E Matagofie Foafoaga A Ieova

‘E Silisili Oe i Mauga’

O LE maimoaina o le oso aʻe o le lā i luga o le mauga o Fuji, o se vaaiga e lē mafaagaloina. O le mūmū o le oso aʻe o le lā i tafatafaʻilagi, ua suluia ai aisa papaʻe ma papa lanu ʻefuʻefu. A o amata se aso fou, e ufitia le faitau maila o mea maupuʻepuʻe ma vanu, i le lafoia atu o ata o mauga.

I le pei o le mauga o Fuji—na tusia muamua i ni faailoga o lona uiga “e lē mafaatusalia”—e tumau pea ona tatou maofa i mauga matagofie. O le mea moni, e tatou te matuā faatauvaa lava pe a faatusatusa atu i lo latou tetelē! Ona o le matagofie tele o mauga, e māfua ai ona talitonu le toʻatele o tagata e faapea, o lona tumutumu lea e tele ina ufitia i le sau ma ao, o le nofoaga lea o atua.

Na pau le Atua e viia moni lava ona o tumutumu mauga, o le mataʻisau poto o Lē na Foafoaina Mea, o Ieova. Ua na o ia o “lē na faia mauga.” (Amosa 4:13) E toetoe lava o le tasi vae fā o le lalolagi e ufitia e atumauga, ma ina ua foafoaina e le Atua lo tatou paneta, na ia tuuina i ai malosiaga lea e mafai ona maua mai ai tumutumu mauga mataʻina ma atumauga. (Salamo 95:4) O se faataʻitaʻiga, e talitonuina faapea, o atumauga o Himalaya ma le Andes sa amata mai i se suiga tele faafuaseʻi na tupu i totonu o le eleele faapea ma gaoioiga o le vaega malō o le lalolagi lea e pito i tua.

E tatou te lē malamalama atoatoa pe faapefea ona iai mauga ma māfuaaga na tutupu ai. O le mea moni, e tatou te lē mafai ona taliina fesili na tuuina atu i le tagata amiotonu o Iopu e faapea: “O ifea sa e i ai ina o oʻu [Ieova] faavaeina le lalolagi? . . . Ua tuuina ea ona faavae i luga o le ā?”—Iopu 38:4-6.

Peitaʻi, ua tatou iloa e faalagolago lo tatou soifua i mauga. Ua taʻua mauga o puna o vai, ona o loo fafagaina e mauga vaitafe tetele ma o le ʻafa o tagata i le lalolagi e faalagolago i mauga mo le mauaina o vai. (Salamo 104:13) E tusa ai ma le faamatalaga a le mekasini o le New Scientist, “o le ono o laau autū e 20 ia e maua mai ai meaʻai, na amata ola i mauga.” I tulaga paleni i fesootaʻiga o meaola ma o latou siʻosiʻomaga i le lalolagi fou ua folafolaina mai e le Atua, o le a iai “taumafa o saito i le nuu i tumutumu lava o mauga; e gasē ona fua.”—Salamo 72:16; 2 Peteru 3:13.

O le toʻatele o tagata, pe a taʻua mauga, e latou te manatunatu i atumauga o Alps i Europa. O nei mauga maualuluga, e aofia ai le mauga o Civetta e pei ona faaalia i inei, e aumaia ai faamaoniga matagofie o Lē na Foafoaina nei mauga. (Salamo 98:8) E viia Ieova i nei mauga, o ia o lē na “faatumauina mauga i lona lava malosi.”—Salamo 65:6. *

E mautinoa le matuā maofa i le matagofie o atumauga o le Alps, i ona tumutumu mauga e toʻa ai le aisa ma ona tuasivi, o ona tafā mauga e ufitia e le kiona, o ona vanu ma vaituloto, faapea ma le mutia o loo ola ai. Na faailoa mai e le tupu o Tavita ia Ieova e faapea, o “lē faatupu le mutia i mauga.”—Salamo 147:8.

O atumauga faasolosolo—e pei o mauga nei i Guilin, i Saina—e ono foliga mai e sili atu ai le matagofie o le Alps, ae peitaʻi e matuā tū ese foʻi nei mauga  i lo latou matagofie o loo iai. O le iai o nei atumauga i autafa o le vaitafe o Li, e ʻosoʻoso i luga tumutumu e faia aʻe i papa papaʻe e faasolosolo isi atumauga i tua o isi atumauga, e maofa ai tagata maimoa i lo latou matagofie. O le mātauina o le tatafe ifo o vai manino mai nei atumauga, e toe tomānatu ai i upu a le faisalamo e faapea: “Ua auina atu e ia [Ieova] o vaipuna i vanu, ua tafe ia i va o mauga.”—Salamo 104:10.

E saʻo lo tatou maofa i mauga ona e tatou te iloa o se vaega matagofie o sauniuniga a Lē na Foafoaina Mea mo lo tatou lelei, ma maua ai le fiafia o tagata. E ui lava e matuā matagofie tele nei atumauga, ae e lē mafai ona faatusalia i le mamalu o Ieova. O Ieova e maoaʻe lona “silisili . . . i mauga.”—Salamo 76:4.

[Faamatalaga pito i lalo]

[Pusa/Ata i le itulau 9]

O le sefulu pasene o le faitau aofaʻi o le lalolagi, o loo soifua i vaega maugā o atunuu. Ae e lē faapea ai o se faafitauli tugā lenā iā i latou o loo folafolaina atu le tala lelei o le Malo o le Atua. O loo matuā pisi lava nei faifeʻau Kerisiano i le faia o la latou galuega i le tele o vaipanoa maualuluga. Ma, e “matuā matagofie i luga o mauga o vae o lē ua fai mai le tala lelei, o lē logologo mai le manuia, ua tala mai le tala lelei; ua faailoa mai le olataga”!—Isaia 52:7.

Na pese le faisalamo e faapea: “O mauga maualuluga mo ʻoti o le vao ia.” O ʻoti o le vao, e pei o le Nubian ibex, o nisi na o meaola o loo mau i mauga e matuā mamau lelei le tutū o latou vae. E latou te savavali i luga o papa e matuā lauiti lava lea e foliga mai e lē mafai ona savalia e se meaola. Ua matuā saunia lelei le ibex e ola i nofoaga e lē mafai ona sao i ai isi meaola. O se tasi o māfuaaga ona o le auala na foafoaina ai ona vae. O le maga o vae o ia meaola, e mafai ona fetuunaʻi i lona mamafa, lea e mafai ai ona mau lelei lea meaola pe a tū pe savali foʻi i luga o papa e matuā lauiti lava. O le mea moni, o le ibex o se foafoaga ofoofogia!

[Ata i le itulau 9]

Mauga Fuji, Honshu, i Iapani