O Folafolaga E te Faatuatuaina

NA SILAFIA e le perofeta a le Atua o Mika e faapea, e masani lava ona lē faataunuuina e isi a latou folafolaga. I ona aso, e oo lava i uō māfana e lē mafai ona faatuatuaina a latou upu. O lea na lapataʻi mai ai Mika: “Aua neʻi outou faatuatua i le uō, aua neʻi faalagolago i le aumeamamae; ia e leoleo i puipui o lou gutu i lau avā pele.”—Mika 7:5.

Pe sa masalosalo ea Mika i folafolaga uma ona o lenei tulaga lē lelei? E mautinoa lava e leai! Na ia matuā talitonu i folafolaga sa faia e lona Atua, o Ieova. Na ia tusi e faapea: “A o aʻu, ou te faatalitali iā Ieova, ou te faamoemoe i le Atua o loʻu olataga.”—Mika 7:7.

Aiseā na iai ai lenā talitonuga mautinoa iā Mika? Talu ai sa ia silafia e faamaoni Ieova i ana afioga. O mea uma lava sa tautō ai le Atua i augātamā o Mika sa taunuu uma lava. (Mika 7:20) O le faamaoni o Ieova i aso ua mavae, na mafai ai ona talitonu Mika e faapea, o le a Ia faataunuu Ana afioga i le lumanaʻi.

 “E Leʻi Iʻuvale se Upu e Tasi”

O se faaaʻoaʻoga, na iloa e Mika e faapea, na faasaoina e Ieova Isaraelu mai le nofo pologa i Aikupito. (Mika 7:15) O Iosua, o lē na tofo i lenā faasaoina, na ia faalaeiauina tagata Isaraelu ina ia faatuatua i folafolaga uma a le Atua. E faavae i le ā? Na faamanatu atu e Iosua iā i latou e faapea: “Ua outou iloa ma o outou loto atoa, ma o outou agaga atoa, e leʻi iʻuvale se upu e tasi i upu lelei uma na fetalai mai ai Ieova lo outou Atua iā te outou; ua taunuu uma iā te outou, ua lē iʻuvale se upu e tasi.”—Iosua 23:14.

Na malamalama lelei lava Isaraelu i mea matagofie na faia e Ieova mo i latou. Na ia faataunuuina lana folafolaga i lo latou augātamā faatuatua o Aperaamo e faapea, o le a faatoʻateleina lana fanau e pei o fetu ma o le a latou mauaina le laueleele o Kanana. Na fetalai atu foʻi Ieova iā Aperaamo e faapea, o le a faapuapuagatia lana fanau i tausaga e 400 peitaʻi o le a toe foʻi i Kanana i le “lona fā o tupulaga.” Na taunuu uma nei mea.—Kenese 15:5-16; Esoto 3:6-8.

Sa talileleia Isaraelu i Aikupito i aso o Iosefa le atalii o Iakopo. Mulimuli ane, na faamalosia i latou e tagata Aikupito e faia ni galuega mamafa, peitaʻi e pei ona sa folafola atu e le Atua, e tusa ma le vaitaimi o le lona fā o tupulaga mai le taimi na latou ulu atu ai i Aikupito, na faasaʻolotoina ai nei fanau a Aperaamo mai le nofo pologa i Aikupito. *

A o faagasolo le isi 40 tausaga, na atili faamaonia ai iā Isaraelu e faapea, e faataunuu e Ieova ana folafolaga. Ina ua osofaʻia fua e sa Amelekā ia Isaraelu, na tau Ieova mo ona tagata ma puipuia i latou. Na ia faamalieina o latou manaʻoga faaletino a o latou savalia le vaomatua mo le 40 tausaga ma mulimuli ane faamautū ai i le Nuu o le Folafolaga. A o toe faamanatu e Iosua le talaaga o feutagaʻiga a Ieova ma fanau nei a Aperaamo, e mafai ona ia faapea mai ma le mautinoa: “E leʻi iʻuvale se upu i upu lelei uma na fetalai mai ai Ieova i le aiga o Isaraelu; ua taunuu uma lava.”—Iosua 21:45.

