Pe Faavae le Faamālōlōga i le Faatuatua o le Tagata Maʻi?

PE A tatou mamaʻi, tatou te saʻili mo se mapusaga ma se vaifofō. Atonu, na e silafia mai le Tusi Paia e faapea, sa masani ona faamālōlō e Iesu Keriso so o se ituaiga o gasegase, ma aumaia se mapusaga iā i latou. Sa faapefea ona faia na faamālōlōga? Ua taʻua i le Tusi Paia sa faia e ala i le “mana mamalu o le Atua.” (Luka 9:42, 43; Galuega 19:11, 12) O lea, o le agaga paia mai le Atua na māfua ai ona mālōlō le maʻi, ae lē o le faatuatua o le tagata maʻi. (Galuega 28:7-9) O le māfuaaga lenā e leʻi manaʻomia ai e Iesu ona faailoa atu e tagata mamaʻi lo latou faatuatua iā te ia ina ia mālōlō ai.

Atonu e te tau manatu: ‘Pe o toe iai ni faamālōlōga faavavega, pe o toe faia foʻi faamālōlōga ia sa faia e Iesu? O le ā se faamoemoe mo i latou o mafatia i tigā po o gasegase e lē matogafitia?

Ua faamatala mai e le Tusi Paia e faapea, i le lalolagi fou amiotonu a le Atua, o le a toe faia ai e le mana o le Atua faamālōlōga faavavega ia na faia e Iesu a o iai i le lalolagi. E fiafia Molimau a Ieova i lou vaipanoa e faasino atu iā te oe le auala ma o afea o le a faia ai e le Atua faamālōlōga o le faatuatua, lea o le a aveesea ai maʻi ma le oti. Ioe, “e faaumatia e ia le oti e faavavau.”—Isaia 25:8.