Ia Leoleo Faasaga i le Taufaaʻoleʻole

“Ia outou, neʻi faatagataotauaina outou e se tasi i le poto lē aogā e faasesē ai.”—KOLOSE 2:8, LT.

1-3. (a) O ā faaaʻoaʻoga e faaalia ai ua toetoe oo atu le taufaaʻoleʻole i vala uma o le olaga i aso taʻitasi? (e) Aiseā e lē o se mea e faateʻia ai i tatou i faiga taufaaʻoleʻole i le lalolagi?

“E TOʻA fia outou e leʻi pepelo lava iai se tasi o i latou na ō atu mo se fesoasoani?” Na faia se suʻesuʻega a se loia i ni tausaga ua tuanaʻi atu e ala i le fesiligiaina o le fesili lenā. O le ā le tali mai? Ua ia faamatala e faapea: “I le faitau afe o loia, e na o le toʻatasi lava na faapea mai e leʻi pepelo lava se tasi iā te ia.” O le ā le māfuaaga? “O le taimi lenā faatoʻā amata le pisinisi a le loia ma e leʻi talanoa atu lava se tasi.” Ua faaalia i lenei mea se mea moni e faanoanoa ai, ua taatele i le lalolagi i aso nei le pepelo ma le taufaaʻoleʻole.

² O le taufaaʻoleʻole e ala mai i le tele o auala ma ua oo atu i le toetoe lava o vala uma o le olaga i aso nei. Ua lipotia mai e faasalalauga i atunuu le tele o faaaʻoaʻoga—e masani ona pepelo le aufaʻi polotiki e uiga i a latou gaoioiga, ua soona faateleina e loia ma le le ʻausuʻetusi i a latou lipoti polofiti a kamupani tetele, ua faasesēina le ʻaufaatau i faasalalauga ma ua iai tagata e faitogafiti pepelo ina ia maua ai tupe mai kamupani inisiua. E iai foʻi le taufaaʻoleʻole i tapuaʻiga. Ua faasesēina e taʻitaʻi lotu le ʻaulotu e ala i le aʻoaʻoina o aʻoaʻoga sesē, e pei o le ola pea o le agaga, le afi i seoli ma le Tasitolu.—2 Timoteo 4:3, 4.

³ Pe e faateʻia ea i tatou i nei faiga taufaaʻoleʻole uma? O le mea moni e leai. Na lapataʻi mai le Tusi Paia e tusa o “aso e gata ai” e faapea: “O tagata amio leaga ma ē taupelopelo, e alualu pea lava lo latou leaga, o loo faasesē atu, ua faasesēina foʻi i latou.” (2 Timoteo 3:1, 13) I le avea o ni Kerisiano, e ao ona tatou  mataala i manatu taufaasesē e ono faaliliueseina ai tatou mai le upu moni. Ua lāgā ai ni fesili se lua: Aiseā ua taatele ai le taufaaʻoleʻole i aso nei, ma e faapefea ona leoleoina i tatou faasaga i le ʻolegiaina?

Aiseā ua Tele ai le Taufaaʻoleʻole i Aso Nei?

4. Ua faamatalaina faapefea e le Tusi Paia le māfuaaga ua salalau ai le taufaaʻoleʻole i le lalolagi?

⁴ Ua faamatala manino mai e le Tusi Paia le māfuaaga ua salalau atu ai le taufaaʻoleʻole i lenei lalolagi. Na tusi Ioane e faapea, “o le lalolagi uma o loo nofo toʻilalo i loo leaga.” (1 Ioane 5:19) O lē o “loo leaga” o Satani le Tiapolo. Na fetalai Iesu e faatatau iā te ia: “E lē tū lava ia i le upu moni, auā e lē o i totonu lava iā te ia le upu moni; a tautala ia i le tala pepelo, o lana lava lea e tautala aʻi, auā o le pepelo ia, ma le tamā o le pepelo.” E lētioa lava la faaatagia mai e lenei lalolagi le agaga, amioga ma uiga taufaasesē o lo latou taʻitaʻi.—Ioane 8:44; 14:30; Efeso 2:1-3.

5. O faapefea ona faateteleina e Satani ana taumafaiga taufaaʻoleʻole i lenei taimi o le iʻuga, ma o ai ua ia taulaʻi faapitoa atu lava i ai?

