Ia Avatu i le Atua le Viiga, Ae Lē o Tagata
Ia Avatu i le Atua le Viiga, Ae Lē o Tagata
I MASINA talu ai nei, na aʻoaʻoina ai ē naunau i le amiotonu i le lalolagi aoao i le auala e avatu ai i le Atua le viiga a o latou tauaofia i Tauaofiaga Itumalo o Molimau a Ieova, “Ia Avatu i le Atua le Viiga.” Seʻi o tatou toe autaluina le polokalame tauaʻoaʻoga sa faia i inā.
E tolu aso sa faia ai le polokalame e faavae i le Tusi Paia mo le toʻatele o le ʻauusufono ae fā aso mo i latou o ē na mafai ona auai i tauaofiaga faapitoa faavaomalo. I tauaofiaga uma ia, na faafofoga ai le ʻauusufono i le sili atu i le 30 vaega eseese faale-Tusi Paia, e aofia ai lauga e faalolotoina ai le talisapaia faaleagaga, o mea tutupu e faamalosia ai le faatuatua, o faataʻitaʻiga e faamamafa ai le aogā o le faatatauina o mataupu silisili o le Tusi Paia, ma se tala faale-Tusi Paia lea e laʻeiina ai e tagata laʻei o aso anamua, na faaata mai ai luʻi na fesagaʻi ma Kerisiano i le uluaʻi senituri. Afai sa e auai i se tasi o na tauaofiaga, aiseā e lē toe tilofaʻia ai au faamaumauga a o e faitauina lenei mataupu? E matou te mautinoa o le a toe manatua ai le tele o taumafa susua faaleagaga ma aogā.
Matua o le Aso Muamua: “E Tatau Lava Oe [Ieova] Ina ia Tuuina Atu iā te Oe le Viiga”
Ina ua māeʻa le tatalo ma le pese amata, na faafeiloaʻia ma le māfana e le failauga muamua le aofia i le lauga e taulaʻi atu i le māfuaaga autū o le tauaofiaga: “Ua Tauaofia e Viia le Atua.” Na faamamafa e le failauga le matua atoa o le tauaofiaga i le siiina mai o le Faaaliga 4:11. Sa ia faamatalaina po o le ā le uiga o le avatu i le Atua le viiga. I le faaaogāina o le tusi o le Salamo, na ia faamamafa ai e faapea, o le faamamaluina o le Atua e aofia ai le “ifo,” po o le tapuaʻi atu, o “viiga” po o le faafetai ma le “vivii.”—Salamo 95:6; 100:4, 5; 111:1, 2.
O le lauga na sosoo ai na faamatuaina, “E Faamanuiaina i Latou e Faamamaluina le Atua.” Sa taʻua ai e le failauga se manatu manaia. Talu ai e sili atu i le ono miliona Molimau a Ieova i atunuu e 234 i le lalolagi atoa, e mafai ona faapea atu o loo latou avatu le viiga iā Ieova i le ao ma le pō. (Faaaliga 7:15) O se tasi o vala na faalaeiauina ai le aofia, o se faatalanoaga o uso ma tuafāfine Kerisiano o loo i le auaunaga faapitoa faataimi atoa.
O le isi lauga na sosoo ai, “Ua Tala Mai e Foafoaga le Mamalu o le Atua.” Ua faamamaluina e aunoa ma se leo e le lagi faitino le silisili ese o Isaia 40:26.
le Atua, ma ua fesoasoani iā i tatou e matuā talisapaia lana tausiga alofa. Sa faamatalaina lenei tulaga i ni faaaʻoaʻoga mananaia.—Ua luʻia le faamaoni o Kerisiano moni ona o sauāga, omiga, aafiaga faalelalolagi ma tuʻinanauga agasala. O lea, na uaʻi totoʻa atu ai le aofia i le lauga, “Ia Savavali ma le Faamaoni.” Na iloiloina i le lauga fuaiupu taʻitasi o le Salamo e 26, ma faatalanoa ai se Molimau aʻoga o lē na tumau i le amiolelei a o le isi na faaaluina le tele o le taimi i faafiafiaga faalēlelei peitaʻi ua toe uia laasaga e faaleleia ai le faafitauli.
