomaulalo o ia. Na ia pese e faatatau iā Ieova e faapea: “A ou vaai atu i lou lagi, o le galuega a ou tamatamaʻi lima, o le masina atoa ma fetu na e faia; se ā ea le tagata e te manatu mai ai iā te ia; ma le atalii o le tagata e te asiasi mai ai iā te ia?” (Salamo 8:3, 4) Na i lo le mafaufau faapea o ia e sili, na taʻua e Tavita o Ieova na laveaʻiina o ia mai ona fili uma, o lea na ia faapea atu ai i le Atua: “Ua e foaʻiina mai foʻi iā te aʻu le talita o le olataga mai iā te oe, o lou agamalu ua faasilisiliina ai aʻu.” (2 Samuelu 22:1, 2, 36) Ua faaalia e Ieova le lotomaulalo e ala i lona alofa i tagata agasala, ma na talisapaia e Tavita le alofa tunoa o le Atua.
‘Ou te Faaneenee i le Atua le Tupu’
3. (a) O le ā le manatu o Tavita i le tulaga tau tupu o Isaraelu? (e) O le ā le umi na faanaunau Tavita e vivii ai iā Ieova?
3 E ui lava o Tavita o le tupu na filifilia e le Atua, ae sa ia talitonu o Ieova o le Tupu moni lea o Isaraelu. Na faapea mai Tavita: “Ieova e, e ou le malo, o faasilisili oe e silisili i mea uma lava.” (1 Nofoaiga a Tupu 29:11) Maʻeu le faaaloalogia o le Atua e Tavita o ia o le Pule! Na ia pese e faapea: “Loʻu Atua e, le Tupu, ou te faaneenee iā te oe; ou te faamanū atu foʻi i lou suafa e faavavau faavavau lava. Ou te faamanū atu iā te oe i aso uma lava; ou te vivii atu foʻi i lou suafa e faavavau faavavau lava.” (Salamo 145:1, 2) O le faanaunauga o Tavita ia vivii atu iā Ieova le Atua i le aso atoa ma e faavavau.
4. O ā tuuaʻiga sesē ua faaalialia e le Salamo 145?
4 O loo iai i le Salamo 145 le tali sili ona malosi i tuuaʻiga a Satani e faapea, o le Atua o se pule e manatu faapito o loo ia taofia le saʻolotoga mai ana foafoaga. (Kenese 3:1-5) O loo faaalialia foʻi i le salamo lenei le pepelo a Satani e faapea, e māfua ona usiusitai tagata i le Atua ona o mea latou te maua mai iā te ia, ae e lē ona latou te alolofa i le Atua. (Iopu 1:9-11; 2:4, 5) I le pei o Tavita, e faapena foʻi ona faia e Kerisiano moni i aso nei se tali i tuuaʻiga sesē a le Tiapolo. Talu ai latou te faanaunau e vivii iā Ieova e faavavau, ua latou faapelepele ai i lo latou faamoemoe o le ola e faavavau i le pulega a le Malo. E faitau miliona ua faia faapea e ala i le faatuatua i le taulaga togiola a Iesu ma auauna ma le usiusitai iā Ieova ona o le alofa i le avea ai o ni tagata tapuaʻi tuuina atu ma papatisoina.—Roma 5:8; 1 Ioane 5:3.
5, 6. O ā avanoa tatou te faamanū ma vivii atu ai iā Ieova?
5 Ia manatunatu i le tele o avanoa tatou te faamanū atu ai iā Ieova o ni ana auauna. E mafai ona tatou faia faapea e ala i le tatalo, pe a matuā ootia o tatou faalogona i se mea ua tatou faitau ai i lana Afioga le Tusi Paia. E mafai ona tatou lotofaafetai ma vivii atu pe a faagaeetia i tatou i le auala ua feutagaʻi ai Ieova ma ona tagata po o ua tatou matuā fiafia i se vala patino o ana foafoaga matalasi. E tatou te faaneenee atu foʻi iā Ieova pe a talanoa ma o tatou uso Kerisiano i ana fuafuaga i sauniga faa-Kerisiano po o ni talanoaga faasamasamanoa foʻi. O le mea moni, o galuega “lelei” e faia e fesootaʻi atu i le Malo o le Atua e avatu ai le viiga iā Ieova.—Mataio 5:16.
