“Ia E Matuā Faaiʻuina Lau Faiva”

“Ia fai māeʻaeʻa lau auaunaga.”—2 TIMOTEO 4:5, Byington.

1, 2. E ui lava o Kerisiano uma o ni faievagelia, ae o le ā le manaʻoga faale-Tusi Paia mo toeaina?

PO O oe o sē e faalauiloa le Malo? Afai o lea, e faafetaia Ieova le Atua mo lenei faaeaga matagofie. Po o oe o se toeaina i le faapotopotoga? O se faaeaga faaopoopo lenā mai iā Ieova. Ae e lē tatau ona galo iā i tatou, e lē o le lelei o aʻoaʻoga po o le mau upu e agavaa ai se tasi o i tatou mo le faiva, po o le avea o sē e vaaia le faapotopotoga. O Ieova ua taʻuagavaaina i tatou mo le faiva, ae ona ua ausia e nisi o tane o iā i tatou ni mea e manaʻomia faapitoa faale-Tusi Paia, ua latou maua ai le faaeaga e auauna ai o ni ovasia.—2 Korinito 3:5, 6; 1 Timoteo 3:1-7.

² O Kerisiano tuuina atu uma lava, e latou te faia le galuega o le faievagelia, ae faapitoa lava i ovasia, po o toeaina, le manaʻomia ona faataatia se faaaʻoaʻoga lelei i le faiva. O toeaina o loo “galulue i le upu atoa ma le aʻoaʻo atu” o loo mātauina e le Atua ma Keriso, faapea foʻi ma aumea Molimau a Ieova. (1 Timoteo 5:17; Efeso 5:23; Eperu 6:10-12) I vala uma lava, e tatau i le aʻoaʻo atu a se toeaina ona faaleleia ai le itu faaleagaga o ē o loo faalogologo iā te ia, ona sa taʻu atu e le aposetolo o Paulo i le ovasia o Timoteo e faapea: “Auā e oo i ona pō latou te lē mafafai ai ona talia o le aʻoaʻoga e ola ai, a e tusa ma o latou lava tuʻinanau, latou te faapotopoto ai aʻoaʻo mo i latou, ina ua feū o latou taliga; latou te liliu ese foʻi o latou taliga i le upu moni, a e liliu atu i tala o le vavau. A o oe, ia e faautauta i mea uma lava, ia e onosai i mea e tigā ai, ia e fai le galuega a lē folafola le tala lelei, ia e matuā faaiʻuina lau faiva.”—2 Timoteo 4:3-5.

3. O le ā e manaʻomia ona fai ina ia lē faamataʻuina e aʻoaʻoga sesē le itu faaleagaga o le faapotopotoga?

³ Ina ia mautinoa e lē o faamataʻuina le itu faaleagaga o le faapotopotoga i aʻoaʻoga sesē, e tatau i se ovasia ona faia e tusa o le fautuaga a Paulo e faapea: “Ia e faautauta i mea uma, . . . ia fai māeʻaeʻa lau auaunaga.” (2 Timoteo 4:5, Byington) Ioe, e manaʻomia ona ‘matuā faaiʻuina le faiva’ a se toeaina. E tatau ona faia atoatoa le faiva, i se tulaga māeʻaeʻa. O se toeaina e atoatoa ona fai lana faiva e taulaʻi atu i ona tiute fai uma lava, e leai se tiute na te lafoaʻia pe na ona faia foʻi faaʻafaʻafa. O le ituaiga tane faapena e faamaoni e oo lava i mea iti.—Luka 12:48; 16:10.

4. O le ā e fesoasoani iā i tatou ina ia faaiʻuina atoatoa le faiva?

⁴ O le faaiʻuina atoatoa o la tatou faiva e lē manaʻomia ai i taimi uma ni taimi se tele, ae e manaʻomia ai le faaaogā lelei o le taimi. O le lelei ona faafoe o le faiva e mafai ona fesoasoani i Kerisiano uma e faataunuuina ai mea i le faiva. Ina ia tele atu le taimi e faaalu i le auaunaga i le fanua, e manaʻomia e se toeaina ona iai sana faatulagaga lelei e paleni ma lana faasologa, ma iloa po o ā mea e ao ona faasafua atu e fai e isi, ma le auala e fai ai. (Eperu 13:17) O le tulaga masani lava ia, o se toeaina lelei, e fai lana lava vaega o tiutefai pei o Neemia, o lē sa auai i le toe fausia o pā o Ierusalema. (Neemia 5:16) O auauna uma a Ieova e tatau ona auai e lē aunoa i le galuega talaʻi o le Malo.—1 Korinito 9:16-18.

