Ua Sao le “Auauna Faamaoni” Ina ua Asiasia!

“O ona pō nei e amata ai le faamasinoga i le aiga o le Atua.” —1 Peteru 4:17.

1. O le ā na maua mai e Iesu ina ua ia asiasia le “auauna”?

I LE Penetekoso 33 T.A., na tofia ai e Iesu le “auauna” e saunia taumafa i ona itu aso mo “ana auauna.” I le 1914, na avea ai Iesu ma tupu ma ua oo i le taimi e asiasia ai lenā “auauna.” I le tulaga aoao tetele lava ia, na ia silafia e faapea, sa ‘faamaoni ma mafaufau’ le “auauna.” O lea la, na ia tofia ai loa le auauna e pule i “ana mea uma.” (Mataio 24:45-47) Peitaʻi, sa iai foʻi se auauna leaga, e lē faamaoni ma e lē mafaufau.

“Lea Auauna Leaga”

2, 3. O fea na sau ai “lea auauna leaga,” ma na faapefea ona tupu aʻe?

² Na taʻua e Iesu le auauna leaga ina ua uma ona ia talanoaina le “auauna faamaoni ma le mafaufau.” Na ia fetalai mai: “Afai e fai ifo lea auauna leaga i lona loto, E faatuai mai loʻu alii; ona fasi ai lea e ia i ona uso a auauna, ua aai foʻi ma inu faatasi ma ē inu ia onā; e sau lava le alii o lea auauna i le aso e lē faatalitali atu ai o ia, o le itu aso foʻi e lē iloa ai e ia, ona matuā faasala lea iā te ia, ma avatu iā te ia lona tofi faatasi ma tagata faafiaamiotonu; e i ai le taufaitagiaue ma le lilivau o nifo.” (Mataio 24:48-51) O le faaupuga o “lea auauna leaga” ua faauaʻi atu ai o tatou manatu i upu muamua a Iesu e faatatau i le auauna faamaoni ma le mafaufau. Ioe, o le “auauna leaga” na avea muamua ma nisi o le auauna faamaoni. * E faapefea?

³ A o lumanaʻi le 1914, na malosi le faamoemoe o le toʻatele o sui o le auauna faamaoni o le a faafeiloaʻia le Faatoʻāfaiavā i le lagi i lenā tausaga, peitaʻi e leʻi taulau o latou faamoemoega. O le iʻuga o lenei mea ma isi taualumaga, e toʻatele na faanoanoa ae o nisi na matuā feita. O nisi na “fasia” i latou na avea muamua ma o latou uso e ala i faaupuga ma auaufaatasi ma ē “onā” o lona uiga o lotu o loo faapea mai o Kerisiano.—Isaia 28:1-3; 32:6.

4. Na faapefea ona feutagaʻi Iesu ma le “auauna leaga” ma i latou uma ua iai le agaga lava lea e tasi?

⁴ O i latou nei na avea muamua ma Kerisiano na iʻu ina faia aʻe ai le “auauna leaga” ma na “matuā faasalaina” i latou e Iesu. E faapefea? Na ia teena i latou ma lē mauaina ai lo latou faamoemoe i le lagi. Peitaʻi, e leʻi faaumatiaina loa i latou i lenā taimi. E muamua ona latou iai i se vaitaimi o le taufaitagiaue ma le lilivau o nifo i le “pōuliuli i fafo” o le faapotopotoga Kerisiano. (Mataio 8:12) Talu mai na aso, na iai ni nai tagata o le ʻaufaauuina na faaalia se agaga leaga faapena, ma ua avea ma nisi o le “auauna leaga.” Na faaaʻoaʻo foʻi i ai nisi o “isi mamoe” i lo latou lē faamaoni. (Ioane 10:16) O na fili uma o Keriso ua i le “pōuliuli” faaleagaga i fafo.

