Ua Saunia E Ieova Mea Tatou te Manaʻomia i le Aso

“Aua foʻi le feaveaʻiina [pe popole] o outou loto. Auā . . . ua silafia foʻi e lo outou Tamā o ia mea e aogā iā te outou.”—LUKA 12:29, 30.

1. E faapefea ona tausia e Ieova manu vaefā ma manufelelei?

PE SA e tagaʻi ea i se manulele laʻitiiti o togitogi solo i le palapala? Atonu na e taumānatu pe faamata e maua sana mea e ʻai e ala i le togitogi solo i le palapala. I lana lauga i le Mauga, na faaalia ai e Iesu e mafai ona tatou aʻoaʻoina se lesona mai le auala e tausia ai e Ieova manu felelei. Na fetalai o ia: “Ia outou vaavaai i manu felelei; latou te lē lūlū saito, pe selesele, pe faaputu i fale saito, a e fagaina i latou e lo outou Tamā o i le lagi. E lē sili ea lo outou lelei i lo latou?” (Mataio 6:26) Ua saunia e Ieova i ni auala ofoofogia, meaʻai mo ana meafaiola uma.—Salamo 104:14, 21; 147:9.

2, 3. O ā ni lesona faaleagaga tatou te maua mai le mea moni e faapea na aʻoaʻoina i tatou e Iesu e tatalo mo a tatou meaʻai e tatau ma le aso?

² Aiseā la na faaaofia ai e Iesu le talosaga lenei i lana tatalo faaaʻoaʻo: “Ia e foaʻi mai iā te i matou i le aso nei a matou mea e ʻai e tatau ma le aso”? (Mataio 6:11) E iai ni lesona tāua faaleagaga e mafai ona tatou aʻoaʻoina mai i lenei talosaga. Muamua lava, e faamanatu mai ai iā i tatou o Ieova o Le Puna Sili o mea uma tatou te manaʻomia. (Salamo 145:15, 16) E mafai e tagata ona totō ma atiaʻe mea, ae e na o le Atua lava e mafai ona faatupuina i le faaleagaga ma faaletino. (1 Korinito 3:7) O a tatou meaʻai ma meainu o ni meaalofa mai le Atua. (Galuega 14:17) O le talosaga atu iā te ia e foaʻi mai mea tatou te manaʻomia mo le aso, e faaali atu ai iā te ia tatou te talisapaia na sauniuniga. Ae o lenā talosaga, e lē faapea o le a tuusaunoa ai i tatou mai le tiute tauave e faigaluega ai pe afai e mafai ona tatou fai.—Efeso 4:28; 2 Tesalonia 3:10.

³ Lona lua, pe a tatou talosaga atu mo “mea e ʻai e tatau ma le aso,” e faaalia ai e lē tatau ona tatou popole naʻuā i le lumanaʻi. Na fetalai atili mai Iesu: “Aua neʻi outou popole, ma faapea ane. Ni ā mea tatou te aai ai, ni ā foʻi mea tatou te inu ai, ni ā foʻi mea tatou te oofu ai? Auā o mea uma ia ua saʻilia e nuu ese. Auā ua silafia e lo outou Tamā o i le lagi e aogā ia mea uma iā te outou. A ia outou muaʻi saʻili lona malo ma lana amiotonu; ona faaopoopoina atu lea o ia mea uma iā te outou. ‘O lenei, aua tou te popole i le aso a taeao; auā e popole le aso a taeao i ana lava mea.’” (Mataio 6:31-34) O le tatalo i “mea e ʻai e tatau ma le aso,” ua aumai ai se taʻiala mo i tatou ina ia ola i ni olaga faigofie i le “amio Atua ma le loto mālie.”—1 Timoteo 6:6-8.