5. O ā o tatou lagona e tatau ona iai e faatatau i le faiva?

⁵ Maʻeu se tofiga olioli ua tatou maua o le avea ma nisi e folafola le Malo ua faavaeina nei i le lagi! E mautinoa e tatou te faapelepele i lo tatou faaeaga o le auai i le talaʻia o le tala lelei i le lalolagi uma a o leʻi oo mai le iʻuga. (Mataio 24:14) E ui lava e tatou te lē lelei atoatoa, ae e  mafai ona faalaeiauina i tatou i upu a Paulo e faapea: “Ua iā te i matou lenei ʻoa [le faiva] i ipu omea, ina ia i le Atua le matuā tele o le mana, a e lē mai iā te i matou.” (2 Korinito 4:7) Ioe, e mafai ona tatou tuuina atu se auaunaga e taliaina—ae e na o le malosi ma le atamai mai le Atua e mafai ai.—1 Korinito 1:26-31.

Ia Faasusulu Atu le Mamalu o le Atua

6. O le ā le faaeseesega ua iai i le Isaraelu faaletino ma le Isaraelu faaleagaga?

⁶ I le faasino atu i Kerisiano faauuina, ua faapea le faamatalaga a Paulo, o le Atua ua ia “sauni i matou ia tatau ona fai ma auauna o le feagaiga fou.” Ua faaeseese e le aposetolo le feagaiga fou ua faia ma le Isaraelu faaleagaga e ala iā Iesu Keriso, ma le feagaiga tuai o le Tulafono na faia ma Isaraelu faaletino e ala iā Mose. Na faaopoopo atili mai Paulo e faapea, ina ua alu ifo Mose mai le mauga o Sinai ma papa o loo iai Tulafono e Sefulu, sa matuā pupula ona fofoga lea sa lē mafai ai e tagata Isaraelu ona tepa taulaʻi atu iā te ia. A o faagasolo taimi, na oo ina tupu se mea e sili atu ona matuiā ona “sa faatauasoina o latou manatu” lea na ufitia ai o latou loto. Peitaʻi, pe a liliu ma tuutoina atu ma le loto atoa iā Ieova, ona aveesea lea o le ufiufi i o latou loto. Na sosoo ai ma le faasino atu i le faiva lea ua tuuina atu iā i latou o loo i le feagaiga fou, na faapea atu Paulo: “A o i tatou uma, . . . ma o tatou mata e lē ufitia ua tatou faasusulu atu e pei o faata le mamalu o Ieova.” (NW) (2 Korinito 3:6-8, 14-18; Esoto 34:29-35) Ua faaeaina foʻi “isi mamoe” a Iesu i aso nei e faasusulu atu le mamalu o Ieova.—Ioane 10:16.

7. E faapefea e tagata ona faasusulu atu le mamalu o le Atua?

⁷ E faapefea i tagata agasala ona faasusulu atu le mamalu o le Atua, ae e leai se tagata e vaai i fofoga o le Atua ma ola pea? (Esoto 33:20) E tatau ona tatou iloa e faapea, e ese mai i le mea moni o Ieova lava ia e mamalu, o loo iai foʻi lana fuafuaga mamalu o le faamaonia lea o le tonu o lana pule silisili ese e ala i lona Malo. O upu moni e fesootaʻi atu i le Malo, e aofia ai se vaega o ‘vavega a le Atua’ po o mea matagofie lea na amata ona folafola atu e i latou na liligiina ifo i ai le agaga paia i le Penetekoso o le 33 T.A. (Galuega 2:11) O le taʻitaʻiga a le agaga, na mafai ai ona faataunuuina le faiva ua tuuina atu iā i latou.—Galuega 1:8.

8. E tusa ai ma le faiva, o le ā na maumauaʻi Paulo e fai?

⁸ Sa maumauaʻi Paulo ia aua nei iai se mea e taofia ai o ia mai le faataunuuina atoatoa o lana faiva. Na ia tusi e faapea: “O le mea lea matou te lē faavaivai ai, o i matou ua i ai lenei faiva, ina ua alofaina i matou; a ua matou lafoaʻi mea lilo e māsiasi ai, e lē o savavali ma le amio pepelo, e lē o faafilogia e i matou le afioga a le Atua; a ua faailoa matou e i matou i le loto fuatia ifo o tagata uma i luma o le Atua i lo matou faaali atu le upu moni.” (2 Korinito 4:1, 2) O “lenei faiva,” e pei ona taʻua e Paulo ua faaalia ai le upu moni ma faasalalau atu ai le malamalama faaleagaga i nuu mamao.