Na faaiʻuina le polokalame o le taeao i le lauga autū, “Ua Faamalosia i Tatou i Vaaiga Faamamaluina!” Na taʻua e le failauga faaaʻoaʻoga a le perofeta o Tanielu ma aposetolo o Ioane ma Peteru, o ē na faamalosia lo latou faatuatua i vaaiga matagofie faavaloaga e faatatau i le faavaeina ma le faagaoioia o le Malo faa-Mesia o le Atua. E faatatau atu iā i latou atonu ua galo faamaoniga manino e faamaonia ai ua tatou ola i le taimi o le iʻuga, na faapea mai le failauga: “Talosia o le a toe taulaʻi atu le vaai a i latou na, i le faatasi moni mai o Keriso i le mamalu o le Malo, ma faapea ona fesoasoani ai iā i latou e toe faafoʻisia lo latou malosi faaleagaga.”
Na amata le polokalame o le aoauli i le lauga sa faamatuaina e faapea, “E Faaalia le Mamalu o Ieova i Ē Lotomaulalo.” Na faaalia e le failauga le auala e faataatia ai e Ieova se faaaʻoaʻoga o le lotomaulalo, e ui lava o ia o Lē e Silisili Ese i le vateatea aoao. (Salamo 18:35) E fiafia le finagalo o Ieova iā i latou o ē lotomaulalo, peitaʻi e tetee iā i latou o ē faafoliga mai e lotomaulalo pe a feutagaʻi ma a latou aumea po o a latou pule, ae fia pulepuletutū iā i latou o loo latou vaavaaia.—Salamo 138:6.
Na sosoo ai ma le lauga faasolo sa faamatalaina ai valoaga a le Tusi Paia ma faamatilatila ai vala eseese o le matua: “Le Valoaga a Amosa—Lana Feʻau mo o Tatou Aso.” I le faasino atu i le faaaʻoaʻoga a Amosa, sa faauaʻi atu ai e le failauga muamua i lo tatou tiute tauave o le lapataʻia lea o tagata i le faamasinoga a Ieova o loo sau. O le matua o lana lauga e faapea: “Ia Taʻutaʻu Atu Afioga a le Atua ma le Loto Tele.” Na lāgā e le failauga na sosoo ai le fesili e faapea: “Pe o le a faaiʻuina ea e Ieova le amioleaga ma mafatiaga i lenei lalolagi?” O lana matua e faapea, “Le Faasalaga Faafaamasinoga a le Atua Faasaga i Tagata Amioleaga,” na faaalia ai o le faasalaga faafaamasinoga a le Atua e tonu, e lē maʻalofia ma e na o tagata amioleaga e faaumatia ai. O le failauga mulimuli o le lauga faasolo na taulaʻi atu i le matua e faapea, “E Suʻesuʻeina e Ieova le Loto.” O i latou o ē mananaʻo e faafiafia Ieova o le a utagia upu o loo i le Amosa 5:15: “Ia outou ʻinoʻino i le leaga, a e loto atu i le lelei.”
E mafai ona faaaogāina sesē le ʻava malosi e pei o le uaina lea e faafiafia ai le loto. I le lauga “ ʻAlofia le Mailei o le Faaaogāina Sesē o le ʻAva Malosi,” na lisi mai ai e le failauga lamatiaga faaletino ma le faaleagaga ona o le lē pulea lelei o le ʻava malosi, e tusa lava pe leʻi onā se tasi. Na ia aumaia se mataupu silisili e fai ma taʻiala: Talu ai e eseese aafiaga o le isi tagata mai i le isi tagata, afai o le tele o le ʻava malosi ua e taumafaina ua afāina ai lou “poto ma lou mafaufau” o lona uiga la ua ova le ʻava malosi ua e taumafaina.—Faataoto 3:21, 22.
