Le Auala Tatou te Faaalia ai le Alofa i le Atua

O LE faatupuina o le alofa mo le Atua, e lē na o le aʻoaʻoina e uiga iā te ia. E pei ona faamaonia e auauna a le Atua i le lalolagi aoao, e tupu le alofa moni o se tasi i le Atua pe a malamalama i ona uiga, ae o le a sili atu ona malosi pe a oo ina masani lelei o ia ma mea e finagalo i ai le Atua, o mea e inoino i ai, ma mea o ia manaʻomia mai iā i tatou.

Ua aumaia ma le alofa e Ieova iā i tatou lana Afioga o le Tusi Paia, lea ua faailoa mai ai o ia. Ua tatou aʻoaʻoina mai ai le auala na ia feutagaʻi ai ma tulaga eseese. E pei lava ona tatou fiafia i se tusi mai sē e pele iā i tatou, e faapena foʻi ona aumaia e le Tusi Paia iā i tatou le olioli a o tatou vaaia vala eseese o uiga o Ieova ua faaalia mai.

Peitaʻi, e pei ona tatou mātauina i la tatou galuega talaʻi i le lautele, o le aʻoaʻoina o se tasi e uiga i le Atua e lē faapogaia ai o ia i taimi uma e alofa i le Atua. Na fetalai atu Iesu i ni tagata Iutaia lē lotofaafetai i ona aso: “E suʻesuʻe outou i Tusi, auā ua outou manatu tou te maua ai le ola faavavau; . . . A e peitaʻi ua ou iloa lava outou, e leai so outou alofa i le Atua i totonu iā te outou.” (Ioane 5:39, 42) E autausagā o aʻoaʻoina isi e uiga i gaoioiga alofa a Ieova, ae peitaʻi e itiiti so latou alofa mo ia. Aiseā? E latou te lē o manatunatu i mea ua latou aʻoaʻoina. I sona faaeseesega, e faitau miliona tagata faamaoni o loo tatou suʻesuʻeina le Tusi Paia ma i latou, o loo faatupuina pea lo latou alofa i le Atua. Aiseā? Talu ai, e pei foʻi ona sa tatou faia, sa faapena foʻi ona latou mulimuli i le faaaʻoaʻoga a Asafo. I le ā le auala?

Manatunatu Loloto ma ia Lotofaafetai

Sa maumauaʻi Asafo e atiina aʻe i lona loto le alofa iā Ieova. Na ia tusi: “Ou te mafaufau i loʻu loto . . . Ou te manatua galuega a Ioa; e moni, ou te matuā manatua ou vavega anamua. Ou te manatunatu foʻi i au galuega uma,  ou te mafaufau i mea na e faia.” (Salamo 77:6, 11, 12) O se tasi e manatunatu i ala o Ieova e pei ona sa faia e le faisalamo, o le a tupu i lona loto le alofa i le Atua.

E lē gata i lea, o le manatuaina o mea na tutupu na tatou olioli ai a o auauna iā Ieova e faamalosia ai la tatou faiā ma ia. Na faapea mai Paulo o i tatou o le “ʻau faigaluega” a le Atua, ma o lenā faauōga i le va ma le ʻau faigaluega e matuā tāua lava. (1 Korinito 3:9) Pe a tatou alolofa iā Ieova, e na te talisapaia ma e fiafia ai lona finagalo. (Faataoto 27:11) O lea, pe a tatou ole atu iā Ieova mo se fesoasoani ma ia puipuia i tatou i ni tulaga faigatā, ona tatou iloa lea o loo faatasi o ia ma i tatou ma e mafai ona faalolotoina ai lo tatou alofa iā te ia.