9, 10. E mafai faapefea ona faasusulu atu le mamalu o Ieova?

⁹ E faatatau atu i le Puna o le malamalama faaletino ma le faaleagaga, na tusi Paulo e faapea: “Auā o le Atua o lē na fai atu ‘ia pupula mai le malamalama mai le pōuliuli,’ ua faapupula mai  e ia i o matou loto, ina ia malamalama e iloa ai le mamalu o le Atua i fofoga o Iesu Keriso.” (2 Korinito 4:6; Kenese 1:2-5) Talu ai ua tatou maua le faaeaga mamalu o le avea ma faifeʻau a le Atua, ia tatou tausia i tatou ia mamā ina ia pei i tatou o ni faata e mafai ona faasusulu atu le mamalu o Ieova.

¹⁰ O tagata o loo i le pōuliuli faaleagaga e lē mafai ona vaai i le mamalu o Ieova po o le auala o loo faaata mai ai e Iesu Keriso, le Mose Sili. Ae i le avea o ni auauna a Ieova, e tatou te maua le malamalama faamamaluina mai le Tusi Paia ma faasusulu atu i isi. Ina ia mafai ona sosola ese i latou o loo iai i le pogisa faaleagaga i le faaumatiaga, e latou te manaʻomia le malamalama mai le Atua. O le mea lea, i le iai o le olioli ma le maelega, e tatou te usitaia ai le faatonuga tauatua ia faasusulu atu le malamalama i le pōuliuli i le mamalu o Ieova.

Faasusulu Atu lo Outou Malamalama i Suʻesuʻega Faale-Tusi Paia

11. O le ā na fetalai i ai Iesu e faatatau i le faasusulu atu o lo tatou malamalama, ma o le ā se tasi o auala e faia ai lenei mea i la tatou faiva?

¹¹ Sa taʻu atu e Iesu i ona soo e faapea: “O outou, o le malamalama o le lalolagi outou. E lē mafai ona lilo le aai ua tū i luga o le mauga. Latou te lē tutuina foʻi le molī i le tuu ai i lalo o le mea e fua aʻi saito, a e tuu i luga lava o le tuugāmolī ia pupula atu ai i ē o i le fale uma. Ia faapea ona pupula atu lo outou malamalama i luma o tagata, ina ia latou iloa la outou amio lelei, latou te vivii atu ai i lo outou Tamā o i le lagi.” (Mataio 5:14-16) O la tatou amio lelei e māfua ai ona vivii atu isi i le Atua. (1 Peteru 2:12) Tatou te maua avanoa e tele e faasusulu atu ai lo tatou malamalama, i vala eseese o la tatou galuega faaevagelia. O se tasi o o tatou sini autū, o le faasusulu atu lea o le malamalama faaleagaga mai le Afioga a le Atua, e ala i le faia o suʻesuʻega uigā faale-Tusi Paia i aiga. O se auala aupito tāua lea e faataunuuina atoatoa ai la tatou faiva. O ā fautuaga e ono fesoasoani iā i tatou i le faia o suʻesuʻega faale-Tusi Paia e pāʻia ai loto o ē saʻili i le upu moni?

12. O le ā le sootaga a le tatalo i le faia o suʻesuʻega faale-Tusi Paia?

¹² O le tatalo iā Ieova mo le faia o suʻesuʻega faale-Tusi Paia e faaalia ai lo tatou faanaunauga ia faia ni suʻesuʻega faale-Tusi Paia. Ua faaalia ai foʻi, e tatou te iloa le tāua o le fesoasoani atu i isi, ina ia maua le poto e faatatau i le Atua. (Esekielu 33:7-9) E mautinoa le tali mai o Ieova iā tatou tatalo ma faamanuia i a tatou taumafaiga māeʻaeʻa i le faiva. (1 Ioane 5:14, 15) Ae peitaʻi e lē na o le mauaina o se tasi e fai se suʻesuʻega faale-Tusi Paia tatou te tatalo ai. A uma loa ona tatou faavaeina se suʻesuʻega, o le tatalo ma le manatunatu loloto i manaʻoga patino o le tagata aʻoga o le Tusi Paia, o le a fesoasoani iā i tatou ina ia uigā i taimi uma e fai ai le suʻesuʻega faale-Tusi Paia.—Roma 12:12.