⁵ Ua matuā faateteleina taumafaiga a Satani i lenei taimi o le iʻuga. Ua lafo mai o ia i le lalolagi. Ua ia iloa ua saasaa ona pō ma ua “lotoa tele.” Ua ia “faasesē i le lalolagi uma” ma ua ia maumauaʻi e faaumatia se aofaʻiga tele o tagata. (Faaaliga 12:9, 12) O Satani, e lē o sē taufaaʻoleʻole e fai ma mālōlō. Na i lo lea, o loo faaauau pea ana taumafaiga ina ia faasesē le fanau a tagata. * Ua ia faaaogā faiga taufaaʻoleʻole uma ua iā te ia, e aofia ai faiga togafiti ma faiga pepelo, ina ia faatauasoina ai manatu o ē lē faatuatua ma ia vavaeese pea i latou mai i le Atua. (2 Korinito 4:4) O loo taulaʻi atu lenei matai taufaaʻoleʻole e faaleagaina i latou e tapuaʻi i le Atua i le “agaga ma le faamaoni.” (Ioane 4:24; 1 Peteru 5:8) Ia aua lava neʻi galo, ua faapea Satani: ‘E mafai ona ou faaliliueseina so o se tasi mai le Atua.’ (Iopu 1:9-12) Seʻi o tatou iloiloina nisi o “togafiti” a Satani ma le auala e leoleo faasaga i ai.—Efeso 6:11.

Leoleo Faasaga i Ē ua Liliu Ese Mai le Upu Moni

6, 7. (a) O le ā le faamatalaga e ono fai e i latou ua liliu ese mai le upu moni? (e) E faapefea ona faaalia manino e le Tusi Paia le mea o mananaʻo ai i latou ua liliu ese mai le upu moni?

⁶ Ua loa ona faaaogā e Satani i ana taumafaiga i latou ua liliu ese mai le upu moni ina ia faasesēina auauna a le Atua. (Mataio 13:36-39) Latou te ono faapea mai o loo latou tapuaʻi iā Ieova ma e talitonu i le Tusi Paia peitaʻi, ua latou teena lana faalapotopotoga i le lalolagi. O nisi ua oo ina toe foʻi i aʻoaʻoga e lē faamamaluina ai le Atua a “Papelonia le aai tele,” le emepaea o lotu sesē a le lalolagi. (Faaaliga 17:5; 2 Peteru 2:19-22) I le faagaeega a le Atua, na faaaogā ai e tusitala o le Tusi Paia upu malolosi e faaalia ai uunaʻiga ma auala a i latou ua liliu ese mai le upu moni.

⁷ O le ā le mea o loo latou taulaʻi atu i ai? O le toʻatele o i latou ua lē faamalieina i le na o le ō ese mai le tapuaʻiga lea na latou manatu muamua i ai e moni. E masani lava, latou te mananaʻo e ave isi faatasi ma i latou. Na i lo le faia o ni o latou lava soo, e toʻatele i latou ua liliu ese ua latou saʻili ina ia ‘fetoso ese le ʻau soo o Keriso ia mulimuli iā i latou.’ (Galuega 20:29, 30) Na faaleo mai e Paulo lenei lapataʻiga faanatinati e faatatau i aʻoaʻo pepelo: “Ia outou, neʻi faatagataotauaina outou e se tasi.” (Kolose 2:8) Pe lē o faamatalaina ai ea i inā le mea ua taumafai i latou ua liliu ese mai le upu moni e fai? E pei o se tagata na te ave faamalosia se tasi mai lona aiga e aunoa ma le faatalitalia e lea tagata o se mea faapena e tupu, e faapena foʻi ona taumafai i latou ua liliu ese e faasesēina i latou o i le faapotopotoga, ma aveesea ai mai le lafu.

8. O ā auala ua faaaogā e ē ua liliu ese mai le upu moni ina ia taulau ai lo latou sini?

⁸ O ā auala ua latou faaaogā ina ia faataunuu ai lo latou sini? E masani ona latou faia togafiti taufaaʻoleʻole, o tala e lē moni atoatoa ma tala pepelo. Na silafia e Iesu o le a sauāina ona soo e ē ‘tuuaʻiina pepelo i latou i mea leaga.’ (Mataio  5:11) O le a taʻu atu e na ʻau tetee lotoleaga mea e lē moni ona o lo latou faanaunauga ia faasesēina isi. Na lapataʻi mai Peteru e faatatau iā i latou ua liliu ese o ē e faaaogā “upu pepelo,” aʻoaʻoga e “faasesē” ai ma “faauigaeseina” le Tusi Paia ina ia taulau ai lo latou sini. (2 Peteru 2:3, 13; 3:16) O se mea e faanoanoa ai, ona ua latou “faaliliu ese ai nisi tagata i le faatuatua.”—2 Timoteo 2:18.

