Fesili Mai le ʻAufaitau

E pei ona faamauina i le Kenese 38:15, 16, aiseā na māfua ai ona faia e Iuta feusuaʻiga ma se fafine na ia manatu i ai o se fafine talitane?

Na faia e Iuta feusuaʻiga ma se fafine na ia manatu i ai o se fafine talitane, peitaʻi o le mea moni e lē o ia o se fafine talitane. O le mea lenei na tupu e tusa ai ma le Kenese mataupu e 38.

A o leʻi maua e le atalii ulumatua o Iuta ni ona atalii mai i lana avā o Tamara, na fasiotia o ia talu ai “sa leaga o ia i le silafaga a Ieova.” (Kenese 38:7) I lenā taimi, sa tausia ai se tulafono faapitoa tau faaipoipoga. Pe afai e oti se tane ae leai sona suli, e tatau i le uso o lē ua maliu ona faaipoipo ma le avā o lē ua maliu ina ia maua ai sona suli. Peitaʻi, na teena e Onani, le atalii lona lua o Iuta lona tiutefai. O lea, na oti ai o ia ona o le faamasinoga a le Atua. Ona auina atu lea e Iuta o Tamara le avā a lona atalii ua maliu i le aiga o lona tamā, seʻia matua Sila lona atalii lona tolu ona faaipoipo lea ma ia. Peitaʻi, a o faagasolo tausaga, na lē taulau ona avatu e Iuta lona atalii o Sila e faaipoipo ma Tamara. O lea, ina ua maliu le avā a Iuta, na mafaufau ai loa Tamara ia maua sona suli mai iā Iuta, le tamā o lana tane. O lea, na ofu ai o ia e faafoliga o se fafine talitane o le malumalu ma nofo i autafa o le auala, ona na ia iloa o le a sau Iuta.

Talu ai na te leʻi iloaina Tamara, na faia ai e Iuta feusuaʻiga ma ia. Na maua e Tamara ni mea totino ma iā Iuta o se taui o le la feusuaʻiga, ma o mea ia na ia faaaogāina mulimuli ane e faamaonia ai o Iuta na ia maʻitō ai. Ina ua iloa le mea moni, e leʻi tuuaʻia e Iuta ia Tamara peitaʻi na ia faapea mai ma le lotomaulalo: “Ua sili ona tonu lana amio i laʻu, ona ua lē avatua o ia iā Sila loʻu atalii.” Na “la lē toe feiloaʻi” pe toe faia ni feusuaʻiga ma e saʻo lea tulaga.—Kenese 38:26.

Sa sesē Iuta i lona lē avatuina o Tamara i lona atalii o Sila e pei ona ia folafola atu. Sa ia faia foʻi ni feusuaʻiga ma se fafine na ia manatu i ai o se fafine talitane. Ua tuufaafeagai lenei ma le fuafuaga a le Atua mo se tamāloa e na o le faatulagaga lava faalefaaipoipoga e faia ai feusuaʻiga. (Kenese 2:24) Ae, o le mea moni lava, e leʻi faia e Iuta ni feusuaʻiga ma se fafine talitane. Na i lo lea, ma lona lē iloa sa ia suitulaga i lona atalii o Sila i le faia o le faaipoipoga o le uso o le tane ua maliu, ma avea ai o ia ma tamā o le pepe e tusa ma le tulafono.

Ae mo Tamara, o lana gaoioiga lea sa fai, e lē o se amioga lē mamā. O lana fanau masaga e lē o se fanau e maua mai i le faitaaga. Ina ua ave e Poasa o Ierusalema ia Ruta le fafine Moapi e fai ma ana avā, na fai ni faamatalaga lelei e toeaina o Ierusalema iā Poasa e faatatau iā Faresa le tama a Tamara e faapea: “Ia avea foʻi lou aiga pei o le aiga o Faresa na fanau mai e Tamara iā Iuta, nai le fanau e foaʻi mai e Ieova iā te oe i lenei teine.” (Ruta 4:12) O loo lisina mai foʻi ia Faresa iā i latou o le tupuaga o Iesu Keriso.—Mataio 1:1-3; Luka 3:23-33.