13. O le ā e fesoasoani iā i tatou i le faia o suʻesuʻega uigā faale-Tusi Paia?

¹³ Ina ia faia suʻesuʻega uigā faale-Tusi Paia i aiga, e tatau ona tatou sauniuni lelei mo suʻesuʻega taʻitasi. Afai e tatou te lagona lo tatou lē agavaa, e lelei pe a mātauina le auala e taulimaina ai e le ovasia o Suʻesuʻega Tautusi a le Faapotopotoga ia mataupu o suʻesuʻega i vaiaso taʻitasi. I nisi taimi, e mafai ona tatou ō faatasi ma tagata talaʻi o le Malo o ē ua maua ni iʻuga lelei i le auala e faia ai a latou suʻesuʻega faale-Tusi Paia i aiga. O le mea moni, e manaʻomia faapitoa lava ona tatou manatunatu i uiga o Iesu Keriso ma le auala na ia aʻoaʻo atu ai.

14. E mafai faapefea ona tatou pāʻia le loto o se tagata aʻoga o le Tusi Paia?

¹⁴ Sa fiafia Iesu i le faia o le finagalo o lona Tamā i le lagi ma le talanoa atu i isi e faatatau i le Atua. (Salamo 40:8) Sa agamalu o ia ma taulau manuia i le pāʻia o loto o i latou na faalogologo iā te ia. (Mataio 11:28-30) O lea la, ia tatou taumafai e pāʻia loto o ā tatou tagata aʻoga o le Tusi Paia. Ina ia faia faapea, e tatau ona tatou sauniuni mo suʻesuʻega taʻitasi ma ia tatou mafaufau i tulaga o le tagata aʻoga. O se faataʻitaʻiga, afai o lenei tagata e leai sona iloa e faatatau i le Tusi Paia, e ao ona tatou faatalitonu o ia i le moni o le Tusi Paia. I lenā la tulaga, e tatou te faitauina ai le tele o ni mau ma faamalamalama.

 Fesoasoani i Tagata Aʻoga ia Malamalama i Talafaatusa

15, 16. (a) E faapefea ona tatou fesoasoani i se tagata aʻoga e lē malamalama i se talafaatusa o loo faaaogā i le Tusi Paia? (e) O le ā e mafai ona tatou fai pe a faaaogā i se tasi o ā tatou lomiga se talafaatusa e faigatā ona malamalama i ai se tagata aʻoga o le Tusi Paia?

¹⁵ Atonu e lē malamalama se tagata aʻoga o le Tusi Paia i se talafaatusa o loo faaaogāina i le Tusi Paia. O se faaaʻoaʻoga, atonu e lē malamalama i le uiga o le fetalaiga a Iesu i le tuu o le molī i luga o le tuugāmolī. (Mareko 4:21, 22) Sa faasino atu Iesu i se molī suāuu anamua e iai se vavae o loo mumū. O lenā molī sa tuu i luga o se tuugāmolī faapitoa ma faapea ona faamalamalamaina ai se vaega o se fale. Atonu e manaʻomia ona faia ni saʻiliʻiliga loloto i le mataupu “Lamp” (Molī) ma le “Lampstand” (Tuugāmolī) i lomiga e pei o le Insight on the Scriptures ina ia malamalama ai i le talafaatusa a Iesu. * Ae maʻeu le faamalieina i le alu i le suʻesuʻega faale-Tusi Paia ma se faamalamalamaga e malamalama lelei ma fiafia i ai le tagata aʻoga!

¹⁶ Atonu e faaaogā i se lomiga faale-Tusi Paia se talafaatusa e faigatā ona malamalama i ai se tagata aʻoga. Ia faaalu se taimi e faamatala ai, po o le faaaogā o se isi talafaatusa e faatatau atu i le manatu lava lea e tasi. Atonu o loo faamamafa i se lomiga faapea, o se paaga lelei ma ni taumafaiga e fai faatasi, e tāua tele i se faaipoipoga. Ina ia faataʻitaʻia lenei mea, atonu e faasino atu i se tamāloa o loo tāupe pe o loo suigi mai i se tāupega, ma faamamulu ona lima ae faalagolago atu i le isi tagata tāupe e puʻea o ia. Afai e fai se isi faataʻitaʻiga o le manaʻomia o se paaga lelei ma taumafaiga e fai faatasi, e mafai ona faataʻitaʻi i le auala e galulue faatasi ai tagata i le aveesea mai o ni pusa mai le uta a se vaa.

