Ua Suia “le Tū o le Lalolagi Nei”

“A o laʻu lenei e fai atu ai, le ʻau uso e, ua itiiti ona aso ua totoe.”—1 KORINITO 7:29.

1, 2. O ā suiga ua e tagaʻi i ai i lou soifuaga?

O Ā SUIGA ua e tagaʻi i ai i lou soifuaga? Pe e mafai ona e toe faamatalaina nisi o na suiga? O se faaaʻoaʻoga, o mea lelei ua faataunuuina i le togafitiga o gasegase. Ona o na suʻesuʻega, ua faatupulaʻia ai tausaga e faatalitalia e soifua ai i nisi o atunuu, mai le itiiti ifo i le 50 tausaga i le amataga o le senituri lona 20 e oo i le sili atu i le 70 tausaga i aso nei! Seʻi tōmanatu foʻi i aogā ua tatou maua ona o le faaaogāina lelei o leitiō, TV, telefoni feaveaʻi ma masini fax. E tāua foʻi mea ua faataunuuina i matātā tau aʻoaʻoga, o femalagaaʻiga ma aiā tatau a tagata ia ua faaleleia ai soifuaga o le faitau miliona o tagata.

² Ae o le mea moni, e iai suiga e lē lelei. E lē mafai ona faagaloina āuga leaga o le faatupulaʻia o le solitulafono, le paʻū maulalo o amioga, le taatele o le faaaogāina o fualaau faasāina, le faatupulaʻia o tatalaga faaipoipoga ma le taugatā o le tau o le soifuaga, ma le faamataʻu mai pea o faiga faatupu faalavelave. Ona o tulaga faapena, e lē taumatea e te ioe i upu ua loa tausaga talu ona tusia e le aposetolo o Paulo: “O le a mavae atu [pe suia] le tū o le lalolagi nei.”—1 Korinito 7:31.

3. O le ā le uiga o upu a Paulo ina ua tusi e faapea “o le a mavae atu [pe suia] le tū o le lalolagi nei”?

³ A o faia le faamatalaga lenā a Paulo, na ia faatusaina ai le lalolagi i se tala o loo faatino i luga o se pulelaa. O ē e faia la latou vaega i le tala—o tagata taʻutaʻua i faiga faapolotiki, i lotu po o le aganuu—latou te ō atu e faatino a latou vaega i le tala ona tuua lea o le pulelaa mo isi tagata. Ua autausagā o faaauau lenā tulaga. I aso ua tuanaʻi, atonu e tele tausaga pe e  faitau senituri foʻi, o iai se soloaʻiga tupu ma e umi se taimi ona faatoʻā iai lea o ni suiga. Ae e lē faapena aso nei auā e mafai ona suia faafuaseʻi le tulaga o mea pe a tagatavaleina se taʻitaʻi o le malo! Ioe, tatou te lē iloa le mea e tupu a taeao i nei aso lē mautonu.

4. (a) O le ā le vaaiga saʻo e tatau ona iai i Kerisiano e faatatau i mea o tutupu i le lalolagi? (e) O ā faamaoniga e lua o le a tatou talanoaina?

⁴ Afai o le pulelaa o le lalolagi ma o ona taʻitaʻi o ē e auai i le tala, o lona uiga la o Kerisiano o ē maimoa. * Talu ai “e lē ni o le lalolagi i latou,” latou te lē soona pupū atu i le faatinoga o le tala po o tagata o faatinoina le tala. (Ioane 17:16) Na i lo lea, latou te tulimataʻia faailoga e iloa ai ua oo le tala i lona ooooga—o se mutaaga mataʻutia—auā latou te iloa o le a faaumatia muamua lenei faiga o mea a o leʻi aumaia e Ieova le lalolagi fou amiotonu lea ua leva ona faatalitali i ai. * O lea la, seʻi o tatou iloiloina faamaoniga e lua e faaalia ai o loo tatou ola i aso e gata ai ma ua lata mai le lalolagi fou. O faamaoniga nei (1) taimi o mea na tutupu i le Tusi Paia ma (2) ua faasolo ina leaga le tulaga o le lalolagi.—Mataio 24:21; 2 Peteru 3:13.

Ua Iloa le Mea na Natia!

