Faamāfanafanaga mo Ē Mafatia

INA ua mafatia tane ma fafine faatuatua anamua i puapuaga, na latou tatalo faatauanau i le Atua mo se taʻitaʻiga. Ae sa tausolomua foʻi i latou i le faia o gaoioiga e faamāmā ai mafatiaga, e pei o le faaaogāina o le utaga poto ina ia sao ai mai i faiga sauā. O se faaaʻoaʻoga, o le faalagolago iā Ieova faatasi ma ana lava taumafaiga, na mafai ai e Tavita ona onosaia ona mafatiaga. Ae faapefea i tatou?

Pe a oo mai mafatiaga, atonu e te taumafai lava oe e foʻia lou faafitauli. O se faataʻitaʻiga, afai ua leai sau galuega, pe e te lē taumafai ea e saʻili se galuega talafeagai e maua ai mea e tausia ai oe ma lou aiga? (1 Timoteo 5:8) Ia, pe e te mafatia foʻi i se maʻi o le tino, pe e te lē saʻilia ea se fesoasoani mai le fomaʻi? Seʻi tagaʻi foʻi iā Iesu, o lē e iai le mana mai le Atua e faamālōlō ai maʻi eseese uma, ae na ia faapea atu, ‘e aogā le fomaʻi i ē mamaʻi.’ (Mataio 9:12) Ae peitaʻi, atonu e lē foʻia uma ai ou faafitauli, ma e ono manaʻomia ai ona e onosai mo se taimi umi.

Aiseā e lē tuu atu ai le mataupu iā Ieova i le tatalo? O se faataʻitaʻiga, a o saʻilia se galuega, o le tatalo ma faalagolago iā Ieova o le a fesoasoani iā i tatou e tetee atu ai i soo se uunaʻiga e talia se galuega e ono feteenaʻi ma mataupu silisili o le Tusi Paia. O le a lē ‘sesē ai lava o i tatou i le faatuatua,’ ona o le matapeʻapeʻa po o le manaʻo tele i tupe. (1 Timoteo 6:10) O le mea moni, pe a faia filifiliga tāua e faatatau i le saʻilia o se galuega, po o mea o popole ai le aiga po o le soifua mālōlōina, ia mulimuli i le apoapoaʻiga a Tavita: “Ia e tuuina atu ia Ieova o mea e te popole vale ai; o ia lava na te tausia oe; na te lē tuuna e faavavau le amiotonu ia faagaeetia.”—Salamo 55:22.

O le a fesoasoani foʻi a tatou tatalo mai le loto e tausia ai lo tatou tulaga paleni ina ia lē lofitūina i tatou i mafatiaga. Na tusi mai le Kerisiano faamaoni o Paulo e faapea: “Ia faailoa atu o outou manaʻo i mea uma lava i le Atua, i le tatalo, ma le faatoga, atoa ma le faafetai.” I ā auala e mafai ona faamāfanafanaina ai i tatou i tatalo e faia ma le faamaoni? “O le manuia foʻi mai le Atua, o loo silisili lava i mea uma e manatu i ai, e leoleoina ai o outou loto atoa ma o outou mafaufau iā Keriso Iesu.” (Filipi 4:6, 7) O le manuia po o filemu mai le  Atua “o loo silisili lava i mea uma e manatu i ai.” O lea la, e mafai ona faatoʻafilemuina ai i tatou pe afai ua mafatia o tatou faalogona. O le a ‘leoleoina ai o tatou loto ma o tatou mafaufau,’ ma fesoasoani iā i tatou e ʻalofia ai le soona nanati e faia se gaoioiga lē atamai e ono faaopoopo mai ai mafatiaga iā i tatou.

E mafai foʻi ona aogā le tatalo i le auala e galueaʻiina ai se mea. Ina ua faafalepuipuiina le aposetolo o Paulo i Roma, sa ia talosaga atu ma le lotomaulalo i uso Kerisiano ina ia tatalo mo ia. Aiseā na talosaga atu ai faapea Paulo? Na ia fai atu iā i latou: “Ua atili loʻu ʻaiʻoi atu iā te outou e fai lenā mea, ina ia vave ona toe tuuina atu ai o aʻu ia te outou.” (Eperu 13:19) I se isi faaupuga, sa iloa e Paulo o le a faafofoga mai Ieova i tatalo faatauanau a ona uso talitonu, ma atonu o le a fesoasoani e vave ai ona faasaʻoloto o ia.—Filemoni 22.

Po o le a suia e tatalo le iʻuga o o tatou mafatiaga? Atonu e mafai. Ae, e tatau ona tatou iloa, atonu o le a lē tali mai Ieova le Atua i a tatou tatalo i le auala e tatou te mananaʻo ai. Sa faatele ona tatalo Paulo e faatatau i “le mea matuitui i le tino,” atonu o se faafitauli i lona tino. Ae peitaʻi, na i lo o le aveesea o le mafatiaga, na fetalai atu le Atua iā Paulo e faapea: “O loʻu nei alofa tunoa e lava lea e fesoasoani iā te oe; auā o le vaivai e faaatoaina ai loʻu mana.”—2 Korinito 12:7-9.

O lea la, atonu e lē mou ese atu loa o tatou mafatiaga. Ae peitaʻi, o le a maua le avanoa e faamaonia ai e tatou te faalagolago atu i lo tatou Tamā faalelagi. (Iakopo 1:2-4) Ia mautinoa, e tusa lava pe e lē aveesea e Ieova le mafatiaga, ae na te ‘sauni foʻi se mea e sao ai, ina ia tatou lavā oono.’ (1 Korinito 10:13) E aogā foʻi ona mātauina ua taʻua Ieova “o le Atua foʻi e ana le faamāfanafanaga uma, o lē na te faamāfanafanaina mai iā te i [t]atou i lo [t]atou puapuaga uma lava.” (2 Korinito 1:3, 4) E mafai ona tuuina mai e le Atua iā i tatou le mea tatou te manaʻomia ina ia tumau ai, ma ua iā i tatou foʻi le faamoemoe o le ola e faavavau.

Ua folafola mai e le Afioga a le Atua, le Tusi Paia e faapea, “e soloiesea foʻi e le Atua loimata uma i o latou mata; e leai foʻi se toe oti, po o se faanoanoa, po o se auē, e leai foʻi se toe puapuaga.” (Faaaliga 21:3, 4) Pe e faigatā ona e talitonu i se lalolagi e aunoa ma ni tigā? Atonu e faigatā, pe afai ua e masani e soifua i se olaga e tumu i mafatiaga. Ae e ui i lea, ua folafola mai e le Atua o le a lē toe iai le mataʻu ma ni mala, ma o le a faataulauina lava lana fuafuaga.—Isaia 55:10, 11.

[Ata i le itulau 9]

Mai mafatiaga i le mapusaga