5. Na faapefea ona gaoioi le “auauna faamaoni ma le mafaufau” pe a faatusatusa atu i le “auauna leaga”?

⁵ E tutusa lelei lava tofotofoga na oo i le “auauna faamaoni ma le mafaufau” ma ia na oo i “lea auauna leaga.” Peitaʻi, na i lo le ita, na toe fetuunaʻi e ē faamaoni o latou mafaufauga. (2 Korinito 13:11) Na faamalosia lo latou alofa mo Ieova ma o latou uso. O le iʻuga, na avea i latou ma ‘poutū ma lagolago o le upu moni’ i  nei “aso e gata ai” e faigatā tele.—1 Timoteo 3:15; 2 Timoteo 3:1.

O Taupou Popoto ma Taupou Vālea

6. (a) Na faataʻitaʻia faapefea e Iesu le popoto o lana vasega faamaoni o le auauna? (e) A o lumanaʻi le 1914, o le ā le feʻau na folafola atu e Kerisiano faauuina?

⁶ Ina ua uma ona fetalai Iesu i “lea auauna leaga,” ona ia fetalai atu lea i ni faataoto se lua ina ia faaalia ai le māfuaaga o le a faamaoni ma mafaufau pe popoto ai nisi Kerisiano faauuina a o isi e leʻi faapena. * Ina ia faataʻitaʻia le tulaga popoto, na ia fetalai e faapea: “O ia ona pō e tusa ai le malo o le lagi ma taupou e toʻasefulu, o ē na ave a latou molī, ma latou ō atu e faafetaiaʻi i le faatoʻāfaiavā. Ua popoto le toʻalima o i latou, a e vālea le toʻalima. O ē vālea ua ave a latou molī, a e leʻi avea ma ni suāuu. A o ē popoto ua ave ni suāuu i a latou fagu faatasi ma a latou molī.” (Mataio 25:1-4) O taupou e toʻasefulu ua faamanatu mai ai iā i tatou Kerisiano faauuina a o lumanaʻi le 1914. Na latou iloa mai suʻesuʻega o le Tusi Paia e faapea, ua i faitotoʻa le taunuu mai o le faatoʻāfaiavā, o Iesu Keriso. O lea, na “latou ō atu” ai e faafeiloaʻi iā te ia, i le talaʻia ma le lototele e faapea, e “faaiʻuina taimi o nuu ese” i le 1914.—Luka 21:24, NW.

7. O anafea ma aiseā na foliga mai ai ua “momoe” Kerisiano faauuina?

⁷ Na saʻo i latou auā na faaiʻuina taimi o nuu ese i le 1914, ma na amata ai ona faagaoioia le Malo o le Atua e ala iā Iesu Keriso. Peitaʻi, na tupu lenā mea i le lagi. Ae i le lalolagi, na amata ona puapuagatia tagata i auē e pei ona valoia mai. (Faaaliga 12:10, 12) Na sosoo ma le taimi na tofotofoina ai. Ona o le lē manino lelei o lo latou malamalamaaga i mea, na manatu ai Kerisiano faauuina e faapea, “ua tuai mai le faatoʻāfaiavā.” O lo latou fenuminumiaʻi ma teteega mai le lalolagi, na latou faifailemū ai ma toetoe ai lava a taofia le galuega talaʻi. E pei o taupou i le faataoto, i se tulaga faaleagaga, na “taufaitulemomoe ai lea o i latou uma, ua momoe lava” e pei lava o Kerisiano lē faamaoni ina ua mavae le maliliu o le ʻauaposetolo o Iesu.—Mataio 25:5; Faaaliga 11:7, 8; 12:17.