17. O le ā e mafai ona tatou aʻoaʻoina mai iā Iesu e tusa ai o talafaatusa?

¹⁷ O le faaaogāina o se isi talafaatusa e ono manaʻomia ai le muaʻi sauniuni. Ae peitaʻi, o le auala lenā e faaalia ai lo tatou naunau totino i se tagata aʻoga o le Tusi Paia. Sa faaaogā e Iesu talafaatusa faigofie e faamalamalama ai mataupu faigatā. O lana Lauga i luga o le Mauga e maua ai faaaʻoaʻoga faapena ma ua faaalia i le Tusi Paia e faapea, na iai ni āuga lelei o lana aʻoaʻo atu i lana ʻaufaalogologo. (Mataio 5:1–7:29) Sa faamatalaina ma le onosai e Iesu mea, ona o lona naunau tele i isi.—Mataio 16:5-12.

18. O le ā o loo fautuaina e tusa ai ma mau faasino o loo i a tatou lomiga?

¹⁸ O lo tatou naunau i isi, o le a uunaʻia ai i tatou e ‘felafolafoaʻi ma i latou i Tusi.’ (Galuega 17:2, 3) E manaʻomia i lenei mea le suʻesuʻe ma tatalo ma le faaaogāina lelei o lomiga o loo maua mai i “le auauna e pule.” (Luka 12:42-44) O se faataʻitaʻiga, o le tusi o Le Poto e Taʻitaʻia ai i le Ola e Faavavau o loo siiina mai ai le tele o mau. * Ona o le lē lava o le avanoa i le tusi, o nisi o mau ua na ona faasino mai lava. A o faia le suʻesuʻega faale-Tusi Paia, e tāua tele le faitau ma faamalamalama nisi o nei mau faasino. Ia aua neʻi galo, o la tatou aʻoaʻo atu e faavae i le Afioga a le Atua, ma e telē sona taaʻiga i tagata. (Eperu 4:12) Ia faasino atu i le Tusi Paia a o faagasolo suʻesuʻega taʻitasi, ma faaaogā i taimi uma mau o loo maua i palakalafa. Ia fesoasoani atu i le tagata aʻoga ia iloa mea o loo fai mai ai le Tusi Paia e faatatau i se mataupu patino, po o se gaoioiga.  Ia taumafai e faailoa i ai le auala o le a aogā ai iā te ia le usiusitai i le Atua.—Isaia 48:17, 18.

Fai ni Fesili Faatupu Manatu

19, 20. (a) Aiseā e faaaogā ai fesili e faaali mai ai manatu, a o faia se suʻesuʻega faale-Tusi Paia i le aiga? (e) O le ā e mafai ona fai pe a manaʻomia se iloiloga atili o se mataupu patino?

¹⁹ O le faaaogāina ma le tomai e Iesu o fesili, na fesoasoani ai i tagata e manatunatu. (Mataio 17:24-27) Pe a tatou faia ni fesili e faaali mai ai manatu ma e lē faamāina ai le tagata aʻoga o le Tusi Paia, e ono faaalia mai i ana tali le mea o loo ia manatu i ai e faatatau i se mataupu. E tatou te mātauina o loo iai pea iā te ia manatu e lē faale-Tusi Paia. O se faataʻitaʻiga, atonu o loo talitonu pea i le Tolutasi. I le mataupu e 3 o le tusi o Le Poto o loo faasino mai ai faapea o le upu “Tolutasi” e lē o iai i le Tusi Paia. O loo iai mau sii ma mau faasino e faaalia ai faapea, e ese Ieova mai iā Iesu ma o le agaga paia o le mana galue o le Atua ae lē o se peresona. O le faitau ma le talanoaina o nei mau o le Tusi Paia, atonu ua lava lenā e faamaonia ai le manatu. Ae faapefea pe a manaʻomia atili se faamalamalamaga? Atonu i le isi suʻesuʻega, e ono faaalu se taimi e faia ai se talanoaga lelei i lenei mataupu, lea o loo talanoaina i se isi lomiga a Molimau a Ieova, e pei o le polosiua Pe Ao ona E Talitonu i le Tolutasi? A uma lenā, ona toe faia lea o le suʻesuʻega i le faaaogāina o le tusi o Le Poto.