Taumafa Faaleagaga i Aso Taʻitasi

4. O ā mea na tutupu iā Iesu ma tagata Isaraelu e iloa ai le tāua o le fafagaina i taumafa faaleagaga?

⁴ O a tatou tatalo mo meaʻai i aso taʻitasi, e ao ona tatou manatua ai o tatou manaʻoga mo taumafa faaleagaga i aso taʻitasi. E ui i lona fia taumafa ina ua uma le tele o aso o faalāina, ae na teena e Iesu le faaosoosoga a Satani ina ia liua maa e avea ma areto, e ala i lona faapea atu: “Ua tusia, E lē na o mea e ʻai e ola ai le tagata, a o afioga uma e tulei mai i le fofoga o le Atua.” (Mataio 4:4) Na taʻua i inei e Iesu upu a  le perofeta o Mose o lē na fai atu i tagata Isaraelu: “Na ia [Ieova] faatigāina foʻi oe, ma faalāina oe, ua na fafaga iā te oe i le manai, o le mea na e lē iloa, na lē iloa foʻi e ou tamā, ina ia na faailoa atu iā te oe e lē na o mea e ʻai e ola ai tagata, a o mea uma e tulei mai i le fofoga o Ieova e ola ai tagata.” (Teuteronome 8:3) O le auala na saunia ai e Ieova le manai, na maua ai e tagata Isaraelu a latou taumafa atoa foʻi ma ni lesona aogā. O se tasi o nei lesona, na tatau ona “latou faaputuina, o le aso ma ana mea e tusa ai.” Afai latou te faaputuina mea e sili atu mo le aso, na elosia ma tupu ai ilo i mea totoe. (Esoto 16:4, 20) Peitaʻi ane, e leʻi tupu lenā mea i le aso lona ono lea sa tatau ai ona taʻilua mea latou te faaputuina mo le aso, ina ia tausia ai o latou manaʻoga mo le Aso Sapati. (Esoto 16:5, 23, 24) E ala i le manai, na latou matuā manatua ai e faapea sa tatau ona latou usiusitai, ma e faalagolago o latou ola e lē gata i taumafa, ae i “mea uma e tulei mai i le fofoga o Ieova.”

5. E faapefea ona saunia e Ieova taumafa faaleagaga mo i tatou i aso taʻitasi?

⁵ E manaʻomia foʻi ona tatou aai i aso taʻitasi i taumafa faaleagaga ua saunia e Ieova e ala i lona Alo. Ua tofia e Iesu le “auauna faamaoni ma le mafaufau” e saunia “mea e ʻai i ona itu aso” mo ē faatuatua. (Mataio 24:45) E lē gata ua saunia e le vasega o le auauna faamaoni le anoanoaʻi o taumafa faaleagaga e ala mai i lomiga faale-Tusi Paia, ae ua ia faalaeiauina foʻi i tatou e faitau le Tusi Paia i aso faisoo. (Iosua 1:8; Salamo 1:1-3) E mafai foʻi ona tatou maua le malosi faaleagaga e pei o Iesu, pe a tatou filigā i aso taʻitasi e aʻoaʻoina ma faia le finagalo o Ieova.—Ioane 4:34.

Faamagaloga o Agasala

6. O ā mea tatou te ōle atu ina ia faamagaloina, ma e faavae i le ā e nofosauni ai Ieova e faamagalo?

⁶ O le talosaga e sosoo ai i le tatalo faaaʻoaʻo: “Ia e faamagalo iā te i matou i a matou agasala, E pei o i matou foʻi ona matou faamagaloina atu i ē ua agaleaga mai iā te i matou.” (Mataio 6:12, Luka 11:4) Tatou te agasala uma. Ae ua nofosauni Ieova e “sōloiesea” a tatou agasala pe a tatou salamō moni ma “liliu,” ma ōle atu mo lana faamagaloga e faavae i le faatuatua i le taulaga togiola a Keriso.—Galuega 3:19; 10:43; 1 Timoteo 2:5, 6.

7. Aiseā e ao ai ona tatou tatalo mo le faamagaloga o agasala i aso taʻitasi?

⁷ I se isi itu, tatou te agasala pe a tatou lē ausiaina tapulaa amiotonu a Ieova. Ona o le agasala tuufaasolo mai, tatou te sesē uma i upu, amio ma mafaufauga, pe lē taulau foʻi ona tatou faia le mea e ao ona tatou faia. (Failauga 7:20; Roma 3:23; Iakopo 3:2; 4:17) O lea la, pe tatou te iloa pe lē iloa foʻi a tatou agasala na faia i le aso, ae a faia a tatou tatalo i aso taʻitasi, e manaʻomia ona talosaga atu mo le faamagaloga o a tatou agasala.—Salamo 19:12; 40:12.

