Aiseā e Asiasi Soo Atu ai Molimau a Ieova iā te Oe?

I LE lalolagi aoao, e lauiloa ai Molimau a Ieova i lo latou maumauaʻi e auai i la latou faiva mai lea fale i lea fale. E tau mānatu nisi tagata pe aiseā e asiasi soo atu ai Molimau a Ieova iā i latou, aemaise lava pe afai latou te lē o faaalia se naunau i le feʻau a Molimau a Ieova. Ua fesoasoani ni tusi se lua mai Rusia, e faamatala ai le māfuaaga.

Ua faapea mai se teine e 19 tausaga e igoa iā Masha i le nuu o Khabarovsk: “O laʻu tala moni lava, i aso ua mavae, sa ou taumafai e ʻalofia Molimau a Ieova e pei o se mala.” Ae peitaʻi, ina ua uma ona faitauina ni kopi o mekasini e lomia e Molimau a Ieova, sa suia ai lona mafaufau. Ua tusi mai Masha e faapea: “E ese le manaia o mea na ou faitau ai i mekasini, ma ua ou malamalama ai, ae o le mea e sili ona tāua, ua ese le auala ou te mafaufau ai agaʻi i le lalolagi. Ua faasolosolo mālie ina ou malamalama i le māfuaaga ua soifua ai tagata i nei soifuaga.”

Na tusi mai ia Svetlana mai le aai o Ussuriysk, e tusa ma le 50 maila [80 kilomita] i mātū o Vladivostok e faapea: “E leʻi leva tele talu ona ou faitauina Le Olomatamata ma le Ala Mai! Ua matuā manaʻomia lava nei mekasini i o tatou aso. Ou te fiafia i mataupu uma lava. O ni faamatalaga faaoso fiafia, e maua ai le poto, ma e mafai ona faamalamalamaina ai. Faafetai! Faafetai tele lava mo lo outou soifua ai i lenei lalolagi ma le faia o se galuega agalelei ma sili ona manaʻomia.”

E amanaʻia tele e Molimau a Ieova i le lalolagi atoa le fesili faatupu manatu a le aposetolo o Paulo e faapea: “Pe faapefea foʻi ona faalogo atu [tagata], pe a leai sē talaʻi atu?” (Roma 10:14) Aiseā e lē faaavanoa ai ni nai minute e te faalogologo ai i le isi taimi e asiasi atu ai Molimau a Ieova iā te oe? E mafai foʻi ona e olioli i le feʻau faamāfanafana mai le Afioga a le Atua, le Tusi Paia.