9, 10. (a) E faapefea ona leoleoina i tatou i le ʻolegiaina e i latou ua liliu ese mai le upu moni? (e) Aiseā e lē tatau ai fua ona tatou popole pe afai ua manaʻomia ona toe fetuutuunaʻi lo tatou malamalamaaga i fuafuaga a le Atua?

⁹ E faapefea ona leoleoina i tatou faasaga i le ʻolegiaina e i latou ua liliu ese mai le upu moni? E ala i le utagiaina o le fautuaga mai le Afioga a le Atua, lea ua faapea mai: “Ia outou vaavaai i ē faatupu fevaevaeaʻiga, ma mea e tausuai ai; o mea ia e lē tusa ma le mataupu ua aʻoaʻoina ai outou; ia outou liliu ese foʻi iā te i latou.” (Roma 16:17) Tatou te ‘liliu ese iā te i latou’ e ala i le matuā teena o latou manatu—pe ala mai i upu, i tusitusiga po o le Initineti. Aiseā tatou te faia ai faapea? Muamua, talu ai ona ua faatonuina i tatou e le Afioga a le Atua ia faia faapea, ma tatou te faatuatuaina Ieova o loo ia manatu mamafa mai mo le mea e sili ona lelei mo i tatou.—Isaia 48:17, 18.

¹⁰ O lona lua, ona tatou te talisapaia le faalapotopotoga na aʻoaʻoina i tatou i upu moni tāua, lea ua manino ai le faaesea o i tatou mai iā Papelonia le aai tele. I le taimi lava e tasi, ua tatou iloa e lē atoatoa lo tatou poto i fuafuaga a le Atua, a o faagasolo tausaga na manaʻomia ona toe fetuutuunaʻi lo tatou malamalamaaga i nisi o mataupu. E naunau Kerisiano faamaoni e faatalitali iā Ieova mo na fetuutuunaʻiga. (Faataoto 4:18) Ua tatou vaaia i le taimi nei faamaoniga manino o le faamanuia a Ieova i lana faalapotopotoga, o lea la o le a tatou lē lafoaʻia ai le faalapotopotoga ua ia finagalo e faaaogā.—Galuega 6:7; 1 Korinito 3:6.

Leoleo Faasaga i le ʻOlegiaina o Oe e Oe Lava

11. Aiseā ua iai ai i tagata lē lelei atoatoa se masaniga o le ʻolegiaina o i latou e i latou lava?

¹¹ E iai le amioga a tagata lē lelei atoatoa e masani ona vave puʻea e Satani, o lona uiga o le faigofie lea ona ʻolegiaina o le tagata e ia lava. Ua faapea mai le Ieremia 17:9 : “E sili le faaʻoleʻole o le loto i mea uma, ma ua matuā leaga lava.” Na tusi Iakopo: “Ua taʻitasi ma faaosoosoina, pe a tosina ma maileia i lona lava tuʻinanau.” (Iakopo 1:14) Pe a maileia o tatou loto, e ono iʻu ina tatou tosina atu i tuʻinanauga agasala, ma o le a foliga mai ai na mea e lelei ma e lē afāina. O na vaaiga e taufaaʻoleʻole, auā e iʻu  ina faaleagaina ai se tasi pe a lolo atu i le agasala.—Roma 8:6.

12. O ā auala atonu e maileia ai i tatou e ala i le ʻolegiaina o i tatou e i tatou lava?

¹² O le ʻolegiaina o i tatou e i tatou lava e faigofie ona maileia ai i tatou. O le loto taufaaʻoleʻole e ono mafai ona taʻutonuina se vaivaiga a se tagata, po o le faia foʻi o se faamolemolega i se agasala matuiā. (1 Samuelu 15:13-15, 20, 21) E tatou te ono faia ni faamolemolega i amioga lē talafeagai ona e faaʻoleʻole o tatou loto. O se faataʻitaʻiga, seʻi o tatou iloiloina le mataupu e faatatau i faafiafiaga. O nisi faafiafiaga e lelei ma o se mea e olioli ai. Peitaʻi, o le tele o mea tatou te matamata ai i tifaga ma polokalame o televise ma le Initineti, e matagā ma e lē mamā. E mafai ona tatou manatu e lē afāina pe a matamata i ni faafiafiaga lē talafeagai. O nisi e manatu faapea, “E lē o faapopoleina ai loʻu lotofuatiaifo, o le ā la lona afāina?” Peitaʻi, o na tagata ua ‘faasesēina i latou e i latou’ lava.—Iakopo 1:22.