8. O ā mea e ao ona tatou faia ona o tatalo mo le faamagaloga, ma o ā iʻuga lelei e maua mai ai?

⁸ A o leʻi tatalo mo le faamagaloga o agasala, e ao ona iloilo totoʻa muamua i tatou lava, ia salamō ma taʻu atu a tatou agasala e faavae aʻe i le faatuatua i le mana laveaʻi o le toto o Keriso. (1 Ioane 1:7-9) Ina ia faamaonia le moni o a tatou tatalo, e tatau ona lagolagoina a tatou talosaga “i amio e tatau ma le salamō.” (Galuega 26:20) Ona mafai lea ona tatou talitonu o loo nofosauni Ieova e faamagalo a tatou agasala. (Salamo 86:5; 103:8-14) O le iʻuga, o le a matuā toʻafilemu o tatou mafaufau, auā o “le manuia foʻi mai le Atua, o loo silisili lava i mea uma e manatu i ai, e leoleoina ai o [tatou] loto atoa ma o [tatou] mafaufau iā Keriso Iesu.” (Filipi 4:7) Ae o le tatalo faaaʻoaʻo a Iesu, e tatou te aʻoaʻoina ai isi mea e tatau ona tatou faia ina ia faamagalo ai a tatou agasala.

Ina ia Maua le Faamagaloga, e Tatau Ona Tatou Faamagalo Atu

9, 10. (a) O ā faaupuga faaopoopo na fetalai i ai Iesu i le tatalo faaaʻoaʻo, ma o le ā o loo faamatilatila mai ai? (e) Na faapefea ona faataʻitaʻia atili e Iesu le manaʻoga ina ia tatou lotofaamagalo?

⁹ O se mea e mataʻina ai, o le talosaga “ia e  faamagalo iā te i matou i a matou agasala, E pei o i matou foʻi ona matou faamagaloina atu i ē ua agaleaga mai iā te i matou,” e pau lenā o le talosaga na saunia ai e Iesu ni faaupuga faaopoopo. Ina ua māeʻa le tatalo, na ia fetalai mai: “Auā afai tou te faamagaloina atu tagata i a latou agasala, e faamagaloina foʻi outou e lo outou Tamā o i le lagi. A e afai tou te lē faamagaloina atu tagata i a latou agasala, e lē faamagaloina foʻi e lo outou Tamā a outou agasala.” (Mataio 6:14, 15) O lea la, na manino fetalaiga a Iesu, e faalagolago le faamagaloina o i tatou e Ieova, i lo tatou nofosauni e faamagalo atu i isi.—Mareko 11:25.

¹⁰ I se tasi aso, na fetalai ai Iesu i se talafaatusa e faaalia ai, e tatau ona tatou lotofaamagalo pe afai tatou te mananaʻo e faamagalo i tatou e Ieova. Na fetalai o ia e faatatau i se tupu lotoalofa o lē na faamagaloina se aitalafu tele a se tasi o ana auauna. Na matuā faasalaina mulimuli ane e le tupu, lenei auauna ina ua musu e faamagalo se aitalafu faatauvaa a se isi auauna. Na faaiʻu e Iesu lana talafaatusa i le fetalai mai: “E faapea foʻi ona faia iā te outou e loʻu Tamā o i le lagi, pe afai tou te lē taʻitasi ma faamagalo ma o outou loto atoa i o outou uso.” (Mataio 18:23-35) E manino lava le lesona: E sili atu ona tele a tatou agasala ua faamagaloina e Ieova, na i lo agasala ua faia mai e isi iā i tatou. E lē gata i lea, e faamagaloina e Ieova i tatou i aso taʻitasi. E mautinoa la, e mafai foʻi ona tatou faamagaloina ni masei ua faia e isi mai lea taimi i lea taimi iā i tatou.