Ia Ati Aʻe le Faatuatua i Folafolaga a le Atua

E faapefea ona e faatuatua i folafolaga a Ieova e pei o Mika ma Iosua? O lea, e faapefea ona e ati aʻe lou maufaatuatuaina o isi? E manaʻomia ona e iloa i latou i le tele e te mafai ai. O se faaaʻoaʻoga, e te ono iloa le maufaatuatuaina o i latou e ala i le mātauina o lo latou taumafai e faataunuuina ma le faamaoni a latou folafolaga. A o faateleina lou iloa o na tagata, ua agaʻigaʻi ai ona e ati aʻe lou faatuatuaina o i latou. E mafai ona e faia faapena i le atiina aʻe o le faatuatua i folafolaga a le Atua.

O se tasi o auala e te faia ai faapea o le manatunatu lea i foafoaga ma tulafono o loo pulea ai. Ua faatuatua saienitisi i nei tulafono, e pei o lea e māfua ai le vaevaeina o se sela se tasi o le tagata ma toe faateleina ina ia saunia ai le tiliona o sela e faia aʻe ai lou tino. O le mea moni, o tulafono ia e pulea ai gaoioiga o mea faitino ma le malosiaga i le aoao o mea e ao ona faavaeina e Sē e Faitulafono  maufaatuatuaina. E mautinoa, e te faatuatuaina ana folafolaga, e pei ona e faatuatuaina tulafono o loo pulea ana foafoaga.—Salamo 139:14-16; Isaia 40:26; Eperu 3:4.

E ala i le perofeta o Isaia, o lē sa soifua faatasi ma Mika, na faaaogā e Ieova le fesuiaʻiga o le tau ma le faataamilosaga ofoofogia o le vai e faaalia ai le maufaatuatuaina o lana Afioga. O tausaga taʻitasi uma lava e timu ai. E faasūsūina le palapala ina ia faigofie ai i tagata ona totō a latou fatu ma selesele mai mea ua latou totō. E tusa ai ma lenei tulaga, na fetalai Ieova e faapea: “E pei ona totō ifo o le ua ma le kiona mai le lagi, a e lē toe foʻi atu i ai, a e peitaʻi e faasūsūina ai le laueleele, ma fua mai ai, ma totogo mai ai, e tupu mai ai saito i lē lūlū saito ma mea e ʻai i lē ua ʻai; e faapea foʻi laʻu upu e alu atu ai loʻu gutu, e lē foʻi mai fua iā te aʻu; a e peitaʻi e faia le mea ou te loto i ai, e manuia foʻi i le mea ou te auina atu ai.”—Isaia 55:10, 11.

E Mautinoa Folafolaga o le Parataiso

O le iloiloina o le foafoaga e mafai ona atiina aʻe ai le faatuatua i Lē na Foafoaina Mea, peitaʻi e iai se isi mea e sili atu ona manaʻomia pe afai e te manaʻo e malamalama i folafolaga o se vaega lea o ‘upu e sau mai lona fofoga.’ Ina ia malamalama i nei folafolaga ma e faatuatua i ai, e manaʻomia ona e suʻesuʻe le tusi mai le agaga o le Atua o loo iai faamatalaga o fuafuaga a le Atua mo le lalolagi ma ana feutagaʻiga ma tagata.—2 Timoteo 3:14-17.

Na matuā talitonu le perofeta o Mika i folafolaga a Ieova. Ua sili atu le tele o faamaumauga na faagaeeina e le Atua ua e maua na i lo Mika. A o e faitau ma mafaufau loloto i le Tusi Paia, e mafai foʻi ona e atiina aʻe le faatuatua i le faataunuuga o folafolaga a le Atua. O nei folafolaga e aofia ai e lē na o fanau a Aperaamo ae o tagata uma lava. Na folafola e Ieova i lea augātamā mataʻu i le Atua e faapea: “O lau fanau foʻi e manuia ai atu nuu uma lava o le lalolagi; auā ua e usiusitai i laʻu upu.” (Kenese 22:18) O le vaega autū o le “fanau” a Aperaamo o le Mesia, o Iesu Keriso.—Kalatia 3:16.