5. O ā “taimi o nuu ese,” ma aiseā tatou te naunau i ai?

⁵ Ona o suʻesuʻega na faia, ua mafai ai ona iloa le fesootaʻiga o le taimi ma mea na tutupu. Na fetalai Iesu e faatatau i le taimi o le a pule ai taʻitaʻi o le lalolagi e aunoa ma le faalaa ane o le Malo o le Atua. Na taʻua e Iesu le taimi lenā o “tausaga [“taimi,” NW] o nuu ese.” (Luka 21:24) I le faaiʻuga o na “taimi,” o le a pule ai le Malo faalelagi o le Atua ma fai ai Iesu ma Tupu. E muamua ona pule Iesu “i totonu o ē ita iā te [ia].” (Salamo 110:2) E tusa ai ma le Tanielu 2:44, o le a “tuʻimomomoina ma faaumatia” mulimuli ane e le Malo ia malo uma a tagata, a o ia e tumau e faavavau.

6. O anafea na amata ai “taimi o nuu ese,” o le ā lona umi, ma o anafea na muta ai?

⁶ O afea e muta ai “taimi o nuu ese” ma amata ai ona pule le Malo o le Atua? O le tali lea na ‘faamaufaailogaina seʻia oo i ona pō o le iʻuga,’ e aofia ai taimi o mea na tutupu i le Tusi Paia. (Tanielu 12:9) Ina ua lata i na “ona pō,” na faailoa atu ai e Ieova le tali i se vaega o tagata aʻoga o le Tusi Paia o ē lotomaulalo. Ona o le fesoasoani o le agaga o le Atua, na latou mātaulia ai faapea na amata “taimi o nuu ese” i le faaumatiaga o Ierusalema i le 607 T.L.M. ma e 2,520 tausaga le umi o ia “taimi.” Ona o lea, na latou faitauina ai e faapea o le 1914 o le tausaga lenā na faailoga ai le mutaaga o “taimi o nuu ese.” Na latou iloa ai foʻi, o le 1914 o le amataga lenā o le faaiʻuga o lenei faiga o mea. Ona o oe o se tagata aʻoga o le Tusi Paia, pe e mafai ea ona e faaaogāina le Tusi Paia e faamatala ai le auala e taunuu ai i le 1914? *

7. O ā mau e fesoasoani iā i tatou e iloa ai le amataga, le umi ma le mutaaga o taimi e fitu o loo taʻua i le tusi o Tanielu?

⁷ O se tasi o vala e iloa ai, o loo taʻua i le tusi o Tanielu. Talu ai na faaaogāina e Ieova le tupu o Nepukanesa o Papelonia e faaumatia Ierusalema i le amataga o “taimi o nuu ese” i le 607 T.L.M., na faailoa atu ai e Ieova e ala iā Nepukanesa e faapea, o le a faaauau ona pule nuu ese e aunoa ma le faalaa ane o le Atua mo taimi faafaatusa e fitu. (Esekielu 21:26, 27; Tanielu 4:16, 23-25, NW) O le ā le umi o na taimi e fitu? E tusa ai o le Faaaliga 11:2, 3, ma le 12:6, 14, e 1,260 aso le umi o taimi e tolu ma le ʻafa. O lea la, e faaluaina aso na ona maua ai lea o taimi e fitu, o lona uiga, e 2,520 aso. Pe na gata ai i inā? E leai auā na tuuina atu e Ieova i le perofeta o Esekielu o lē na soifua foʻi  i aso o Tanielu, le taʻiala ina ia iloa ai le faailoga: “Ua ou faatatauina atu iā te oe o le aso ma le tausaga o le aso ma le tausaga.” (Esekielu 4:6) O lea la, o le umi o taimi e fitu e 2,520 tausaga. Pe a faaaogā le 607 T.L.M. e amata ai ma e 2,520 tausaga lona umi, e mafai la ona faapea atu, na muta taimi o nuu ese i le 1914.

Faamautinoaga o “Ona Pō o le Iʻuga”

8. O ā ni faamaoniga e mafai ona e taʻua e iloa ai le faasolo ina leaga o le tulaga o le lalolagi talu mai le 1914?

⁸ O mea na tutupu i le lalolagi talu mai le 1914, ua faamautinoa ai le moni o le malamalamaaga e pei ona taʻua i luga, lea e faavae aʻe i taimi o mea na tutupu i le Tusi Paia. Na fetalai Iesu o le “gataaga o le lalolagi” po o le faaiʻuga o le faiga o mea, o le a faailogaina i taua, oge ma faamaʻi. (Mataio 24:3-8; Faaaliga 6:2-8) O mea tonu lava na, na tutupu talu mai le 1914. Na faaopoopo mai foʻi Paulo e faapea o le a iai se eseesega tele i uiga o tagata i a latou va fealoaʻi ma isi. Na saʻo aʻiaʻi lana faamatalaga e faatatau i suiga o le a iai, ia tatou te vāaitino i ai.—2 Timoteo 3:1-5.

