Pe e Ao Ona Tatou Tatalo Atu i Agelu mo se Fesoasoani?

PE TALAFEAGAI ona tatalo atu i agelu i taimi o mafatiaga? E toʻatele tagata e manatu faapena. Ua faapea mai le New Catholic Encyclopedia: “O le tatalo atu o se tasi . . . i agelu . . . e uiga atu i le na o le fai ma o tatou sui i le Atua.” Pe e ao ona tatou tatalo i agelu e fai ma o tatou sui?

E na o le toʻalua lava agelu mai agelu faamaoni a le Atua o loo taʻua o la suafa i le Tusi Paia, o Mekaeli ma Kaperielu. (Tanielu 8:16; 12:1; Luka 1:26; Iuta 9) Talu ai o loo taʻua nei suafa i le Tusi Paia, ua tatou iloa ai o agelu taʻitoʻatasi o ni peresona agaga e tofu ma le suafa, ae lē na o se malosi po o se mana. E iai foʻi isi agelu na mumusu e faailoa mai o latou suafa. O se faaaʻoaʻoga, ina ua fesili atu Iakopo i le agelu sa asiasi atu iā te ia e faailoa mai lona suafa, na musu le agelu e faia faapea. (Kenese 32:29; Faamasino 13:17, 18) E lē o taʻua i le Tusi Paia se lisi o suafa o agelu, o le faia faapea ua taofia ai tagata mai le soona uaʻi atu iā i latou.

E aofia ai i tiute o agelu le faaooina atu o feʻau mai le Atua i tagata. O le mea moni, o le uluaʻi upu Eperu ma le Eleni na faaliliuina i le “agelu” o lona uiga moni o le “avefeʻau.” Ae ui i lea, e lē auauna agelu o ni fautua e faaooina atu tatalo a tagata i le nofoālii o Lē Silisili Ese. O le finagalo lava ia o le Atua, ia taulaʻi atu tatalo iā te ia e ala atu i le suafa o lona Alo, o Iesu Keriso, o lē na fetalai: E “foaʻiina atu iā te outou e le Tamā mea uma lava tou te ole atu ai iā te ia i loʻu igoa.”—Ioane 15:16; 1 Timoteo 2:5.

E nofo sauni Ieova le Atua i taimi uma e faafofoga mai iā i tatou pe afai tatou te faalatalata atu iā te ia i le auala saʻo. Ua taʻua i le Tusi Paia lenei faamautinoaga e faapea: “E latalata mai Ieova iā i latou uma o ē valaau iā te ia, o i latou uma o ē valaau iā te ia ma le faamaoni.”—Salamo 145:18.