Liberia—Faatelega o le Malo e ui i Taua

NA MATUĀ aasa le taua i Liberia i le sili atu i le faitau sefulu o tausaga. E oo ane i le ogatotonu o le 2003, ua oo le ʻaufouvale i le aai laumua o Monrovia. I nisi taimi, e toʻatele Molimau a Ieova na faamalosia e tuua o latou aiga. Na gaoia a latou meafaitino mai i lea taimi i lea taimi.

E faanoanoa lava, ona e faitau afe tagata na fano o latou soifua a o faia fevesiaʻiga i le laumua. Sa aofia ai ni Molimau se toʻalua, o se uso ma se tuafafine iā i latou na maliliu. Na faapefea ona fesagaʻia e isi uso le tulaga faigatā, ma o le a sa faia e fesoasoani ai iā i latou?

Fesoasoani mo i Latou o Iai le Manaʻoga

A o faagasolo tulaga faigatā, na faatulaga ai e le ofisa o le lālā o Molimau a Ieova i Liberia ni fesoasoani mo i latou o loo manaʻomia. Na saunia taumafa, mea e aogā i le aiga ma vailaau faafomaʻi. I le taimi na pulea ai e le ʻaufouvale le uafu na utiuti le tulaga o mea taumafa. Na muaʻi silafia e le lālā lenei tulaga ma faamautinoa ai loa ua lava fesoasoani e faaleoleo auā Molimau e luaafe o ē na sosola atu i Maota o le Malo i le aai atoa. Na faasoasoa lelei e uso ia mea taumafa ina ia lava ma totoe seʻia oo i le taimi e toe tatala ai le uafu. Na auina atu e lālā i Peleseuma ma Sierra Leone i vaalele ia vailaau faafomaʻi, ae o lālā i Peretania ma Falani na auina atu lavalava i vaa.

E ui lava i le tulaga lē mautonu, ae sa toʻa pea le tai i o tatou uso ma sa fiafia. O se tasi na sola ese ma lona aiga, na ia faia se faamatalaga e masani foʻi ona faia e le toʻatele sa sosola ese. Na ia faapea mai: “Ua tatou ola nei i aso e gata ai, ma o tulaga nei o mea o loo tatou talaʻia.”

Tali Atu i le Tala Lelei

E ui lava i fevesiaʻiga i le atunuu atoa, ae sa faaauau pea ona maua e Molimau iʻuga lelei i le fanua. Sa iai se tumutumuga e leʻi iai muamua e 3,879 le ʻautalaʻi o le Malo iā Ianuari 2003, ma iā Fepuari na latou faia ai suʻesuʻega faale-Tusi Paia i aiga e 15,227.

Na vave ona tali atu tagata i le tala lelei. O se faaaʻoaʻoga o lenei mea, na maua mai i se nuu i le vaega o saute i sasaʻe o le atunuu. Sa fuafua se faapotopotoga e faamanatuina le Faamanatuga o le maliu o Keriso i le nuu tele o Bewahn, e tusa ma le lima itula e savavali ai mai le mea lea sa masani ona fai ai a latou sauniga. A o leʻi ō atu uso i le nuu e valaaulia tagata i le Faamanatuga, sa avatu muamua se tusi valaaulia i le pulenuu o Bewahn. Ina ua ia maua le tusi valaaulia, na ia alu atu i tagata o le nuu ma lana Tusi Paia, ma faitau atu i ai le mau o loo i le tusi valaaulia ma faalaeiauina i latou e auai i le Faamanatuga. Ina ua ō atu le ʻautalaʻi, na latou iloa ai ua māeʻa ona faia e se tasi la latou galuega! Na ō mai le pulenuu ma ona alo e toʻalua ma fafine e toʻalua i le Faamanatuga. E 27 le aofia na auai. Talu mai lenā taimi, na faamavae ai le pulenuu mai le Lotu Metotisi ae amata ona suʻesuʻe ma Molimau  ma na ia ofoina atu se fanua e fausia ai le Maota o le Malo.