11. O le ā le fautuaga na aumaia e le aposetolo o Paulo tatou te mulimuli ai pe a tatou mananaʻo e faamagalo i tatou e Ieova, ma o ā ona iʻuga lelei?

¹¹ Na tusi le aposetolo o Paulo: “Ia outou feagaleleiaʻi, ia femutimutivaleaʻi lo outou alofa, ia fefaamagaloaʻi outou, faapei ona faamagaloina outou e le Atua iā Keriso.” (Efeso 4:32) O le fefaamagaloaʻi e filemu ai faiā a Kerisiano. Na augani atili mai Paulo: “O lenei, ia oofu outou i le alofa mutimuti vale, ma le agalelei, ma le loto maulalo, ma le agamalu, ma le onosai, faapei o ē ua filifilia e le Atua, o ē ua paia ma ua alofaina; ia fefaapalepaleaʻi, ma ia fefaamagaloaʻi outou, pe afai ua agaleagaina  se tasi e se tasi; faapei ona faamagalo mai le Alii iā te outou, ia faapea foʻi outou. A o le alofa, e lautua lea i nei mea uma, o le fusi lea e atoatoa ona lelei ai.” (Kolose 3:12-14) O manatu uma na, o loo aofia i le tatalo na aʻoaʻo ai i tatou e Iesu: “Ia e faamagalo iā te i matou i a matou agasala, E pei o i matou foʻi ona matou faamagaloina atu i ē ua agaleaga mai iā te i matou.”

Puipuiga pe a Faaosoosoina

12, 13. (a) O le ā e lē o uiga atu i ai le talosaga na sosoo ai i le tatalo faaaʻoaʻo? (e) O ai Lē Faaosooso sili, ma o le ā le uiga o la tatou tatalo e aua le taʻitaʻiina i tatou i faaosoosoga?

¹² O le talosaga lenei na sosoo ai i le tatalo faaaʻoaʻo a Iesu: “Aua foʻi e te taʻitaʻiina i matou i le faaosoosoga.” (Mataio 6:13) Po o le uiga ea o le fetalaiga a Iesu, e ao ona tatou talosaga atu iā Ieova e aua neʻi faaosoosoina i tatou? E leai, auā na faagaeeina le soo o Iakopo e le agaga paia e tusi e faapea: “A faaosoosoina se tasi, aua le faapea, ‘Ua faaosoosoina aʻu mai le Atua,’ auā e lē mafai ona faaosoosoina o le Atua i mea leaga, e lē faaosooso atu foʻi o ia i se tasi.” (Iakopo 1:13) E lē gata i lea, na tusi le faisalamo: “Ioa e, afai e te mātaulia le amio leaga, le Alii e, o ai sē na te mafaia ona tulaʻi?” (Salamo 130:3) E lē o faamamafaina e Ieova mea sesē uma tatou te faia, ma e mautinoa lava e na te lē faaosoosoina i tatou e faia se mea sesē. O lea la, o le ā le uiga o le vaega lenei o le tatalo faaaʻoaʻo?

¹³ O lē o loo taumafai e faaosooso i tatou e fai le mea sesē, o Satani le Tiapolo, ma e taumafai e faavaivai i tatou e ala i ana togafiti ma e manaʻo foʻi e ʻaina i tatou. (Efeso 6:11) O ia o Lē Faaosooso sili. (1 Tesalonia 3:5) O lo tatou tatalo atu ina ia aua le taʻitaʻiina i tatou i faaosoosoga, o lona uiga o loo tatou talosaga atu iā Ieova e aua neʻi o tatou paʻūʻū pe a faaosoosoina i tatou. O loo tatou talosaga atu iā te ia e fesoasoani mai iā i tatou e aua neʻi “ʻoleʻolegia i tatou e Satani,” ma aua foʻi neʻi o tatou lolo atu i faaosoosoga. (2 Korinito 2:11) Tatou te tatalo ina ia tatou tumau i le “mea lilo o i ai lē Silisili ese,” ma maua ai le puipuiga faaleagaga lea e tuuina atu i ē e amanaʻiaina le pule silisili ese a Ieova i mea uma latou te faia.—Salamo 91:1-3.