8. O le ā na māfua ai ona sau le alaga: “Ua sau le faatoʻāfaiavā” ma o le ā e ao ona faia e Kerisiano i lenā taimi?

⁸ I le 1919 na tupu ai se mea e leʻi faatalitalia. Tatou te faitau ai e faapea: “A ua oo i le tulua o pō, ona sau ai lea o le alaga, Faauta, ua sau le faatoʻāfaiavā; inā ō ia outou e faafetaiaʻi iā te ia. Ona tutū ai lea o ia taupou uma lava, ma teuteu a latou molī.” (Mataio 25:6, 7) O le taimi lava na foliga mai ai ua leai se faamoemoe, ae sau loa le valaau ina ia gaoioi! I le 1918, na afio mai ai Iesu o le “Agelu [po o le avefeʻau] o le feagaiga” i le malumalu o Ieova, ina ia asiasia ma faamamā le faapotopotoga a le Atua. (Malaki 3:1) O le taimi lea, sa manaʻomia ai e Kerisiano faauuina ona latou ō atu e faafeiloaʻi o ia i le lotoā faalelalolagi o lenā malumalu. Ua oo i le taimi mo i latou e faasusulu atu ai le “malamalama.”—Isaia 60:1; Filipi 2:14, 15.

9, 10. I le 1919, aiseā na “popoto” ai isi Kerisiano ae “vālea” isi?

⁹ Peitaʻi seʻi faatali! I le faataoto, sa iai se faafitauli i nisi o taupou. Na faaauau ona fetalai Iesu: “Ona fai atu ai lea o ē vālea i ē popoto, Au mai ni a outou suāuu mā matou; auā o le a mamate a matou molī.” (Mataio 25:8) O le a lē susulu atu le malamalama pe a leai se suāuu. Ua faamanatu mai iā i tatou e le suāuu le upu  moni o le Afioga a le Atua ma lona agaga paia, lea e faamalosia ai tagata tapuaʻi e avea ma ē faasusulu atu le malamalama. (Salamo 119:130; Tanielu 5:14) A o lumanaʻi le 1919, sa maelega ai Kerisiano faauuina i le saʻilia o le finagalo o le Atua mo i latou, e ui i lo latou tulaga vaivai faaleagaga. O lea, ina ua sau le valaau e faasusulu atu le malamalama, sa latou nofosauni.—2 Timoteo 4:2; Eperu 10:24, 25.

¹⁰ Peitaʻi, sa iai nisi o le ʻaufaauuina e leʻi mananaʻo e faia ni faataulagaina, pe faia ni taumafaiga e ui sa naunau e fia faatasi atu i le Faatoʻāfaiavā. O lea, ina ua oo i le taimi e matuā gaoioi ai i le talaʻiga o le tala lelei, e leʻi sauni i latou. (Mataio 24:14) Sa latou taumafai foʻi e faagesegese le galuega a a latou uō maelega, e pei lava o loo latou fesili atu mo ni a latou suāuu. I le faataoto a Iesu, na faapefea ona tali atu taupou popoto? Na latou faapea atu: “Neʻi lē lava ia i matou ma outou; a e lelei ona outou ō i ē faatau ma faatau mai ai ni a outou.” (Mataio 25:9) I se tulaga talitutusa, na lē mananaʻo Kerisiano faauuina i le 1919 e faia so o se gaoioiga e faagesegese ai le faasusulu atu o le malamalama. O lea la, na sao i latou ina ua asiasia.

11. O le ā na tupu i taupou vālea?

¹¹ Ua faaiʻu mai fetalaiga a Iesu: “Ua latou [taupou vālea] ō e faatau, ona sau ai lea o le faatoʻāfaiavā; o ē ua saunia foʻi ua latou ulufale atu faatasi ma ia i le tausamaaga, ona pupuni ai lea o le faitotoʻa. E mulimuli ane, ona ō mai ai lea o isi taupou, ua faapea mai, Le alii e, le alii e, ia e tatala atu le puipui mo i matou. A ua tali atu o ia, ua faapea atu, E moni, ou te fai atu iā te outou, ou te lē iloa outou.” (Mataio 25:10-12) Ioe, e leʻi sauni nisi i le taunuu mai o le Faatoʻāfaiavā. O lea, na lē sao ai i latou ina ua asiasia ma lē maua ai le avanoa e auai i le tausamaaga i le lagi. Pagā se leaga!

