Le Auala e Mafai Ona Faamalie ai Ou Manaʻoga Faaleagaga

UA FAAPEA mai le U.S.News & World Report: “I le sefulu tausaga ua mavae, na faatumulia ai faletusi i tusi e silia ma le 300 ia na tusia e faatatau i le vaega ua faia e le tulaga faaleagaga i le galuega a se tagata; e mai lava i le tusi Jesus CEO e oo i le tusi Tao of Leadership.” O lenei manatu, ua na ona faaatagia mai ai le mea moni e faapea, i le tele o atunuu tamaoaiga, ua faateleina ai le moomoo o tagata mo ni taʻiala faaleagaga i le olaga. I le faia o se faamatalaga i lenei mataupu, ua faailoa mai e le mekasini faapisinisi o le Training & Development e faapea: “I aso nei, ua matuā taaʻina ai lava e le poto maoaʻe faaonapōnei isi vala uma  o tatou olaga, ae i le taimi e tasi, o loo tatou saʻili ai foʻi mo se olaga e matuā uigā, e iai se fuafuaga, ma matuā faamalieina ai i tatou lava.”

O fea la e te maua ai ni taʻiala faamalieloto faaleagaga? I aso ua mavae, sa vaavaai atu ai tagata i lotu autū e fesoasoani iā i latou ina ia maua ni olaga “matuā uigā” ma “iai se fuafuaga.” I aso nei, e toʻatele ua fulitua i lotu autū. I se suʻesuʻega na faia i ni pule maualuluga se toʻa 90, na iloa ai e pei ona taʻua i le Training & Development e faapea, “e matuā telē lava le eseesega i le va o lotu ma le tulaga faaleagaga.” Sa manatu tagata na tali mai i le suʻesuʻega e faapea, o lotu, “e feitagaʻi ma faatupu fevaevaeaʻiga,” ae o le tulaga faaleagaga “e aofia ai tagata i le lalolagi aoao.”

O le toʻatele o tagata talavou i atunuu e lē tōʻaaga i lotu e pei o Ausetalia, Niu Sila, Peretania ma Europa, e faapena foʻi ona latou iloa le eseesega i le va o lotu ma le tulaga faaleagaga. Ua faamautinoa mai e le polofesa o Ruth Webber, i lana tusi o le Youth Studies Australia, e faapea: “O le toʻatele o tagata talavou e talitonu i le Atua, po o se malosi e sili atu, ae latou te lē o manatu i le lotu e tāua, pe e fesoasoani patino i o latou tulaga faaleagaga.”

O le Lotu Moni e Siitia ai le Tulaga Faaleagaga

Ua iloa lelei lava le lē mautonu o lotu. E tele faalapotopotoga faalotu o loo matuā aafia i faiga faapolotiki ma amioga pepelo, ma ua onanā i le toto o tagata e lē sala ona o taua e lē mafaitaulia a lotu. Ae peitaʻi, ona o le teena o faalapotopotoga faalotu ia ua pisipisia i le faafiaamiotonu ma le tau faasesē, ua faasesēina ai foʻi nisi i lo latou teena o le Tusi Paia lea ua latou manatu e lē o amanaʻiaina na faiga.

O le mea moni, e taʻusalaina e le Tusi Paia le faafiaamiotonu ma le solitulafono. Na fetalai atu Iesu i taʻitaʻi lotu i ona aso: “Oi talofa iā te outou tusiupu ma faresaio, tagata faafiaamiotonu! Auā e tutusa outou ma tuugamau ua faasinasinaina, o loo matagofie i fafo, a o totonu ua tutumu i ivi o tagata oti, ma mea leaga uma. E faapea foʻi outou, o fafo ua mataamiotonu i luma o tagata, a o totonu, ua tutumu outou i le pepelo ma le amiolētonu.”—Mataio 23:27, 28.

E lē gata i lea, ua faalaeiauina e le Tusi Paia ia Kerisiano ina ia solitū i mataupu faapolotiki uma. Na i lo o le uunaʻia o tagata talitonu ina ia fefasiotiaʻi, ua faasino mai e le Tusi Paia lo latou loto malilie e oti le tasi mo le isi. (Ioane 15:12, 13; 18:36; 1 Ioane 3:10-12) Na i lo o le “feitagaʻi ma faatupu fevaevaeaʻiga,” o le tapuaʻiga moni e faavae i le Tusi Paia, e “aofia ai tagata i le lalolagi aoao.” Na faapea mai le aposetolo o Peteru: “E lē faailogaina tagata e le Atua; a e peitaʻi o lē mataʻu iā te ia i nuu uma lava, ma fai le amiotonu, ua talia i latou e ia.”—Galuega 10:34, 35.