9. O ā faamatalaga a tagata e tusa ai ma mea na tutupu i le lalolagi talu mai le 1914?

⁹ Po ua matuā suia ea “le tū o le lalolagi nei” talu mai le 1914? I se tasi tusi, na taʻua ai e le polofesa o Robert Wohl e faapea: “O i latou na soifua a o faia le taua, na faaauau ona latou talitonu e faapea, na muta le lalolagi ae toe amata ai se isi lalolagi iā Aokuso i le 1914.” (The Generation of 1914) Na faamautinoa e le alii fomaʻi o Jorge A. Costa e Silva, le faatonusili o le tulaga lelei o le mafaufau a le Faalapotopotoga o le Soifua Mālōlōina i le Lalolagi e faapea: “Ua tatou ola nei i aso ua matuā televave ai suiga, lea ua faapogaia ai popolega ma mafatiaga e leʻi iai muamua i le talafaasolopito o tagata.” Pe na e oo i se tulaga faapena?

10. Ua faapefea ona faamalamalama mai e le Tusi Paia le pogai o tulaga malapagā o le lalolagi talu mai le 1914?

¹⁰ O ai lē o leaga ua faapogaia le tulaga malapagā o le lalolagi? Ua faailoa mai e le Faaaliga 12:7-9 (LF) lē o leaga e faapea: “Ua tau foʻi le taua i le lagi; o Mikaele [Iesu Keriso] ma ana agelu ua latou tau ma le tarako [Satani le Tiapolo], ua ʻau foʻi le tarako ma ana agelu e tau ai le taua, a ua latou lē manumalo, e lē toe maua foʻi i le lagi se mea latou te nonofo ai. Ua lafo foʻi le tarako tele, . . . o lē faasesē i le lalolagi uma.” Ioe, o lē o loo faapogaia nei mea leaga o Satani le Tiapolo ma o le tulieseina o ia mai le lagi i le 1914, ua taunuu ai upu nei: “Oi talofa iā te oulua le fanua ma le sami, auā ua alu ifo iā te oulua le tiapolo ua lotoa tele, auā ua na iloa ua saasaa ona pō.”—Faaaliga 12:10, 12.

Le Vaaiga Faaiʻu o le Tala

11. (a) O ā auala ua faaaogā e Satani e faasesē ai “le lalolagi uma”? (e) O le ā le taumafaiga faapitoa a Satani na taʻua patino e le aposetolo o Paulo?

¹¹ Ona ua iloa ua saasaa ona pō, ua matuā faateteleina ai e Satani ana taumafaiga talu mai le 1914, ina ia “faasesē i le lalolagi uma.”  Talu ai o ia o le taufaasesē sili, ua galue ai Satani i vaaiga o le tala, e tuu i luga o le pulelaa tagata autū o le tala, o taʻitaʻi o le lalolagi ma ē taulamua. (2 Timoteo 3:13; 1 Ioane 5:19) O se tasi o sini a Satani, o le taufaasesē lea o tagata ina ia manatu faapea, o lana auala e pule ai e maua ai le filemu moni. Pe a fua i ai, o loo taulau manuia taumafaiga a Satani auā o loo faaauau ona manatu tagata e faapea, o loo iai le faamoemoe e faaleleia ai mea e ui ua anoanoaʻi faamaoniga e iloa ai, o loo faasolo ina leaga le tulaga o mea. Na valoia e le aposetolo o Paulo, a o toeitiiti lava faaumatia lenei faiga o mea, o le a iai se vaaiga iloga o taumafaiga a Satani. Na ia tusi e faapea: “Auā pe a latou fai ane, ‘O loo filemu, ua lē afāina,’ ona oo lea iā te i latou o le fano faafuaseʻi, faapei o le faatigā o le fafine tō a fanau mai.”—1 Tesalonia 5:3; Faaaliga 16:13.

12. O ā ni taumafaiga faifai pea mo le mauaina o le filemu i o tatou aso?

¹² I tausaga talu ai nei, e masani ona faaaogā e le ʻaufaipolotiki le faaupuga “o loo filemu, ua lē afāina” e faamatala ai taumafaiga a tagata. Na latou taʻua foʻi le 1986 faapea o le Tausaga o le Filemu i le Lalolagi Aoao, e ui lava e leʻi iai se filemu i le lalolagi aoao i lenā tausaga. Po ua faataunuu atoatoa e gaoioiga na, a taʻitaʻi o le lalolagi le faamatalaga i le 1 Tesalonia 5:3, pe na faasino atu Paulo i se isi mea patino matuā mataʻina o le a iloa e le lalolagi aoao?