O le Faataoto i Taleni

12. (a) O le ā na faaaogā e Iesu e faataʻitaʻia ai le faamaoni? (e) O ai le tagata na “alu malaga”?

¹² Ina ua uma ona faataʻitaʻia mai e Iesu le faia o gaoioiga poto, ona ia faataʻitaʻia mai lea o le faamaoni. Na ia fetalai: “E faapei o le tagata foʻi na alu malaga, ua valaau i ana auauna, ona tuuina atu ai lea e ia o ana mea iā te i latou. Ua avatu e ia taleni e lima i le tasi, a e lua a le tasi, a e tasi i le tasi; ua faatatau i le mea ua mafai ai e le tagata; ona alu loa lea o ia i lana malaga.” (Mataio 25:14, 15) I le faataoto, o le tagata na “alu malaga,” o Iesu ina ua afio aʻe i le lagi i le 33 T.A. Peitaʻi a o leʻi afio aʻe o ia, na tuuina atu e Iesu “ana mea” i ona soo faamaoni. E faapefea?

13. Na faapefea ona amata e Iesu se galuega tele ma faatonuina ana “auauna” ina ia faia se galuega o le faatau atu?

¹³ I lana faiva i le lalolagi, na amata ai e Iesu se galuega tele o le talaʻiga lea o le tala lelei o le Malo i laufanua o Isaraelu. (Mataio 9:35-38) A o leʻi “alu malaga” o ia, na ia tuuina atu lenā galuega i ona soo faamaoni, i le faapea atu: “O lenei, ia outou ō atu e fai nuu uma lava ma soo, ma papatiso atu iā te i latou i le suafa o le Tamā, ma le Atalii, ma le Agaga Paia; ia outou aʻoaʻo atu iā te i latou ia tausi i mea uma ua ou fai atu ai iā te outou.” (Mataio 28:18-20) I nei upu, na faatonu ai e Iesu ana “auauna” ina ia  faia se galuega o le faatau atu e ‘faatatau i le mea ua mafai e le tagata’ seʻia toe afio mai o ia.

14. Aiseā e lē faatalitalia ai tagata uma e tutusa mea latou te mafaia i le galuega?

¹⁴ O lenā faaupuga e ‘faatatau i le mea e mafai e le tagata,’ ua faaalia ai e lē o Kerisiano uma i le uluaʻi senituri na tutusa tulaga po o latou avanoa na iai. O nisi sa pei o Paulo ma Timoteo sa mafai ona faia se sao atoatoa i le galuega talaʻi ma le aʻoaʻo atu. O tulaga o isi atonu na matuā tapulaa ai lo latou saʻolotoga e gaoioi ai. O se faaaʻoaʻoga, o nisi Kerisiano na avea ma pologa, o isi e lē malolosi, matutua pe iai ni tiute tauave i le aiga. Manatua, o nisi o faaeaga po o tofiga i le faapotopotoga e leʻi faasafua atu i soo uma. O fafine faauuina ma nisi tane faauuina sa lē aʻoaʻo atu i le faapotopotoga. (1 Korinito 14:34; 1 Timoteo 3:1; Iakopo 3:1) Peitaʻi, po o le ā lava le tulaga o le tagata lava ia, ae o i latou uma lava o soo faauuina o Keriso, o tane ma fafine sa auai i se galuega, sa faaaogā tatau o latou avanoa ma o latou tulaga i le faiva faa-Kerisiano. O loo faapena foʻi ona faia e soo o Keriso i ona pō nei.

Ua Amata Ona Asiasia!

15, 16. (a) O anafea sa faamasino ai mea? (e) O ā nisi avanoa na tuuina atu i le vaega faamaoni e faia ai le galuega?