13, 14. (a) O le ā le faaaʻoaʻoga faale-Tusi Paia e faaalia ai e lē o taimi uma e avea ai o tatou lotofuatiaifo ma taʻiala lelei? (e) E faapefea ona leoleoina i tatou faasaga i le ʻolegiaina o i tatou e i tatou lava?

¹³ E faapefea ona leoleoina i tatou faasaga i le ʻolegiaina o i tatou e i tatou lava? Muamua lava,  e ao ona tatou manatua, o le lotofuatiaifo o le tagata e lē maufaatuatuaina i taimi uma. Seʻi manatu i le mea na tupu iā Paulo. A o leʻi avea o ia ma Kerisiano, na ia faasauā i soo o Keriso. (Galuega 9:1, 2) Atonu e leʻi faapopoleina o ia e lona lotofuatiaifo i lenā taimi. E manino lava, sa sesē le taʻitaʻiga a lona lotofuatiaifo. Na faapea mai Paulo: “Na ou faia faapea i loʻu lē iloa ma le lē faatuatua.” (1 Timoteo 1:13) O lea la, o le mea moni pe a lē faapopoleina i tatou e o tatou lotofuatiaifo i se faafiafiaga, e lē faapea o se faamaoniga lenā ua saʻo le mea lea tatou te faia. E na o le lotofuatiaifo ua uma ona aʻoaʻoina lelei e le Afioga a le Atua e mafai ona avea ma taʻiala lelei.

¹⁴ E iai ni fautuaga aogā e ao ona tatou manatua ina ia ʻalofia ai le ʻolegiaina o i tatou e i tatou lava. Ia iloilo oe lava faatasi ai ma le tatalo. (Salamo 26:2; 2 Korinito 13:5) O le iloiloina ma le faamaoni o oe lava atonu e faaalia atu ai iā te oe e manaʻomia ona faia ni suiga i ou manatu po o ou ala. Ia faalogo atu i isi. (Iakopo 1:19) Talu ai o le iloiloina o le tagata lava ia e taulaʻi iā i tatou lava, e atamai ai la le faalogo atu i fautuaga aogā mai Kerisiano taʻumatuaina. Pe afai ua e faia ni filifiliga po o ni gaoioiga e lē talafeagai ma le vaaiga a uso talitonu ua iai le poto masani, ia fesili ifo iā te oe lava, ‘Pe e māfua lenei mea ona o le lē lelei o le toleniina o loʻu lotofuatiaifo pe ua ʻolegiaina aʻu e loʻu loto?’ Ia lē aunoa ona faitau ma suʻesuʻe le Tusi Paia ma lomiga faale-Tusi Paia. (Salamo 1:2) O le faia faapea o le a fesoasoani ai iā te oe e tausia ou manatunatuga, uiga ma faalogona e talafeagai ma mataupu silisili a le Atua.

Leoleo Faasaga i Pepelo a Satani

15, 16. (a) O ā pepelo ua faaaogā e Satani i ana taumafaiga ina ia ʻolegia ai i tatou? (e) E faapefea ona tatou ʻalofia le ʻolegiaina i na pepelo?

¹⁵ Ua faaaogā e Satani i ana taumafaiga ituaiga pepelo eseese ina ia ʻolegia ai tatou. Ua ia taumafai e faatalitonu i tatou e faapea e maua le fiafia ma le faamalieina i meafaitino, peitaʻi ua masani ona tuufaafeagai le tulaga moni ma lea manatu. (Failauga 5:10-12) Ua manaʻo Satani ia tatou talitonu o le a faaauau pea ona iai lenei lalolagi amioleaga e faavavau, e ui lava o loo iai faamaoniga manino ua tatou ola nei i “aso e gata ai.” (2 Timoteo 3:1-5) O loo faaauiluma e Satani le manatu e faapea, e leai se afāina o le saʻilia o se olaga o amioga lē mamā, e ui lava e masani ona seleseleina e i latou o ē saʻilia mea faafiafia āuga leaga. (Kalatia 6:7) E faapefea ona ʻalofia le ʻolegiaina o i tatou i na pepelo?