E atiina aʻe se faauōga i le va o ni tagata se toʻalua pe a faaalia faalogona o le tasi i le isi. E faapena foʻi ona faamalosia lo tatou alofa iā Ieova, pe a tatou taʻu atu le māfuaaga ua tatou tuutoina atu ai iā te ia. O le a avea ai i tatou o ni ē e manatunatu i upu a Iesu: “Ia e alofa foʻi i le Alii lou Atua ma lou loto atoa, ma lou agaga atoa, ma lou manatu atoa, ma lou malosi atoa.” (Mareko 12:30) O le ā e mafai ona tatou faia ina ia faamautinoa ai o le a faaauau ona tatou alolofa iā Ieova ma o tatou loto atoa, agaga atoa, manatu atoa ma lo tatou malosi atoa?

Alofa iā Ieova ma lo Tatou Loto Atoa

O loo faasino atu le Tusi Paia i le loto, o lona uiga o le tagata i totonu—o tatou faanaunauga, o uiga ma faalogona. O lea, o le alofa iā Ieova ma lo tatou loto atoa o lona uiga, e sili atu i lo se isi lava mea, tatou te faanaunau e faafiafia le Atua. (Salamo 86:11) E tatou te faaalia o loo iā i tatou lenā alofa e ala i le atiina aʻe o tatou uiga lelei ina ia taliaina e ia. E tatou te taumafai e faaaʻoaʻo i le Atua e ala i le ‘ʻinoʻino i le leaga, ma pipii i le lelei.’ —Roma 12:9.

O lo tatou alofa i le Atua e aafia ai o tatou faalogona i mea uma lava. O se faaaʻoaʻoga, atonu tatou te fiafia i se galuega totogi po o ua alu ai le tele o lo tatou taimi, peitaʻi pe o le mea lenā o i lou loto? E leai. Talu ai tatou te alolofa iā Ieova ma o tatou loto atoa e tatou faamuamuaina la ia la tatou auaunaga i le Atua. E tatou te mananaʻo foʻi e faafiafia o tatou mātua, paaga faaipoipo ma o tatou pule, peitaʻi e ao ona faamuamua ma faasilisilia ona faafiafia le finagalo o Ieova, e faamaonia ai lo tatou alofa iā te ia ma o tatou loto atoa. Auā foʻi e tatau iā te ia lo tatou alofa mai le loto.—Mataio 6:24; 10:37.

Alofa iā Ieova ma lo Tatou Agaga Atoa

I le Tusi Paia o le upu “agaga” e faasino atu i lo tatou tagata atoa. O lea, o le alofa iā Ieova ma lo tatou agaga atoa o lona uiga, tatou te faaaogā o tatou ola e vivii atu ai iā te ia ma faamaonia lo tatou alofa iā te ia.

 E mautinoa, atonu e iai isi mea tatou te fiafia ai i le olaga, e pei o le aʻoaʻoina o se galuega, faia o se pisinisi po o le tausiaina aʻe o se aiga. Peitaʻi i le taimi e tasi, e faamaonia lo tatou alolofa ma lo tatou agaga atoa iā Ieova e ala i le faia o mea i lana auala ma faatulaga saʻo mea i le olaga, o lea la ua tatou “muaʻi saʻili lona malo ma lana amiotonu.” (Mataio 6:33) O le tapuaʻi ma le agaga atoa e uiga atu foʻi i le maelega. E tatou te faaalia lo tatou alolofa iā Ieova e ala i le maelega e talaʻi le feʻau o le Malo, faia ni sao e ati aʻe ai isi i sauniga po o le fesoasoani i o tatou uso ma tuafāfine Kerisiano. I mea uma lava ua tatou faia ai le “finagalo o le Atua ma le loto.”—Efeso 6:6.

Na faaalia e Iesu le alofa ma le agaga atoa i le Atua e ala i le faafitia o ia lava. Na ia faamuamua le finagalo o le Atua ae faatulaga lua ona lava manaʻoga. Ua valaaulia i tatou e Iesu e mulimuli i lana faaaʻoaʻoga. Na ia fetalai: “Ai se tasi e fia mulimuli mai iā te aʻu, ia faafiti o ia iā te ia, ma ave lona satauro, i le mulimuli mai iā te au.” (Mataio 16:24, 25) O le faafitia o i tatou lava o lona uiga o le faia o se tuuina atu. O lona uiga tatou te alolofa i le Atua o lea ua tatou tuuina atu ai tatou e pule ai o ia, e pei lava o taimi o le Tusi Paia, pe a alofa se tagata Isaraelu i lona matai na te tuuina atu o ia e fai ma auauna a lona matai e faavavau. (Teuteronome 15:16, 17) O le tuuina o tatou ola iā Ieova o se faamaoniga moni lea o lo tatou alolofa iā te ia.