Ua Suia Uiga

O amio a o tatou uso sa iai sona aafiaga i le suia o le vaaiga i le upu moni a nisi sa tetee. Seʻi o tatou iloiloina se faaaʻoaʻoga i se tamāloa e suafa iā Opoku. Na feiloaʻi atu i ai se paeonia i le galuega talaʻi ma ofo atu iā te ia se mekasini o le Olomatamata. Na fiafia Opoku i se mataupu i le mekasini ae leai sana tupe. Na faamatala i ai e lē faatauina, o lea na tuu ai e le paeonia le mekasini ma faatulaga se aso e toe foʻi ane ai. Ina ua toe foʻi ane, na fesili Opoku i le paeonia: “Pe e te iloa aʻu? O le toʻatele o outou tagata i le taulaga o Harper latou te iloa aʻu. E masani ona ou tuliesea a outou tamaiti mai le aʻoga!” Ona ia faamatala lea e faapea, o ia sa avea ma pule aʻoga i se aʻoga maualuga i le taulaga ma sa ia sauāina tamaiti Molimau a Ieova ona o le lē faalo i le fuʻa.

Ae peitaʻi, e tolu ni faaaʻoaʻoga o le alofa faa-Kerisiano na faaalia e Molimau a Ieova na māfua ai ona uunaʻia Opoku e toe iloilo ona uiga. Muamua, na ia iloaina ni Molimau o tausia se uso faaleagaga o lē na matuā maʻi lava. Na latou faia foʻi fuafuaga ina ia maua togafitiga mo ia i le nuu tuaoi. Na manatu Opoku o le uso maʻi lea ai o se tagata “taualoa” i Molimau peitaʻi, na ia iloa o ia o se tasi e pei o isi foʻi Molimau. Lona lua, e tusa o le 1990-1999, sa avea ai Opoku ma se tagata sulufaʻi i Côte d’Ivoire. Ina ua ia fia inu i se tasi o aso, na ia alu atu ai e faatau mai se vai mai i se tama talavou. Sa na o se tupe telē a Opoku sa iai ma e leai se sui a le tama talavou, o lea na ia ave fua ai loa le vai iā Opoku. Ina ua ia tuuina atu iā Opoku le vai, na fesili atu le tama talavou: “Pe e te manatu o le a iai se taimi o le a avatu ai e se tasi ni mea i le isi e pei o oe ma aʻu e aunoa ma le fesili atu mo se tupe?” Na taumasalosalo Opoku o ia o se Molimau a Ieova, ma na toe faamautinoa atu e le tama talavou e faapea o ia o se molimau. O le lotoalofa ma le agalelei o lenei uso na faagaeetia ai o Opoku. O le mea mulimuli, ona na lotomalie le paeonia faapito e tuu iā te ia le mekasini e aunoa ma se totogi, na faatalitonuina ai Opoku e faapea e sesē lana vaaiga i Molimau ma e manaʻomia ai ona suia ona uiga. Na ia faia se agaʻigaʻi i luma faaleagaga ma ua avea nei o ia o se tagata talaʻi e leʻi papatisoina.

E ui o loo faaauau pea ona fesagaʻi uso i Liberia ma tulaga matuā sili ona faigatā, ae o loo latou faatuatua pea i le Atua ma faalauiloa ma le faamaoni le tala lelei e uiga i tulaga lelei i lalo o le pulega amiotonu o le Malo o le Atua. E lē faagaloina e Ieova la latou galuega ma le alofa ua latou faaalia i lona suafa.—Eperu 6:10.

[Faafanua i le itulau 30]

(Tagaʻi i le lomiga mo le ata atoa)

MONROVIA

[Ata i le itulau 31]

Ua saunia e tagata o Ieova fesoasoani faaleagaga ma le faaletino mo i latou o manaʻomia i taimi o mala