O le Tusi Paia —O se Taʻiala Maufaatuatuaina mo le Soifua Mālōlōina Faaleagaga

Ua taʻu mai e le Tusi Paia iā i tatou e faapea, ua faia tagata i le faatusa o le Atua. (Kenese 1:26, 27) E ui ina e lē o faauiga lenei faaupuga e faapea, o foliga faaletino ua foliga ai le tagata i le Atua, ae ua maua e le tagata le tomai e faaatagia atu ai uiga totino o le Atua. E aofia ai foʻi i lenei tulaga le tomai o le mafaufau e ave ai i fale mea faaleagaga.

Pe afai o le tulaga lenā, o se mea tatau ona talitonu o le a saunia foʻi e le Atua mo i tatou ia auala e faamalieina ai o tatou manaʻoga faaleagaga, faapea taʻiala tatau ina ia mafai ai ona tatou iloa le eseesega i le vā o mea e aogā mo lo tatou lelei faaleagaga, ma mea e afāina ai. Na foafoaina e le Atua o tatou tino i se auala sili i le tuuina i ai o sela e puipuia ai mai faamaʻi ma fesoasoani foʻi i le tausia o lo tatou soifua mālōlōina. Ua faapena foʻi ona ia faaauupegaina i tatou i le iai o se loto fuatiaifo, po o se musumusuga mai i totonu, lea e mafai ona fesoasoani iā i tatou i le faia o filifiliga saʻo ma ʻalofia ai le faia o amioga e lamatia ai lo tatou ola faaletino faapea ma le ola faaleagaga. (Roma 2:14, 15) Ua tatou iloa, e tatau ona fafaga lelei ia sela o le tino ia e puipuia i tatou mai faamaʻi, ina ia mafai ai ona galue lelei. Ina ia galue foʻi la o tatou loto fuatia ifo, e manaʻomia ona fafagaina faapena i taumafa lelei faaleagaga.

I le faailoaina mai o taumafa e mafai ona  fesoasoani ina ia tatou malolosi ai faaleagaga, na fetalai Iesu: “E lē na o mea e ʻai e ola ai le tagata, a o afioga uma e tulei mai i le fofoga o le Atua.” (Mataio 4:4) O loo faamauina afioga a Ieova i lana Afioga, le Tusi Paia, ma “e aogā foʻi ia e aʻoaʻo ai, e aʻoaʻi ai, e faatonu ai, e faapoto ai foʻi i le amiotonu.” (2 Timoteo 3:16) O lea la, o i tatou lava e faia taumafaiga e ave ai i fale na taumafa faaleagaga. O le tele o lo tatou malamalama i le Tusi Paia ma taumafaiga e faatatauina ona mataupu silisili i o tatou olaga, o le tele foʻi lenā o lo tatou mauaina o aogā e lē gata i le tulaga faaleagaga, ae faapea foʻi i o tatou tino.—Isaia 48:17, 18.

Pe Aogā na Taumafaiga?

O le mea moni, e manaʻomia se taimi tele ina ia faaleleia ai lo tatou mālōlōina faaleagaga e ala i le suʻesuʻeina o le Tusi Paia; ma e foliga mai, o le toʻatele o tagata e seāseā lava ona maua le taimi e faia ai faapea. Ae peitaʻi, e tele ni taui e maua i na taumafaiga! Seʻi faalogo atu a o faamatala mai e nisi tagata faigaluega e pisi, le pogai e tāua tele ai iā i latou le faaaluina o le taimi e tausia lelei ai o latou soifua faaleagaga.

O Marina o se foma’i, ua ia faapea mai: “Ou te leʻi manatu mamafa muamua lava e uiga i loʻu tulaga faaleagaga seʻi oo i le taimi na ou faigaluega ai i se falemaʻi ma amata ona ou matuā lagona le tigā o mafatiaga o isi. O lea, sa ou iloa ai, afai ou te fia mauaina le lotomalie ma le toʻafilemu, e tatau ona ou faailoa atu ma faamalieina oʻu manaʻoga faaleagaga auā, e mafai ona lofitūina se tasi o loo galue i lenei galuega i le saosaoa o le olaga ma le tele o mea e manaʻomia e tausia ai popolega o tagata.

