Fesili Mai le ‘Aufaitau
Fesili Mai le ʻAufaitau
Talu ai sa leai se tofi o le ʻau sa Levī i Isaraelu anamua, na faapefea la e le sa Levī o Hanameali ona faatau atu se fanua iā Ieremia le atalii o le uso o lona tamā, e pei ona taʻua i le Ieremia 32:7?
Na fetalai Ieova iā Arona e faatatau i le ʻau sa Levī e faapea: “E te lē maua se tofi . . . e leai foʻi sou fanua iā te i latou [Isaraelu].” (Numera 18:20) Peitaʻi, na tuuina atu i le ʻau sa Levī ia aai e 48 na tūtū solo i le Nuu o le Folafolaga ma o latou tuāfanua. O le nuu o Ieremia o Anatota, o se tasi o aai na tuuina atu i “atalii o Arona le faitaulaga.”—Iosua 21:13-19; Numera 35:1-8; 1 Nofoaiga a Tupu 6:54, 60.
I le Levitiko 25:32-34, na avatu ai e Ieova se faatonuga patino e faatatau i le “toe faatau” mai o mea a sa Levī. E foliga mai, e ono maua e aiga taʻitasi o sa Levī le tofi o fanua, o lona faaaogāina, ma le faatauina atu o se fasi fanua. O le tulaga masani lava e aofia ai i le faatauina atu ma le toe faatauina mai o fanua. * I le tele o vala, na tutusa le auala na umia ai e sa Levī ma faaaogā fanua ma le auala na faaaogā e Isaraelu ma isi ituaiga.
Atonu, o le pule o na fanua o sa Levī sa faasolo atu i aiga ma o latou tofi. Peitaʻi, e tusa ai ma le tulaga o le “toe faatau” atu, na faatagaina ai fefaatauaʻiga na o le va lava o le ʻau sa Levī. E lē gata i lea, e foliga mai o le faatau atu ma le toe faatau mai o le fanua na faatatau atu i na o fanua i totonu o le aai, talu ai o “fanua i tuapa o a latou aai” e lē faatauina “auā o lo latou lava lea e faavavau.”—Levitiko 25:32, 34.
O lea la, o le fanua lea sa faatau mai e Ieremia mai iā Hanameali e foliga mai o le ituaiga o fanua lenā e mafai ona toe faatauina atu. Atonu e tū i le tuaoi o le aai. Na fetalai Ieova e faapea, o le “fanua” o Hanameali ua iā Ieremia le “pule i le faatau e faatau ai.” (Ieremia 32:6, 7) Na faaaogā faafaatusa e Ieova lenei fefaatauaʻiga ina ia faamalosi ai lana folafolaga e faapea, o le a toe foʻi Isaraelu e toe atiaʻe lo latou tofi o le laueleele pe a mavae lo latou faaaunuua i Papelonia.—Ieremia 32:13-15.
E lē o iai se faailoaga e faapea, na umia ma le lē tonu e Hanameali le fanua i Anatota. E lē o faaalia mai e faapea, na ia solia se tulafono a Ieova i le faatagaina o Ieremia e faatau lenei fanua i Anatota pe sa faia ma le lē talafeagai e Ieremia lana aiā tatau i le faatauina mai o le fanua.—Ieremia 32:8-15.
[Faamatalaga pito i lalo]
^ pala. 4 I le uluaʻi senituri T.A., na faatau atu ai e le sa Levī o Panapa lona fanua ma foaʻi atu tupe o le tau o le fanua e fesoasoani i soo matitiva o Keriso i Ierusalema. E lē o manino mai po o fea sa iai le fanua po o Palesitina po o Kuperu. E lē gata i lenā, e ono mafai ona faapea o lenei fanua na maua e Panapa i le vaipanoa o Ierusalema, ua na o se fasi fanua e tanu ai tagata oti.—Galuega 4:34-37.