“Se Faiva Alofilima Aupito Sili Ona Telē”

INA ua fausia le malumalu o Ieova i Ierusalema i le taimi o le pulega a le tupu o Solomona i le tusa ma le 3,000 tausaga ua mavae, na fausia ai foʻi ma se faatanoa ʻapamemea matagofie e tuu ai vai, ma faatū i fafo atu o le faitotoʻa o le malumalu. O le mamafa o lea faatanoa e sili atu i le 30 tone ma e mafai ona ofi ai le 11,000 kalone [40,000 lita] o vai. Sa taʻua lenei faatanoa telē, o le vai ʻapamemea. (1 Tupu 7:23-26) I le mekasini o le Biblical Archeologist, ua faapea mai ai Albert Zuidhof, o lē sa galue muamua i le Komiti Suʻesuʻe a le Atunuu o Kanata i mea tau i le poto faaonapō nei: “E mautinoa lava, o se faiva alofilima aupito sili ona telē lea sa faapea ona faia i le nuu o sā Eperū i aso ua mavae.”

Na faapefea ona fausia lenei faatanoa? Ua faapea mai le Tusi Paia: “Ua faia ia mea [ʻapamemea] e le tupu i le eleele laugatasi o Ioritana, i le eleele omea.” (1 Tupu 7:45, 46) Fai mai ia Zuidhof: “Atonu ua tutusa le faiga o le palu lea ma le paluga o se ‘gaʻo ua malō ae faamataa ese’ lea o loo faaaogāina pea i le gaosia o logo ʻapamemea tetele i aso nei.” Ua ia faamatala mai: “I le amataga lava o le fausiaina o le faatanoa, e muamua ona fai se faatanoa omea ma ina ua matuā mago lelei ona faafaō lea ma salani le tino i tua i le gaʻo. . . . Pe a uma ona faia faapea, ona gaosia loa lea e le ʻau fai ʻapamemea le isi paluga o omea i luga o le gaʻo lea ua malō ma tuu ai seʻia mago lelei. O le mea mulimuli lava e fai, o le faamataa ese lea o le gaʻo, ae sasaa le palu o le ʻapamemea lea ua faaliu suāvai i totonu o le avanoa lea sa iai le gaʻo.”

O le telē ma le mamafa o le faatanoa, sa manaʻomia ai ni tagata e sili ona tomai latou te fausia. Sa tatau ona malosi le fausaga i totonu ma tua o le faatanoa, ina ia mafai ona tatalia le mamafa o le paluga e tusa ma le 30 tone o le ʻapamemea lea ua tunu, ma sa tatau ona faia pea lenei gaoioiga a o matuā vevela ina ia taofia ai mai le taʻetaʻei ma vetevete o le faatanoa. O lenei gaoioiga, atonu sa manaʻomia ai se faasologa o ni taʻinafi sa faafesootaʻi faatasi a o sasaa atu le palu o le ʻapamemea ua faaliu suāvai i totonu o le fausaga omea. O se galuega matuā telē lava!

I lana tatalo i le faapaiaina o le malumalu, na tuuina atu ai e le tupu o Solomona iā Ieova le Atua le viiga ma le mamalu mo galuega uma na faia i le malumalu, i lona faapea atu: “Na e fetalai mai i lou fofoga, o lou aao foʻi ua e faataunuuina ai.”—1 Tupu 8:24.