¹⁵ Ua faaauau le faataoto: “Ua mavae pō [aso] e tele, ona sau ai lea o le alii o ia auauna, ua faamasino i ana mea ua iā te i latou.” (Mataio 25:19) I le 1914, na faatasi mai ai Iesu Keriso o se tupu ma e mautinoa ua mavae aso e tele talu mai le 33 T.A. I le tolu ma le ʻafa tausaga mulimuli ane ai i le 1918, na afio mai ai o ia i le malumalu faaleagaga o le Atua ma faataunuu ai upu a Peteru: “O ona pō nei e amata ai le faamasinoga i le aiga o le Atua.” (1 Peteru 4:17; Malaki 3:1) Ua oo i le taimi e faamasino ai mea.

¹⁶ O le ā na faia e auauna, o uso faauuina o Iesu i “taleni” a le Tupu? Mai i le 33 T.A. agaʻi mai ai, e aofia ai tausaga e oo mai i le 1914, e toʻatele sa galulue mamafa i le galuega a Iesu. (Mataio 25:16) E oo lava i le taua muamua a le  lalolagi, sa latou faaalia se faanaunauga malosi e auauna ai i le Matai. Ua matuā talafeagai ai la ona tuuina atu i nei vaega faauuina nisi avanoa e faia ai le galuega. Ua amata le taimi o le iʻuga o lenei faiga o mea ma e tatau ona talaʻia le tala lelei i le lalolagi aoao. Ua oo i le taimi e tatau ai ona ‘seleseleina le saito o le lalolagi.’ (Faaaliga 14:6, 7, 14-16) E ao ona saʻili sui mulimuli o le vasega ua faaataina e le saito ma aoaoina le “motu o tagata e toʻatele” o isi mamoe. —Faaaliga 7:9; Mataio 13:24-30.

17. Na faapefea i Kerisiano faauuina ona ‘ulufale i le fiafia o lo latou alii’?

¹⁷ O le taimi o le seleselega o se taimi lea e olioli ai. (Salamo 126:6) Ua fetaui lelei la, ina ua tuuina atu e Iesu nisi tiute tauave i ona uso faamaoni faauuina i le 1919, na ia fetalai atu: “Ua e faamaoni i nai mea itiiti, ou te tofia oe e pule i mea e tele; inā ulufale mai ia i le fiafia o lou alii.” (Mataio 25:21, 23) E lē faigofie ona malamalama o tatou mafaufau i le fiafia o le Alii ina ua afio i lona nofoālii o se Tupu fou o le Malo o le Atua. (Salamo 45:1, 2, 6, 7) Ua tofusia faatasi le vasega faamaoni o le auauna i lea fiafiaga, e ala i le fai ma sui o le Tupu ma faateleina ana mea i le lalolagi. (2 Korinito 5:20) Ua vaaia lo latou fiafia i upu faavaloaga a le Isaia 61:10 e faapea: “Ou te matuā fiafia iā Ieova, e olioli loʻu loto i loʻu Atua; auā ua na faaofuina aʻu i ofu o le olataga.”

18. Aiseā na lē sao ai nisi ina ua asiasia, faatasi ai ma ā iʻuga?

¹⁸ E faanoanoa, ona sa lē sao nisi ina ua asiasia. E tatou te faitau ai e faapea: “Ua sau foʻi lē ua i ai le taleni e tasi, ua faapea mai, Le alii e, na ou iloa o oe o le tagata faigatā, ua e selesele i le mea e te leʻi lūlūina ai saito, ua e faapotopoto foʻi i le mea e te leʻi faataapeapeina ai mea; ona ou fefe ai lea, ua ou alu ma ou nā lau taleni i le eleele; faauta, o lau mea lea.” (Mataio 25:24, 25) I se tulaga talitutusa, sa faapena foʻi ona lē auai nisi Kerisiano faauuina i le galuega o le “faatau atu” po o le galuega talaʻi. A o lumanaʻi le 1914 sa lē tinoū i latou e tufa atu lo latou faamoemoe i isi, ma sa mumusu i latou e amata i le 1919. Na faapefea ona tali atu Iesu i lo latou loto maaa? Na ia aveesea o latou faaeaga uma. Na ‘tulia foʻi i latou i le pōuliuli i fafo, e i ai le taufaitagiaue ma le lilivau o nifo.’—Mataio 25:28, 30.