6 O faaaʻoaʻoga lata mai nei o na galuega lelei e aofia ai faugāfale o maota mo tapuaiga na fausia e tagata o Ieova i atunuu e lē lelei le tamaoaiga. O le tele o na faugāfale sa faia e ala i fesoasoani tautupe a le ʻauuso i isi atunuu. Na saunia e nisi Kerisiano le fesoasoani e ala i le tauofo e galulue i na vaipanoa i faugāfale o Maota o le Malo. Ae o le vala sili ona tāua o galuega lelei uma lava e viia ai Ieova, o le talaʻia lea o le tala lelei o lona Malo. (Mataio 24:14) E pei ona faaalia i fuaiupu mulimuli o le Salamo 145, na talisapaia e Tavita le pulega a le Atua ma viiviia Lona tulaga tautupu. (Salamo 145:11, 12) Pe e faapena lou talisapaia o le pulega sili ona lelei a le Atua? Pe e te talanoa e lē aunoa i isi e faatatau i lona Malo?
Faaaʻoaʻoga o le Silisili Ese o le Atua
7. Aumai se māfuaaga autū e viia ai Ieova.
7 Ua aumaia e le Salamo 145:3 le māfuaaga autū e viia ai Ieova. Ua pese Tavita e faapea: “E silisili lava Ieova, e tusa ona matuā viia o ia; e lē mafai ona suʻesuʻeina lona silisili ese.” E faavavau le silisili ese o Ieova. E lē masuʻesuʻeina, e lē mafai foʻi ona malamalama pe faatusatusaina i se auala atoatoa e tagata le silisili ese o Ieova. Peitaʻi, o le a tatou mauaina aogā mai le iloiloina o faaaʻoaʻoga o le silisili ese lē masuʻesuʻeina o Ieova.
8. O le ā ua faailoa mai e le vateatea e tusa o le silisili ese ma le mana o Ieova?
8 Ia taumafai e manatunatu i se taimi na e tū ai i se nofoaga pogisa ma tagaʻi atu i le lagi i se pō lagi lelei. Pe e te leʻi maofa ea i le vaaia o le anoanoaʻi o fetu o loo fepulafi mai i le vanimonimo pogisa? Pe e leʻi uunaʻia ai ea oe e vivii atu iā Ieova i lona silisili ese i le foafoaina o nei fetu? Peitaʻi, o mea na e tagaʻi i ai, ua na o se vaega itiiti lava o le aofaʻi o fetu i le aniva lea o loo aofia ai ma le lalolagi. E lē gata i lea, i se fua faatatau e faapea e sili atu i le selau piliona aniva ua iai, ae na o le tolu e mafai ona vaaia e aunoa ma le faaaogāina o le faaata vāai mamao. O le mea moni, o le anoanoaʻi o fetu ma aniva o loo faia aʻe ai le vateatea aoao, o se faamaoniga lenā o le mana o Ieova e foafoaina ai mea ma lona silisili ese e lē masuʻesuʻeina.—Isaia 40:26.
9, 10. (a) O ā vala o le silisili ese o Ieova ua faaalia e fesootaʻi atu iā Iesu Keriso? (e) E ao faapefea ona aafia lo tatou faatuatua i le toe faatūina o Iesu?