13. Ina ua valoia e Paulo le alaga o le “Filemu, ua lē afāina,” o le ā na ia faatusaina i ai le faaumatiaga e mulimuli mai ai, ma o le ā tatou te aʻoaʻoina mai ai?

¹³ E tatau ona tatou faatalitali, talu ai e faatoʻā malamalama lelei i valoaga o le Tusi Paia pe a uma ona faataunuuina, pe ua amata foʻi ona faataunuu. O se mea e mataʻina ai, na faatusaina e Paulo le faaumatiaga faafuaseʻi lea e mulimuli mai i le alaga o le “Filemu, ua lē afāina,” e pei o le faatigā o se fafine tō a fanau. I se vaitaimi pe tusa ma le iva masina, e faasolosolo ina iloa e se tinā o loo maʻitaga, le pepe lea o loo tuputupu aʻe i totonu iā te ia. Atonu na te lagonaina le tātā o le fatu o lana pepe pe lagonaina foʻi ana gaoioiga i totonu o lona manava. E ono aa foʻi ia e le pepe. E masani ona faasolo ina malosi gaoioiga a le pepe ma e iai se aso mulimuli ane, o le a lagona ai e le tinā se tigā tele e faailoa ai ua oo i le taimi e fanau mai ai le pepe, o se taimi ua faatalitalia ma le fiafia. Po o le ā lava le auala e faataunuu ai le valoaga o le alaga o le “filemu, ua lē afāina,” ae o le a oo i se tulaga tigā e tupu faafuaseʻi ae e fiafia lona taunuuga—o le faaumatiaga o le amioleaga ma le amataga o le lalolagi fou.

14. O le ā le faagasologa o mea o le a tutupu i le lumanaʻi, ma o le ā lona taunuuga?

¹⁴ O le faaumatiaga o loo faaloloʻi mai, o se tulaga mataʻina e sili ona mataʻutia mo Kerisiano faamaoni o loo maimoa ane. Muamua lava, o le a liliu ane tupu o le lalolagi (vaega faapolotiki o le faalapotopotoga a Satani) e faaumatia Papelonia le Aai Tele (le vaega faalelotu). (Faaaliga 17:1, 15-18) O lea la, o le a iai se suiga ofoofogia e tulaʻi mai, o le a fevaevaeaʻi le malo o Satani ma fetauaʻi ona lava vaega, ma e lē mafai e Satani ona taofia. (Mataio 12:25, 26) O le a tuuina atu e Ieova i loto o tupu o le lalolagi ina ia “faia lona finagalo,” o lona uiga, ia tafiesea mai le lalolagi, ona fili faalelotu uma. Pe a māeʻa ona faaumatia lotu sesē, ona taʻitaʻiina lea e Iesu Keriso lana ʻautau faalelagi e matuā tafiesea vaega o totoe o le faalapotopotoga a Satani—o faiga faapolotiki ma faapisinisi. Mulimuli ane, ona saisaitia ai lea o Satani. O lea la, ua oo le tala i lona mutaaga.—Faaaliga 16:14-16; 19:11-21; 20:1-3.

15, 16. O le ā se aafiaga e ao ona iai i o tatou olaga ona o le fautuaga “ua itiiti ona aso ua totoe”?

¹⁵ O afea e tutupu ai nei mea uma? Tatou te lē iloa le aso ma le itu aso. (Mataio 24:36) Peitaʻi, tatou te iloa “ua itiiti ona aso ua totoe.” (1 Korinito 7:29) O lea la, e matuā tāua le faaaogā tatau o le taimi o totoe. E faapefea? E pei ona faamatalaina e Paulo, e tatau ona tatou “faaaogāina” le taimi mo mea e sili atu ona tāua na i lo mea e lē tāua, ma ia tatou  faatāuaina aso taʻitasi. Aiseā? “Auā o ona pō nei ua leaga.” O lo tatou ‘iloaina o le finagalo o Ieova’ mo i tatou, tatou te lē faamaumau ai le taimi puupuu o loo totoe.—Efeso 5:15-17; 1 Peteru 4:1-4.