Ua finagalo Ieova e oo atu faamanuiaga i tagata e ala iā Iesu Keriso. Ae o le ā ua folafola e le Atua na te faia i o tatou aso? Ua tali e le Mika 4:1, 2 i nei upu faavaloaga e faapea: “O aso e gata ai e oo ina faatumauina ai le mauga o i ai le fale o Ieova i tumutumu o mauga, e faamaualugaina foʻi ia sili i mauga iti, ona gasolo ane lea o nuu i ai. E ō mai lava nuu ese e tele, ma latou faapea ane, Ō mai ia, tatou ō aʻe ia i le mauga o Ieova, o le fale foʻi o le Atua o Iakopo; e aʻoaʻo mai ai o ia iā te i tatou i ona ala, ona tatou savavali ai lea i ona ala.”

O i latou ua aʻoaʻoina ala o Ieova “o latou tao foʻi o fai e fai ma polo teu vine.” Ua mou atu uiga o le sauā ma le fia fasioti tagata. Ua toeitiiti ona tumu lea o le lalolagi i tagata amiotonu, e leai foʻi se tasi e faamataʻu iā i latou. (Mika 4:3, 4) Ioe, ua folafola mai e le Afioga a le Atua e faapea, i le pulega o le Malo i aao o Iesu Keriso, o le a aveesea ai e Ieova tagata amioleaga uma.—Isaia 11:6-9; Tanielu 2:44; Faaaliga 11:18.

O le a toe faatutūina i latou sa mafatia ma maliliu ona o le fouvale a tagata i le Atua, faatasi ai ma le faamoemoe o le ola e faavavau i le lalolagi. (Ioane 5:28, 29) O le a lē toe iai ē faapogaia le amioleaga o Satani ma ana temoni,  ma o le a aveesea aafiaga o le agasala a Atamu e ala i le taulaga togiola a Iesu. (Mataio 20:28; Roma 3:23, 24; 5:12; 6:23; Faaaliga 20:1-3) Ae o le ā le tulaga o tagata usiusitai? O le a faamanuiaina i latou i le ola e faavavau i le soifua mālōlōina lelei i le parataiso i le lalolagi!—Salamo 37:10, 11; Luka 23:43; Faaaliga 21:3-5.

E mautinoa le matagofie o nei folafolaga. Ae e te talitonu i ai? O le mea moni lava e mafai ona e talitonu i ai. E lē o ni folafolaga a tagata atonu e faia ona o ni uunaʻiga lelei peitaʻi, e leai se malosi e faataunuuina ai. O folafolaga na a le Atua Silisili Ese, o lē e lē pepelo ma e ‘lē faatuai mai i le mea na ia folafolaina mai.’ (2 Peteru 3:9; Eperu 6:13-18) E mafai ona e faatuatua atoatoa i folafolaga uma o loo i le Tusi Paia, ona o le Puna o ia folafolaga o ‘Ieova le Atua faamaoni.’—Salamo 31:5.

[Faamatalaga pito i lalo]

[Faamatalaga faaopoopo i le itulau 6]

“E leʻi iʻuvale se upu e tasi i upu lelei uma na fetalai mai ai Ieova lo outou Atua iā te outou.”—IOSUA 23:14

[Ata i le itulau 4, 5]

Sa faataunuuina e Ieova ana folafolaga iā Isaraelu i le Sami Ulaula ma i le vaomatua

[Ata i le itulau 7]

Na faataunuuina e Ieova lana folafolaga iā Aperaamo. O lana Fanau, o Iesu Keriso, o le a manuia ai le fanau a tagata