9 Seʻi o tatou iloiloina isi vala o le silisili ese o Ieova, lea e aofia ai Iesu Keriso. Na faaalia le silisili ese o Ieova i le foafoaina o lona Alo ma faaaogā o ia i se taimi umi e lē mailoa o Sana “tufuga.” (Faataoto 8:22-31) Na faaalia le silisili ese o le alofa o Ieova ina ua ia auina mai lona Alo pele e toʻatasi e fai ma taulaga togiola mo le fanau a tagata. (Mataio 20:28; Ioane 3:16; 1 Ioane 2:1, 2) E lē mafai foʻi e lo tatou poto faaletagata ona malamalama e faatatau i le tino agaga ma mamalu e lē toe mafai ona maliu, lea na tuuina atu e Ieova iā Iesu i le taimi na toe faatuina ai o ia.—1 Peteru 3:18.
10 Na aofia i le toe tū mai o Iesu le tele o vala mataʻina o le silisili ese lē masuʻesuʻeina o Ieova. E aunoa ma se masalosalo na toe faafoʻisia e le Atua iā Iesu ona manatunatuga e faatatau i galuega na aofia ai i le foafoaga o mea lē vaaia ma mea e vaaia. (Kolose 1:15, 16) O nei mea e aofia ai foafoaga agaga, le vateatea, le lalolagi ma vala uma o meafaitino o le olaga i lo tatou kelope. E ese mai i le toe faafoʻisia o le poto o lona Alo e faatatau i le talafaasolopito o le olaga faalelagi ma le faalelalolagi a o leʻi avea ma tagata, ae na toe faafoʻisia foʻi e Ieova iā Iesu ona manatunatuga i mea na ia faia o se tagata lelei atoatoa. Ioe, na faaalia le silisili ese lē masuʻesuʻeina o Ieova i le toe faatūina mai o Iesu. E lē gata i lea, o lenā gaoioiga sili o se faamaoniga lea o le a toe faatutūina mai isi. E ao ona faamalosia ai lo tatou faatuatua e faapea, e mafai ona toe faatutūina e le Atua le faitau miliona o tagata ua maliliu ma o loo ia manatuaina pea.—Ioane 5:28, 29; Galuega 17:31.
O Galuega Matagofie ma le Mamana
11. O le ā le galuega mamana a Ieova na amata i le Penetekoso 33 T.A.?
11 Na faatinoina e Ieova le tele o isi galuega mamana ma le matagofie talu ona faatūina Iesu. (Salamo 40:5) I le Penetekoso 33 T.A., na faia ai e Ieova se nuu fou, le “Isaraelu o le Atua,” ua faia aʻe i soo o Keriso o ē na faauuina e le agaga paia. (Kalatia 6:16) Na faalautele atu lenei nuu fou faaleagaga i le lalolagi na iai i na ona pō. E ui lava i faiga a i latou na lafoaʻia le upu moni ina ua mavae le maliliu o aposetolo o Iesu, lea na oo atu ai i le faavaeina o lotu ua taʻua o lotu Kerisiano, ae na faaauau pea e Ieova ona faia galuega matagofie ina ia faataunuuina ana fuafuaga.
12. O le ā ua faamaonia e le mea moni e faapea, ua maua le Tusi Paia i gagana autū uma o le lalolagi?
12 O se faaaʻoaʻoga, na faasaoina le Tusi Paia ma mulimuli ane faaliliuina i gagana autū uma o le lalolagi i aso nei. Na faia faaliliuga o le Tusi Paia i lalo o tulaga faigatā ma le taufaamataʻu i le oti mai i sui a Satani. E mautinoa, pe ana lē finagalo i ai Ieova le Atua, o lē e lē masuʻesuʻeina lona silisili ese, e lē mafai ona faaliliuina le Tusi Paia i le sili atu i le 2,000 gagana!