Talu ai ua tatou ola i aso faigatā, na matuā faamāfanafanaina le aofia i le lauga na sosoo ai, “O Ieova, o ‘lo Tatou Malosi i Ona Pō o le Puapuaga.’” E fesoasoani le tatalo, agaga paia ma le ʻauuso Kerisiano iā i tatou e feagai ai ma ia mea.
Na faaiʻu le lauga mulimuli o le aso, “ʻLe Nuu Lelei’—O se Faataʻimuaga o le Parataiso,” i le faateʻia ma le fiafia o tagata uma i le tatalaina o se lomiga fou e iai ni faafanua faale-Tusi Paia se tele! Ua faaulutalaina faapea, Matamata i le Nuu Lelei.
Matua o le Aso Lona Lua: “Ia Outou Taʻutaʻu Atu Lona Mamalu i Nuu Ese”
Ina ua māeʻa le iloiloina o le mau o le aso, ona tauaaoina atu lea o le lauga faasolo lona lua o le tauaofiaga o le matua e faapea, ‘Ia Faaatagia Atu le Mamalu o Ieova.’ Na faamatalaina
i le lauga muamua e faatatau i le “Faasalalau Atu le Tala Lelei i so o se Nofoaga,” ma faaiʻu i le toe faaata mai o mea moni na tutupu i le auaunaga i le fanua. O le lauga na sosoo ai, “Aveesea le Ufimata o Ē Tauaso,” na aofia ai se faataʻitaʻiga i le faia o se toe asiga. O le lauga mulimuli o le lauga faasolo, “Ia Faasilisili Pea i la Tatou Faiva” na faamamafaina ai lea manatu e ala i faatalatalanoaga i mea tutupu i le fanua.O le isi vaega na sosoo ai o le polokalame, “E Inosia Fua e Aunoa ma ni Māfuaaga.” Na aofia ai ni faatalatalanoaga faalaeiau o ē faamaoni na tumau i teteega ona o le malosi mai le Atua.
O se vala e sili ona faatalitalia i tauaofiaga, o le lauga o le papatisoga ma le faatofuina mulimuli ane ai i le vai sui papatiso uma ua agavaa.
O le papatisoga i le vai e faailogaina ai le tuuina atoatoa atu o se tasi iā Ieova. O lea, sa matuā talafeagai lelei le matua: “E Viia le Atua pe a Tatou Ola e Tusa ai ma lo Tatou Tuuina Atu.”Na amata le polokalame o le aoauli i se lauga e faalaeiauina ai le tilofaʻia e le tagata o ia lava, “Ia Maua le Silafaga a Keriso i Tulaga Aloaʻia.” Na taʻua e le failauga lenei manatu faaosonaunau: O le tulaga aloaʻia e maua mai i le faaaʻoaʻo i le lotomaulalo o Keriso. O lea la, e lē tatau i se Kerisiano ona saʻilia faaeaga ina ia faamalieina ai ona lava faanaunauga. E tatau ona ia fesili iā te ia lava, ‘Po o oʻu manaʻo moni lava e faatino gaoioiga aogā ia e lē o mātauina e nisi?’
Pe e te lagona ea le vaivai? Ioe, e lagona uma lava e tagata le vaivai i nisi taimi. Na talisapaia e tagata uma le lauga, “Lē Lavā ae e Lē Vaivai Ai.” Na faaalia i faatalatalanoaga a i latou ua loa o avea ma Molimau e faapea, e mafai e Ieova ona ‘faamalosia i tatou i lona Agaga.’—Efeso 3:16.