¹⁶ Mauaina o aogā mai faaaʻoaʻoga o le Tusi Paia. O loo i le Tusi Paia faaaʻoaʻoga lapataʻi a i latou o ē na ʻolegiaina e pepelo a Satani. Na latou mananaʻo i meafaitino, lē taulaʻi atu i le taimi sa latou ola ai, pe na lolo atu i amioga lē mamā, o na mea uma na iʻu i ni iʻuga leaga. (Mataio19:16-22; 24:36-42; Luka16:14; 1 Korinito 10:8-11) Ia aʻoaʻoina ni lesona mai i faaaʻoaʻoga i aso nei. E faanoanoa lava ona o nisi Kerisiano ua latou lē lagona le faanatinati o le taimi ma ua talitonu ai e faapea, o le auauna i le Atua ua latou misia ai se mea lelei. Ua ō ese nisi mai le upu moni ona o le saʻilia o mea ua taʻua o faafiafiaga o lenei lalolagi. Peitaʻi, o i latou na ua “i mea maseesee” ma e alu aso ae sau aso o le a latou tofo i āuga o a latou amioga faalēmataʻu. (Salamo 73:18, 19) E atamai mo i tatou ona aʻoaʻoina ni lesona mai i mea sesē a isi.—Faataoto 22:3.

17. Aiseā ua faaauiluma ai e Satani le pepelo e faapea, e lē o silasila alofa mai ma e lē o faatāuaina e Ieova i tatou?

¹⁷ E iai le isi pepelo o loo faaaogā ma le poto e Satani, o le pepelo lea e lē o alofa mai pe faatāuaina i tatou e Ieova. Ua faitau afe tausaga o iloilo e Satani le fanau a tagata lē lelei atoatoa. Ua ia iloa lelei lava e faapea, o le lotovaivai e mafai ona faavaivaia ai i tatou i le itu faaleagaga. (Faataoto 24:10) O lea la, ua ia faaauiluma ai le pepelo e faapea, ua lē aogā i tatou i le silafaga a le Atua. E tatou te ono lafoaʻia le upu moni pe afai ua “lafotuina i lalo” i tatou ma talitonu ai e faapea, e lē o silasila alofa mai Ieova iā i tatou. (2 Korinito 4:9) O le mea tonu lava lenā o loo manaʻo i ai le Taufaasesē sili! O lea la, e faapefea ona leoleoina i tatou faasaga i lenei pepelo a Satani?

18. E faapefea ona faamautinoa mai e le Tusi Paia iā i tatou le alofa o Ieova?

¹⁸ Ia mafaufau loloto i le mea ua fai mai ai le  Tusi Paia e faatatau i le alofa o le Atua mo i tatou. O loo faaaogā e le Afioga a le Atua ni faataʻitaʻiga e ootia ai loto e faamautinoa ai iā i tatou o loo silasila mai Ieova ma alofa mai iā i tatou taʻitoʻatasi. O loo ia utuina ou loimata i lana ‘fagu’ o lona uiga, o loo ia silasila ma manatua ou loimata na maligi i au tauiviga ina ia tumau i le faamaoni. (Salamo 56:8) O loo ia silasila mai pe a e “loto momomo” ma e latalata mai o ia iā te oe i na taimi. (Salamo 34:18) Ua ia silafia faamatalaga uma e faatatau iā te oe, e aofia ai “o outou lauulu lava ua faitaulia uma ia.” (Mataio 10:29-31) E sili atu i na mea uma, ua ia “au mai . . . lona Atalii e toʻatasi,” ona o oe. (Ioane 3:16; Kalatia 2:20) O nisi taimi, e ono faigatā iā te oe ona e talitonu e faapea o loo faatatau patino atu na mau iā te oe. Peitaʻi, e ao ona tatou talitonu i le Afioga a Ieova. Ua Ia finagalo ia tatou talitonu e faapea, o loo ia alofa mai iā te i tatou e lē gata o se vaega ae o tagata taʻitoʻatasi foʻi.

19, 20. (a) Aiseā e tāua ai le iloaina ma teena le pepelo a Satani e faapea, e lē alofa Ieova iā te oe? (e) Na faapefea ona fesoasoani se tasi ovasia femalagaaʻi i ē ua lotovaivai?

