O ā ni Itū ua Pei ai Auauna a le Atua o Laau?

UA FAAPEA mai le faisalamo e faatatau i se tasi e fiafia i mataupu silisili o le Tusi Paia ma faatatauina i lona olaga: “O ia foʻi e faapei o le laau ua totō i tafatafa ane o vaitafe, e fua mai ona fua i ona lava tau; e lē toʻulu foʻi ona lau; e manuia foʻi mea uma na te faia.” (Salamo 1:1-3) Aiseā ua talafeagai ai lenei faatusatusaga?

Atonu e ola laau mo se taimi umi lava. O se faaaʻoaʻoga i le vaipanoa o le Metitirani, o nisi laau o le olive e ola mo le afe po o le lua afe tausaga. E faapena foʻi i Aferika tutotonu e ola le laau o le baobab mo le tele o tausaga, ma e ola le bristlecone pine mo ni tausaga e 4,600. I se vaomatua, e masani ona maua aogā e laau o loo ola i autafa o laau ua leva ona feola. O se faaaʻoaʻoga, e saunia e laau uumi se paolo mo laau muli ma o lau o laau o loo toʻulu i lalo e pala ma toe maua ai nisi palapala fou.

E masani ona ola faatasi laau uumi i le vaomatua e fesoasoani lē tasi i le isi. Talu ai ona o loo milo faatasi o latou aʻa, atonu e sili atu ai la le mauaa o na laau na i lo se laau e ola tutasi i se mea taalaelae. E mafai foʻi e aʻa tetele o se laau ona maua mai le tele o le vai ma le niuturiane (nutrients) mai le palapala. Atonu e loloto tele i lalo i le palapala aʻa na i lo le maualuga o se laau, pe atonu e sosolo tele foʻi i autafa na i lo lālā o le laau.

Atonu na manatu Paulo i se laau ina ua ia faamatala atu e faapea e ao i Kerisiano ona “savavali . . . iā te ia [Keriso], ia mauaa outou ma ia atiina aʻe iā te ia, ma ia faatumauina i le faatuatua.” (Kolose 2:6, 7) O le mea moni, e mafai ona mausalī le faatuatua o Kerisiano pe afai latou te pipiimau atu iā Keriso.—1 Peteru 2:21.

O ā nisi itū ua pei ai auauna a le Atua o laau? Ioe, i se togālaau, e fesoasoani isi laau i isi foʻi laau, o lea o i latou uma lava e vavalalata atu i le faapotopotoga Kerisiano latou te maua le lagolagosua mai le ʻauuso talitonu. (Kalatia 6:2) E fesoasoani Kerisiano faamaoni ma taʻumatuaina o ē loloto lo latou tofā faaleagaga i ē fou ina ia tumau i le faatuatua e ui i teteega e pei o se afā. (Roma 1:11, 12) E mafai ona malupuipuia Kerisiano fou i le “paolo” o auauna a le Atua ua iai le poto masani. (Roma 15:1) E mafai e sui uma o le faapotopotoga Kerisiano i le lalolagi aoao ona maua aogā mai taumafa susua faaleagaga ua saunia e “laau o le amiotonu,” o le vaega totoe faauuina.—Isaia 61:3.

Maʻeu le faalaeiauina o auauna a le Atua i le manatu e faapea o le a latou tofo i le faataunuuga o le folafolaga i le Isaia 65:22: “Auā e pei o aso o le laau aso o loʻu nuu.”

[Faamatalaga i Ata i le itulau 28]

Godo-Foto