Alofa iā Ieova ma lo Tatou Manatu Atoa

O le alofa iā Ieova ma lo tatou manatu atoa o lona uiga, o le tatou faia lea o taumafaiga talafeagai uma ina ia malamalama ai i uiga o Ieova, o ana fuafuaga ma mea o loo ia faafinagaloina. (Ioane 17:3; Galuega 17:11) E tatou te faaalia lo tatou alolofa iā Ieova e ala i le faaaogāina o tatou tomai faalemafaufau e fesoasoani ai i isi ina ia latou alolofa foʻi iā Ieova ma faaleleia ai la tatou aʻoaʻo atu. Na faalaeiau mai Peteru e faapea: “Ia outou fusi aʻe i sulugātiti o outou mafaufau.” (1 Peteru 1:13) E lē gata i lea, ia tatou faia taumafaiga e faaalia ai le naunau i isi, aemaise lava auauna a le Atua. O loo tatou mataala i o latou tulaga ma mātau le taimi e talafeagai ai ona avatu le faamālō po o le taimi foʻi e manaʻomia ai se faamāfanafanaga.

E tatou te alolofa iā Ieova ma lo tatou manatu atoa e ala i le gauaʻi atu ma o tatou mafaufau iā te ia. E tatou te taumafai e vaai i le auala e silasila ai o ia i mea, manatua o ia pe a tatou faia filifiliga ma faatuatuaina ona ala e sili ona lelei. (Faataoto 3:5, 6; Isaia 55:9; Filipi 2:3-7) Peitaʻi, a o faaauau ona tatou faaalia le alofa i le Atua, e faapefea ona tatou faaaogā lo tatou malosi?

Alofa iā Ieova ma lo Tatou Malosi Atoa

O le toʻatele o talavou Kerisiano i le faapotopotoga ua faaaogā lo latou malosi e vivii ai iā Ieova. (Faataoto 20:29; Failauga 12:1) O se tasi o auala ua faaalia ai e le toʻatele o talavou Kerisiano lo latou alolofa iā Ieova ma lo latou malosi atoa, e ala lea i le auai i le auaunaga paeonia, le faiva faataimi atoa. E toʻatele tinā ua auai i lenei faiva a o ō le fanau i le aʻoga. Ua faaalia e toeaina faamaoni latou te alolofa iā Ieova ma lo latou malosi atoa, i le faia o ni asiasiga faaleoleo mamoe ae i le taimi e tasi o loo tausia foʻi le tulaga lelei o latou aiga. (2 Korinito 12:15) E avatu e Ieova le malosi iā i latou e faalagolago iā te ia, ina ia mafai ai ona latou faaalia lo latou alofa e ala i le viiaina o ia ma faaaogā po o le ā lava le malosi o iā i latou.—Isaia 40:29; Eperu 6:11, 12.

O le a tupu lo tatou alofa pe a atiina aʻe lelei. O lea la, ua tatou faaaogā ni taimi e manatunatu loloto ai. E tatou te manatua mea na faia e Ieova mo i tatou ma le māfuaaga e tatau ai lo tatou tuutoina atu iā te ia. I le avea ai o ni fanau lē lelei atoatoa a Atamu, ua lē tatau iā i tatou mea “ua saunia e le Atua mo i latou o ē alofa iā te ia” peitaʻi, e mafai ona tatou alolofa iā Ieova ma lo tatou ola atoa. Seʻi tatou faaauau ona faia faapea!—1 Korinito 2:9.

[Ata i le itulau 20]

E tatou te faaalia le alofa i le Atua e ala i gaoioiga