Fesili Mai le ʻAufaitau

Ina ua mavae le Lolo, ona auina atu lea e Noa mai le vaa se lupe lea na toe foʻi mai ma le “lau olive.” O fea na maua ai e le lupe le lau olive?

Ua taʻu mai e le Tusi Paia iā i tatou e faapea, “ua matuā malo tele lava le vai i le lalolagi; ma ua ufitia ai mauga maualuluga uma o i lalo o le lagi uma.” (Kenese 7:19) A o mauiui lemū atu vai o le lolo, na auina atu ai e Noa se lupe e faatasi i le vaiaso mo vaiaso e tolu. I le taimi lona lua, na toe foʻi mai ai le lupe “o i lona gutu le lau olive mata; ona iloa ai lea e Noa ua papaʻu le vai i le lalolagi.”—Kenese 8:8-11.

O le mea moni, i le taimi nei, e lē mafai ona iloa po o le ā le umi na iai le lolo i se vaega patino o le lalolagi, talu ai na suia e le Lolo foliga o le laueleele. Ae ui i lea, e foliga mai, na umi se taimi na ufitia ai e le vai le tele o vaega o le lalolagi auā sa mamate ai le tele o laau. Peitaʻi, sa mafai lava ona sao nisi o laau, ma toe ola mai ai tātupu fou ina ua matūtū le vai.

Ae ua faamatalaina e le New Bible Dictionary e uiga i le laau o le olive e faapea: “pe afai e tuu i lalo, e toe tutupu aʻe tātupu fou mai le aʻa, o lea, e mafai ai ona tutupu mai pe a ma le lima ni laau fou. E masani foʻi i ni olive ua toetoe lava mamate ona tātupu mai faapena.” Ua faapea mai le New Schaff-Herzog Encyclopedia of Religious Knowledge: E “foliga mai e lē mafai ona faaumatia le ola o le olive.” E leai se tasi i aso nei e mafai ona ia iloaina faamatalaga auiliili po o le ā le tele o le masima, ma le vevela po o le malūlū o vai o le lolo. I lea, e tatou te lē o mautinoa e uiga i aafiaga o vai o le lolo i laau o le olive ma isi laau.

Ae peitaʻi, o le olive vao, e lē mafai ona ola i le tau mālūlū e pei o olive na e ola i luga o mauga maualuluga. E masani lava ona ola i ogaeleele i lalo ifo o le 3,000 futu [1,000 mita], o le tau masani i inā e i luga aʻe o le 50 tikeri Fahrenheit [10°C]. Ua faapea mai le tusi, The Flood Reconsidered: “I lea, atonu sa mafai ona iloa e Noa mai le lau olive e faapea, ua agaʻi ina matūtū le vai o laufanua maulalo.” Ina ua mavae se vaiaso, na toe tuu atu ai e Noa le lupe, ma e leʻi toe foʻi mai, e faailoa ai, ua maua e le lupe le anoanoaʻi o laau ʻaina ma mea e mālōlō ai.—Kenese 8:12.