“O lea ua matou suʻesuʻeina nei le Tusi Paia ma Molimau a Ieova. Ua fesoasoani lenei suʻesuʻega iā te aʻu e iloilo ai aʻu gaoioiga ma uunaʻiga o loʻu loto i se auala e faaleleia ma toleni ai loʻu mafaufau ina ia mafaufau i mea lelei, ma mafai ai ona tausia loʻu olaga i se auala paleni. Ua faamalieina aʻu i laʻu galuega totogi o loo fai nei. Ae ua faaleleia e laʻu suʻesuʻega o le Tusi Paia oʻu faalogona, ua fesoasoani e pulea ai oʻu faalogona lē lelei, faaitiitia ai le popolevale, ma sili atu ai ona onosai ma tigāalofa i tagata. Ua aogā foʻi i laʻu faaipoipoga le faatatauina o mataupu silisili o le Tusi Paia. Ae o le mea e sili ona tāua, ua oo ai ina ou iloa Ieova, ma ua tofo ai i se fua itiiti i le liligi mai pea o lona agaga, lea ua matuā uigā ai loʻu olaga.”

O Nicholas, o se tasi e tusia ata o fale, ua ia faapea mai: “Ae ou te leʻi suʻesuʻeina le Tusi Paia ma Molimau a Ieova, ou te leʻi fiafia lava i ni mea faaleagaga. O loʻu sini autū i le olaga, ia ou taulau i le galuega lea ua ou filifilia. Ae ua ou iloa mai laʻu suʻesuʻega o le Tusi Paia e faapea, e iai isi mea e sili atu i le olaga, ma o le faia o le finagalo o le Atua, e maua ai le fiafiaga moni e tumau.

“Ou te lagona lava le lotomalie i laʻu galuega totogi lea o loo fai nei, ae ua aʻoaʻoina aʻu e le Tusi Paia i le tāua o le faafaigofie o le olaga e ala i le taulaʻi atu i mea faaleagaga. O le faia faapea, ua ʻalofia ai e i maʻua ma laʻu avā le tele o omiga e oo mai ona o le ola i se olaga manaʻo tele i mea faitino. O lo ma auaufaatasi atu iā i latou e tutusa o matou sini faaleagaga i le olaga, ua ma maua ai foʻi le tele o uō moni.”

 O Vincent, o se loia, ua faapea mai o ia: “O se galuega lelei, e mafai ona maua ai se loto malie. Ae peitaʻi, ua ou iloa e tele atu mea e manaʻomia ina ia maua ai le fiafia ma le faamalieina. Ae ou te leʻi iloa le aʻoaʻoga a le Tusi Paia e uiga i le mataupu lea, na faateʻia lava aʻu ina ua ou iloa ane e leai se uiga o le olaga e na o le fanau mai, oo ina matua, faaipoipo, faia o se galuega ina ia maua ai mea faaletino e tausia ai se fanau, aʻoaʻoina o i latou ina ia mulimuli i lea lava faataamilosaga o le olaga, ma iʻu ina matua ma oti ai.

“Ae na faatoʻā ou maua lava ia tali faamalie loto i aʻu fesili e uiga i le fuafuaga o le olaga, ina ua ou suʻesuʻeina le Tusi Paia ma Molimau a Ieova. O laʻu suʻesuʻega faale-Tusi Paia na mafai ai ona ou iloa uiga o Ieova, ma oo ai ina ou alofa tele iā te ia. O le mea lenei na māfua ai ona ou tausia pea se vaaiga paleni faaleagaga a o ou taumafai ou te ola e ōgatusa ma mea ua ou iloa o lana fuafuaga. Ua faamalieina i maʻua uma ma laʻu avā i le iloa ua faaaogāina o ma olaga i se auala e sili ona uigā ma talafeagai.”

E mafai foʻi ona e lagona le iai o se fuafuaga ma se olaga uigā e ala i lou suʻesuʻeina o le Tusi Paia. E fiafia Molimau a Ieova e fesoasoani atu iā te oe. E mafai ona faamalieina oe lava e pei o Marina, Nicholas, ma Vincent, ona ua e aʻoaʻoina e uiga iā Ieova ma ana fuafuaga mo le fanau a tagata atoa ma oe. E lē gata o le a e maua le olioli ona ua faamalieina ou manaʻoga faaleagaga i le taimi nei, ae o le a e maua ai foʻi se faamoemoe o le olioli i le ola e lē uma i tulaga lelei atoatoa faaletino, o se faamoemoe ua avanoa mo na o i latou “e manatu mamafa i o latou manaʻoga faaleagaga.”—Mataio 5:3, NW.

O le isi auala e atiina aʻe ai lo tatou tulaga faaleagaga, o le tatalo. Sa faaalu e Iesu le taimi e aʻoaʻo ai ona soo i le auala e tatalo ai, i le aʻoaʻo atu lea iā i latou o le mea lea e masani ona taʻua o le Tatalo a le Alii. O le ā le uiga o lenā tatalo iā te oe i aso nei? O ā ni aogā mo oe? O le a e maua tali i isi mataupu e lua ia e sosoo mai.

[Ata i le itulau 6]

Marina

[Ata i le itulau 7]

Nicholas

[Ata i le itulau 7]

Vincent