O Loo Faaauau Pea Ona Asiasia

19. I le ā le auala ua faaauau ai ona asiasia, ma o le ā ua maumauaʻi Kerisiano faauuina uma e fai?

¹⁹ O le mea moni, o le toʻatele o i latou sa avea mulimuli ane ma auauna faauuina a Keriso i le taimi o le iʻuga, e leʻi auauna atu iā Ieova ina ua amata ona asiasia e Iesu le vasega o le auauna i le 1918. Po o lona uiga la, o le a lē asiasia i latou? E mautinoa e leai. Ua na o le amataga lenā o le asiasia i le 1918 ma le 1919, ina ua sao le auauna faamaoni ma le mafaufau i le avea o se vasega i le tofotofoga. E faaauau pea ona asiasia Kerisiano faauuina taʻitoʻatasi seʻia oo ina faamaufaailogaina i latou e faavavau. (Faaaliga 7:1-3) I le iloaina o lenei mea, ua maumauaʻi ai uso faauuina o Keriso ina ia faia ma le faamaoni le galuega talaʻi. Ua latou maumauaʻi ina ia popoto, ia lava ma totoe suāuu ina ia faasusulu atu ai le malamalama. Ua latou iloa e faapea, pe a maliu se tasi o faamaoni pea, o le a la faatasi ma Iesu i le afioaga i le lagi.—Mataio 24:13; Ioane 14:2-4; 1 Korinito 15:50, 51.

20. (a) O le ā ua maumauaʻi isi mamoe i aso nei e fai? (e) O le ā ua iloa e Kerisiano faauuina?

 ²⁰ Ua faaaʻoaʻo le motu o tagata e toʻatele o isi mamoe i o latou uso faauuina. Ua latou iloa e faapea, o lo latou poto i fuafuaga a le Atua ua aumaia ai le tele o tiute tauave. (Esekielu 3:17-21) O lea la, o le fesoasoani a le Afioga a Ieova ma le agaga paia, ua lava ma totoe ai a latou suāuu e ala i suʻesuʻega ma sauniga faa-Kerisiano. Ua latou faasusulu atu lo latou malamalama, auai i le galuega talaʻi ma le aʻoaʻo atu ma o lea ua latou faia ai le galuega o le “faatau atu” faatasi ma o latou uso faauuina. Peitaʻi, na iloa e Kerisiano faauuina ua tuuina atu taleni iā i latou. E ao ona latou tali atu e tusa ma le auala o loo latou faatautaia ai mea a le Alii i le lalolagi. E ui lava e toʻaitiiti lo latou faitau aofaʻi, ae e lē mafai ona latou tuua o latou tiute tauave e faia e le motu o tagata e toʻatele. Ona o lenei mea, ua faaauau ai pea e le auauna faamaoni ma le mafaufau ona taulamua i le faia o galuega a le Tupu, ma latou te lotofaafetai i le lagolagosua a le motu o tagata e toʻatele. Ua iloa e le motu o tagata e toʻatele le matafaioi a o latou uso faauuina ma ua latou manatu ai o se faaeaga le galulue i lalo o la latou vaavaaiga.