Tatou te leʻi fananau mai ma le uiga lea o le agalelei peitaʻi, e ao ona tatou atiina aʻe. Sa faamamafa mai lenei manatu tāua i le lauga, “Ia Mataalofa, Ia Avatu Fua a Outou Mea.” Na lāgā ai se fesili faatupu manatu e faapea: “Pe o tatou faaaluina ea se taimi ma uso ma tuafāfine matutua, ē o mamaʻi, lotomafatia, po o i latou ua tuua toʻatasi?”
Na matuā uaʻi atu manatu o le aofia i le lauga, “Ia Faaeteete i ‘Leo o Tagata Ese.’” Na faatusa e lenei lauga soo o Iesu i mamoe e faalogo i le leo o le “leoleo mamoe lelei” ae lē faalogo atu i “leo o tagata ese” e pei ona faaalia e ala mai i le tele o gaoioiga a tagata ua aafia i faiga a le Tiapolo.—Ioane 10:5, 14, 27.
E ao ona usuina faatasi e se ʻaufaipese le pese ina ia malamalama ai. Ina ia avatu i le Atua le viiga, e ao ona autasi tagata tapuaʻi moni i le lalolagi aoao. O lea, “Ia Faamamaluina le Atua i ‘le Leo e Tasi’” na aumaia ai se faatonuga aogā i le auala tatou te tautatala ai i le “gagana mamā” e tasi ma auauna iā Ieova ma le “loto gatasi.”—Sefanaia 3:9, NW.
Na matuā faafiafiaina mātua, aemaise lava i latou e iai fanau laiti i le lauga mulimuli o le aso, “O a Tatou Fanau—O se Tofi Tautele.” Na faateʻia ma sa faafiafiaina le aofia i le tatalaina o le lomiga fou e 256 ona itulau. O le a fesoasoani lenei tusi Ia Faalogo i le Faiaʻoga Sili i mātua ina ia faaalu se taimi aogā i mea faaleagaga ma o latou alo, o i latou ia o ni meaalofa mai le Atua.
Matua o le Aso Lona Tolu: ‘Ia Faia Mea Uma Lava e Viia ai le Atua’
Na amata le aso mulimuli o le tauaofiaga i ni manatu faaleagaga mai le mau o le aso. O le vaega muamua o le polokalame o lenei aso, na uaʻi atu i le aiga. O le lauga muamua na saunia ai mafaufau o le aofia e faapea, “Mātua e, ia Faamalosia lo Outou Aiga.” Ina ua uma ona iloiloina
tiute tauave a mātua o le saunia lea o mea faaletino mo le aiga, ona faamatala lea e le failauga, o le tiute autū lava a mātua o le saunia lea o mea faaleagaga mo o latou alo.O le failauga na sosoo ai na talanoa atu i le fanau ma iloiloina le mataupu, “Le Auala e Viia ai e Talavou Ieova.” Na ia taʻua e faapea, o talavou ua pei i latou o le “sau o le vave ao,” ona o lo latou toʻatele ma le faafouina o lo latou maelega. E naunau tagata matutua e galulue faatasi ma i latou i le auaunaga iā Ieova. (Salamo 110:3) Na aofia ai i lenei vaega ni faatalatalanoaga o ni talavou na avea ma faaaʻoaʻoga lelei.
E masani lava o se tasi o vala e sili ona fiafia i ai i tauaofiaga itumalo, o le tala faale-Tusi Paia lea e laʻeiina ai e tagata laʻei o aso anamua, ma na faia foʻi i le tauaofiaga lenei. O le matua o le tala, “Molimau Atu ma le Loto Tele e ui i Teteega” na faaataina mai ai soo o Iesu i le uluaʻi senituri. E lē gata o se mea e fiafia ai peitaʻi, e sili atu lona tāua ma aogā. O le lauga na sosoo ma le tala, “Ia ‘Lē Mapu’ Ona Taʻutaʻu Atu le Tala Lelei” sa faamatilatila ai manatu autū o le tala.