¹⁶ Talu ai ua tatou iloa le latalata mai o le faaumatiaga o lenei faiga o mea a le lalolagi, e ao faapefea ona tatou gaoioi? Na tusi le aposetolo o Paulo i se mea e aogā iā i tatou: “O lenei, o le a teʻa eseese nei mea uma, pe faapefea la outou amio e tatau ai i le amio lelei ma le amio Atua.” (2 Peteru 3:11) Ioe, o le auala lenā e tatau ona tatou amioaʻi ai! Ina ia ōgatusa ma le fautuaga atamai a Peteru, e tatau ona (1) mautinoa ua lelei la tatou amio ma ia mamā, (2) ia faamautinoa o a tatou gaoioiga maelega i le auaunaga a Ieova, e atagia atu ai i taimi uma lo tatou alofa faamaoni iā te ia.

17. O ā mailei a Satani e tatau ona faaeteete i ai Kerisiano faamaoni?

¹⁷ O le alofa i le Atua o le a taofia ai i tatou mai le manaʻonaʻo i le lalolagi ona o ana faatosinaga. Pe a mafaufau i le mea o le a tupu i lenei faiga o mea, o se lamatiaga mo i tatou le pupū atu i olaga faatosina o le lalolagi nei, lea e mafuli atu i mea e fiafia ai. E ui lava o nonofo ma faigaluega i le lalolagi, e ao ona tatou utagia le fautuaga poto ina ia lē fetagofi i le lalolagi. (1 Korinito 7:31) O le mea moni, e tatau ona tatou matuā faaeteete ina neʻi faasesēina i tatou i faamatalaga o loo faia e le lalolagi. O le a lē taulau lenei lalolagi i le saʻilia o se vaifofō mo ona faafitauli. E lē faaauau ona iai pea lenei lalolagi. Aiseā tatou te matuā mautinoa ai? Auā o le faamatalaga lenā a le Afioga a le Atua: “E mavae atu foʻi le lalolagi, atoa ma lona tuʻinanau, a o lē fai le finagalo o le Atua, e tumau lea e faavavau.”—1 Ioane 2:17.

O Loo Lumanaʻi Pea le Mea Silisili Ona Lelei!

18, 19. O ā suiga o loo e tulimataʻia i le lalolagi fou, ma aiseā ua avea ai o se faamanuiaga lou faatalitali?

¹⁸ Ua toe o se aga ona faaumatia lea e Ieova o Satani ma ē e lagolagoina o ia. E faatasi ai ma le faamanuiaga a Ieova, o le a galulue tagata faamaoni o ē e sao mai le iʻuga o lenei faiga o mea, i se lalolagi o le a iai ni suiga e tumau e faavavau. O le ā le toe iai ni taua auā o le a ‘faaiʻua e le Atua taua e oo lava i tuluʻiga o le lalolagi.’ (Salamo 46:9) Na i lo o oge, o le a “taumafa o saito i le nuu i tumutumu lava o mauga.” (Salamo 72:16) O le a lē toe iai ni falepuipui, ofisa o leoleo, faamaʻi pipisi ona o feusuaʻiga, ē e pulea le fefaatauaʻiga o fualaau faasāina, o faamasinoga mo tatalaga faaipoipoga, pisinisi gau ma faiga faatupu faalavelave.—Salamo 37:29; Isaia 33:24; Faaaliga 21:3-5.

¹⁹ O le a faagaogao tuugamau ma o le a faatutūina le faitau piliona o tagata. Maʻeu le olioli o le a iai pe a toe autasia augātupulaga ma toe feasogi atu ma le māfana i ē pele ua autausagā o valavala! O le a iʻu ina auauna tagata uma lava iā Ieova. (Faaaliga 5:13) Pe a māeʻa na suiga o le a faatumulia le lalolagi aoao i le tulaga parataiso. O ā ni ou faalogona pe a e iai i inā? E lē taumatea o le a faagaeetia oe e faapea atu, ‘Ua leva tele ona ou faatalitali mo lenei mea, ae maʻeu se faamanuiaga ua ou mauaina!’

[Faamatalaga pito i lalo]

E Faapefea Ona E Tali?

• Ua faapefea ona faataunuuina i o tatou aso, upu a le aposetolo o Paulo “o le a mavae atu [pe suia] le tū o le lalolagi nei”?

• E faapefea ona faailoa patino mai e taimi o mea na tutupu i le Tusi Paia le mutaaga o “taimi o nuu ese”?

• E faapefea ona faamautiona e suiga o tulaga o le lalolagi, o le 1914 o le tausaga lenā na faailoga ai le amataga o “ona pō o le iʻuga?”

• O ā gaoioiga e ao ona tatou faia ona o le mea moni e faapea “ua itiiti ona aso ua totoe”?

[Fesili mo le Suʻesuʻega]

[Ata i le itulau 20]

Ua iloa le mea na natia!