21. O le ā le fautuaga o loo faatatau i Kerisiano uma a o lumanaʻi le 1919 e oo mai i o tatou aso?

²¹ O lea, e ui lava o nei faataoto e lua ua faamalamalamaina ai mea na tutupu i le vaitaimi o le 1919 po o se taimi e lata ane i ai, ae e faatatauina foʻi ia mataupu silisili i Kerisiano uma i le vaitaimi o aso e gata ai. I lenei auala, o le fautuaga lea na avatu e Iesu i le faaiʻuga o le faataoto i taupou e toʻasefulu, sa faatatau muamua atu lava i Kerisiano faauuina a o lumanaʻi le 1919, ae o loo faatatau atu foʻi i Kerisiano i se tulaga lautele. Seʻi o tatou utagia uma lapataʻiga a Iesu: “O lea, ia outou mataala ai, auā tou te lē iloa le aso po o le itu aso.”—Mataio 25:13.

[Faamatalaga pito i lalo]

Pe Mafai Ona E Faamatala?

• O anafea na asiasia ai e Iesu ona soo, ma o le ā na ia mauaina ai?

• Aiseā na atiina aʻe ai e nisi o Kerisiano faauuina le uiga o le “auauna leaga”?

• E mafai faapefea ona tatou popoto faaleagaga?

• I le faaaʻoaʻo i uso faauuina o Iesu, o le ā le auala tatou te auai ai i le galuega o le “faatau atu” po o le galuega talaʻi?

[Fesili mo le Suʻesuʻega]

[Pusa i le itulau 16]

O AFEA E MALIU MAI AI IESU?

I le Mataio mataupu e 24 ma le 25, ua faamatala mai e uiga iā Iesu e faapea e “maliu mai” i auala eseese. E lē manaʻomia ona suia lona tulaga ina ia “maliu mai” ai. Na i lo lea, o lona “maliu mai,” o lona liuliualo mai lea i le fanau a tagata po o ona soo, ae i nisi taimi e maliu mai, ina ia faamasinoina i latou. O lea, i le 1914 na “maliu mai” ai o se Tupu. (Mataio 16:28; 17:1; Galuega 1:11) I le 1918, na “maliu mai” ai o se avefeʻau o le feagaiga ma amata ona faamasinoina i latou o ē faapea mai o loo auauna iā Ieova. (Malaki 3:1-3; 1 Peteru 4:17) Iā Amaketo, o le a “maliu mai” e aumaia le sala faafaamasinoga i fili o Ieova.—Faaaliga 19:11-16.

O le maliu mai (po o le sau o le Atalii o le tagata) lea o loo taʻua i le Mataio 24:29-44 ma le 25:31-46 o le a taunuu i le taimi o le “puapuaga tele.” (Faaaliga 7:14) Ae i le isi itu, o le sau o le Alii o loo taʻua i le Mataio 24:45 i le 25:30 e fesootaʻi atu i le faamasinoina o ē ua faapea mai o soo talu mai le 1918 ma faasolo mai ai. E lē talafeagai ona faapea atu, pe a “sau” le Atalii o le tagata i le taimi o le puapuaga tele o le a tauia le auauna faamaoni, ma faia le faamasinoga o taupou vālea ma le auauna paiē o lē na natia taleni a le Alii. Pe afai e tupu ia mea i le puapuaga tele, o lona uiga la o le a toʻatele le ʻaufaauuina o le a lē faamaoni i lenā taimi ma e ao ona suitulaga ai nisi. Peitaʻi, ua faaalia i le Faaaliga 7:3 e faapea, e oo atu i lenā taimi ua māeʻa le “faamaufaailogaina” e faavavau o auauna faauuina uma a Keriso.

[Ata i le itulau 14]

E leʻi maua e le “auauna leaga” ni faamanuiaga i le 1919

[Ata i le itulau 15]

Na sauni taupou popoto ina ua sau le faatoʻāfaiavā

[Ata i le itulau 17]

Na auai le auauna faamaoni i le galuega o le “faatau atu” po o le galuega talaʻi

E leʻi auai le auauna paiē

[Ata i le itulau 18]

O loo faaauau pea e le vaega faauuina ma le motu o tagata e toʻatele ona faasusulu atu lo latou malamalama