Na tulimataʻia e le aofia le lauga lautele na faamatilatila ai le polokalame o le Aso Sa, “O Ai o Viia pe Faamamaluina le Atua i Aso Nei?” Na taʻua e le failauga ni faamaoniga o le auala e lē avatu ai e saienitisi ma faalapotopotoga faalotu le viiga i le Atua. E na o ona tagata lava, i latou o loo talaʻia ma aʻoaʻo atu le upu moni e uiga iā Ieova, o loo vivii atu i lona suafa i aso nei.
Na sosoo mai i le lauga lautele le otootoga o Le Olomatamata o lenā vaiaso, ona sosoo ai lea ma le lauga mulimuli, “Ia Viia Ieova e Ala i le ‘Fua Tele Mai.’ “ Na lauina e le failauga se iʻugāfono e iai manatu e sefulu e ao ona ioe i ai i latou uma i le aofia. Na faaautū atu i auala eseese e ao ai ona avatu le viiga iā Ieova, Lē na Foafoaina Mea uma. Na ioe ma le leotele i ai tagata uma lava na auai i tauaofiaga uma i le lalolagi aoao.
Na faaiʻuina le tauaofiaga ae e lē mafai ona galo i le ʻauusufono uma le matua “Ia Avatu i le Atua le Viiga.” Seʻi o tatou saʻili e avatu i le Atua le viiga e ala i le fesoasoani a le agaga o Ieova ma lana faalapotopotoga vaaia ae lē o tagata.
[Pusa/Ata i le itulau 23]
Tauaofiaga Faavaomalo
Sa faia tauaofiaga faavaomalo e fā aso i Ausetalia, Aferika, Asia, Amerika i Mātū, Amerika i Saute ma Europa. Na valaaulia ai Molimau i le lalolagi atoa ina ia usufono ai i nei faatasitasiga. O lenei auala sa “fefaamāfanafanaaʻi” ai tagata asiasi ma i latou o loo talimalo. (Roma 1:12) Na toe feiloaʻi ai ma uō ua leva ona masani, ma faia ai foʻi nisi uō fou. O se vala faapitoa o tauaofiaga faavaomalo o le vaega lea o le polokalame e faamatuaina, “Lipoti Mai Isi Atunuu.”
[Pusa/Ata i le itulau 25]
Lomiga Fou e Avatu ai i le Atua le Viiga
E lua lomiga fou na tatalaina i tauaofiaga itumalo, “Ia Avatu i le Atua le Viiga.” O le tusi ua iai faafanua o le Tusi Paia, Matamata i le Nuu Lelei, e anagatā lona faavaa ma e 36 itulau o loo iai faafanua ma ata o vaipanoa ma nuu o le Tusi Paia. E lanu uma itulau taʻitasi ma e iai faafanua o le emepaea o Asuria, Papelonia, Metai ma Peresia, Eleni ma Roma. E eseese faafanua o le faiva a Iesu ma le faalautelega o le Faa-Kerisiano.
Ia Faalogo i le Faiaʻoga Sili o se tusi e 256 ona itulau faatasi ai ma ni ata e 230. E mafai ona faaaogā le tele o taimi e fiafia ai ma le fanau i le autiloina o ata ma tali i fesili faatupu manatu o loo i le tusi. Ua lomiaina lenei lomiga fou ina ia mafai ai e a tatou fanau iti ona tetee atu i osofaʻiga a Satani, auā o loo ia taumafai e faaleagaina a latou amioga lelei.
[Ata i le itulau 23]
Na faamatalaina e misionare mea na tutupu e faamalosia ai le faatuatua
[Ata i le itulau 24]
O le papatisoga o se vala tāua lea o tauaofiaga, “Ia Avatu i le Atua le Viiga”
[Ata i le itulau 24]
Ua fiafia ē matutua ma ē laiti i tala faale-Tusi Paia