14. E faapefea ona faamautinoa mai e le aposetolo o Paulo e lē tuulafoaʻia i tatou e Ieova pe a tatou liliu atu iā te ia i taimi o faaosoosoga?

¹⁴ Pe afai o lo tatou naunautaʻiga moni lenā, lea o loo faailoa atu i a tatou tatalo ma gaoioiga, e mafai ona tatou mautinoa e lē tuulafoaʻia i tatou e Ieova. Na faamautinoa mai e le aposetolo o Paulo: “Ua lē maua outou e se faaosoosoga e ese i lo tagata; a ua faamaoni le Atua, o lē na te lē tuuina atu outou i le faaosoosoga e sili i se mea ua outou lavātia, a e sauni foʻi faatasi ma le faaosoosoga se mea e sao ai, ina ia outou lavā oono.”—1 Korinito 10:13.

“Ia E Laveaʻi iā i Matou ai Lē Leaga”

15. Aiseā ua sili ai ona tāua i le taimi lenei ona tatalo ina ia laveaʻi i tatou mai lē e leaga?

¹⁵ E tusa ai ma manusikulipi e sili ona maufaatuatuaina o Tusi Paia Eleni faa-Kerisiano, na faaiʻuina le tatalo faaaʻoaʻo a Iesu i upu nei: “Ia e laveaʻi iā i matou ai lē leaga.” * (Mataio 6:13) O le taimi sili lenei e manaʻomia ai le puipuiga faasaga i le Tiapolo i nei aso o le iʻuga. O loo tauina e Satani ma ana temoni le taua faasaga i le vaega totoe faauuina, “o ē ua tausi i poloaʻiga a le Atua, ma ua taofi le mau [pe molimau] iā Iesu,” ma a latou aumea o “le motu o tagata e toʻatele.” (Faaaliga 7:9; 12:9, 17) Na timaʻi mai le aposetolo o Peteru i Kerisiano: “Ia outou faautauta, ia outou mataala, ona o lē ua fai outou mona fili, o le tiapolo lea, o loo fealualuaʻi o ia e pei o se leona tagi, ua saʻili se tasi e ʻaina e ia; ia outou tetee atu iā te ia, o mausalī outou i le faatuatua.” (1 Peteru 5:8, 9) E manaʻo Satani e taofia la  tatou galuega talaʻi, ma na te taumafai e faafefe i tatou e ala i ona sui o i le lalolagi—e tusa lava po o tagata lotu, le ʻaufaipisinisi po o le ʻaufaipolotiki. Ae o le a laveaʻi i tatou e Ieova pe a tatou tutū mausalī. Na tusi le soo o Iakopo: “O le mea lea ia outou gauaʻi ai i le Atua; ia outou tetee atu i le tiapolo, ona sola ese ai lea o ia iā te outou.”—Iakopo 4:7.

16. O ā auala ua saunia e Ieova e fesoasoani ai i ana auauna i taimi o tofotofoga?

¹⁶ Na faatagaina e Ieova lona Alo ina ia faaosoosoina. Ae ina ua uma ona teena e Iesu le Tiapolo ma faaaogā le Afioga a le Atua e puipuia ai o ia, na auina mai e Ieova ana agelu e faamalosiau iā te ia. (Mataio 4:1-11) E faapena foʻi ona faaaogā e Ieova ana agelu e fesoasoani iā i tatou, pe a tatou tatalo ma le faatuatua ma fai o ia ma o tatou malu. (Salamo 34:7; 91:9-11) Na tusi le aposetolo o Peteru: “Ua silafia e le Alii se mea e laveaʻi mai ai i ē amio Atua ai le tofotofoga, a e taofi i ē amio leaga e oo i le aso faamasino ina ia faasalaina i latou.”—2 Peteru 2:9.