13. Na faaalia faapefea le silisili ese o Ieova e ala i fuafuaga a lona Malo talu mai le 1914?
13 Ua faaalia le silisili ese o Ieova e ala i fuafuaga a lona Malo. O se faaaʻoaʻoga, i le 1914, na nofo tupu ai lona Alo, o Iesu Keriso, o se Tupu i le lagi. E leʻi umi lava mulimuli ane, ae gaoioi Iesu faasaga iā Satani ma ana temoni. Na tulia i latou mai le lagi ma taofia i le lalolagi, ma ua toe o se aga ona lafoina lea o i latou i le tō e lē gata. (Faaaliga 12:9-12; 20:1-3) Talu mai lenā taimi, ua faateteleina ai sauāga i soo faauuina o Iesu. Peitaʻi, ua faatumauina i latou e Ieova i lenei taimi o le faatasi mai lē vaaia o Keriso.—Mataio 24:3; Faaaliga 12:17.
14. O le ā le galuega matagofie na faia e Ieova i le 1919, ma o le ā na faataunuuina ai?
14 I le 1919, na faia ai e Ieova se isi galuega matagofie lea na faaalia ai lona silisili ese. Na toe faaolaolaina ai soo faauuina o Iesu, o ē na i se tulaga ua lē toe gaoioi faaleagaga. (Faaaliga ) Talu mai na tausaga, na maelega ai le ʻaufaauuina i le talaʻia o le tala lelei o le Malo faalelagi ua faavaeina. Ua uma ona aoaoina isi vaega faauuina ina ia faaatoa ai le fuainumera e 144,000. ( 11:3-11Faaaliga 14:1-3) E ala i soo faauuina o Keriso, na faataatia ai e Ieova se faavae o le “lalolagi fou” o le sosaiete o tagata amiotonu. (Faaaliga 21:1) Peitaʻi, o le ā o le a tupu i le “lalolagi fou” pe a ō uma i le lagi le ʻaufaauuina faamaoni?
15. O le ā le galuega o loo taulamua ai Kerisiano faauuina, ma o ā iʻuga?
15 I le 1935, o mataupu o le Aokuso 1 ma le Aokuso 15 o lenei mekasini, na iai ni mataupu autū e faatatau i le “motu o tagata e toʻatele” lea o loo taʻua i le Faaaliga mataupu e 7. Na amata ona maelega Kerisiano faauuina e saʻili ma aumaia i totonu o le faapotopotoga nei tagata tapuaʻi mai i nuu uma, ma aiga, ma nuu ma gagana eseese. O le a faasaoina lenei “motu o tagata e toʻatele” mai le “puapuaga tele” o loo faaloloʻi mai, ma le faamoemoe o le ola e faavavau i le Parataiso o ni sui tumau o le “lalolagi fou.” (Faaaliga 7:9-14) Talu ai le talaʻiga o le Malo ma le galuega o le faia o soo lea o loo taulamua ai Kerisiano faauuina, ua sili atu nei ma le ono miliona tagata ua iai le faamoemoe o le ola e faavavau i le lalolagi parataiso. O ai e ao ona viia mo lenā faatelega e ui i teteega mai iā Satani ma lana lalolagi leaga? (1 Ioane 5:19) E na o Ieova lava e mafai ona faataunuuina nei mea uma, e ala i lona agaga paia.—Isaia 60:22; Sakaria 4:6.
O le Matagofie ma le Mamalu o Ieova
16. Aiseā e lē mafai ai ona vaai tagata i le ‘matagofie o le mamalu o Ieova’?
16 E tusa lava po o le ā le auala na faatino ai ia gaoioiga, ae o le a lē faagaloina “galuega” matagofie ma “mea mamana” a Ieova. Na tusi Tavita e faapea: “E vivii atu le tasi tupulaga ma le tasi tupulaga i au galuega; latou te faailoa atu au mea mamana. Ou te tautala atu i le matagofie o le viiga o lou mamalu, atoa ma au mea mamana; e tautalatala i latou i le malosi o au mea e mataʻutia ai oe; ou te taʻutaʻu atu foʻi i lou silisili ese.” (Salamo 145:4-6) Talu ai o le “Atua o le agaga” ma e lē vaaia e tagata, o le ā la le tele o le iloa o Tavita e faatatau i le matagofie o Ieova?—Ioane 1:18; 4:24.
