O Folafolaga a Ai E te Faatuatuaina?

“SA MALOSI o ia e pei o ana folafolaga; a o lenei ua faatauvaa o ia na te lē o toe mafaia se mea.”—King Henry the Eighth, tusia e William Shakespeare.

O folafolaga malolosi ia na taʻua e Shakespeare, na faia e le katinale Peretania e suafa iā Thomas Wolsey, o lē sa tele sona aafiaga i faiga faalemalo i le senituri lona 16. Ua manatu le toʻatele, o faamatalaga a Shakespeare ua fetaui ma le tele o folafolaga o loo faia i aso nei. Ua faia soo folafolaga e i latou o iai le pule peitaʻi o le toʻatele e lē o faataunuuina a latou folafolaga. O lea la, e faigofie ona tatou malamalama ai i le māfuaaga latou te masalosalo ai i so o se folafolaga.

Ua Lē Taulau le Tele o Folafolaga

O se faaaʻoaʻoga, i se taua mataʻutia i le va o le 1990-1999 i atunuu o le Balkins, na faalauiloa ai e le Fono tau Puipuiga a Malo Aufaatasi o le a avea le taulaga o Srebrenica i Bosnia o “se nofoaga malupuipuia.” E foliga mai o se faamautinoaga lelei na faia e sui o malo aufaatasi. O le manatu foʻi lenā o le faitau afe o tagata sulufaʻi Musalimi i Srebrenica. Peitaʻi, mulimuli ane, na iloa ai o se mea noa lenā folafolaga faapea o se nofoaga saogalemu. (Salamo 146:3) Iā Iulai i le 1995, na ō mai ai fitafita osofaʻi ma latou tuliesea fitafita o Malo Aufaatasi ma latou pulea ai le aai. E sili atu i le 6,000 tagata Musalimi na leiloloa ma a itiiti ifo e 1,200 tagata Musalimi na fasiotia.

Ua aafia vala uma o le olaga ona o folafolaga lē taulau. Ua lē fiafia tagata ona o le “tele o faasalalauga pepelo” o loo vaaia pe faalogo i ai i aso nei. Ua latou lē malilie ona o “le tele o folafolaga a sui o vaega faaupufai ae lē o taulau.” (The New Encyclopædia Britannica, Tusi 15, itulau 37) O taʻitaʻi lotu maufaatuatuaina o ē na folafola atu o le a tausia lelei a latou lafu, ua latou faileagaina le ʻaulotu i se auala e sili ona matagā. E oo lava i matātā e pei o aʻoga ma le faafomaʻi, o ē e tatau ona pulea i le alofa ma le manatu mamafa mo isi, o nisi ua lē faamaoni e ala i le faaaogāina o tagata po o le fasiotia foʻi o ē e tatau ona latou tausia. E lētioa la lapataʻia i tatou e le Tusi Paia ina ia aua neʻi taliaina upu uma!—Faataoto 14:15.

 O Folafolaga e Faataunuuina

O le mea moni, e toʻatele tagata latou te faataunuuina a latou folafolaga, e ui i nisi taimi e faapogaia ai i o latou olaga tulaga faigatā. (Salamo 15:4) Latou te faamaoni i a latou upu ma latou tausisi i ai. O isi latou te faanaunau e tausia a latou folafolaga ona o ni faanaunauga lelei. Ua latou sauni ma tauivi e faataunuu a latou folafolaga ae e lē mafai ona latou faia. E mafai ona faalēaogāina fuafuaga e sili ona lelei ona o mea e tutupu faafuaseʻi.—Failauga 9:11.

Po o le ā lava le māfuaaga, ae o le mea moni ua iloa e le toʻatele e faigatā ona faatuatuaina folafolaga a so o se tasi. O lea la, ua lāgā ai se fesili e faapea: Pe iai ea ni folafolaga tatou te faatuatuaina? Ioe. E mafai ona tatou faatuatuaina folafolaga o loo i le Afioga a le Atua, le Tusi Paia. Aiseā e lē iloilo ai le mea o fai mai ai le isi mataupu o sosoo mai? Atonu o le a e faapea mai, e pei ona manatu i ai le isi faitau miliona e faapea, tatou te faatuatuaina moni lava folafolaga a le Atua.

[Faamatalaga i Ata i le itulau 3]

AP Ata/Amel Emric