Ua Lata Mai le Laveaʻiga Atoatoa

17. E ala i le saunia o le tatalo faaaʻoaʻo, sa faapefea ona faatulaga mai e Iesu mea e tusa ma lo latou tāua?

¹⁷ I le tatalo faaaʻoaʻo, sa faatulaga ai e Iesu mea e tusa ma lo latou tāua. O lo tatou naunautaʻiga sili, o le faapaiaina lea o le suafa mamalu o Ieova. Talu ai o le a faaaogā e Ieova le Malo Faa-Mesia ina ia faapaia ai lona suafa, tatou te tatalo la ina ia oo mai le Malo e faaumatia malo po o pulega a tagata lē lelei atoatoa, ma ia faamautinoa ua faia atoatoa le finagalo o le Atua i le lalolagi e pei ona faia i le lagi. O lo tatou faamoemoe mo le ola e faavavau i le lalolagi parataiso, e faalagolago lea i le faapaiaina o le suafa o Ieova ma ia amanaʻia lana pule silisili ese amiotonu i le lagi ma le lalolagi. Pe a uma ona tatalo mo nei mea e sili ona tāua, ona mafai lea ona tatou tatalo mo o tatou manaʻoga i aso faisoo, le faamagaloga o a tatou agasala, le laveaʻiga mai faaosoosoga ma togafiti a lē e leaga, o Satani le Tiapolo.

18, 19. E faapefea ona fesoasoani le tatalo faaaʻoaʻo a Iesu ina ia faaauau ai ona tatou tinoū ma ‘taofi mau i le faatuatua e oo i le gataaga’?

¹⁸ Ua lata tele mai le laveaʻiina atoatoa o i tatou mai lē o loo leaga, atoa foʻi ma lana faiga o mea faapiʻopiʻo. Ua iloa lelei e Satani “ua saasaa ona pō” e faasasao mai ai lona “lotoa tele” i le lalolagi, aemaise lava i auauna faamaoni a Ieova. (Faaaliga 12:12, 17) I le faailoga o le “gataaga o le lalolagi,” na valoia ai e Iesu mea mataʻina o le a tutupu, ma o nisi o na mea e leʻi faataunuuina. (Mataio 24:3, 29-31) Pe a tatou vaaia le faataunuuga o na mea, e atili ai ona malosi lo tatou faamoemoe mo le laveaʻiina. Na fetalai Iesu: “A afua ona faia o ia mea, ia tepa aʻe outou, ma ia ea i luga o outou ulu; auā e latalata ina faaolaina outou.”—Luka 21:25-28.

¹⁹ O le tatalo puupuu na faaaʻoaʻo atu e Iesu i ona soo, ua saunia ai ni taʻiala lelei mo i tatou i mea e faaaofia i a tatou tatalo a o taulata mai le iʻuga. Tau ina ia o tatou mautinoa pea e oo i le iʻuga, o le a faaauau ona saunia e Ieova o tatou manaʻoga i aso taʻitasi i le itu faaleagaga ma le itu faaletino. O lo tatou tinoū i le tatalo, o le a mafai ai ona tatou “taofi mau lava i lo tatou muaʻi faatuatua e oo i le gataaga.”—Eperu 3:14; 1 Peteru 4:7.

[Faamatalaga pito i lalo]

O se Autaluga

• O le ā le uiga o lo tatou talosaga mo “mea e ʻai e tatau ma le aso”?

• Ia faamatala le talosaga “ia e faamagalo iā te i matou i a matou agasala, E pei o i matou foʻi ona matou faamagaloina atu i ē ua agaleaga mai iā te i matou.”

• O le ā le uiga o lo tatou ōle atu iā Ieova e aua le taʻitaʻiina i tatou i faaosoosoga?

• Aiseā e tatau ai ona tatou tatalo e ‘laveaʻi i tatou ai lē e leaga’?

[Fesili mo le Suʻesuʻega]

[Ata i le itulau 13]

Manulele laʻitiiti e taʻua o le lydekker

[Ata i le itulau 15]

Ina ia faamagaloina i tatou, e tatau ona tatou faamagalo atu i isi