¹⁹ Ia iloa ma teena le pepelo. Afai e te silafiaina se tasi e pepelo, e mafai ona e puipuia oe mai le ʻolegiaina. O lea, e mafai ona avea o se fesoasoani malosi iā te oe le iloa e faapea, e manaʻo Satani e te talitonu i le pepelo e lē alofa Ieova iā te oe. I le tali mai a se mataupu o Le Olomatamata na lapataʻia e faatatau i togafiti a Satani, na faapea mai se tasi Kerisiano: “Ou te leʻi iloa o loo taumafai Satani e faaaogā oʻu faalogona e faavaivaia ai aʻu. O le iloaina o lenei mea ua uunaʻia ai aʻu ina ia foʻia nei faalogona.”

²⁰ Seʻi o tatou iloiloina le mea e masani ona fai e se ovasia femalagaaʻi i Amerika i Saute. Pe a faia asiasiga faaleoleo mamoe i nisi uso talitonu ua lotovaivai, e masani lava ona ia fesili, ‘Pe e te talitonu i le tolutasi?’ E masani lava ona tali mai lē ua vaivai ‘E leai,’ i lona iloaina o le tasi lea o pepelo a Satani. Ona toe fesili atu lea o le toeaina asiasi, ‘Pe e te talitonu i le afi i seoli?’ Ona toe tali mai foʻi lea, ‘E leai!’ Ona taʻu atu lea e le toeaina asiasi iā te ia e faapea, o loo iai se isi pepelo a Satani e iloagatā. Ua ia tataʻi atu o latou manatu i le itulau e 249, palakalafa e 21, o le tusi Faalatalata Atu iā Ieova, * o loo faaalialia ai le pepelo e faapea, e lē alofa Ieova iā i tatou taʻitoʻatasi. Ua lipotia mai e le ovasia femalagaaʻi iʻuga lelei mai le fesoasoani i ē ua lotovaivai ina ia iloa ma teena le pepelo lenei a Satani.

Leoleomalu Oe Faasaga i le Taufaaʻoleʻole

21, 22. Aiseā tatou te lē o iai ai i se tulaga pogisa e faatatau i togafiti taufaaʻoleʻole a Satani, ma o le ā e ao ona avea ma o tatou faanaunauga?

²¹ A o iai i le siʻui o aso e gata ai, e lē o se mea e ofo ai le faaauau pea e Satani ona faasalalau atu le anoanoaʻi o pepelo ma mea taufaasesē. O se mea tatou te lotofaafetai ai, ona e lē tuua i tatou e Ieova i se tulaga pogisa e tusa ai ma togafiti taufaaʻoleʻole a Satani. Ua faaalia manino e le Tusi Paia ma lomiga faale-Tusi Paia mai le “auauna faamaoni ma le mafaufau” ia auala leaga a le Tiapolo. (Mataio 24:45) O le muaʻi lapataʻia, o le faigofie foʻi lenā ona faafetaiaʻia.—2 Korinito 2:11.

²² O lea, seʻi faaauau ona leoleo faasaga i manatu o tagata ua liliu ese mai le upu moni. Seʻi o tatou maumauaʻi e ʻalofia le mailei iloagatā lea o le ʻolegiaina o le tagata e ia lava. Ia tatou iloa ma teena pepelo uma a Satani. O le faia faapea, o le a tatou leoleomalu ai la tatou faiā ma le “Atua faamaoni” o lē e inoino i le taufaaʻoleʻole.—Salamo 31:5; Faataoto 3:32.

[Faamatalaga pito i lalo]

Pe E te Manatua?

• Aiseā ua tele ai le taufaaʻoleʻole i le lalolagi i aso nei?

• E faapefea ona leoleoina i tatou faasaga i le faasesēina e i latou ua liliu ese mai le upu moni?

• E faapefea ona leoleoina i tatou faasaga i so o se faanaunauga o le ʻolegiaina o oe e oe lava?

• E faapefea ona tatou ʻalofia le faasesēina i pepelo a Satani?

[Fesili mo le Suʻesuʻega]

[Ata i le itulau 17]

Aua neʻi faasesēina oe e oe lava i faafiafiaga

[Ata i le itulau 18]

Ina ia leoleo faasaga i le ʻolegiaina o oe e oe lava, ia iloilo oe lava faatasi ma le tatalo, faalogo atu i isi ma suʻesuʻeina e lē aunoa le Afioga a le Atua