²⁰ Seʻi faapea o le tali a se tagata aʻoga i se fesili e faaali mai ai se manatu e faateʻia ai, po o le lē fiafia ai foʻi. Afai o loo aofia ai se mataupu e pei o le ulaula po o nisi mataupu maʻaleʻale, atonu e fautuaina le faaauau o le suʻesuʻega ae talanoaina le mataupu i se taimi mulimuli ane ai. O le iloa faapea o loo ulaula pea le tagata aʻoga, o le a tatou suʻeina ai ni faamatalaga ua lomia atonu e fesoasoani iā te ia, e faia ai se agaʻigaʻi i luma faaleagaga. A o tatou taumafai e pāʻia le loto o le tagata aʻoga, ia tatou tatalo iā Ieova e fesoasoani iā te ia ia tupu aʻe faaleagaga.

21. O le ā e ono tupu pe a fetuunaʻi le auala e tatou te aʻoaʻo ai ina ia fetaui ma manaʻoga o le tagata aʻoga o le Tusi Paia?

²¹ O le sauniuni lelei faatasi ai ma le fesoasoani a Ieova, e lē taumatea o le a mafai ai ona tatou fetuutuunaʻia a tatou auala e aʻoaʻo atu ai, ina ia fetaui ma manaʻoga patino o le tagata aʻoga o le Tusi Paia. A o faagasolo taimi, e mafai ona tatou fesoasoani iā te ia e ati aʻe le alofa loloto mo le Atua. E mafai foʻi ona tatou taulau i le atiina aʻe o lona faaaloalo ma le lotofaafetai mo le faalapotopotoga a Ieova. Ma e maʻeu le faafiafiaina ai pe a taʻutino mai e tagata aʻoga o le Tusi Paia e faapea o loo ‘iā te i tatou le Atua’! (1 Korinito 14:24, 25) O lea la, seʻi o tatou faia nei loa ni suʻesuʻega faale-Tusi Paia uigā, ma faia mea uma tatou te mafai e fesoasoani ai i isi e avea ma soo o Iesu.

Se ʻOa Tāua e Ao Ona Faapelepele i Ai

22, 23. O le ā e manaʻomia ina ia faataunuuina atoatoa ai la tatou faiva?

²² Ina ia faataunuuina atoatoa la tatou faiva, e tatau ona tatou faalagolago i le malosi mai le Atua. I le faasino atu i le faiva, na tusi Paulo i uso Kerisiano faauuina e faapea: “Ua iā te i matou lenei ʻoa i ipu omea, ina ia i le Atua le matuā tele o le mana, a e lē mai iā te i matou.”—2 Korinito 4:7.

²³ Pe faauuina po o “isi mamoe,” ua pei i tatou o ni ipu omea e vaivai. (Ioane 10:16) Peitaʻi, e aumai e Ieova iā i tatou le malosi e manaʻomia e faataunuuina ai lo tatou tofiga, po o ā lava omiga o loo aumai iā i tatou. (Ioane 16:13; Filipi 4:13) O lea la seʻi o tatou faalagolago atoatoa iā Ieova, ia faapelepele i la tatou ʻoa o le auaunaga, ma ia faataunuuina atoatoa la tatou faiva.

[Faamatalaga pito i lalo]

E Faapefea Ona E Tali?

• O le ā e mafai ona faia e toeaina ina ia faataunuuina atoatoa ai la latou faiva?

• E faapefea ona faaleleia le uigā o a tatou suʻesuʻega faale-Tusi Paia i aiga?

• O le ā e te faia pe a lē malamalama se tagata aʻoga o le Tusi Paia i se talafaatusa po o le manaʻomia atili foʻi o ni faamatalaga e faatatau i se mataupu patino?

[Fesili mo le Suʻesuʻega]

[Ata i le itulau 16]

E aʻoaʻo atu toeaina Kerisiano i totonu o faapotopotoga ma fesoasoani e toleni aumea talitonu i le faiva

[Ata i le itulau 18]

O le faia o suʻesuʻega uigā faale-Tusi Paia i aiga, o se tasi lea o auala e faasusulu atu ai lo tatou malamalama