17, 18. Na faapefea ona faateleina le talisapaia e Tavita o le ‘matagofie o le mamalu o Ieova’?
17 E ui lava e leʻi mafai ona vaai Tavita i le Atua, ae na iai auala na faateleina ai lona talisapaia o le mamalu o Ieova. O se faaaʻoaʻoga,
sa mafai ona ia faitau i le Tusi Paia i galuega mamana a le Atua, e pei o le faaumatiaga o le lalolagi amioleaga i le lolo. E lē taumatea, na mātauina e Tavita le auala na faalumaina ai atua sesē o Aikupito ina ua laveaʻiina e le Atua ia Isaraelu mai le nofo pologa i Aikupito. O na mea tutupu ua faamaonia ai le mamalu ma le silisili ese o Ieova.18 E lē masalomia le talisapaia e Tavita o le mamalu o le Atua e lē gata e ala i le faitauina o le Tusi Paia, ae sa manatunatu loloto foʻi i ai. O se faaaʻoaʻoga, atonu sa ia manatunatu loloto i le mea na tupu ina ua tuuina atu e Ieova le Tulafono iā Isaraelu. Na iai faititili, uila, ao uliuli, ma le leo o le pu ua matuā tele. Na lūlūina ma ua pusa atoa uma le mauga o Sinai. Sa faapotopoto Isaraelu i le auvae mauga, ma faalogologo i “upu e sefulu” mai i totonu o le afi ma le ao a o fetalai Ieova iā i latou e ala i se agelu. (Teuteronome 4:32-36; 5:22-24; 10:4; Esoto 19:16-20; Galuega 7:38, 53) Maʻeu ni faaaliga o le mamalu ofoofogia o Ieova! O i latou e matuā naunau i le Afioga a le Atua ma manatunatu loloto i nei faamatalaga, e ootia o latou loto ona o le ‘matagofie o le mamalu o Ieova.’ I aso nei, ua tatou mauaina le Tusi Paia atoa, lea o loo aofia ai vaaiga matagofie eseese e mafai ona tatou maofa ai i le silisili ese o Ieova.—Esekielu 1:26-28; Tanielu 7:9, 10; Faaaliga, mataupu 4.
19. O le ā o le a faateleina ai lo tatou talisapaia o le mamalu o Ieova?
19 O le isi auala na maofa ai Tavita i le mamalu o le Atua, o le suʻesuʻeina lea o tulafono na tuuina atu iā Isaraelu. (Teuteronome 17:18-20; Salamo 19:7-11) O le usiusitai i tulafono a Ieova na faamamaluina ai le nuu o Isaraelu ma vavaeese mai ai i isi tagata. (Teuteronome 4:6-8) E pei ona moni i le tulaga o Tavita, o lo tatou faitauina e lē aunoa o le Tusi Paia, manatunatu loloto i ai, ma filigā i le suʻesuʻeina o le a faateleina ai lo tatou talisapaia o le mamalu o Ieova.
E Silisili Uiga o le Atua
20, 21. (a) O ā uiga e viia ai le silisili ese o Ieova o loo i le Salamo 145:7-9? (e) O le ā le aafiaga o ia uiga o le Atua iā i latou o ē alolofa iā te ia?
20 E pei ona tatou mātauina, o fuaiupu e ono o le Salamo 145, ua aumaia ai iā i tatou māfuaaga talafeagai e vivii ai iā Ieova i mea e fesootaʻi atu i lona silisili ese e lē masuʻesuʻeina. O le fuaiupu e 7 e oo i le 9 o loo viia ai lona silisili ese e ala i le faasino atu i ona uiga. Ua pese Tavita e faapea: “Latou te taʻu atu lava le faamanatuga i lou agalelei tele lava; latou te alalaga fiafia foʻi i lau amiotonu. E alofa fua mai ma alofa mutimuti vale mai Ieova; e tele gese lona toʻasā, e tele foʻi lona alofa. O loo agalelei mai Ieova i mea uma, o lona alofa mutimuti vale foʻi ua i ana mea uma na fai.”
