E Tāua Mea Faaleagaga mo Lou Lava Lelei

E LĒ taumatea e tele se taimi e faaalu i le tausia o lou soifua mālōlōina faaletino. I aso taʻitasi, atonu e te faaalu ai le valu itula e te moe ai, faaalu ni nai itula e kuka ma taumafa ai, e valu itula pe sili atu foʻi e faigaluega ai ina ia mafai ona totogi ai se fale e nofo ai ma faatau ai meaʻai. Afai foʻi e te gasegase, atonu e te faaalu se taimi ma tupe e vaai ai se fomaʻi, pe e sauniuni ai se togafitiga faaleaganuu. E te faamamā lou fale, faamālū, ma atonu e faia foʻi ni au faamalositino, ma e te faia nei mea uma lava mo lou soifua mālōlōina lelei.

Ae peitaʻi, o le tausia o le soifua mālōlōina lelei, e aofia ai mea e sili atu na i lo o le tau ina tausia o ou manaʻoga faaletino. E iai se isi mea o loo faia se vaega sili ona tāua mo lou lava lelei. Ua faaalia i suʻesuʻega faafomaʻi le fesootaʻi lelei o lou soifua mālōlōina faaletino ma lou mālōlōina faaleagaga, e aafia lou soifua mālōlōina faaletino pe a leai se faaleagaga.

Se Fesootaʻiga Tuusaʻo

Ua faapea mai le polofesa o Hedley G. Peach o le Iunivesite o Melepone, i Ausetalia: “O le tele o suʻesuʻega na faia i lenei mataupu, ua iloa ai e faapea, e fesootaʻi lelei lava le faateleina o lou tulaga faaleagaga, ma le faaleleia o lou soifua mālōlōina faaletino.” I le faia o se faamatalaga e uiga i mea na maua i nei suʻesuʻega, ua taʻua ai i le Medical Journal of Australia (MJA) e faapea: “O le toʻaga i le lotu, ua mafai foʻi ona . . . faalalo ai le  toto maualuga, e faaitiitia ai le gaʻo i ala toto . . . ma faaitiitia ai foʻi le ono aafia i le kanesa o le taufale.”

Ua faapena foʻi ona faaalia i se suʻesuʻega na faia i le 2002 i tagata e 6,545 i le Iunivesite o Kalefonia i Berkeley i le Iunaite Setete, e faapea, “e uumi atu ona soifua tagata e ō i lotu i vaiaso taʻitasi na i lo o i latou e seāseā pe e lē ō foʻi i ni lotu.” Na faapea mai ia Doug Oman, o se tusitala na taʻimua i suʻesuʻega ma o se faiaʻoga o le Aʻoga mo le Soifua Mālōlōina o le Lautele i le Iunivesite o Kalefonia i Berkeley: “Na matou iloa o loo tumau pea lenei mea e ui lava ua uma ona iloiloina vala eseese e pei o faiā i le va fealoaʻi ma amioga tau le soifua mālōlōina, e aofia ai le ulaula ma le faia o faamalositino.”

I le faamaʻotiina mai o isi aogā mo i latou e iai se vaaiga faaleagaga i le olaga, ua faapea mai le MJA: “Ua iloa mai i suʻesuʻega a Ausetalia e faapea, o tagata e tōʻaaga i lotu ua sili atu ona lē manatu faapito, mautū faaipoipoga, faaitiitia le faaaogāsesēina o le ʻava malosi ma fualaau faasāina. E latou te teena le pule i le ola, e faaitiitia ai foʻi popolega ma mafatiaga o le mafaufau.” E lē gata i lea, ua lipotia mai e le British Medical Journal e faapea: “O tagata e malolosi o latou talitonuga faaleagaga, e foliga mai e vave lava ona mavae atoatoa atu o latou tulaga faavauvau pe a maliu sē e pele iā i latou na i lo o i latou e leai ni talitonuga faaleagaga.”

E tele lava manatu eseese po o le ā le uiga o le faaleagaga moni. Ae peitaʻi, e iai aafiaga o lou tulaga faaleagaga i lou soifua mālōlōina i le tino ma le mafaufau. Ua faaalia lenei mea moni i le fetalaiga a Iesu Keriso lea na faia i le toetoe lava 2,000 tausaga ua mavae e faapea: “Amuia i latou e manatu mamafa i o latou manaʻoga faaleagaga.” (Mataio 5:3, NW) Talu ai e aafia lou soifua ma lou fiafiaga i lou tulaga faaleagaga, ua talafeagai ai la ona e fesili: ‘O fea e mafai ona ou maua ai ni taʻiala maufaatuatuaina faaleagaga? O le ā e aofia ai i le avea ma tagata faaleagaga?’