21 I inei, o loo faamatilatila muamua ai e Tavita le agalelei ma le amiotonu o Ieova, o uiga ia na luʻia e Satani le Tiapolo. O le ā le aafiaga o nei uiga iā i latou uma e alolofa i le Atua ma gauaʻi i lana pulega? Ioe, o le agalelei ma le amiotonu o Ieova i le auala o loo pule ai, ua olioli ai ona tagata tapuaʻi ma e lē taofia ai i latou mai le taʻutaʻu atu o lona viiga. Ae e sili atu i lenā, ua faasafua atu le agalelei o Ieova i “mea uma” atoa ma tagata. E maualuga le faamoemoe, o le a fesoasoani lenei manatu i le toʻatele ina ia salamō ma avea ma tagata tapuaʻi i le Atua moni a o leʻi tuai.—Galuega 14:15-17.
22. E faapefea ona feutagaʻi Ieova ma ana auauna?
22 Na faatāuaina foʻi e Tavita uiga ia na faamatilatila e le Atua lava ia ina ua Ia ‘afio ane i ona [Mose] luma’ ma na fetalai atu e faapea: Esoto 34:6) O lea la, na faailoa atu ai e Tavita: “E alofa fua mai ma alofa mutimuti vale mai Ieova; e tele gese lona toʻasā, e tele foʻi lona alofa.” E ui lava e lē masuʻesuʻeina le silisili ese o Ieova, ae ua ia faamamaluina ana auauna i le lalolagi e ala i le feutagaʻi ma i latou i le alofa. E alofa mutimuti vale o ia, ma e naunau e faamagalo tagata agasala ua salamō e faavae i le taulaga togiola a Iesu. E telegese foʻi le toʻasā o Ieova, ma ua ia tuuina atu ai i ana auauna le avanoa e foʻia ai o latou vaivaiga ia e mafai ona taofia ai i latou mai le ulu atu i le lalolagi fou amiotonu.—2 Peteru 3:9, 13, 14.
“O Ieova, o Ieova, o le Atua alofa mutimutivale ma le alofa fua, e telegese lona toʻasā, a e tele le alofa ma le faamaoni.” (23. O le ā le uiga tāua o le a tatou talanoaina i le mataupu o sosoo mai?
23 Na viia e Tavita le alofa faamaoni o le Atua. Ua faaalia i le isi vaega o le Salamo 145 le auala ua faaalia ai e Ieova lea uiga ma le tali atu o ana auauna i lona alofa faamaoni. O le a talanoaina nei mataupu i le mataupu o loo sosoo mai.
O le a Faapefea Ona E Tali?
• O ā avanoa e viia ai Ieova i “aso uma lava”?
• O ā faaaʻoaʻoga ua iai o le lē masuʻesuʻeina o le silisili ese o Ieova?
• O le ā le auala e faateleina ai lo tatou talisapaia o le mamalu ofoofogia o Ieova?
[Fesili mo le Suʻesuʻega]
[Ata i le itulau 10]
Ua faamaonia e aniva o le vateatea le silisili ese o Ieova
[Faamatalaga i Ata]
Faatagaga a le Anglo-Australian Observatory, ata na puʻeina e David Malin
[Ata i le itulau 12]
Ua faapefea ona faaalia le silisili ese o Ieova i ana feutagaʻiga ma Iesu Keriso?
[Ata i le itulau 13]
Ina ua maua e Isaraelu le Tulafono i le mauga o Sinai, na latou maua faamaoniga o le mamalu ofoofogia o Ieova